كتمت صوتي لين صمتي نطقني
الجزء الأول
الفصل الأول
=-=-=-=-=-=-=-=
جاكلين: مدام.. وين رايحه بهالليل. الصباح رباح خلك هوون..
مهره وهي شاله بنتها الرضيعه وتربع وتصيح: مينونه انتي اتم فهالبيت يوم واحد.. مستحيييل..ماقدر اعيش فيه ولا دقيقه زيادة..
جاكلين وهي تتطالع وراها كأنها خايفه ان حد يشوفها : بترجاكي مدام .. مابيصح هيك.. الدنيا ظلام وين بدك تروحي عالأقل قولي لي..
مهره: رايحه لأي مكان يكون أحسن من سجن التعذيب هذا الي عايشته.. بس يكفي 10 سنين وأنا صابره اقول اليوم بيتغير (تيلس على الرصيف في طرف الشارع وهي تتطالع الرضيعه وتصيح).. ولا يتغير.. دخيلج جاكلين لا تجبريني أرجع.. ماقدر أعيش فهالعذاب أكثر من الي عشته يكفي.. خل هالبيت والأموال كلها تنفعه .. لأن انا مابينفعني غير سمعتي وشرفي.. أما هذا الإنسان مايهمه شي..
جاكلين وهي تصيح على حال مهره: أنا كمان مابقدر إبقى بالمكان هيدا إذا انتي رحتي من هون.. انا اذا باقيه مشانك.. أرجوكي مدام ارجعي وين بدك تروحي ببلد الغربة هاي.. لا بتعرفي حد ولا حدا بيعرفك .. بليز خلينا نرجع…
مهره : والله ما أرجع له لو الموت.. ودخيلج لا تيلسين تضيعين وقتي في أي وقت يلاحظ غيابي ويظهر.. تبين اتيين وياي تعالي.. ماتبين ردي ولا كنج تدرين عن شي..
جاكلين صدت صوب الفيلا العودة ويلست تتطالعها وتتحسر: حمدان شو ذنبه تتركيه وتروحي؟؟
مهره وهي تحاول تتمالك احساس الأمومه الي بداخلها وتغصب على نفسها.. : حمدان خله عند أبوه بيعيش مرتاح .. أنا الله العالم شو بتكون حياتي..
جاكلين: انتي جنيتي أكيد.. شو عم بتقولي.. لك هيدا أبو مشان تتركي حمدان المسكين عندووو.. يا بنت الناس شغلي هالعقل شوي..
مهره وهي تصارخ .. ومن صريخها سمعتها الرضيعه ويلست تصيح وتهزها مره تسكتها: شو اسوي قوليلي.. ماعرف احس راسي خلاص بينفجر.. مب قادره اتحمل ظلم وظلايم هالريال.. دخيلج روحي ييبي حمدان بهدوء بدون لا يعرف أبوه أو يحس وتعالي اترياج..
وجاكلين بهالوقت ماترددت وبسرعه سارت صوب الفيلا شافت حمدان يالس فالحديقه ويصيح.. خافت عليه.. راحت صوبه: حمدان شوفيك حبيبي؟؟ ليش عم تبكي؟؟
حمدان: أميه وينها .. دورتها فالبيت مالقيتها.. أكيد أبوي سوا فيها شي.. أكرهه اكرهه ..
جاكلين حضنته ويلست تهديه: هدي يا ماما لا تخاف.. هلا راح آخدك عند الماما.. ماتاكل هم..
حمدان: بسرعه وديني عندها مابا ابويه يشوفني يضربني..
بسرعه يودت جاكلين ايده وراحت صوب المطبخ الي يوصلها لغرفتها.. عشان تاخذ لها كم غرض بتحتاجهم.. وخذت شنطتها الي حاطه فيها اوراقها الرسميه وشويه بيزات .. والكوت الي تلبسه عشان البرد.. : حمدان لا تتحرك من مكانك لحد ماروح غرفتك وجيب كم غرض راح يلزموك..
