***للحــــــــــب عنـــــــــــــــــوان***

[عويد الموز]

السلام عليكم

....

وااااااااااااااااااااايد حلوه القصه تسلمين فديت خشمج

[عشق الليل]

اااااااااااااااااااااااااف يا ربي متى يعدي اسبوع

ترا مليت ابي اكملها

بس بغيت اسالج انت الكاتبه ؟؟؟؟؟؟؟؟؟؟؟؟؟؟؟؟

[بنت البلاد]

بنت المزروعي.. هلا والللللللللللللللله.. فرحتيني بوجودج في هالقصه بعد..

اقول .. يوم تتخاشمين وياي دخيلج شلي البرقع لأنه لعوزني.. خخخخخ

عشق الليل اخوي.. اخبرك الصبر حلو.. ولا تضغطون علي.. تدرون وراي دراسه وغير جيه نحن في رمضان يعني وقت الفراغ قليل.. يادوب كل يوم اكتب صفحه.. واذا كان الجزء قصير لا تلوموني.. بس هذا الي مقدوري عليه..

واما بالنسبه للقصه.. هي نعم الغالي انا الي كاتبتها.. ولي كتابات سابقه هم.. حكم الأيام اول قصه لي .. وآه من الزمن.. ثاني قصه.. وهاي الثالثه من رصيد قصصي.. وكلهم موجودين في هالمنتدى..

واسمحوا لي طولت عليكم.. يوم الخميس بإذن الله الجزء عندكم

[فتى الأحزان]

انتظرج

يا حبيبتي

تري ما احب الصبر

تسلمين بنت البلاد على هالاجزاء الحلوه

يعطيج العااااافيه أأأأأأختي وما شاااء الله عليج ممبدعه في القصص

[بنت البلاد]

ياكم الفرج يا جماعه.. وهذا الجزء الثالث وصل.. ان شاء الله يعيبكم.. وترضون عليه.. حتى لو قصير.. اعذروني تدرون رمضان وضغط.. بس المهم اني كنت عند وعدي وكتبت الجزء

الجزء الثالث..

للحب عنوان

ملخص الجزء السابق..: (( تدبر سلطان وابوه موضوع هادف الي في المركز.. واعتراف وداد بسبب رفضها لسلطان.. وقرار عادل بأنه يسأل عن حصه))

في مركز الشرطه.. راح بوسلطان يقابل هادف ويكلمه..

بو سلطان: مسود الويه.. هاي اخرة سواياك يا هادف يا ولد اخووووي؟؟ .. يا فشيله ابوك فيك..

هادف: لا حول ولا قوة إلا بالله.. عمي.. اسمعني انا هالرمسه موووول ما تعيبني.. وبعدين انا ما سويت شي.. ييت ادافع عن نفسي.. وليش هو يغلط علي.. يستاهل الي اييه..

بوسلطان: تف عليك من ريال.. هاي مريلتك .. السلام يا ولد خليفه.. وهاي الطريقه المثلى في الدفاع عن النفس يا فهيم زمانك..

هادف: لو سمحت عمي.. عندك شي مهم تبا اتقوله قوله.. ما عندك.. خلاص

بوسلطان: الله الله .. ماشاء الله عليك.. اصفق لك..

دخل سلطان عليهم وشاف هالجدال.. ما قدر ايود اعصابه.. كان بيجرب منه وبيضربه بس منعه ابوه..

هادف: اسمعني انت (يأشر على سلطان).. انا ابوي ما ضربني.. اتي انت اونك تستريل علي.. ؟

بوسلطان: وهاي غلطة ابوك.. انه ما صفعك.. يمكن كنت بتوعي من الي انت فيه..

سلطان: اخبرك.. انا كنت ناوي اساعدك.. وكنت ياي ومستانس لأن اهل الولد وافقوا على التنازل .. يعني كنت بتظهر.. بس احين عقب الي شفته وسمعته منك.. مابخليك تظهر..

هادف من سمع هالرمسه زاد غياضه.. لكنه مغرور ما بين هالشي: شو يعني.. عادي ترا الولد ما مات.. يعني ما بنعدم وانا بعدني ما كملت 18.. يعني كلها كم سنه وبطلع.. عااااااادي

بوسلطان: ايا الظالم.. وامك وابوك.. وهند المسكينه.. ما فكرت فيهم شو بيصيبهم..

