|
 |
|
|||||||
| محمل الروايات الطويله يشمل القصص الطويلة ذات أجزاء المنقولة منها أو المكتوبة من قبل الأعضاء . |
 |
|
|
أدوات الموضوع | طرق العرض |
|
#1
30-03-2005, 12:32 AM
|
||||
|
||||
|
حكم الأيام
السلام عليكم ورحمة الله وبركاته
إسم القصة : حكم الأيام نوع القصة : قصة خيالية بالطبع .. تروي قصة حب في أرض الإمارات وتجري أحداثها في مدينة الشارقة وذات مضمون اجتماعي . كاتب القصة : بنت البلاد المتطلبات : متابعة اجزاء القصة على هذا الرابط بالضغط هنا دعم كاتبة القصة بالتقييم الشخصي بالضغط على هذه الصورة  تقديرآ لجهود الكاتب .تقييم مستوى القصة بالمراحل الخمسة  وذلك من خلال الضغط على خيار تقييم الموضوع .تذكير : تم تجميع اجزاء القصة في موضوع واحد تسهيلآ للقارئ واختصارآ للوقت ، على أن تكون المشاركات على القصة في الموضوع الاساسي للقصة . وتذكروا ان تواصلكم مع الكاتب يعطيه حافزآ لتقديم المزيد ، فلا تبخلوا عليه بأرائكم ودعمكم له . اختكم بنت البلاد ، مشرفة محمل الروايات والقصص .
__________________
 التعديل الأخير كان بواسطة بنت البلاد; 07-04-2005 الساعة 12:16 PM |
|
#2
30-03-2005, 12:35 AM
|
||||
|
||||
|
الجزء الأول
======== ريم فتاة في السنه الثانيه في كليه الشارقه (تقنيه المعلومات) وهي البنت الوحيده بين ولدين وابوها متوفي وطبعا هي الدلوعة اللي ما ينرد لها طلب، الكل مدلعها أخوها راشد عمره 30سنه ومتزوج من نوف وعنده بنوته عمرها سنتين واخوها عبود اصغر واحد عمره 19 سنه (سنه أولى كله ) الكل كان يحب ريم لطيبتها وعفويتها وجمالها ورقتها .. كانت مالكه اهتمام الكل لها بيتها وبيت عمها بعد سلطان وحرمته أم يوسف.. عمها سلطان عنده ولدين يوسف عمره 24 سنه وخالد في نفس عمر عبد الله اخو ريم 19 سنه وياه في الكليه وهم ربع وايد متفاهمين ومتعلقين في بعض.. وطبعا يوسف مب معرس.. ولا حتى خالد في بيت ريم قاعده ويا اخوانها وحرمه اخوها نوف.. ريم: يا ربي ما ادري متى بفتك من دوام الكليه للأبد ياخي مب حاله هاي نوف: بعدج نونو حبييتي اتريي ما شفتي شي ريم: فديتني شيخه الحريم مب نونو... يا دلوعه رشود راشد: انتي بلاج حبيبتي... ليش منحره ليش اني ادلعها ياخي كيفي مرتي ام سارونه فديتها معلوم بدلعها ريم: لا والله .. انا احيد الناس يدلعون شي يستاهل الدلع.. شي حلو مب .. (تمت تطالع نوف بنص عين) لا حلوه حلوه مافيها شي نوف: مابا رايج احتفظي فيه .. راشد: والله انتوا شو بلاكم اصطلبوا حريم غديتوا هب يهال دخلت عليهم ام راشد توها يايه من برع من بيت عمهم.. : السلام عليكم الكل: وعليكم السلام ريم: اهئ اهئ ..(اتسوي عمرها اتصيح) اميييييي.. شوفي عيالج كلهم طايحين فيني ما يحبوني.. شافوج محد هجموا علي.. عبود: بل بل بل متى طحنا فيج.. انتي الي طايحه فينا .. وقابضتنا وانتي جيه .. حشى امي انا شاهد محد غيرها الي كان يلعوز.. سوسه تراها ريم: سوسه حرمتك عبود: فديتها حرمتي ليش انتي جيه من احين تغارين عليها.. أم راشد: استحوا على ويوهكم لا حشيمه ولا مستحى وانا جدامكم (الكل سكت ما عرف شو يرد عليها) راشد: ما عليج منهم امي ما تدريبهم عيالج من يومهم جيه .. ما يعيشون جان ما تقارضوا.. ام راشد: والله اسير ارقد لي ابرك من مجابلكم .. تصبحون على خير... (راحت وصكت الباب بالقو) عبدالله: ما تدرون امي شو بلاها معصبه راشد: اسكت لا تسمعك وتسوي لنا مصيبه ,, وبعدين انت ما تعرف امك كمن اتيي من برع تعبانه محد يروم يجابلها لو بكلمه نوف: اقول .. عمتي لازم اتودونها اتغير جو.. لأنها من وفاة عمي الله يرحمه وهي ما تطلع من هني.. الا اذا سارت بيت عمي سلطان راشد: نوف انتي ما تعرفنين امي وعنادها يعني نحن ما حاولنا,... هاكو الباب جدامج سيري حاولي فيها جان طاعت وايد زين نوف: راشد حبيبي.. مادري ليش الجو حر هني... احس عمري بختنق.. يمكن لأنه زحمه ريم: أقول الي مب عايبنه الجو.. هاكوا الباب جدامه يظهر برع البيت يشم هوا نوف: جني سمعت ذبابه اتون في الصاله.. ممكن ارش مبيد حشري.. ريم وهي تقلد نوف: لا مب ممكن راشد+ عبود: جاااااااااااااااااب أالكل انصدم سكت اشوي.. وبعدها تموا يضحكون.. هنيه رن تليفون سعيد.. طلع الشاشه شاف عليها حرف Sعلى طول شل عمره وراح صوب الدري يروح حجرته.. وراشد كان يتابع فلم في التلفزيون.. ونوف سمعت سارووه بنتها اتصيح.. راحت لها... وريم انتهزت فرصه ان اخوها راشد بروحه في الصاله.. عشان تاخذ الإذن منه على طلعه صحارى سنتر ويا ربيعتها عزّة ريم: اخوي حبيبي... الغالي(وتغني).. يا بعدهم كلهم.. يا سراجي بينهم.. عطني من دنياك حبك.. واترك الباقي لهم راشد ابتسم: شو عندج يلا قولي اعترفي.. ريم: ما عندي شي .. بس اغني حق اخوي حرام راشد: انتي ما تغنين لي الا اذا في مصلحه من ورى الغنى هذا ريم: افااااااااااااا احين ريامي الي ما في مثلها اثنين في الدنيا مصلحه ... ما عليه جان ازعل راشد وهو يدلعها:: ريامي.. ريومتي... حبيبتي بلا دلع عاد ... ريم:اممممممم برضى بس بشرط؟؟ راشد: هاتي من الآخر.. انتي شروطج اوامر .. تدللي بس انتي كم ريامي عندي انا ريم: وحده ماكو مثلها في الكون كله .. أبااااا أباااااااا اروووووووح... صحارى سنتر ويا عزّة بنت مصبح.. راشد: وانا اقول شو سالفه حبيبي حبيبي.. اثاري تبين تظهرين .. ريم.: يلا عاد هذا شرطي شو موافق راشد وشل الجريده وغطى فيها ويهه : بفكر؟؟ ريم بعصبيه: رشود عاد .. قول بسرعه ولا والله تراني ماراح اعطيم من افكاري الذهبيه لرسوماتك الفلته (راشد اخوها فنان ورسام محترف.. دومه يفتح معرض لرسوماته.. والكل ينبهر بفنه ويحضر معرضه) راشد: اخ.. زختني من الإيد الي اتعورني.. عاد انا مالي غير سما وحده ومافيها غير قمر واحد يضوي هو ريم فديتها .. اروم اقول لها لا ريم: فديتني .. زين عرفت قدري ..يلا تصبح على خير امممممموح (حبته على خده ) راشد: لا اتريي بعدني ما وافقت نهائي.. انا بعد عندي شرط ريم .: افففف مشكله المذله.. ها شو عندك.. راشد: ههههه ما عليه انا اراويج بعدين... عندي لوحه يديده راسمنها ابا اخذ رايج فيها.. ريم: وينها ؟ راشد: في الورشه تعالي وياي.. ريم : بيي بس بعد لازم مقابل.. راشد .. : انتي مافي شي لوجه الله عندج ريم : نو مافي راشد : يلا قولي.... يا قمري ريم: حبيبي... بعد اسبوع في مناسبه مهمه ابا اذكرك فيها بس راشد: لا تخافين ادري انه عيد ميلادج جرب ما نسيت ولا بنسى.. هذا اليوم التاريخي اللي الله عطاني فيه القمر ريم: عيل يلا وين اللوحه توهم بيدخلون الورشه الي في الملحق الخارجي.. راشد: ها شو رايج فيها:... ريم مندشه: الللللللللللللللللله روعه روعه.. وايد حلو.. كانت اللوحه في غايه الجمال الروعه محطوطه على الإستاند .. كان راسم بنته ساره و وراها ابيات من الشعرعنها.. والألوان هاديه وغايه الروعه.. ومحاطه بنته بالورود راشد: ها شو تنصحيني احطها في المجموعه؟؟ ريم: الا مب بس في المجموعه الا في راس المجموعه... وتبا رأيي سم مجموعتك بإسم ساره راشد: امممممممم مادري والله.... بس فكره اتصدقين ودخلت عليهم الشغاله تزقر راشد أن نوف تباه .. روح راشد وتمت ريم روحها في الورشه.. ريم عندها ميول للرسم بس هي ما نمت موهبتها.. كانت تتطالع اللوحات الي موجوده في الغرفه. كل لوحه احلى عن الثانيه.. وشافت لوحه مغطايه بقطعه ومخشوشه ورى الكبت.. جاسها فضول تبا تعرف شو الرسمه الي عليها.. ولما خذت اللوحه وشلت القطعه من عليها تفاجئت من المنظر الي جدامها,, كان راشد راسمها بطرقه واااااايد حلوه أحلى من الواقع.. كانت ملامحها البريئه والناعمه واضحه في الرسمه ... وهاي اول مره راشد يرسمها من عقب ما كبرت.. آخر مره رسمها يوم كان ابوها عايش.. يعني قبل 10 سنين.. وردت غطت اللوحه وردتها مكانها.. وطلعت من الورشه راحت البيت.. يوم دخلت الصاله شافت راشد ونوف قاعدين في الصاله يتابعون فلم... بغت ريم تسأل راشد عن اللوحه بس خافت عن يعصب ليش انها نبشت في اغراضه وهوما يحب هالشي.. غيرت رايها وراحت صوب الدري عشان تدخل حجرتها... شافت ليت حجره اخوها عبدالله مفتوح يعني بعده واعي ... جان تدخل عليه ريم: عبادي.. حبيبي بعدك ما رقدت.. ما رد عليها.. يوم اطالعته شافته راقد ومو متلحف.. ابتسمت له وباسته على راسه وغطته وسكرت الليت والباب.. ودخلت حجرتها تذكرت سالفه الطلعه.. جان تشل تليفونها وتتصل في عزوز ربيعتها اتخبرها. ريم:هلا والله .. اشحالج.. اوف ما بغيت احصلج كله مشغول عزّة: هلا والله .. بخير ربي يعافيج.. تدرين بعد الحب ما نروم نصك عنه ريم : انتي متى بتودرين هالوهم عنج ما ادري عزّة: اي وهم الله يخليج.. بس معذوره بعدج ما طحتي في الهوا شراتي ريم: عدال عدال يا جولييت عن تنكسر جناحاتج واتطيحين عزّة: ويا يهج شو عندج الساعه 12 متصله ريم: زين تذكرت.. على سالفه صحارى..