طلعت من غرفتها وسارت الصاله شافتها هاديه بس حشره ولويه يايه من صوب الميلس.. صعدت بسرعه صوب غرفه حمدان وخذت كل شي مهم.. ومرت ع غرفه مهره وخذت بعد كم غرض وبسرعه حطتهم في الشنطة الي وياها.. وطلعت من الفيلا تركض ويا حمدان.. وراحوا صوب الشارع وين ماكانت مهره تترياهم.. من شاف حمدان امه ربع صوبها وحضنها.. : أمي وين سرتي خليتيني بروحي ..
مهره: انا هني أميه لا تخاف انا وياك مابخليك..
حمدان: أميييه.. مابا اعيش ويا هالأبو دخيلج أبعديني عنه… اكرهه…
مشت مهره ويا جاكلين وحمدان صوب الشارع الرئيسي علهم يحصلون سياره توديهم لأي فندق..
** ** ** **
وقفه مع مهره
إنسانه من عائله إماراتيه عريقه جداً وغنيه جدا جدا.. دلوعه أمها وأبوها مستحيل ينرفض لها.. عاشت حياتها بكل حريه ورفاهيه.. كانت دوم تروح لشركة أبوها تيلس وياه وتقضي وقتها .. أعجبت بأحد الموظفين.. هو من بلد عربي يعمل في شركة والدها.. عاشت معه قصة حب مدتها سنتين ونص.. قرر إنه يخطبها… رفض والدها فالبداية بس بعد إصرار بنته وافق.. مهره قررت تعيش الحب هذا بعد زواجها.. صار زوجها رئيس فرع الشركة التابعه لأبوها في مصر.. ولكن كانت غايه هذا الرجل المال والإستغلال فقط.. فبعد وفاة أمها وابوها في الحريق الي صار في الفيلا الي للحين محد يدري سبب الحريق مفتعل أم لا.. ورثت مهره كل شي.. أموالهم الي فالإمارات صارت تحت إدارة عمها وعياله.. كلهم ناس والنعم فيهم.. مخلصين في شغلهم ولا عمرهم فكروا يستغلون أموالها.. تغير عماد (زوج مهره) بعد زواجه على مهره.. صار قاسي فالتعامل.. جاف.. همه بس تعذيبها واستغلال جمالها لأغراض شيطانيه .. جبرها تكتب فرع الشركة بإسمه وألغى الشراكة مابينها وبين فرع الإمارات حتى تكون شركة مستقله عن الي يديرونها عيال عمها,.. وانقطعت عنهم وانقطعت كل اخبارها.. عمها كل ما يحاول يوصل لها مايقدر لأن عماد يمنع هالشي.. لكن الي مايعرفه عماد إن مهره عندها حساب في أحد البنوك بإسم جاكلين عشان مايتسلط عليهم.. كانت هاي فكرة جاكلين.. ومحتفظة فيه بمبلغ بسيط اذا يتها لحظة مثل الي تعيشها ألحين وتحتاج البيزات فيها..
مهره عمرها 32 سنه.. حمدان عمره 8 سنين.. نهى .. عمرها سنه…
** ** **
وقفت سيارة كانت فيها حرمه عيوز وريلها..
حمدي: أي خدمه ؟
جاكلين: يا عم بتقدر توصلنا محل نقدر نبات فيه
ماجدة: يا حمدي الست دي بتقول إيه مابسمعهاج..
حمدي: يانهارك ايه .. دنتي ودانك لازم تتبدل باضت خلاص مابتنفعش دلوقتي
جاكلين: يا عم حمدي بتقدر تعجل شوي.. لأن الوقت متأخر وعدنا بيبي صغير مابيتحمل جو برع كتير..
حمدي: طب اركبوا معاي.. انا حوديكو لوكانده قريبه ..
ركبو السياره وقعدوا فيها.. ومهره ايدها على قلبها من الزيغة.. تخاف في أي لحظة يطلع عماد ويشوفها .. وحمدان ميود امه ويرتعش من الخوف..
ماجدة: الا ما قولتيش اسمك إيه؟
جاكلين: انا اسمي جاكلين مادام..
ماجدة: اسمك ايه؟؟.. ايه الأسامي الغريبة دي..