هادف: هههههههه.. اتصدق عمي ضحكتني.. شو بيصيبهم يعني.. ليش هم مفتكرين فيني اصلا

سلطان: ايا يا ناكر الجميل.. انت تدري الدلع الي دلعوك فيه.. محد لقى شرواك.. وتدري انهم حارقين تليفوناتنا بس عسب يطمنون عليك..

هادف.. : اقول انا تعبان.. عندكم شي مهم..

بو سلطان حس بتعب.. وحس ان قلبه بدا يقبضه.. وانشلت حركه ايديه وريوله.. وبدى يعرق ما لقى عمره الا وطايح على الأرض.. وسلطان على طول لحق على ابوه..واما هادف فكان يطالع بنظرات لا مبالاة ورد ويا الشرطي لداخل السجن.... اما سلطان فطلب الإسعاف ونقل ابوه المستشفى..

..

في ألمانيا..

غزلان و وداد وامهم كانوا يلمون اغراضهم لأنهم بيردون البلاد.. وسعيد يلم اغراضه والحزن في عيونه.. لأنه ما بيرد البلاد وياهم.. هو راح يرد استراليا لأنه دراسته راح تبتدي..

غزلان: سعييييييييييييد.. قاعد سرحان جيه في البلكونه.. وماعندك شغل. تعال ساعدنا شوي..

سعيد تم ساكت وما رد عليها.. استغربت غزلان.. شو الي خلا سعيد يسكت عنها.. وهو بالعاده يدور اللحظه الي يتقارض فيه وياها..

غزلان قربت منه وقفت حذاله وحطت ايدها على جتفه: شو بلاه اخوي سرحااااااان.. في شو يفكر

سعيد: ااااه يا غزلان.. بتوحشوني.. تدرين اني في اخر سنه.. يعني ماشي مجال اني اييكم في الإجازات.. لأن ضغط الدراسه كبير..

غزلان: ما عليه.. ان شاء الله بترجع لنا بالسلامه.. وبتمر عليك الأيام جنها الا البرق.. انت هد عمرك وبالك..

سعيد: غزلان.. حطي بالج على هند..

غزلان: افا عليك.. شو هالرمسه.. هند في عيونا كلنا..

سعيد: لا تخلين هادف الغيور هذا يغصص فيها.. تدرين به مينون.. وعقله مب في راسه..

غزلان: بس .. تامر امر..

سعيد: وحطي بالج على عمرج ودراستج.. وامي وابوي.. طيعيهم ولا تزعلينهم..

غزلان: سعيييييد.. شو بلاك.. رمستك غريبه.. دومك اتسافر وما اتقول هالكلام.. اشمعنى هالمره

سعيد: تبين الصدق.. انا حاس ان في شي .. وخايف على امي وابوي..

وداد دخلت وسمعت رمسه سعيد: شي مثل شو يا سعيد؟؟

سعيد: وداد.. مادري والله.. بس قلبي قابضني..

غزلان: ما عليك.. يمكن من الضيق انك بتسافر ونحن بنسافر بعد.. ليش انك بتفارقني مثلا..

سعيد: لا عاد في هاي صدقتي.. فراقج انتي صعب جدا.. مافي حد اتقارض وياه..

غزلان ما قدرت تتمالك رغبتها في الصياح.. نزلت منها الدمعه وحست بحرقتها على خدها..

سعيد: لا .. مابا اشوف هالدموع

وداد: ولا نحن نبا انشوف الحزن في عيونك ياخوووي..

سعيد.. : وداد.. طلبتج..

وداد: انا حاسه شو بتطلب.. عشان جيه ما بقول تم..

سعيد: حرام عليج.. فكري فيه.. لا تعذبين الريال مب زين..

وداد: هالشي راجع لي في النهايه..

غزلان: ماعليك .. بتم على راسها لين ما تقتنع..

وداد: لا والله شاطره اونج.. اوكي..

هند كانت تنادي على غزلان.. من سمعتها ربعت صوب غرفتها..

غزلان: خير..

هند: ماشي مكان حق البوت ها.. خليه عندج

غزلان: زيغتيني غربلج الله.. اتحريت شي.. اخر شي تبين مني احط لج البوت في شنطتي.. ما اقول غير مالت على ويهي..

هند: ههههههه.. يلا شلي بلا رمسه زايده..

..

الإمارات..