ز اخوي ما طاع عزّة: جديمه جدييييييمه.. ما افدر اصدق ريامي ينقال لها نوووو. امبوزيبل.. ريم: عاد هذا الي صار.. عزّة: احلف انتي بس.. عاد انا الي بصدق.. لعبي غيرها يا حلوه ريم: اووووووف ماروم عليج.. وافق للأسف عزّه: معلوم ما ترومين علي فاهمتنج تراني.. ليش للأسف إن شاء الله ريم: لأني بجابل ويهج النحيس عزّة: عاد نا الي ميته على ويهج احين .. اقول للأسف اني ما بجابلج.. راح اتجابلين القمر.. الي في بالي بالج ريم: عزوز خلصنا من هالسالفه قلت لج لا يعني لا عزّة: اه honey ... ما بدينا عشان نخلص.. يامي الريال شاريج لا اتبيعينه ريم: نحن اتفاهمنا على هالسالفه وايد.. لا يعني لا عزّة: والله ظالمه .. انتي ما فيج قلب.. حسي فيني بتكونين سبب دماري.. الريال ذابح عمره بشوفتج.. وانتي جيه اتقولين لي.. والله باجر فرصه انتي شوفيه وعقب احكمي ريم: عزوز واخواني .. واهلي .. شو بيقولون لو عرفوا.. فكري مستحيل هالشي.. افهميني.. مابا وخلاص عزّة: ليش انتي مب متفائله يا اختي سمعيني.. اذا اتعزيني صدق واتحبيني بتسوينها قلت لج مره وحده بس.. وباي سكرت الخط قبل لا تسمع اي كلمه من ريم... عزّة ربيعتها من الصغر ما يخشون شي عن بعض.. ومتعلقين في بعض وايد.. حبّت اتعرف ريم على ربيع حبيبها لأن حبيبها حالف اذا ما عرفت ريم بالذات على ربيعه بيودرها .. وهي اتحبه ما تبا تخسره.. نواف هذا ربيع عزّة عمره 23 سنه.. يشتغل في اتصالات.. واصله كويتي بس عايش في الإمارات.. واحمد ربيعه من الصغر يحبه وايد.. ومستحيل يفرط فيه لو الثمن كان انه يترك عزّة الي يحبها.. احمد عمره 23 بعد ويشتغل في اتصالات وياه.. ريم ما تبا هالشي.. لأنها اتخاف من اخوانها وانها تفقد ثقتهم فيها.. حطت راسها على السرير ونامت.. لأن باجر لازم اتقوم اتسير اتزور عمها المريض.. عمها المسكين مشلول.. من بعد ما ياته سكته قلبيه من صدمه وفاة اخوه علي ابو ريم... نشت ريم الساعه 9 من الرقاد.. واتلست وراحت عشان تزقر اخوها عبدالله عشان يوديا بيت عمها سلطان.. دخلت عليه الحجره لقته بعده نايم ريم: حبيبي .. عبوود عبادييي.. يلا قوم عبود وهو نايم: سوسن .. سوسن.. لا تروحين والله احبج( كانت عيونه تدمع يوم يقول هالكلام) استغربت ريم من كلام اخوها وردت زقرته.. عبود فز من الرقاد فجأة وشاف ريم تبتسم له.. لف ويهه يمسح دموعه وقالها: خمس دقايق وانا بنزل ريم: اترياك.. بغت تسأله عن سوسن بس ترددت وأجلت السالفه لبعدين نزلت شافت امها تزهب الريوق على الطاوله ونوف تلبس ساره.. سارت صوب امها وحضنتها ريم: امي حبيبتي انتي صح ام راشد: شتبين يلا ريم: افا ماماتي انا ريامي .. بدايه الشهر احين وما شفنا شي.. ام راشد: والله انج مب هينه عنبوج .. عبود الولد ما قال هالكلام انتي مادري على منو طالعه ريم: افا يا امي انا دلوعتج.. تراني بظهر ويا عزوز اليوم يهون عليج اظهر وجيبي فاضي نوف: انتي ما تشبعين طلعه ريم: اففففف بدت ترمس ام العريف ام راشد: استحي اشوي.. حرمه اخوج هاي نوف: ما عليج عموتي انا وريم دومنا جيه.. خلها على راحتها انا استانس عليها(صدت صوب بنتها).. تعالي امي ساروه عن الشطانه ساره: آلو ليم.. وين ألاوه (خالو ريم وين الحلاوه) ام راشد: بل بل حتى ساروه الصغيره طالعه عليج كله تطلب وبس.. نوف: ماراحت بعيد تراها طلعت على خالتها., ريم..: تعالي يا عمر خالو ريم... انتوا شعليكم تراها القمر الثاني من بعدي طبعا في البيت.. وطلعت الحلاوه من الشنطه وعطتها اياه.. ام راشد: ما قلتي كم تبين ريم: والله القمر غالي .. يستاهل الغالي ام راشد: اممم بعطيج 1500 بسج يدج ولا لا ريم: يلا يمشون .. نرضى فيها احسن من لا شي نوف: والله انج مب ويه نعمه احمدي ربج.. نحن يوم كبرج والله 500 ما ناخذها .. احمدي ربج ريم: تراج مب قمر غالي شراتي.. هههههه نزل عبدالله وسلم على امه .. وراح صوب الباب: ريم يلا انا اترياج ريم: خلاص ا احلى ام في الدنيا.. انا سايره احين بيت عمي سلطان حليله من زمان ما شفته.. تامريني بشي امايه ام راشد: لا حبيبيتي في حفظ الرحمن... سلمي عليهم ريم: ان شااااااء الله وسارت وركب سياره اخوها الي كان في عالم ثاني ما يرمس ولا ينطق.. مب على عادته ريم: عبود حبيبي.. بلاك خبرني.. عبود:....... ريم: حووووووح نحن هنا.. وينك وصلت عبود: نعم ريم شو بغيتي ريم: طاعو هذا .. انت شايف شكلك في المظره اليوم .. ما تشوف شكلك شلون صاير.. جنه حد ميت عبود: قولي انا الميت ريم معصبه: بسم الله عليك اخوي.. لا اتقول جيه.. حبيبي انت .. لا اتعور قلبي قولي بلاك صدق عبود: ريم شو اقول .. شو ارمس.. خلاص روحي راحت من بعدها ريم: منو تقصد سوسون...؟؟؟ بلاها عبود مستغرب: شقايل عرفتي اسمها.. انا ما خبرتج اسمها ريم: انت يالس تزقرها يوم كنت راقد... عبود: آآآخ وينها خل تسمعج.. حتى وانا راقد افكر فيها... ريم: شو صاير خبرني؟؟ عبود: خلاص راحت وما بترجع لي.. ريم: ليش"" ؟؟؟ ماتت عبود: لا بسم الله عليها.. خذوها عني.. ملجت البارحه على ولد عمها .. وخلاص.. وهي بعدها تتصل واتعور قلبي.. ماباها تتصل خلاص .. لأنها مرتبطه.. مابا الجرح يتجدد كل يوم ريم وهي معصبه: ها لعابه ولا اشو.. البنت يوم اتعرس خلاص تنسى اي شي كانت قبل اتسويه حتى لو انها اتموت فيك.. بس مب انها تخون ريلها عبود: ريم .. معاج حق بكل كلامج.. ومشكلتي اني ماروم اشوف رقمها وما ارد عليها ريم: خلاص هات تليفونك عندي وانا برد عليها لين ما تنقطع عنك عبود: ينيتي انتي .. احط تليفوني عندج.. انزين وربعي اذا اتصلو ريم: خلاص غير رقمك وخبرهم عن رقمك اليديد.. اتصرف.. حاول انك اتكون انت الي تهديها من الي هي فيه.. لو ريلها شاف رقمك عندها تعرف شو بيصير بتتدمر حياتها ويمكن حياتك بعد.. عبود تم ساكت ويفكر في كلامها.. وهم وصلو بيت عمهم سلطان.. ريم: انا احين بنزل بيت عمي وانت فكر في كلامي.. وعقب بنتفاهم عبود: اوكي .. يلا ننزل فتحت روز الخدامه الباب روز: hello madam reem.. come in,,, they are wait you ريم: ما شاء الله هالكثر انا مهمه .. عسب الكل يترياني عبود: خفي خقه اشوي ترا بندخل احين عليهم عيب.. ريم: خلني انت اخق على يسوف هذا الي مادري على شو شايف عمره.. خقاق عبود: اصطلبي ريم: مابا.. عبود: هلا والله بخالد ولد عمي اشحالك.. وينك ما تنشاف يار يال خالد: وعليكم السلام ... والله موجود انت الي مالك حس... (صد صوب ريم) هلا والله بريامي اشحالج؟ ريم: بخير يسرك الحال.. الا وينهم عمي ومرت عمي خالد: داخل .. ادخلي مافي حد غريب.. الا ما سألتي عن يوسف.. ريم: ما عندي سالفه اسأل عنه دخلت ريم الصاله وفعلا شافت الكل قاعد.. عمها على الكرسي المتحرك ومرت عمها على القنفه وعلى الصوب الثاني يوسف ريم: السلام عليكم .. وراحت باست راس عمها ومرت عمها .. ويلست حذالها ام يوسف: هلا والله ببنيتي ريم.. اشحالج ريم: الحمد لله عمو انتي اشحالج واشحال عمي ان شاء الله احسن ام يوسف: انا بخير.. وعمج على حاله بخير.. الحمد لله يوسف: وانا طوفه هبيطه اني.. مالي رب ريم من غير نفس: السلام عليكم يوسف: وعليكم السلام.. ما بغيتي.. انتي ليش كارهتني ما ادانين تيلسين وياي ريم:.وبعدين يوم تدري انك شخص غير مرغوب فيه ليش اتيي ياخي انت ضيجه واتقصر العمر .. والقعده وياك اتييب امراض الضغط والقلب والشرايين دخل عبود ومع كلامها هذا: شو هالرمسه انتي تخبلتي تقولين جيه حق ولد عمج ... صدق لا حيا ولا مستحا يوسف: حليلها وا جعوها ههههههه ريم: بايخه اتعرف خالد: بسكم الله يخليكم حشا توم وجيري ما تقعدون مكان انتوا عبود: حليلك ماشفت شي .. اصلا ثنيناتم محشمين عمي ومرت عمي ... ولا هذا شوي ام يوسف: اعوذ بالله جيه محشمين بو يوسف مع نبره صوته الثجيله وهو يبتسم: عنبوكم كبرتوا الحين وبعدكم على هالحال يوسف: والله يا عبد الله انا بقولك شي.. الله يعينه الي بيتلي بأم لسان هذي ريم: بيحمد ربه بيحب ايه ويه وظهر .. يوم انه بيبتلي في ريم بنت علي.. لكن اللي بتاخذك انت بتموت قاصرة عمر من القهر يوسف: ضحكتني.. والله بموت هههههه هني تكلمت ام يوسف عشان ما تعطيهم مجال يتناقرون مره ثانيه: ها ريم اشحال امج ريم: والله بخيرعو اتسلم عليج وايد وحتى نوف سلمت عليج الا اقول يا اطربنا يا خالد.. والله اشتقت لصوتك الحلو.. (وهي تتطالع يوسف عشان ينقهر) خالد: بعدين بعدين ترا امي وابوي اهنا.. عقب.. يوسف: ويييييييييو فشلوها ريم: لا ما افتشلت بعدني .. انا اصلا كنت ناسيه اني عمي تعبان وهني تكلم عمها سلطان وطلب من حرمته يوديه الحجره لأنه تعبانه يبا يرقد شوي.. لين ما يوصل وقت الغدا عبود: عيب عليج قومتي عمي خليتيه يروح.. ام يوسف: لا يا عبود عمك روحه تعبان من قبل لا اتيون بغا يروح يرقد انا خليته يقعد عشان ريم بتيي تعرفه يحب ريم يوسف: مادري شو حب في هالمغروره ريم: فديته عمي.. وانت هيه محد طلب رايك ..