جاكلين تبتسم لها: انا لبنانيه مدام..
ماجدة: اااه ماتقولي كده من الأول..
حمدي: انتي عجوز مخرفه.. وانتي مابتسمعيهاش بتتكلم لبناني..
ماجدة: اييه بتقول ايه انت...
وتموا هالشواب على هالحال وجاكلين تضحك على حالهم.. صدق انهم شواب ومخرفين.. وصلوا المكان الي بينزلون فيه.. عبارة عن شقق مفروشة .. شكرت جاكلين الشايب ومرته على المساعدة وراحوا.. خذوا لهم شقه مفروشه ويلسوا فيها..
مهره: جاكلين المكان يخوف..
جاكلين: مدام ماتعتلي هم ان شاء الله ماراح يصير شي.. انتي هـلاّ ارتاحي مشان بكره نقدر نفكر شو بدنا نعمل..
مهره: جاكلين عماد اذا عرف اني مب فالبيت بيدور علي وعادي يوقف في دربي اذا فكرت اسافر..
جاكلين: لا مابعتقد راح يعرف.. انتي بتعرفي زوجك أكتر مني.. راح يسكر ويعمل بلاويه ويتعب وينام.. ومابيقوم إلا العصريه..
مهره: الله يعين..
حمدان: أمييه تعالي ارقدي عندي اخاف ارقد روحي
مهره: فديتك امي يايتنك..
وسارت مهره غرفتها عشان ترقد وترتاح.. لكن وين تشوف الراحة وبالها مشغول شو تسوي وتفكر.. وهذا كان مسبب لها تعب كبير.. كل الي حطته في بالها انها ترقد عشان تنش من وقت وتاخذ لها تذكرة ترجع فيها البلاد.. وتبتعد عن عماد وبلاويه..
=-=-=-=-=
اليوم الثاني الصبح في الإمارات
ساره: أسوم كلها خمس دقايق اذا ماشفتج عندي في الموتر بروح عنج وانتي برايج عاد..
أسما: عن الإستهبال سارووه.. قلت لج بنزل... خليني اكمل اللقمة على الأقل.. وبعدين انتي تدرين اليوم اول يوم للتدريب في المستشفى..
منصور وهو يتريق: عدال مادري منو الي بتداوم ألحين.. مديره مستشفى وانا مادري..
أسما وهي اتدز بإيدها على جتفه: عساني يارب استوي مديره واقهرك..
شيخه وهي ماسكه صينية الأكل( الأم ) : شبلاكم من صباح الله خير حسكم مالي البيت كله..
زايد وهو نازل يعدل بزمة كندورته: أميه توج تعرفينهم مب أول مره هذا حالهم من زمان..
شيخه: الله يصلح حالكم يا عيالي... (توها بتحط الصينيه... ماحست الا بحد ايودها من ظهرها ويحضنها)
أسما: فديتج امي دعواتج.. مع السلامه
زايد: لحوووول هاي البنت عمرها مابتكبر.. صار عمرج 21 وانتي بعدج خبله..
اتصد أسما صوب أخوها وتبتسم له وتروح..
منصور: يالله اميه انا بعد ساير..
شيخه: تعال انت على شو مستعيل.. وصلني بيت يدتك خلاف سير وين ماتبا..
منصور: اميه بتأخر جي عالدوام..
شيخه: بلا بتأخر مابتأخر بتوصلني غصبن عنك..
منصور: وليش كله انا.. اشعنه زايد مايوصلج..
شيخه: زايد بيروح مع أبوه الشركة ..
زايد: اخدم امك وانت ساكت..
منصور: سكتنا خلاص..
نزل بوزايد من الدري وهو مبتسم: السلام عليكم .. صباح الخير
الكل: صباح النور..
بو زايد: إلا وينهم أسما وساره؟
شيخه: روحن مستعيلات..
بوزايد: ربي يحفظهن يارب.. انزين زايد يابوي نروح..
زايد: سرينا
شيخه: مايستوي ماتريقت..
بوزايد: ماعلي مالي خاطر اليوم..
شيخه: انزين تعال خلني ابخرك..