عادل كان قاعد ويا مجموعه من ربعه.. ويسولف وياهم.. وعقبها راح ويا عبيد ربيعه على جنب ..

عبيد: خير شو السالفه الي اتخليك تبعدني عن الربع

عادل: عبيد.. بتخبرك عن شي.. اتحيد دكتور سالم الي كان يدرسنا في الجامعه في اخر سميستر لنا..

عبيد: هيه بلاه

عادل: احيدك كنت وايد اوكي وياه.. ودومك اتسولف وياه.. بغيت اتخبرك عن اهل حرمته جان اتعرف اسمهم ولا شي.. يعني من قوم منو.. هالكلام يعني..

عبيد: عادل.. ؟؟

عادل: لا .. يروح فكرك بعيد.. كل قصدي خير صدقني.. امسات شفت الدكتور في ميركاتو.. وكان ويا هله سلمت عليه.. واخت حرمته الصراحه عيبتني.. ودشت خاطري.. ابا اتخبر عنها .. لأني ابا اخطبها

عبيد: هي اتحرى بعد.. انا احيدك مب راعي سوالف.. فاستغربت شو ياك .. هيه حرمتي تعرفهم.. وتروح بيتهم دوم..

عادل: دخييييييييييييلك.. اترجااااك.. اسمها.. الله يخليك..

عبيد: ههههه.. يالعاشق.. شوي شوي علينا.. ماصار زواج الي نويت عليه فجأة.. بتخبر لك عنها..

عادل: يلا شو تتريا..

عبيد: احين؟؟

عادل: لا باجر... هيييه احين شو تتريا بعد

عبيد: هههههه.. لا انت حالتك الصراحه اتعور القلب.. اوكي احين بكلم ام العيال وبسألها..

اتصل عبيد في مرته ندى..

عبيد: هلا والله بالقلب.. هلا بروووووحي.. هلا بحياتي.. فدييييييتج.. اشتقت لج.. انا مب عارف كيف انا ظهرت من دونج.. حاس اني بختنق..

عادل كان صدق مغيض.. وكل شوي ينغز عبيد.. وعبيد يزيد الجيله ويغيضه زود..

عبيد: هههههه.. لا بس حرام برحمك.. انزين الغاليه اتخبرج

ندى: آمر تدلل.. روحي لك..

عبيد: فديت روحج انا.. لا كل الي اباه منج اتقولين لي عن وحده ربيعي حاط عينه عليها بس ما يعرف عنها شي..

ندى: هههه.. كيف جيه بعد؟

عبيد: بعد ربج حب من اول نظره اونه..

ندى: انزين انا شو عرفني فيها.. يوم هو ما يعرف شي عنها؟

عبيد: ترا هاي اتصير اخت مرت دكتور سالم..

ندى: حصوووو.. هيه بلاها

عبيد: شو فيج.. شو بلاها.. اقولج ربيعي حاط عينه عليها بس ما يبالها شي.. بس يبا يعرف رايج في البنت.. واسمها بالكامل عشان يخبر هله عنها..

ندى: قوله لو يلف الدنيا سبع لفات احسن من حصوو ما بيلقى.. أدب وجمال وأخلاق وطيبه.. ولا بعد دمها خفيف..

عبيد: الللللللله.. هالمطلوب.. وين بيتهم بسير اخطبها..

ندى: لا والله.. اتهبي.. انا اراويك.. يعني انت الي تباها هب ربيعك.. ما عليه اتقص علي.. و..

عبيد: هود هود.. شوي شوي علي.. شو بلاج كلتيني.. امزح وياج يا بابا صدقتي مسرع.. اسفييييين اصلا انا مالي غناة عن القمر الي عندي يسوى الكل..

ندى: فديتك.. انزين اسمها.. حصه مشعل عبدالله العامودي..

عبيد: اوكي.. اقول عادل بس ما تبا شي ثاني ؟

عادل: هيه عمرها؟

عبيد: كم عمرها ؟؟

ندى: هالسنه ثانويه عامه..

عبيد: السنه ثانويه عامه اتقول..

عادل: مثل ما توقعت.. بس وصيها لا تقول لهم شي لين ما اظبط اموري.. وعقب عاد خل اتضبطني وياهم جيه تمدح مني مناك.. ترا انا بعد ما اتعوض..

عبيد: ها سمعتيه..

ندى: ههههه.. قوله لا يحاتي.. وربي يتمم لهم على خير..