( صدت صوب خالد).. ها عمي روح اطربنا يا بلبل الخليج خالد: مقبوله منج ما عليه تتطنزين ريم : لا والله فديتك.. امدحك.. والله ان صوتك حلو يوسف: اقول حد فيكم يزخ السقف عن يطيح علينا وانموت في سبيل الخرط الي ماله آخر خالد: خلاص يوسف اسكت عن البنت .. انت بلاك محترق من القهر الي فيك شوف الدخان الي بدا يظهر من خنافرك ((الكل تم يضحك .. وهنيه بدا خالد يغني.. بصوته الصافي .. وفعلا صوته حلو)) خالد: أموت انا في حبهم.. أرخص انا عيوني لهم.. ناس اسكنوا قلبي انا ... وانا سكنت بقلبهم.. هم علموا قلبي الغرام.. والشوق كله والهيام.. هم بس من كل الأنام.. ما طيق لحظه بعدهم... غالين لو مهما يكون.... مهما العواذل يعذلون.. اهواهم الى حد الجنون.. والقى السعاده قربهم ريم: فديتك ولد عمي.. شو رايك انسوي ديويتو يوسف: انتي شو ناويه اتخلين الخليقه تنقرض يوم يسمعونج ريم: طاع منو يرمس.. انت لا تسمع غيرك بيسمع,, يوم انت ما عندك ذوق شو تتحرى الكل شرواك.. يسمعون بن روغه يوسف: انزين غني خلينا نحكم ريم: مابا.. احتفظ برايك عبود: ريم عشان خاطري .. والله تولهت على صوتج خالد: احم احم.. نحن هنا.. ما نستاهل نسمع منج شي ريم: بس بشرط الكل: شووووو ريم: هذا الي هني(واتأشر بصبعها صوب يوسف)) يسد اذنه يوسف: انا اعترض.. اتوقع اني اول واحد طلبت اتغنين عبود+ خالد: يلا عاد ريم..: انزين بس عشانكم انتوا الإثنين وهذا برع القائمه.. احم احم..(( ما ترتضي نفسي مذله وحقران... نفسي عزيزه ساميه يا فلان.. وابعد من نجوم الثريا محلي..يا مرتضي منهو يدور لك اقران.. بتكون لك بدر وشمس وظلي.. نمشي حسب رايك على كيف ما كان...وتنبادلك سيف الغلا والتسلي.. الا انا عندي قناعه وايمان.. امشي بعقلي والعواطف تولي.. الله خلقني وهامتي فوق الأوزان.. وآخذ من الدنيا تجارب واخلي.. واصبر على مر الليالي والأحزان .. وارضى بما قدر من الله واخلي...والي اشوفه مرخص وانت منان...افارقه وما همني وامسحه من سجلي)) يوسف فهم ان الكلام موجه له من نظرات ريم.. شل عمره وقلبه مكسور ودخل حجرته.. خالد : االله الله وين هالمواهب.. وينه الجسمي يسمعج جان ما خلاج اتروحين الا واتسوين ويا دويتو عبود: لا والله .. يخسي الا هو يسمع صوت اختي.. اجتله ريم تمت ساكته وتفكر بموقف يوسف منها... خالد: حوووووح بلاج.. ما عليج من يوسف.. حس بالهزيمه وراح ريم عشان محد يحس فيها: هي يحليله كاسر خاطري,, بسير عنده اشوف شو رايه في صوتي نشت راحت صوب غرفته.. دقت الباب.. : يوسف انا ريم افتح نش يوسف وفتح الباب: هلا خير.. في شي.. بعد تم شي في خاطرج نسيتي اتقولينه.. ريم: يوسف.. انا ما يخصني احين في كل هذا .. خبرني شو رايك في صوتي يوسف: هذي انتي يا ريم.. الخقه واصله لقمه راسج.. بلا مشاعر بلا احاسيس.. اعتذار واعتذرنا وانتي مب قادره تسامحين... ريم حلي عني خلاص .. وعلى فكره الإسبوع الياي بسافر .. بكمل دراسات عليا.. بيخلى لج الجو هني.. محد انا ريم: شو قصدك بيخلالي الجو يوسف: ما احيدج ما تفهمين بسرعه.. اقصد بترتاحن في البيت ويا خالد وما بضايقج صك الباب عليها وهي تمت مستغربه من كلامه .. رن تليفونها .. الي متصله كانت عزّة ربيعتها.. وهاي ما كانت اتحب يوسف ولا تشتهيه من يومها.. ولا هو يحبها وما كان يحب ان ريم تتمشى وياها.. وطبعا سمع يوسف رنه ريم.. من يوم ما افترقوا من قبل 3 سنين .. واول ما نزلت الرنه هذي كانت ما اتغيرها ولو حتى اتغير تليفونها بس الرنه ما تتغير.. (بودعك يالضنا).. ريم: هلا عزوز.. غريبه شو هالنشاط قايمه من الصبح... يوم سمع يوسف اسم عزّة .. على طول ركض صوب الباب عشان يسمع المكالمه عزّة: امبوني نشيطه من يومي.. وينج انتي اتصلت علىالبيت قالولي طلعت.. لا يكون رحتي صحارى من وراي ريم: وانا اروم اظهر من غيرج.. لا انا بيت عمي سلطان عزّة: وع طاع شو من اسم يابت اخيج بيت يوسف ريم: عيب عليج تراه ولد عمي ما ارضى عليه,, رجاء لا تعبرين عن شعورج جدامي عزّة: ان شاء الله.. يلا خبريني فكرتي.. نواف حشرني تراه,,, واحمد حاشرنه اكثر ريم: عزّة انا فكرت بما فيه الكفايه .. مابا وخلاص عزّو: ريم... يلا عاد اترديني ان عزوز ربيعتج... ريم: انتي بلاج ما تفتهمين.. يا ماما تفاهمنا وانتهى الموضوع.. انا مستحيل اقابل هالإنسان يوم سمع يوسف هالكلام.. كره عزّة صدق.. وعرف معنى كلام ريم.. لأنه يعرف ريم ومتأكد منها.. عزّة: يلا عاد ريامي.. لو مره لا ترديني.. ريم: ترا بهون عن الطلعه عزّة: افف الا الطلعه .. خلاص يلا باي.. ريم: باي طلع يوسف من الحجره وسوى عمره ما سمع شي.. وياي ينزل من الدري.. زقرته ريم يوسف: نعم ريم: وين ساير؟؟ يوسف: ساير الصلاة أن احين.. ريم.: اممممم انزين مو جنك نسيت شي يوسف: لا ما نسيت شي انصدمت ريم من كلامه بس تغاضت : افاااا ... انا ما بذكرك بس اتريا الي في بالي يوم ترجع من برع يوسف: مع السلامه.. ريم: في حفظ الله سرحت ريم بأفكارها عند يوسف... الي كانت اتحبه من صغرها لولا اليوم المشؤوم الي خلاها تفترق من حبها.. يوم عرس اخوها.. كانت تتذكر الي صار.. كانت مالكه الجمال كله يوم العرس.. برقتها ومشيتها وابتسامتها .. الكل كان يطالع جمالها.. حتى رقصها الهادي الحلو.. وكان يوسف يترياها عند الباب عشان يوصلها البيت.. طلعت من الصاله ويا الحريم متغشيه.. شافت بنت خال يوسف .. وهي في نفس عمر ريم.. قاعده تتبادل وياه مسجات.. يعني كنها ترقمه بطريقه غير مباشره.... انغاضت من الي صار.. ركبت وياه السياره وكانت روحها وياه.. شلت تليفونه وتمت تطالع المسجات.. كانت كلها مسجات حب... وفجأة وصل مسج ... يوسف كان ينازعها عشان ما تطالع المسج.. بس هي سوت له طاف وطالعت المسج الي مكتوب فيه (( يوسف.. اترياك.. اتصل فيني اليوم ضروري.. لازم نخلي حد لموضوعنا.. أنا احبك وانت تباني ما يصير هذا كله)) انصدمت ريم من اللي قرته.. ويوسف كان يتوقع انه يكون مسج حب.. وما عرف الي مكتوب.. فجأه سمع ريم يقول لها: نزلني وروح لها احسن من التليفون بوايد يوسف وعليه مليون علامه تعجب: شو انزلج اتخبلتي... ريم: ترا اذا ما نزلتني بنزل جيه وانت تتحرك.. على طول وقف على جنب وتوها ريم بتفج الباب تنزل.. مسك ايدها.. : شو صاير ريامي ريم وهي تدمع: ماباك تزقرني بإسمي.. اتسوي عمرك برئ.. اقرا الي انا اقراه واعرف يوم قرا الكلام الي شافه روحه استغرب من هالكلام.. عرف ان هاي لعبه من الاعيب بنت خاله الي تحبه وهو ما يحبها .. حاول انه يوضح لها وهي مب طايعه تسمع له ولا كلمه.. وطلبت يوصلها البيت ولا بتنزل.. خاف لا تنزل واتسويها صدق.. وصلها البيت وطول الدرب هو مب رايم يكلمها.. وعلى طول اول ما وصلت البيت بطلت التليفون وطلعت البطاقه وفرتها في الدرج... وتمت اتصيح .. وهو يحاول يتصل ويطرش مسجات كله كان مغلق.. وطلبت اليوم الثاني من اخوها راشد اييب لها رقم يديد.. وطلعا نفذوا طلبها ووصل لها رقم يديد ما عرف عنه يوسف.. قطعت زياراتها بيت عمها.. قامت اتروح لهم يوم هو محد عشان اتزور عمها .. واذا شافته بالصدفه اتحط عليه اشوي وتظهر.. هذا حالهم على مدى 3 سنين ردت لواقعها ريم وابتسمت.. هي ملت من هذا الحال.. وحاولت انها اتغير وضعها وياه .. مب انهم يرجعون شرات اول لا .. علىالأقل علاقه عيال عم واخوان.. سمعت عبدالله اخوها يزقرها تحت نزلت له ريم: ها بلاك حشرت الدنيا .. عمي بيقوم بسبتك عبدالله: ههههه ما عليج انتي مني احين خبريني .. بتتغدين هني ولا نرد البيت ريم: لا اليوم ابا انتقم ولا نسيت.. بتم لين المغرب خالد: شو سالفه الإنتقام هذي.. خبروني عبدالله : يعني اونك مول ما اتعرف.. هاي توم وذاك جيري.. ريم: احلف انت بس.. جب اسكتوا هذوا وصل... اقول عبوووود حبيبي وين الديوان الشعري الي قلت راح تكتبه عني.. توصف فيه جمالي.. ولا اقول .. عد قصيده فيني احين احين يوسف: شو تتحرين الشعر فص اتهوسين عليخ ويطلع.. الشعر يباله ويوه سمحه حلوه عشان يظهر .. مب اللهم لا شماته ريم: اظن الكلام توجه لعبد الله.. لا يكون انت اسمك عبد الله وانا ما ادري (( الكل تم يضحك على حالهم)) يوسف: اتخبرج انتي تعرفين تشعرين.. ولا مااظن تعرفين كلمتين شعر على بعضهم ريم: ولو اشعرت شو بتعطيني يوسف: انتي اشعري اول وعقب بقولج ريم: لا الي اوله شرط آخره نور يوسف: الف يسدن ريم: يلا .. نرضى فيها.. خالد: احين انتي من صدقج بتشعرين .. ما احيدج شاعره (تموا يضحكون عليها وهي مغيضه) عبدالله: ايه بس لين اهني حدكم .. ماارضى هعلى القمر ريم: الله يجبر بخاطرك اخوي.. (وهي تتطالع خالد) هي انت.. انا قلت بشعر ما قلت بألف.. بقول شي من الي انا احفظه يوسف: يلا غردي ريم: )وهي تتطالع يوسف): علميني من أكون انا بحايتك؟ ...شخص عادي ؟؟ أو حبيب إنتي تبينه؟؟.... علميني ليه تاخذني حلاتك... حتى صوتك يفرح دافي حنينه... لو لمستي بالغلا بالحب ذاتك... ما شكى قلبي من أيام حزينه... يا حياتي.. يا أمل همي.. رضاتك... وقلبي غيرك بالمحبه يعينه... إيه احبك.. والهنا دربه غلاتك... وهذا عمري.. والهنا بإيدك رهينه... صدقيني هذيالدنيا صفاتك.. في عيوني زان وقتي مع سنينه... علميني من أكون أنا بحايتك؟... شخص عادي؟؟ .. أو حبيب إنتي تبينه؟؟.. ها شو رايكم.. خالد: والله الكلام حلو .. بس موجه لبنت .. منوووووووو اعترفي ريم: ما يخصكم اسرار بنات عيب تتدخلون فيها.. (وصدت صوب يوسف الي كان سرحان .. تذكر انه هو الي قال لها هالشعر من قبل) يلا مد اايدك بالألف الي وعدتني فيها عبد الله: صدق انج هب هينه.. جان خليتيني انا الي اقصد بدالج واحصل الألف يوسف طلع بوكه وتم يلعب بالألف ويبوسها: فديتج والله .. بفتقدج .. ما ادري كيف بتستحملين ريم وبوكها.. زحمه عندها.. عندي انا خلوه.. محد يشاركك ... الله يعينه ويرحمه من الف ريم سحبت الألف من ايده: بلاك اترمس البيزات الا جنه ادمي.. احسن الألف ما صدق ايي عندي القمر خالد: بدت احين عبدالله: اقول خلود.. قوم خلنا نروح الغرفه انجابل الكمبيوتر اهون من مجابل توم وجيري ريم: زين يوم عرفتوا ان فرقاكم عيد بالنسبه لي.. عاد انا الي ميته عليكم يوسف: ايه وين سايرين... بتستفرد فيني هذي ريم: قصابه قالولك؟؟؟؟ ((الكل ضحك)) خالد: والله نحن ما يخصنا بنسير الحجره وبنقفل الباب (وهو يقلد ريم) عندنا اسرار شباب وراحوا فوق ركض يشردون عن يوسف يلحقهم.. وما تم غير ريم ويوسف في الصاله يوسف: سمعيني انتي.. جان تبين اتعقين علي رمسه تراني مب فايج .. ريم: معلوم ما تتفيج لي... وبعدين وين الي بغيته منك يوسف: يبته لج.. (وطلع من جيبه جلاكسي.. لأنها كانت اتحب هالحلاوه دوم... وهو اول ما يشوفها لازم اييبه لها)) .. هاج ريم: بعدك تذكر يا يوسف.. والله ما قصرت.. وما قلت لي شو رايك بالشعر يوف يطالعها بخبث يعرف شو تبا توصل له: حلو.. وادري انج بغيتي اتذكريني بماضي حرقتي قلبي فيه.. ماضي لا انا ولانتي نقدر ننساه... بس محد حرقه غيرج.. انتي حرقتي كل شي حلو فيني.. طعنتيني في الصميم.. ريم انا اعتذرت وحاولت .. وانتي تأكدتي مع الأيام ان ما كان لي يد في الموضوع.. بس غرورج عماج وعمى قلبج وعمى كل شي حلو فينا.. ريم: ______ يوسف: ليش ساكته .. ارمسي .. انتي مستحيل تسكتين... خليتيني جزء مهمل بحياتج .. منعتيني اني ادخل في اي شي كان يخصج.. عسب جيه اقولج خلج في دربج وانا في دربي.. خلاص ما عدت اتحمل.. تراني ريال ولي كرامتي .. وكرامتي انداست منج ريم والدمعه تذرف من عيونها: يوسف لا تسافر.. يوسف: يوسف لا تسافر.. ( وبدا يصفق لها ) ما شاء الله يا بن علي هذا الي قدرتي اتقولينه... حتى احين ما تقدرين تتنازلين من غرورج واتقولين انا آسفه.. يمكن الكلمه هذي تصلح شي على الأقل ريم: يوسف.. يو... افهمني.. تدري اني ندمانه مب... ما عطاها فرصه اتكمل وراح عنها حجرته... وهي دخلت غرفه الضيوف وتمت اتصيح على الي هي فيه.. وسمعت صوت سياره تشتغل .. يوم شافت من الجامه .. شافت يوسف طالع وهو مسرع.. خافت ما عرفت شو اتسوي .. تمت تدعي ربها ان ما يصيبه شي.. وراحت صوب غرفته ودخلتها .... ولقت كل شي مثل ما هو قبل 3 سنين.. مرتب ومحطوط في مكانه.. سارت صوب الدرج الي فيه الدفاتر الي كان يحتفظ فيها .. وهي الي معطته اياهم كاتبه فيه اشعار واغاني ويوم فتحت الدرج لقت الدفاتر موجوده ومن بينهم صورتها الي عطته اباه .. وفتحت درج الكمبيوتر.. شافت فيه دفتره هو.. دفتر يومياته.. فتحت على صفحه عشوائيه ...ولقت مكتوب فيها هالكلمات . .. (( اذكريني اذا حبيتي غيري... اذكري المشتاق يا نور عينه... اذكري حب صفا لك من ضميري... ارجوك لا ينسيك منهو تبينه)) وفتحت صفحه ثانيه لقت مكتوب فيها (( هل سمعتي يوما أن رياحا استأذنت قبل الرحيل... .؟؟ هل رأيتي برقا يعتذر قبل الوميض؟؟؟ .. أو رعدا يتوسل اليك أن تسامحه بعدما صد أذنيك..؟؟ فلماذا تطلبين مني ان أحيطك علما قبل الرحيل..؟؟؟))
__________________
|
|
#3
30-03-2005, 12:36 AM
|
||||
|
||||
|
ما عرفت شو تقول بعد هالكلمات الي قرتهم.. صكت الدفتر وردته مكانه وراحت صوب الكبت الصغير وقتحته وشافت فيه كل الهدايا الي هي اهدته اياهم .. من دباديب واقلام وكل شي حلو.. وتمت ادور في كيس احمر لقت علبه صغيره فتحتها ولقت فيها خصل شعرها الي قصتهم وعطته اياهم.. قلبها عورها يوم شافت انه بعده يذكرها.. وفجأة سمعت صوت الباب.. يوم صدت شافت يوسف وراها.. ما عرفت شو اتقول
يوسف: خذيهم وياج.. حتى ذكراج احرميني منه ريم: يو ... يو .. يوسسف.. دخيلك لا تعذبني زود يوسف: طلعي برع الحجره.. طلعي برع من حياتي كلها . ابا انساج يا ظالمه .. خليني اتهنى بحياتي... ريم: لا تسافر دخيلك .. اترجاك يوسف: شو ما اسافر اتخبلتي انتي.. خلاص كل شي تم وبإذن الله ورى باجر سفري.. ولو سمحتي ابغي ارقد ممكن تطلعين من الحجره ريم: ___ (وظهرت من الحجره وهي ساااكته.. وهو ما قصر صم اذونها من قوته يوم صك الباب.. وهي تصيح.. طلع عبدالله ويا خالد من الحجره.. شافوها طالعه من غرفه يوسف واتصيح.. فهموا السالفه.. لأنهم يعرفون انهم كانوا في يوم من الأيام احباب بس تفرقوا.. وما حبوا يكلمونها في الموضوع) خالد: القمر.. تعالي شوي ابا اتخبرج عن شي في النت.. احيدج خبيره ريم ومن غيرنفس: صدق انك فايج عبدالله: ريامي يلا عاد .. بتردين عبودي اخوج ريم: لا والله ما بسويها .. ما عاش من يردك اخوي خالد : عيل يلا تعالي الحجره ريم دخلت وياهم الغرفه ... : ها شو بغيت تسألني عنه خالد: ريم هاي بنت نبا انقص عليها اونه نحن بنات .. نباج اتمسينها بالمايك ابج تتخبرين عنها .. عايبتني ريم وتتطالعه بنص عين: خلووووووود .. اتخبلت.. لا يكون انت محموم ولا شي حبيبي عبود: لا تقطعين رزق الريال حرام عليج خالد: ريم حرام عليج .. سوي خير لو مره لي ريم: مابا .. كم تعطيني خالد: يووووووه كل شي ببيزات عندها هالبنت ... مره اشتغلي ببلاش عبد الله: يلا عاد قلتي عشان خاطري ريم: اوف انزين وينها خالد: هاي الي نك نيمها .. ناعم الصوت ريم: الله يلعن ابليسك ارحم حاللك عنبوك 57 بنت عندك في الليست.. خالد : يلا عاد اخاف تظهر ريم : انزين.. وانت غير نك نيمك اول خله بلقبي... قمر 14 خالد: لا اله الله .. العن ابو الحاجه.. انزين غيرنا.. قمر 14: السلام عليكم يا الطيبه ناعم الصوت: وعليكم السلام .. ممكن اعرف انت منو وشو تبا مني.. قمر 14: اول شي انا بنت صدقيني.. وثاني شي هدي اعصابج اخاف عليج ناعم الصوت: ما اقدر اصدق شو يضمن لي كلامج قمر 14: حبيبتي برمسج في المايك شو رايج ناعم الصوت: امممممم .. انزين.. بس انتي ترمسين اول قمر 14: ان شاء الله انا الي برمس اول ناعم الصوت: يلا سوي موافقه ريم: هلا والله بناعم الصوت.. سمعينا صوتج احين عبود+ خلود.. ياسين حذال السماعات يبون يسمعونها نوره: اهلين... اشحالج.. نوره بنت عمرها 18 سنه ثانويه عامه.. صوتها فعلا ناعم وحلو... الي يسمعه يذوب فيها.. وبنت مؤدبه وحلوه ومحبوبه من بين الكل.. عيميه.. ريم: ما شاء الله عليج.. صدق يوم قلتي عن عمرج ناعم الصوت نوره: وانتي اكيد صدق يوم قلتي انج قمر 14 ريم: الا ما قلتي لي انتي شو اسمج وكم عمرج ومن وين نوره: شوي شوي علي بالأسئله.. انا نوره من الشارجه.. عمري 18 ريم: هلا والله عاشت الأسامي.. اشوف انا الشاشه منوره عندي اثاريه نورج يا نوره نوره: انزين وانتي شو اسمج ما عرفتيني عليج ريم: وياج ريم.. عمري 20 سنه من الشارجه ادرس في كليه التقنيه نوره : ما شاء الله .. شو من مجال تخصصتي.. ريم: والله انا تخصصت في مجال تقنيه المعلومات نوره: ها حلو.. شو الدراسه في هالمجال اوكي.. لأني ناويه ادخل هالمجال اذا الله راد ريم: لا المجال وايد حلو وممتع.. اتحسين انه متجدد دايما.. اقول الغاليه تراني بظهر احين .. بعطيج رقمي اتصلي فيني بيكون بينا اتصال بإذن الله نوره: خلاص مو مشكله انا بتصل بج ان شاء الله اليوم قمر 14: ******** نوره: خلاص سجلت رقمج عندي.. تبين رقمي.. ولا عادي ريم وتبا تقهر خالد: لا مابا.. بسجله عندي يوم تصلين فيني نوره: خلاص عيل حبوبه.. وداعه الله ريم: في حفظ الرحمن ناعم الصوت: Take Care قمر14: you 2 وسكرت المسنجر وهي ناقعه من الضحك على شكل خالد وهو مغيض منها شوي وبيجتلها لولا ان عبود موجود خالد: الحين انا يبتج وتعنيت وياج عسب انتي تتعرفين عليها ريم: والله يوم قلت لك كم تعطيني ما طعت تعطيني شي.. شو تباني اعطيم شي بلا مقابل خالد: بل عليج توج هافه من يوسف بيزات.. وبعدين يوم بغت البنيه تكتب رقمها وانتي على طول قلتي لا.. ريم: كييييييييييييفي.. عبود ناقع من الضحك على خالد الي شاب ضو.. : عدال عدال بو وليد لا ينط لك عرج احين خالد: حل عني عبود ترا مرتفع ضغطي من اختك هاي لين خشمي.. ريم: اقول انا يعت .. بسير اكل ابرك لي من مجابل هالويووه خالد: فارجي عاد انا قلت احين ريم اختي حبيبتي محد غيرها بيساعدني.. بغيتج عون صرتي فرعون ريم: هيه.. ما يهمنيج وطلعت من الحجره ونزلت غرفه الطعام.. وشافت عمها سارت سلمت عليه وقعدت حذاله وتمت تسولف وياه لين ما نزل يوسف وخالد وعبد الله عشان يتغدون وياهم... الكل تغدى .. وريم اول وحده خلصت فيهم وساروا الميلس تموا يسولفون كلهم ويضحكون.. عدى ريم ويوسف الي مول ما كانوا يتقارضون ولا شي. .. وهاي اول مره لهم يقعدون فيها جيه من غير ما يحطون على بعض.. ام يوسف كانت مستغربه .. بس قالت يمكن هدو اشوي وما افتكرت في السالفه.. رن تليفون ريم.. كانت عزّه الي متصله.. وهنيه فز خالد من مكانه اتحراها نوره وتم يطالع ريم.. وحبت ريم اتسوي مقلب في خالد.. ريم: الو.. عزّة: هلا والله بهالصوت... يلا جرب الموعد مستعده ريم: هلا الله .. نوره اشحالج.. مني تم خالد يخزها بنظراته.. وعبود مب قادر يمسك عمره يبا يضحك من موقف خالد عزّة: ريم بسم الله عليج.. ينيتي.. معلوم ابوي دامج مجابل ويووه مثل يوسف ريم: لا افا عليج.. زين اتصلتي توني كنت افكر فيج.. اقولها وينها نوره قالت بتتصل.. عزّة: حوووووووح منو نوره .. انا عزوز بنت مصبح بلاج انتي مخرفه جنج ريم: لا انتي الحلاة كله.. والله صوتج يهبل.. خاطري اسمعج اتغنين .. خالد وهو مب قادر وده يسحب التليفون من ريم ويسمعها .. نوره بتغني.. ما يقدر يتحمل عزّة : لا بلاه مب صاحيه اقول امي هونت عن الطلعه تراني.. مابا اتخبل .. اخاف انعدي منج وعقب يوم يشوفني نواف يشرد مني ريم بصوت واطي اتقول لها: اسكتي ها مقلب في خلود.. بعدين بقولج السالفه.. يلا اسمعج .. اطربي عزّة: هااااا جيه السالفه عيل .. الظاهر نوره هاي وحده متولع فيها.. اوكي .. شو من اغاني خالد يحبها خليه يعتقد انها بتغني هالإغنيه ريم: اممم... خاطري اسمعج اتغنين اغنيه عيضه(تدري اني موت احبك) خالد مب قادر يتحمل زود.. قاعد يطالع ريم بنص عين وهو يتوعد فيها ريم: اللللللللللللللللللللللللله.. ريم والله يا حي الي بياخذج بيتهنى بصوتج ما شاء الله عليج.. اخبرج خاطري اشوف القمر عزّة: اوهميه انج بتشوفينها يوم بتظهرين وياي ريم: خلاص عيل انتي خبريني وين بيتكم .. وانا بمر عليج ويا اخوي عبود.. وعقبها وبنيسر السنتر وهناك بعرفج على ربيعتي عزّة خالد شكله بينفجر من الغيض.. استوى احمر .. وهو يتحلف ان ما يمررها لريم .. ويراويها ويساسر عبود: اقول تراني بجتلها والله.. شو هاي اتغيضني.. والله ارتفع ضغطي .. بسير ازغدها عبود: ههههه هدي اعصابك انت اشبلاك.. شوف شكلك شلون صاير ريم: هههههههههههههههههه... والله اني قدرت العبها صح.. عزوز.. لو اتشوفين الي اشوفه احين.. خاطرج اتييبين كيمرا واتصورين المنظر الطبيعي هذا عزّة: هي والله صدقج مع اني فاهمه من كلامج انه مغيض.. بس ما علينا متى بتيين ريم: خلاص انا احين برد البيت وبتلبس وبخلي عبود ولا راشد اخوي يوصلني صحارى عزّة: خلاص عيل اترياج .. لا تتأخرين .. باي ريم: باي خالد: تدرين انج سخيفه ريم: احلف انت بس.. ما كنت ادري عبود: ههههه والله شكيت انها مب نوره.. قلبي قالي انها مب نوره خالد: وانت الثاني اسخف عنها.. يوم تدري ليش ما قلت عبود: لا حرام مابغيت احط في ذمتي .. قلت بتأكد عقب بخبرك هههههه ريم: عبود شوف شكلك شقايل.. اتقول حد فالعنك بوكس خالد: توج اتقولين حق ربيعتج بتظهرين من بيتنا.. يلا فارجي ام يوسف: خالد.. عيب عليك هالرمسه.. ها بيتها قبل لا يكون بيتك ريم: وييييييييو هزؤوه خالد: ويا هالويه يوسف.. انتبه لكلام ريم يوم قالت انها بتظهر احين .. وطبعا هو عارف نوايا هالبنت .. قال لازم اسير وراهم واعرف شو الي بيصير ريم: لا عمو خلج ما عليج منه... المهم انا صدق بروح لأني مواعده ربيعتي بظهر وياها ماروم اطول.. تامريني بشي عمر ام يوسف: لا سلامتج.. سلمت على عمها وخالد ويوسف طبعا اخر شي سلمت عليه.. وظهرت من البيت في السياره ويا عبود ريم: ها عبود شو رايك في المقلب عبود: الصراحه يبتيها صح.. المسكين كسر خاطري شوي وبيموت ريم: هي والله يحليله... الا تعال فكرت في موضوع سوسن عبود: هيه ريم.. خلاص انا عطيت رقمي لخالد وخذيت منه رقمه.. ريم: عاد ما حصلت تاخذ غير رقم خالد .. عنبوه رقمه متروس بنات عبود: لا ما عليج انتي ... عطاني رقمه الثاني الي مافيه بنات.. ما يستخدمه ريم: والله هالولد مب هين.. كم رقم عنده.. ويقص على البنات.. بس انا براويه والله .. هو خاطره يتعرف على نوره وامبين عليها بنت حبوبه .. ما بخليها اتطيح في شباكه.. بخليه هو يودر البنات عشانها ويترجاني اخليه يتعرف عليها عبود: حرام عليج والله .. هو جيه وبغا يموت علينا عقب شو بيصير فيه.. وصلوا البيت ونزلوا من السياره.. ويوم دخلو لقوا الكل قاعد في الصاله ريم+عبود: السلام عليكم البقيه: وعليكم السلام ساروه: آلي عبود... ابي تراره كبييييير (خال عبود ابي سياره كبير) عبود: عاد خالي وعبود وما تركب .. قولي خالي عبد الله ساره: آلي عبدلله.. ابي تراره كبير عبود: انا كم ساروه عندي.. الا هي وحده .. بس ما احيدها مستريله من احين تبا سيايير نوف: ههههه .. خلها تتحلم من احين تسوق سياره.. غيرها ما قدر.. هي بتروم راشد: بابا ساره .. ليش خليتي امج تفتح اسطوانتها احين.. زين جيه نزلت ريم وهي متعدله ومتكشخه وتزقر اخوها راشد عشان يوديها .. ساروه: ماما وين نعان ماني... بتير مع آلو ليم( ماما وين نعالي بسير مع خالو ريم) نوف: عيب ما عندنا بنات يظهرن رواحهن ريم: عاد انا الي بوديها احين.. راشد منو بيوديني ام راشد: وين سايره ريامي ريم: امي خبرتج تراني بسير ويا عزوز صحارى سنتر وبرجع ما بتأخر وايد راشد: خل عبود يوصلح انا تعبان اشوي نوف: خير حبيبي شي بلاك ريم: اقول تراج مب في الحجره قامت تتغزل جدامنا... عرفنا عندج ريل.. عاد مب جدامنا الله يخليج .. تسوين مسلسل مكسيكي راشد يبا يغايضها: حبيبه رشود انتي فديتج والله.. ماشي متعبني غير حبج.. مابا اظهر ابااقعد اجابلج ريم: صدق ما عندك سالفه تتغزل في هاي.. عاد لو شي يسوى قلنا زين نوف: انتي اشعليج اخوج يحبني وانتي شو غايضنج ريم: انا اتغايض منكم .. حشى ما صارت.. ترا اخوي يسايرج ما عليج انتي راشد: اقول مو جنج تأخرتي على ربيعتج.. خليني اتفرغ للقمر الي جدامي ريم: حقوق الطبع محفوظه لو سمحت عبود: اترياج ريم في السياره راشد: خلاص سحبناها.. خليني اتفرغ لحور العين الي جدامي ريم: ههه حاسب لا تصدق عمرها علينا ما فينا عقب.. (عرفت ان امها بتعصب شلت عمرها وظهرت) مع السلامه.. راشد: يحليلج يا ريم والله .. والله محد مسلينا في البيت غيرها نوف: هي والله صدقت .. يوم انت محد دومها تيلس عندي واتسليني ركبت ريم ويا عبود السياره .. عشان يوديها صحارى سنتر وهناك بتلتقي ويا عزّة... عبود: ها شو بتاخذين حق اخوج حبيج من هنالك.. ريم: لا والله اخسر بيزاتي عشانك... لا ابوي سايره اتشرى حق عمري.. وبعدين بخبرك انت الي لازم اتزهب بيزاتك ولا نسيت عيد ميلادي جريب عبود: انا كل ما ابا اسوي عمري نسيت انتي تردين اتذكريني.. اعفيني هالسنه.. ياختي ماشي ميزانيه ريم: ما يخصني .. المهم ابا هديتي عبود: خير ان شاء الله.. يلا وصلنا نزلي .. فارجي. افف ريم: بتصل بك عقب اتردني عبود: انا ما يخصني فيج.. بسير اتشحت عند المسيد مشغول .. عشان الم لحضره جنابج ريم: يالله ترزقه بواكد يكفله عشان اييب لي هديه عبود: بل عليج .. حشى.. يلا برع ريم: باي وظهرت ريم من السياره ودخلت السنتر,,, وشافت عزه تترياها في الكوفي.. ريم: هلا عزوز عزّة: هلا والله غناتي... تعالي بخبرج شي... ريم: خير ان شاء الله يا ترى بتقابل ريم أحمد؟؟ وشو موقف يوسف يوم بيوصل السنتر؟؟