منصور تجدم عن ابوه ويتحنحن: احم احم.. فديتج والله دومج تهتمين بي...
تضحك له شيخه واتدزه بعيد: خل حرمتك تبخرك.. انا ببخر الغالي بوعيالي..
منصور: لحووول ماخذ كل شي عنا هالأبو.. وكل مايبت طاري شي قالو لي حرمتك.. يا جماعة انا مابا أعرس..
بوزايد: صدقها أمك.. عرس وشوف حرمتك شو بتسوي لك..
زايد من سمعهم يرمسون بطاري الزواج قال الشردة أحسن.. بسرعة شل اغراضه ومشى صوب الباب..
شيخه انتبهت عليه وضحكت.. : اشوفك شردت من سمعت طاري العرس..
زايد في خاطره: ياربي شو هالبلشه من صباح الله خير هالعيايز ماييبن الا طاري الزواج.. وماعندهن غيره..
شيخه: عسى ربي يهديك يا زايد يا ولدي..
زايد: الله هادني الحمدلله.. يالله ابويه انا في الموتر بترياك..
منصور: امي اغسلي ايدج مني ومن زايد .. يوزي بناتج وخلاف نحن بنفكر في الموضوع..
سعاد: انا موافقه.. بس شو اسمه؟؟ .. وكيف شكله؟؟ ومن وين؟؟ وكم عمره؟؟ شو يشتغل..
زايد ومنصور تموا يطالعون بعض وهزوا روسهم..
منصور: اميه.. تحملي عاد انتي الي فتحتي الطاري..
بوزايد: خلني اشرد وياكم عيل..
شيخه: انتي ماتستحين صدق.. عنبوج لا سلام ولا كلام.. داشه بنص السالفه وتهذربين.. شو هالرمسه بعد.. لا حيا ولا حشيمه .. ترمسين هالرمسات.. كلام هب لوحدة من سنج ..
سعاد وهي تبين ملامحها كيف طفرانه وملانه من هالإسطوانه اليوميه.. : امي خلصتي رمستج.. انا هب ياهل. كبرت ألحين عمري 17 سنه مب ياهل..
شيخه: الله يهديج.. يالله عن تأخرين لمدرستج .. الدريول يترياج برع
سعاد: يالله جاااااااااااااااااو
ومشت صوب الباب وهي شاله الشنطة.. وشيخه تتطالعها وتهز راسها.. : الله يهديج..
وقفه مع عايلة بوزايد
في الواقع بوزايد هو عم مهره.. عنده ولدين و3 بنات.. بنبدأ من الكبير.. زايد .. قمة الغموض والهدوء.. دومه مشغول بالدوام .. نادر مايلقى وقت لنفسه يترفه فيه.. عمره 29 سنه.. تزوج ولكن طلق مرته بعد زواج دام سنتين.. الكل جاهل سبب الطلاق (راح نعرفه مع الأحداث) .. منصور.. انسان يحب اللعب والوناسه .. ولعوب.. سوالف ويحب المغامرات بشكل كبير.. يشارك في سباقات رالي.. ودومه يحرز المراكز الأولى.. عمره 26 سنه.. وسيم وحساس وهالشي الي محد يلاحظه فيه.. لكنه يوم يختلي في نفسه يعيش حاله ثانيه غير الي عايشنه بين اهله.. ساره.. عمرها 24.. مالجه .. رقيقه وهاديه .. طباعها شوي مشابهه لزايد.. بس الي تختلف عنه فيه هو انها ماتحب اتعب نفسها في الشغل... أسما.. الحنون .. الطفولية.. في طبعها وشغبها وسوالفها... الكل يحبها ويحب القعدة وياها.. عمرها 21 سنه.. تدرس في جامعه شارجة .. تقنية مختبرات طبيه.. سعاد الشيطانه.. مابشرح وايد عنها.. لأن في احداث بتعرفون من خلالها من هي سعاد.. عمرها 17 سنه .. ثاني ثانوي أدبي..
=-=-=-=-=-=
كتمت صوتي لين صمتي نطقني
في قصه جديده
العلامات المرجعية