عبيد: ها يا العاشق احين ارتحت..

عادل: هي والله ربي يريحك دنيا واخره..

عبيد: بس تدري اول مره اشوفك متحمس لسالفه الزواج هذي.. قبل على ايام نوال ما كنت ..

عادل يقاطع رمسه عبيد: بس.. لا تذكرني فيها.. هاي ماعرفت قدري.. ولا حشمتني.. ما انكر ان في خوف متملكني ان اشوف الي شفته من سنتين.. بس بعد في شي اقوى من هالخوف يشجعني على هالخطوه

عبيد وهو يطبطب على ظهر عادل: لا تخاف ياخوووي.. مب كل صبوعك سوى.. ذيج الله يستر عليها.. كل يوم اسمع عنها سالفه من الشباب.. الله يحبك لأنه فكك منها.. وصدقني هالبنت مدحتي اياها الحرمه.. واتقول انها بنت ماشي مثلها..

عادل: الله يتمم على خير.. انا بخبر امي عن اسمها.. يمكن سبحان الله ماره عليها البنت في المدرسه.. ونعرف كل شي عنها..

عبيد: هي صدقك.. الله يوفقك يا خوي.. اتمنى لك الخير من كل قلبي..

..

ناصر قاعد ويا احمد وسلطان.. وكل واحد فيهم يفكر شو يسوي..ما بقى على ردة عمهم وعياله من السفر الا ساعات معدوده..

سلطان: انا الصراحه مب عارف شو اسوي.. حاس عمري اذا واجهتهم وقلت الكلام لهم.. بيزيد كره وداد لي.. كافي انها تكرهني من غير شي..

احمد: والله انا الي بتخبل ومب عارف شو اسوي.. لا رقاد مثل الناس ولا شي.. كلها 5 ساعات والطياره بتوصل.. واذا سرنا نستقبلهم من غير هادف.. هني المشكله..

سلطان: اخبركم انا مب ساير وياكم..

ناصر: بالعكس هالشي بيشككهم زوووود.. انت .. وهادف.. غيابكم مشكله اكبر.. فكروا

رن تليفون سلطان والي كانت متصله مريم بنت خالته.. انعفس ويهه زود.. مب مرتاح لملاحقتها له.. وما يستصيغها.. : احين هاي وقته تتصل..

احمد: جيه منو الي متصل..

سلطان: في غيرها.. مريم..

ناصر: العاشقه الولهانه..

سلطان: هاللي ناقص بعد.. ها تعشقني..

احمد: هات التليفون انا برد عليها.. (رد على التليفون).. الو..

مريم:سلطان..

احمد: لا انا احمد.. سلطان راقد.. شو تبين فيه؟؟

مريم: ابا ارمسه شو ابا فيه بعد..

احمد: ايه انتي ما تستحين تتصلين في الريال ..

مريم: ايه انت,.. شو هالرمسه.. اصلا انا وسلطان حبايب انرمس بعض متى ما نبا..

احمد: هههههه... حبايب اونه.. هههه.. ضحكتيني.. اخبرج.. انتي من صدقج حاطه في راسج ان سلطان يحبج.. حوووو.. اصحي عن هالخبال.. تراج خاله حال فدوى عنده.. عمره وحياته ما فكر يحبج.. وانتي تدرين انه ما يفكر غير في وداد بنت عمه..

مريم: ههههه.. خبرك عتييييج.. انزين.. واتهقى ودادوووو هاي اتحبه؟؟

احمد: مريووووووووم.. سمعيني.. اخبرج.. وداد هاي تاج راسج.. مب اصغر عيالج عشان تقولين ودادووو فاهمه..

مريم: اوه ماشاء الله محامي الدفاع .. اخبرك.. قول حق سلطان يشيل من باله وداد.. لنها ما تفكر فيه خلاص.. وصدقني سلطان ما بيكون لغيري.. خصوووصا وداد.. هاي بالذات الوحييييده الي لا يمكن تجرحني وتاخذ عني الي احبه.. اوكي

احمد: لحظه لحظه.. انتي شو الي يخليج هالكثر متأكده ..

مريم: ههههههههه.. انزين قوله لا تنسى.. بااااااااااي

[بنت البلاد]

وبندت الخط واحمد كان واصل حده ومعصب.. وفر التليفون في حضن سلطان وصعد غرفته..ودخل لها

احمد.. والله اراويج يا مريم بنت امج وابوج.. مب انتي الي تتحدين احمد.. مب انتي الي تغلطين على وداد.. هاي اختي وبنت عمي ومرت سلطان وبس.. اصلا انا صدق غبي ليش قاعد افكر في كلامها.. اصلا لو وداد صدق ما اتحب سلطان جان ما رفضت كل من يتقدم لها من بعد سلطان..

ناصر استغرب من تصرف احمد ولحقه لغرفته... ونفس الشي سلطان..

ناصر: احمد.. شو السالفه؟؟

سلطان: شو قالت لك هاي ام لسانين..

احمد: كلام يقهر يا سلطان.. كلام يرفع الضغط..

سلطان: شوووووو.. قول..

احمد: تتحداني اونها.. مادري شو فاكره عمرها.. ياهل ومافيها عقل يايه تتفلسف... اونها اتقول ان بينك وبينها علاقة حب.. ولا بعد اتقول اونه وداد ما تباك.. كيف وهي ترفض كل من يتقدم لها من عقبك مع انه ولا واحد فيهم كان ينعاب بشي.. بالعقل ها على شو يدل.. وبعدين اتقول وبكل ثقه وداد مستحيل تجرحني وتاخذ سلطان.. شو الي يخليها واثقه من هالشي؟؟ انا شاك انها سبب بعد وداد عنك يا سلطان

ناصر: وانا بعد حاس جيه.. لني يوم تميت افكر فيها صح.. واحسبها في راسي.. اشمعنى الإخت ما حبت تنتحر غير قبل ملجه سلطان بليله..

سلطان حس ان راسه افتر عليه.. والتفكير اتعبه.. ما يقدر يتحمل اكثر.. حاس بضغط من كل الجهات.. سالفه هادف.. واحين سالفه مريم.. تم ساكت طول الوقت.. وظهر من الغرفه بكل هدوء ونزل الصاله عند ابوه.. شاف امه وابوه قاعدين في الميلس وراح لهم؟

سلطان: هلا ابوي.. اشحالك؟؟ (باس راس راسه)

بوسلطان: سلمت.. بخير دام انك بخير..

سلطان: وهاي احلى بوسه على راس امي الغاليه.. ام سلطان..

ام سلطان: فديت ولدي انا..

سلطان: ابوي.. فكرت.. شو بنسوي.. ما تم شي وعمي بيوصل..

بو سلطان: توني ياي من عند المحامي.. قالي ان القضيه صعبه .. ولازم اهل الولد يتنازلون.. والصراحه انا ماودي اني اطلعه.. تدري ليش.. لني اعرفه ما بيتأدب لا طلع..

سلطان: بس ابوي.. انت ادرى بالحال.. والموضوع انتشر.. اخاف اذا ما سمع عمي السالفه من عندنا يسمعها من غيرنا.. الكل يطري السالفه ويرمس عنها في البلاد.. كل ما اظهر مكان ربعي يسألوني عنه

بو سلطان: عيل انا شو اقول.. ريال اشكبري

سلطان: المهم احين عمي.. ومرت عمي.. والله اني حاس بفشله.. مب عارف كيف ارمس واقول..

بو سلطان: سلطان يا ولدي.. عمك يدري في ولده.. وان شاء الله من يتنازلون اهل الولد من القضيه راح يظهر من السجن.. بس احنا نعرف كيف انعاقبه احين..

ناصر: هي والله ابوي.. اتسوي خير .. وانا الصراحه ابا انتقل من المدرسه الي فيها.. الشباب بياكلون ويهي.. هم احين ماكلين ويهي من غير شي عيل عقب شو..

بوسلطان: ناصر.. انت لازم اتكون اقوى من هالكلام كله..

ناصر: بس كيف .. والله انا مااقدر اتحمل رمستهم..

سلطان: جنك بنيه ما تقدر اونه.. لازم.. لا اتخلي هالمشاكل البسيطه اتأثر عليك.. وانت الكل يعرفك.. ويعرف انت كيف.. ويفرقون بين طبايعك وطبايع ولد عمك

ناصر: نصبر أمري لله.. ..

..

في بيت عادل..

عادل: اميييييييييي.. وينج يا احلى ام في الدنيا..

ام عادل: هلا والله بعدووولتي..

عادل: امممموح على راسج.. باركي لي.. عرفت اسمها..

اميره: يوم اقول انك عاشق.. ما صدقتني.. طاع طاع عيونه بتدمع من الفرح

عادل: جب انتي انا ارمس امايه..

ام عادل: فديتك والله.. خبرني اسمها؟؟!!

عادل: حصه مشعل عبدالله العامودي؟.. والسنه ثانويه عامه..

ام عادل: حصه العامودي.. (تمت اتفكر اشوي).. قلت لي هالسنه ثالث ثانوي صح..

عادل: هيه..

ام عادل: خل اتذكر.. هالإسم مب غريب علي.. جني سامعته.. لحظه بتصل في الوكيله وبسألها..

عادل: يلا بسرعه.. هاج تليفوني..

ام عادل: يحليلك يا عادل.. ربي يوفقك ان شاء الله.. مابا تليفونك.. ما ترد على ارقام غريبه.. بييب تليفوني..

عادل: انا بييبه انتي قعدي وارتاحي..

اميره: هههههههه.. (تمت اتغني).. أحبك لو بعيد الدار عنك.. جداك يحن قلبي للرجوعي.. يا لو عني الليالي يبعدنك.. غلاك بخافقي تحت الضلوعي..

عادل رد بسرعه وياب التليفون: هاج امي.. ادق عالرقم..

ام عادل: لا هات انا بدق..

اميره وقفت حذاله وتمت تنغزه بإيدها: اشعليييك.. اتحب.. منو قدك..

عادل: جب انتي خل اسمع.؟.

ام عادل: هلا والله بأم محمد.. اشحالج.. ؟

ام محمد: بخير طاب حالج.. اشحالج.. واشحال عيالج..

ام عادل: والله الكل بخير تسلمين.. اقول ام محمد بغيت اسألج عن وحده اذا هي عندنا في المدرسه ولا لا..

ام محمد: قولي..

ام عادل: اسمها حصه مشعل عبدالله العامودي.. السنه ثانويه عامه..

ام محمد:.. هي .. تذكرتها.. ما عرفتيها.. انتي كم مره مكرمتنها بعد..

ام عادل: انا اقول هالإسم مب غريب علي.. بس ذكريني فيها شوي..

ام محمد: هاي ماشاء الله عليها.. هي والي اسمها غزلان.. هالثنتين نشاط دائم.. ماشاء الله عليهم ما خلوا نشاط في المدرسه الا وشاركوا وفيه.. وغير عن جيه دومهم من الأوائل وملتزمين في كل شي..

ام عادل: اها.. هي جني الا تذكرتها..

ام محمد: ليش بغيتي شي منهم.. ترا عندي ارقامهم..

ام عادل: لا ماشي.. بس لأني سمعت طاريها من اختها.. فقلت خل اشوف يمكن اعرفها..

ام محمد: هيه..

ام عادل: خلاص عيل ما بنعطلج زود ام محمد.. تسلمين .. وما تقصرين..

ام محمد: افا عليج.. تامريني بشي ثاني..

ام عادل: لا سلامتج الغاليه.. سلمي على العيال..

ام محمد: يبلغ.. وانتي بعد سلمي..

عادل: ها امي.. شو؟

ام عادل: الي يشوفك ويسمعك يقول مووول ما سمعت كلامي يوم ارمسها..

عادل: ههههههه

اميره: انا ما سمعت خبريني..

عادل: عن اللقافه يقولون اللقافه مب زينه حق الرشاقه.. اتمتن..

اميره: ياريييييت.. خل اتمتني شوي بس..

عادل: لا هي اتمتن وااايد دفعه وحده..

اميره: ههههههههههه

عادل: امي ما عليج منها ها بشري..

ام عادل: لا الصراحه.. بنت ما عليها كلام.. بنت والنعم فيها.. تذكرتها.. اعرفها نشيطه ومؤدبه والكل يتمدح فيها..

عادل: الله وناسه.. يعني خلاص ان شاء الله..

ام عادل: ان شاء الله اتكون من نصيبك يا ولدي..

عادل: الله يسمع منج يا امي..

..

بقى على وصول الطياره ربع ساعه.. والكل تجهز عشان يروح المطار يستقبلونهم..

احمد:سلطان.. انت روح بموترك بنسير بالنيسان مال ابوي.. وموتري..

سلطان: اشله كل ها.. خلني بيي وياك ولا انت تعال وياي.. ما يحتاي هالكثر سيايير..

احمد: سلطان.. قلت لك تعال بموترك لا تخرب الي في راسي..

سلطان: اه منك يوم اتخطط..

احمد" اعيبك انت ما عليك.. لا تحاتي

الكل اتجه صوب المطار ... وبعد نص ساعه الكل وصل.. وكانوا ينتظرونهم في صاله القادمون من مطار دبي.. وبعد 20 دقيقه الكل ظهر..

غزلان: نصووووور.. احمدووو.. عمووور حبايبي والله..

وداد: فضحتينا خل نظهر.. الي يشوفج يقول مسفرينها واحين ردوها..

ناصر: وحليلها غزلان.. محلوه..

احمد: اوه.. شو السالفه .. الأخ قام يفكر في بنت العم..

ناصر: فايج الصراحه..

هند: وداد.. الكل موجود الا هادف وينه.

وداد: اتلاقينه واقف بعيد عنهم تدرين به..

غزلان: ودادووو.. شفتيه.. ماشاء الله محلو..

وداد: منووو؟

غزلان: شو منو.. سلطان..

وداد: اتحريتج ترمسين عن واحد مهم.. ما عندج سالفه..

هند: وداااااااد... عيب عليج.. تراه في النهايه ولد عمج..

الكل طلع من البوابه.. وتموا يسلمون على بعض.. واما وداد فعيونها اتدور يمين ويسار.. تبا اتشوف هادف بس مب ملاقيته..

وداد: احمد.. وين هادف ليش ما يا وياكم؟

بو سعيد: هي صدق ضاعن.. وين ولدي هادف..

بو سلطان(ضاعن): ها.. تدريبه ويا ربعه.. اتصلنا به كله مغلق..

هند: هذا ونحن يايين من السفر ما يا حتى يسلم

احمد: هنووووده.. افا .. لا تتضايجين انتي بس.. ما تدرين به ها هادف من يوم ما استوى جيه..

غزلان: نصووور.. اشحالك.. وينك يالقاطع اشتقنا لك.. عفان الله ما تتصل حتى..

ناصر: تعالي انتي اباج في سالفه.. سيري قولي حق هندو.. وصيها.. من احمد يوصل بموتره .. تركضين انتي وياها على موتر احمد.. والباقي في نيسان ابوي نبا انورط وداد بأنها ما تحصل مكان غير في موتر سلطان.. اوكي.. اعتمد..

غزلان: دام ان السالفه فيها سلطان.. خلاص تامر امر.. من يوصل احمدوو ركض على موتره.. بس انت قايل حق فدوى؟؟

ناصر: ماعليج نحن مضبطين كل شي

غزلان: والله شياطين.. اقول.. هذوا جنه وصل احمد.. هندووو

هند: هلا..

غزلان ركضت صوب هند وسحبت ايدها: تعالي وياي..

هند: اشفييييييج.. جلعتي ايدي..

غزلان: ماشي وقت افهمج.. تعالي في الموتر بفهمج..

والخطه مشت على اصولها .. وانجبرت وداد انها تركب الموتر مع سلطان بروحها..

يا ترى شو الي بيصير.. ؟؟

هل راح ترمس وداد وتواجه سلطان؟؟

وشو موقفهم يوم يعرفون بموضوع هادف؟؟ بيصير شي؟؟

[عويد الموز]

السلام عليـكم

تسلمين يالغــلا عالجزء الحلوو

^_^

[بنت البلاد]

بنت المزروعي العفو الغاليه...

busanad يا هلا والله.. مرحبا بك في القصه الثالثه لي.. لا الصراحه انا اليوم بطير من الفرحه.. الشله كلها اتابع القصه.. وهالشي وايد يفرحني..

وان شاء الله تعيبكم القصه..

الي اباه منكم.. اتقولون لي اذا في هناك فرق في الإسلوب؟؟ وفي تطور.. عشان اقيم نفسي تطورت ولا بعدني مغبره وجديمه

[بنت البلاد]

تسلم اخوي فتى الأحزان على الرد والتواجد الي فرحني...
وان شاء الله اتكون متابع ويانا في القصه.. ولا تحرمني من رايك ابدا..

[بدرةالبحرين]

تسلمييييييييييييييييييييييييييييين على الجزء الروووووعه


عيبني من الخاطر وايد حلووو


الغاليه اتريااااج متحرقصه والله