__________________
|
|
#4
30-03-2005, 12:37 AM
|
||||
|
||||
|
الجزء الثاني
=========== ريم: هلا عزوز عزّة: هلا والله غناتي... تعالي بخبرج شي... ريم: خير ان شاء الله عزّة: ترا احمد ونواف يتريون في الباركينات يلا خل انروح عشان نرجع بسرعه ريم بعصبيه: انتي شو من آدميه انتي.. ياختي قلت مابا.. شو غصب عزّة: هي نعم غصب.. يلا عاد تراني وعدتهم اييبج .. يلا لا اترديني.. ريم وهي شاله تليفونها تبا تتصل في عبود ايي ياخذها... سحبت عنها عزّة التليفون: ريم.. يلا عاد.. مره وحده وعقب بقولهم انه ما عيبج .. المهم انتي تعالي معاي احين... عشان خاطر نواف ريم تمت ساكته ومشت وياها صوب الباركينات عسب يروحون.. ريم: عزّة والله اني مب راضيه بهالشي.. بس عسب خاطرج سويت هالشي عزّة: فديتج والله... ادريبج انتي من يومج ما تخليتي عني يوم بغيتج... يلا هذي سياره نواف الكروزر الي هناك.. ريم: بس مب نتأخر.. مافيني.. يادوب اروم استحمل اشوي عزّة: ان شاء الله.. يلا اركبي... ريم: ------ نواف: يا هلا والله ... شلونكم؟؟؟ عزّة: الحمد لله انت اشحالك نواف.. ؟؟ وانت احمد اشحالك؟؟ احمد: والله بخير.. اشحالج ريم..؟؟ ريم من ورى خاطرها: بخير نواف: ياخي ريم عقي الغشوه محد غريب ريم: لا انا مرتاحه جيه... وهي ما تتطالع صوبهم ابد كله تتطالع صوب الجامه الي حذالها وهي سرحانه كيف قدرت اتطاوع عزّة على هالشي.... هي كانت قاعده ورى نواف.. وعزّة ورى احمد عزّة: خلها انت اشعليك منها.. البنت مرتاحه انت شو حرنك نواف: بدا شغل الغيره احين... احمد: الله الله على هالحب.. الا اقول ريم.. صدق عقي غشوتج ترا خاطري اشوفج.. من متى وانا اتريا هاليوم.. ريم: انا قلت مرتاحه جيه وخلاص نواف: عزّة بلاها ربيعتج الا جنها مغصوبه على الطلعه هذي عزّة وهي تنغز ريم: لا نوااف مب جيه.. ترا البنيه اول مره تظهر جيه مرتبكه مب عارفه كيف تتصرف.. اعذرها تستحي احمد : ما عليه خلوها على راحتها ... الا ما خبرتج عزّة.. اختي سوسن ملجت البارحه مني فزت ريم يوم سمعت اسم سوسن و طاري الملجه .. وتذكرت عبود عزّ: احلف.. والله صدق.. مبرووووك .. عقبالنا يارب.. منو سعيد الحظ احمد: ولد عمي عبيد.. حليلها كانت وايد مستانسه ... كانت تباه من زمان والحمد لله خذته واتوفقت ريم من كثر ما تفاجئت ما انتبهت ان غشوتها طاحت وهي تمت امبهتة وتتطالع احمد.. انتبه عليها احمد وصد يطالعها وشاف في عيونها اسئله وايده ما لها جواب... وشافها نواف من الجامه وانتبه لها... وانتبه لجمالها الخلاب.. ونظرتها الساحره... وتم يطالع احمد ... عزّة: الحمد لله انفجت عقده الخجل ههههه نواف: هي والله زين.. بس ما خبرتوني وين تبونا انسير احمد وريم ساكتيييييين ما كانوا يتكلمون ويوم ريم انتبهت ان غشوتها طاحت من عليها ردت غطت ويها.. عزّة: انت اتعرف وين مكاني المفضل احمد: ليش ريم حرام عليج.. والله انج حلوه.. خليني اشوفج ريم:====== نواف: يا جماعه انا سألت سؤال وين تبونا نسير.. اليوم لازم راي ريم .. نبا مكان على ذوقها.. على شرفها ريم: كيفكم احمد: لا ما يصير لازم تختارين مكان... انتي اليوم محور اهتمامنا ريم: انا قلت كيفكم.. عزّة: يووه وبعدين ما بتستقرون على مكان ريم: انا ابا ارد صحارى خلاص تأخرت نواف: وين تو الناس حرام عليج ما مدانا نتم ويا بعض.. واحمد ما شبع منج.. ولا شو رايك احمد احمد: هي والله ودي ايلس روحي وياها ممكن.. بليز ريم وهي منفعله وبطريقه سريعه: لا مستحيل عزّة: ريم بلاج كليتي الريال.. خلاص خلاص خل نرجع .. واقول احمد بعطيك رقم ريم وانت اتفاهم وياها روحك وخلاص.. ريم تتطالع عزّة بنظرات تعبر فيها عن رفضها للسالفه.. وبصوت واطي: يا ويلج عزّة: اففففف ياخي بصراحه البنت هاي ما تباك يا احمد .. ما تستاهلها.. عنيده وراسها يابس.. احمد: ليش هي تعرفني.. ؟؟ خل اتجربني انزين ريم: اظن ريم وصلت لكم كلامي.. وعن اذنكم بنزل.. (اتجهت صوب عزّة) انا بنزل السنتر بتشرى حق عمري وانتي كيفج.. ونزلت ريم من السياره ودخلت المول.. واحمد نزل وراها وعزّة انتهزت الفرصه وتمت ويا نواف.. احمد: ريم اتريي اشوي.. ريم ريم: انت ايه شو تتحرى عمرك.. اذا باقي البنات يطيحون عليك ترا انا مب من هالنوع واسمحلي... احمد: ريم لو انا ما اعرف عنج.. جان ما اصريت اني اكلمج.. ريم انا من زمان اباج حتى من قبل لا اتكلمج عزّة.. وانا كنت السبب في ان نواف يتعرف على عزّة وهذا عشان اقدر اوصل لج.. محد يعرف بهالشي ولا حتى نواف.. كلهم يتحروني مجرد اني ابا اتعرف على ربيعة عزّة ريم: يعني المطلوب خلصني.. ترانا مب في البيت ولا مكان خاص.. هذا مكان عام يعني الكل يشوفنا احمد: اذا انتي خايفه على عمرج مره انا خايف عليج الف مره ريم وبصوت عالي: أحمد خلصني..... احمد: هدي يا ريم.. هاج رقمي واتصلي فيني... ابا اتفاهم وياج بليز.. لو بس مره ريم خذت الورقه وبسرعه دخلت المصعد واحمد دخل المصعد الثاني... ويوم وصلت للطابق الثاني.. اول ما فتح باب المصعد.. مرت حذال الكوفي شوب.. لقت يوسف قاعد.. استغربت.. شو يايبنه هني.. ما عبرته وسوت عمرها ما شافته وراحت صوب محل تويز ار اص.. عشان تاخذ لعبه لساروه بنت راشد.. وطبعا احمد يراقبها من بعيد يوسف يوم شافها روحها استانس ليش ان عزّة مب وياها ودخل وياها المحل.. يوسف: ريم بنت عمي هني.. شو هالصدفه ريم: هلا يوسف.... صدق انها صدفه معقوله اشوفك مرتين في يوم واحد يوسف: الا اشوفج روحج انا احيدج ما تظهرين روحج ريم: هي والله .. بس عزوز ربيعتي ما يت .. عندها ظروف يوسف: احسن ريم: خير يوسف: ماشي.. انا هالبنت تدرين فيني ما ارتاح لها... ما ادري ليش ما تعيبني تصرفاتها ريم: يوسف.... هاي ربيعتي الي مالي غناة عنها يوسف: والله دنيا انا يسووووف الغالي بعتيني في لحظه اما هي ما ترومين على فراقها... وتموا يسولفون ويكملون كلامهم وهي كانت تختار هديه لبنت اخوها.. اما احمد كان قاعد في الكوفي الي مجابلهم وهو مستغرب منو قاعده اترمس ريم,, مب قادر يتحمل الغيره ذابحته... احمد شايف ريم يوم هي كانت اتروح المدرسه ايام الثانويه... بحكم انه كان يوصل اخته سوسن.. وهي اصغر من ريم بسنه يعني في نفس عمر عبد الله اخوها... وهو كان معجب فيها من ذيج الأيام.. وكان دايما يسأل عنها وكان يشوف عزّة وياها في المدرسه كانت ما تفارج ريم.. فعرف انها ربيعتها المقربه يوسف: بنت عمي... ممكن تختارين لي ملابسي الي ابا اخذهم حق السفر؟؟؟ ريم: هاااااا قول جيه عشان جيه ملاحقني لهني.. لأنك اتعرف ذوقي ماكو احلى منه.. مثلي طبعا... انزين كم بتعطيني؟؟؟ يوسف: بل عليج .. نسيتي توج هافه مني الف على الشعر؟؟؟ ريم: هذا غير وحساب هذا غير.. بس يلا عشانك بسوي ديسكاونت 20% يوسف: ها والله زين يون افتكرتي اتسوين لي ديسكاونت...انزين كم المبلغ النهائي بعد الديسكاونت ريم: تأجل سفرك شوي لين بعد عيد ميلادي يوسف: هاااا قولي جيه من اول تبين هديه... لأن انتي ما تفرق عندج اسافر ولا لا,,, قلت احين بتقول بشتاق لك عشان جيه ماباك اتسافر.. مالت علي وايد اتحلم ريم: هههههههه .. لا والله يوسف.. شو ما بشتاق لك.. بشتاق.. لأن مافي حد اتقارض وياه عقب يوسف: افا بدال ما تقولين لي كلام حلو يرد الروح.. انتي هذا همج بس اتغثيني ريم تضايقت من كلامه بس ما بغت تفتح مجال للماضي يرجع لها: اقول شو رايك ندخل هالمحل سكله في ملابس رجاليه حلوه اتناسبك يوسف فهمها... بس ما حب يذل عمره اكثر بغا بفتح المجال جدامها لعلها تتنازل اشوي بس ماشي فايده: يلا ندخل وانشوف دخلوا المحلو احمد بعده يراقبهم من بعيد لبعيد وهو يتسائل منو الي وياها... فجأة سمع صوت يناديه من بعيد يوم صد شاف نواف يناديه: احمد احمد احمد: هلا نواف.. الا وينها القلب؟؟؟؟؟ نواف: مادري عنها جنه حد من اهلها اتصل فيها وقالت بتروح البيت.. وانت ها طمني قدرت عليها احمد: اسكت يا نواف شكلها معنده مب طايعه اتفج ولا اتوافق.. نواف: يحليلك والله .. الله يعينك وينها هيه احين احمد: توها دخلت هالمحل نواف: بس ها محل ملابس رجاليه شو دخلها احمد: اسكت عني روحي الي فيني مكفيني... ترا في واحد وياها من اول ما دخلت السنتر وهي ما فارقته وماعرف هو منو... وهي دخلت وياه .. هذي شوفها ياسه تختار له لبس.. آآخ يالقهر نواف: ههههههه .... يحليلك يا احمد شكلك بديت.. احم احم احمد: روح لا والله انك متفيج ريم : يوسف هذا عاشر لبس اختاره لك وانت بعدك اتقولي بعد ابا... انزين غير خذ لك من محل ثاني يوسف: محل ثاني وثالث وعاشر .. بس المهم اكون وياج ريم حست بخجل واحمرت اشوي.. بس ما حبت اتبين: افف.. انا تعبت .. انت اتشريت حق روحك وانا بعدني ما خذيت شي.. وما باقي غير اسبوع وبنبدأ دوام الكليه وانا بعدني ما خذيت شي يوسف: وين تبين اتسيرين تاخذين وانا بوديج ريم: احلف انت بس.. لا خلك انت مكانك.. مشكور وما قصرت.. المهم انا نفذت طلبك وبسير عنك احين ابا اتشرى حق عمري يوسف: انزين ممكن ايي وياج؟؟؟؟ ريم: لا مب ممكن .. انا ابا آخذ لبس حريمي.. انت عيب اتفتح عينك على هالأشيا.. يوسف: لا والله.. ها يزاتي اني ابا اكون وياج اسليج وهني رن تليفون ريم .. اتصلت فيها عزّة عشان اتخبرها انها روحت البيت لظروف خاصه.. ويوم عرف يوسف ان عزّة الي متصله تضايق واتغير ويهه.. ريم: يوسف.. يوسف.. حوح وين وصلت يوسف: وين وصلت.. وصلت اهني حذال قلبج.. بس للأسف قلبج مب طايع يفتح بابه ريم: يوسف هذا موضوع انتهى من زمان يوسف: آخ يا قلبي يا ريم.. افهميني.. دومي احاول اني ما اقول بس الاقي عمري مااقدر واقولج.. فهميني لو مره ريم: يوسف ارجوك.. تبا اتم وياي لا اتكلمني في هالموضوع.. بليز يوسف: حاضر حاضر وطلعوا من المحل.. شافت ريم احمد مجابلها وهو واقف ويا نواف... تذكرت الورقه الي عطاها اياه ومن غير تفكير طلعت الورقه من شنطتها وفرته على الأرض.. يوم شاف احمد الموقف انصدم ما قدر يستحمل.. حس انه يختنق.. مب قادر يرمس.. نش وشل عمره وطلع من السنتر ونواف مستغرب نواف: احمد شو فيك شو صار؟؟؟ احمد: حل عني نواف.. مابي حد .. انا ساير البيت.. تامرني بشي نواف: احمد مستحيل اخليك وانت بهالحاله.. بيي وياك احمد وهو متنرفز: نواف خلاص قلت لك.. انا ساير البيت .. واسمحلي مابا احد يكلمني خلاص خلني بهمي نواف: مستحيل بيي وراك لين ما اطمن عليك احمد ما سمع له وراح ركب موتره وشخط فيه بسرعه وسار.. خاف عليه نواف وهو بعد ركب سيارته وسار وراه.. واحمد كان مسرع لدرجه جنونيه... كان نواف يتصل فيه عشان يخف احمد من سرعته.. ما كان يرد عليه.. وهو يدعي ربه انه يستر وما يصيبه شي.. اما ريم فهي كانت مستانسه وايد لأنها ويا يوسف... لأنها قدرت اشوي تسترجع علاقتها وياه.. بعد ما خلصت شرواتها راحت ويا يوسف صوب الكوفي.. وهو ياسين شافت وحده يايه صوبهم.. ما عرفتها .. ويوم جربت حست انها اتعرفها بس ما تذكرها خوله: السلام عليكم يوسف وهو منصدم.. كان يشرب عصير ومن الصدمه غص بالعصير : وعليكم السلام ريم: بسم الله عليك شو صار.. وعليكم السلام.. خير اختي في شي خوله: اشحالج ريم؟؟ ريم وهي مستغربه واتحاول تتذكر هاي منو: تمام انتي منو؟؟ ما عرفتج خوله: يوسف قول لها انا منو؟؟ يوسف وهو مرتبك: هاي خوله بنت خالي ريم مصدومه: انتي؟؟؟؟!!!!! خوله: هي انا.. ليش مب مصدقه... ما علينا يوم شفتكم من بعيد قلت ايي اسلم عليكم ونفس الوقت يت بنيه صغيره صوبهم تزقر خوله : ماما ماما... ابا هالعروسه هناك يوسف: ما شاء الله خوله متى عرستي ومتى ربيتي؟؟؟ خوله: بعد ربك يا يوسف تراك انت انقطعت عنا عقب هاييج السالفه وين بتعرف اخباري... ريم: ما شاء الله مبرووووك .. مع انها متأخره.. خوله: لا ما عليج.. الا ما شاء الله اشوفكم رديتوا لبعض.. والله اني مستانسه لكم الحمد لله احين احس بالراحه ريم ويوسف تموا يطالعون بعض مب عارفين شو يردون فقررت ريم اترد عنها وعنه: لا يا خوله لا ردينا ولا شي .. وانا وياه لأني قاعده اتشرى لبس وشفته صدفه خوله: ريم.. انسي الي صار .. الي صار بسبتي.. بسبه طيش مراهقة.. ارجوج يا ريم ريم تمت ساكته مب عارفه شو اتقول.. ولا شو اترد فيه عليها يوسف: خلها على راحتها خوله.. ما ينجبر قلب على قلب ريم: اقول احين عبود بييني انا استأذن بروح البيت.. اقول خوله سلمي على الأهل وعاد تعاليلنا زورينا خوله: خلاص عيل برايج.. بزورج ان شاء الله يوسف: وين تو الناس ريم: وين تو الناس شوف الساعه كم .. الساعه 10 احين لولا ان عبود عرف اني وياك جان ما خلاني هالكثر يوسف: خلاص عيل الله يحفظج.. خلينا انشوفج قبل سفري ريم: ان شاء الله.. باي وهني اتصل عبود في ريم يخبرها انه يترياها برع.. وهي راحت له.. اما نواف فبعد ما قدر انه يقنع احمد يخف من السرعه راحوا صوب شاطئ جميرا ييلسون هناك شوي... نواف: احمد الله يهديك .. عرضت نفسك للخطر عشان شي ما يسوى احمد: نواف انت ما اتعرف انا اشكثر متعلق فيها .. محد حاس فيني نواف: هههههه .. يالله عاد متعلق اونه.. الا هي مره شفتها وما كلمتك حتى لحقت تتعلق ههههههههه احمد: اييييييييه لو انت اتعرف السالفه جان عذرتني.. انت عمرك ما سألتني ليش انا ما اتعرف على بنات.. ليش انا يوم بغيت اتعرف حددت ربيعه عزّة بالذات؟؟؟؟ نواف: بلا كان يراودني هالسؤال بس ما لقيت له رد مقتع احمد : واذا قلت لك الحقيقه احين تعذرني... نواف: انت انطق ارمس.. انا ابك ترمس احمد: ياخي انا هالبنت اباها من قبل لا انت تتعرف على عزّة .. وتعرفك على عزّة كان تخطيط مني انا... ريم هاي انا اباها من ايام ما كانت هي ثاني ثانوي.. يوم كنت اوصل سوسن اختي المدرسه كنت اشوفها .. كانت اتعيبني .. ودشت خاطري.. وكنت اشوفها دوم ويا عزّة .. خليتك اترقد عزّة عقب ما انا عرفت انها سهل انك تقنعنها انها اتكلمك بحكم ظروفها الي خلتها ضعيفه... لأنها يتيمه وهي اكبر وحده وعايشه عند عمها... ويوم انت تحسن علاقتك وياها خليتك اتكلمها عشان اتعرفني على ربيعتها الي دوم وياها... وانا اعرف ان هي مالها غير ريم ولا ريم لها غيرها فهمتني احين يا نواف عرفت انا من متى متعلق فيها نواف: افا والله.. ما هقيتك اتخش عني شي.. طلعت اتخش اشيا ولا بعد طووووول هالسنين احمد: انا ما بغيت اشغلك وياي.. اعرف غلاوتي عندك نواف: الله يسامحك بس بشو تشغلني.. وانا منو لي غيرك ... انا من فتحت عيني في هالبلاد ما لقيت حد غيرك احمد : تسلم لي والله.. عيل يالله قم خلنا انروح الكوفي عند الشباب عيب تأخرنا عليهم نواف: هيه جيه اباك فرفش.. ان شاء الله كل شي بينحل احمد : الله يسمع منك.. بس انا ما قاهرني غير شي واحد... منو هذا الي كان وياها... نواف: ياخي ليش انت جيه.. الحل عندي وانا بو هندي.. عزّة بتييب لي كل الأخبار احمد: نواف الله يخليك لا اتخبر عزّة عن قصتي مابغي انها اتعرف نواف: افا عليك راح احمد ويا نواف الكوفي يتجمعون عند الشباب هناك.. وريم وصلت البيت ويا عبود.. دخلوا سوا.. بس استغربوا لقوا البيت خالي مافيه حد... ريم: عبود.. وين امي وراشد ونوف.. ماشوف حد في البيت.. مالهم حس عبود: لحظه بدخل حجره امي يمكن راقده ريم: بيي وياك اتريا دق عبود الباب... بس محد رد عليه استغرب.. فتح الباب دخل هوه وريم وشافول الحجره فاضيه امهم محد فيها.. استغربوا.. نادوا سارينا الخدامه يسألونها: سارينا وين ماما سارينا: ماما روخ مع بابا راشد هوسبيتل شهقت ريم بصوت عالي من الصدمه.. وعبود شل تليفونه على طول واتصل في راشد يتخبره عن امه.. بس كان التليفون مغلق.. سمعت ريم صياح بنت اخوها ساره.. راحت ريم الحجره عشان اتسكت ساره واترقدها وعبود تم يحاول يتصل بس ماشي فايده.. وبعد ما نامت ساره راحت ريم عند عبود تتخبره عن امها.. ريم: عبود ها عسى بس حصلت حد فيهم.. عبود: لا راشد قافل تليفونه .. والله قمت احاتي... ريم: انزين اتصل في نوف عبود: هي والله دق راح عن بالي اتصدقين.. بتصل فيها اتصل عبود في نوف الي كان يرن تليفونها.. وبعد كم من رنه رد عليه راشد .. عبود: الو... راشد شو صاير؟؟؟ راشد: هلا عبدالله .. وينكم انتوا.. كم مره اتصلت على تليفون ريم وتليفونك ما حصلت حد فيكم.. عبود: فضى الجارج في تليفوني وريم قافله تليفونها... وانت وينك ؟؟ وشو صاير راشد: عبود امي وايد تعبانه في العنايه المركزه عبود: شوووووووووووووووووو ... ليش شو صار .. ريم: خبرني شو السالفه... عبووود اسأله عن امي.. عبود طمني عبود وهو معصب: اسكتي خليني ارمس.. ها راشد خبرني راشد: اقول الدكتور يباني وانت تعال ويا ريم... عبود: الو .. الو.. راشد .. صك الخط.. قومي لبسي عباتج خلنا انسير المستشفى بسرعه ريم: احين دقايق بس راحت ريم لبست عباتها وهي اتحاتي ومب قادره اتركز.. وعبود اكثر عنها قام يحاتي امه وما قال شي حق ريم عن تحاتي هي بعد.. وركبوا السياره وساروا المستشفى,,..ويوم وصلوا لقوا نوف ياسه عند الباب ريم وهي في حاله انهيار.. وخوف... وارتباك: نوف.. نوف.. وين امي؟؟ بلاها؟؟ شو صاير خبريني؟؟ نوف:-------- عبود: نوف وين راشد.. م ااشوفه وياج نوف وهي تدمع: داخل ويا امك في الحجره ركض عبود ويا ريم وساروا صوب الغرفه الي فيها امهم.. ودخلت ريم اول.. شافت امها في حاله يرثى لها.. ما قدرت تتحمل المنظر الي شافته اغمى عليها وطاحت على الأرض مغمى عليها... شلوها واسعفوها ودخلوها الحجره الثانيه.. ويوم دخل عبود يطمن على امه .. شافها في نفس الحاله وانصدم.. تذكر ابوه وسار صوب اخوه راشد وتم يصيح.. وراشد كان يقرا قرآن على راسها.. كانت في شبه غيبوبه .. موصلين لها اكسجين وويها مزرق.. وموصلين لها وايرات تخطيط القلب ومن هالأشيا... عبود قال لازم يتصل في بيت عمه ويخبرهم عن حاله امه.. اتصل في خالد وخبره وخالد طلع من الحجره عشان يخبر امه يوسف: خالد وين ساير.؟؟ خالد: يوسف مرت عمي علي في المستشفى يقولون وايده تعبانه... بسير اخبر امي يوسف: شو .. لا .. وريم.. ريم خالد: كلهم هناك في المستشفى.. يلا البس خلنا انروح يوسف: اترياني نزل خالد وسار عند امه دق عليها باب الحجره ام يوسف: منو؟؟ خالد: انا امي .. خالد ام يوسف فتحت الباب: خير يما .. شو السالفه؟؟ خالد: امي.. مرت عمي علي في المستشفى وايد تعبانه توه عبود متصل فيني خبرني ام يوسف: والله.؟؟ عيل اترياني خل اسير وياك.. يحليلها ما تستاهل خالد: يلا امي اترياج كلهم اتلبسوا وساروا المستشفى عند راشد عشان يطمنون على امه.. الي كان كل مالها وحالتها تزداد سوء... يوسف نزل من السياره وشاف عبود ويا نوف واقفين في الممر... يوسف: السلام عليكم.. شو بلاها عمو؟؟ عبود: مادريبها والله يا يوسف.. مادري شياها فجأة تعبت... والله قمت احاتي.. خايف (وبدا يصيح وتم يوسف وخالد وامه يهونون عليه) تذكر يوسف ريم لأن ما شافها وياهم : اقول وين ريم؟ نوف: يحليلها يوم شافت عمو ما قدرت تستحمل اغمى عليها وطاحت .. احين هي في الحجره تعبانه يحليلها يوسف: بدخل عندها بشوف شو فيها ام يوسف: بيي وياك سار يوسف ويا امه عند ريم عشان يطمنون عليها.. بس شافوها نايمه فطلعت عنها ام يوسف اما يوسف ماطاع يظهر.. تم عندها تم يتأملها .. ويطالعها ويشوف الألم الي هي فيه.. تم يفكر في حالها لو انه سافر وخلاها واذا امها لا سمح الله صار فيها شي.. ريم شو بيصير فيها.. تم ماسك ايدها بقو وضامنه لصدره.. ويلعب بشعرها ... ويقرا عليها.. وهو مسكر عيونه... فجأه سمع صوت يناديه .. صوت حن له من زمان .. صوت كان بالنسبه له حلم وردي عاشه في حياته.. صوت كان كاه حنان ورقه.. حس بحاجتها له.. ريم: يوسف .. حبيبي فز قلبه يوم سمع طاري حبيبي... حس انه فرحان وزعلان في نفس الوقت.. ماكان مصدق الي هو فيه.. حس انها قالتها وهي نابعه من كل قلبه.. وحس بمدى حاجتها لوجوده قربها يوسف: لبيه ريم وعيونها تدمع: يوسف.. انا آسفه على كل شي.. سامحني.. يو... يوسف: اشششششش لا تتكلمين.. انتي تعبانه ولازم ترتاحين.. وبعدين مافي شي يستاهل الأسف.. ترا مهما صار انتي تبقين ريم الي احبها ريم ابتسمت له ابتسامتها الشفافه الناعمه... فجأة تذكرت امها قامت من على السرير هي تصرخ: امي .. امي وينها دخل عبد الله وخالد وام يوسف ونوف يشوفون شو فيها.. صدت صوبهم وهي اتصيح : وين امي وين.؟؟؟ ييبوها... ابا اشوفها... ودوني لها.... ابا امي.. امييييييييي وانهارت من الصياح زختها ام يوسف وحضنتها وتمت اتهديها ويا نوف.. وطلعوا الباقي عنها.. وسار يوسف صوب غرفه عمته عشان يطمن عليها... دخل شافها على السرير مثل الملاك منوووور ويها .. والنور يطلع منها... وحس كأنها ردت 30 سنه ورى من الجمال الي كانت اتبين فيه.. وشاف السستر بدت اتغطي ويها بالشرشف الأبيض الي قام ما يقدر يفرق بينه وبين ويه مرت عمه.. وشاف راشد منها على زاويه من الغرفه وهو يالس على الأرض مثل الطفل ملتوي على عمره ويصيح ويشهق .. مثل الياهل.. هز هالموقف كيان يوسف.. ما قدر.. تم يفكر اذا طلعت من الحجره شو اقول لهم.. وريم .. ريم شو اقولها... لا بتكرهني اذا قلت لها انها فقدت نور عيونها... وقتها حس بموقف راشد.. وفهم ليش راشد في هالحاله.. لأنه مثله يخاف يطلع من الغرفه.. شو بيقول.. تم مذهول في مكانه من الموقف والأفكار اتوديه واتييبه.. سار صوب راشد..عشان يهديه على الأقل ويفكر وياه كيف يواجه اهله الي برع بالي صار,,, يوسف: راشد.. هدي عمرك وانا اخوك.. راشد.. عشان خاطر هالأم.. شوفها اشقايل منوره.. يعني هي مرتاحه.. اطلب لها الرحمه.. هذي الأعمار الله كاتبها لعباده لا انت ولا انا نروم نتحكم بالقدر.. فكر في ريم وعبد الله مالهم غيرك يشوفون الله ثم يشوفونك راشد: يوسف.. هذي امي.. قوام البيت كله... حاس عمري ضايع.. ماعرف شو اسوي.. ما اقدر استوعب اني ارد ادخل البيت ما اشوف الويه السمح يجابلني.. يوسف.. منو بعد هاليوم بيعاتبني وبيرشدني وبيعلمني كيف اتصرف.. (انهار راشد من الصياح وحط راشد راسه في حضن يوسف مثل الطفل الي يحتاج لحنان امه) .. ابوي راح وهي صارت لنا الأبو... وهي الي زوجتني وهي الي ساعدت حرمتي انها اتييب بنتي.. وريم وعبدالله كانت تتمنى اتشوفهم معاريس.. والحين راحت خلاص.. رااااااااااااحت.... خلت كل شي علي.. انا ضايع من غيرها .. خلوني اروح وراها... ودخل عبود لأنه حس انهم اتأخروا داخل وبغى يطمن بنفسه.. لكنه ما قدر يصدق الي شافه.. معقوله امه الي مغطينها... تم يفكر حس عمره مثل المينون.. يفكر انا في حلم ولا علم... شاف يوسف وراشد على الزاويه ياسين على الأرض.. ريوله ما قامت اتشيله.. حس انه خطوات ريله ثجيله.. حس عمره بينشل.. مب قادر.. جرب من السرير الي عليه امه... وهو يدعي في قلبه انه الي مغطينها مب امه.... واول ما شل الغطا وشاف الويه ... وتأكد اانه امه ما قدر يستحمل الصدمه تم يصارخ ومسكها وتم يصفعها ويصيح بصوت هز المستشفى بكبره... يطلب منها اتقوم .. بس عقب مسكه اخوه راشد وسحبه بعيد وتم حاضننه ويواسيه.. وطلعوا من الحجره .. وأول ما شافتهم نوف .. فهمت الموضوع.. اغمى عليها من الصدمه.. نادوا على السستر تسعفها.. وعبود مب طايع يسكت ويصارخ: خلوني اشوفها .. خلوني ارووووووح انتوا تجذبون امي مافيها شي .. ها هذي اسمعها تسمعني.. امي في البيت... تترياني ارد.. انا وعدتها اني ما اتأخر على البيت يوم اظهر. بسير بسير لها... بعدين بتزعل علي... كان عبود في حاله هستيريه شديده.. قام اكل يخاف عليه... وام يوسف تمت تترحم لها .. واتصيح .. يوسف تذكر ريم.. هي بعدها في الحجه يا ترى تعرف ولا لا.. وشو بيكون موقفها .. خاف عليها.. لأنه يعرف انها وايد متعلقه في امها خصوصا بعد وفاة ابوها ... وتم يهدي عبود عشان يدخل هو وراشد عندها ويخبرونها.. ويوم تذكر عبود ريم.. سكت وراح صوب غرفتها... بس استغرب شافها محد... طلع وحاس ان راسه بينفجر من التفكير.. خاف عليها.. سار عند مرت عمه.. قالت له انها ودرتها في الغرفه.. وسار عند راشد يتخبره عن ريم. بس محد شافها.... الكل تم يحاتيها وين سارت .. نادوا عليها في المستشفى ما لقوها.. راشد من صوب وعبود من صوب ويوسف من صوب.... وام يوسف كانت ياه حذال الحجره عشان يمكن اذا ردت ريم .. وعشان اتكون قريبه من نوف... رن تليفون عبود شاف الرقم.. شاف خالد متصل فيه: الو خالد: هلا عبود.. عبود: وينك انت ؟؟ خالد : انا في بيتكم... عبود: بيتنا ليش؟؟ شو عندك اهناك؟؟ وبعدين ما شفت وين ريم خالد: ترا انا عشان جيه اتصلت بغيت اطمنك بس ان ريم وياي رديتها البيت... خفت عليها انها اتشوف امها ميته مب زين.. وبعدين ماباها اتشوف حالتكم... عبود وهو معصب: لا اتقول ميته.. امي مب ميته(وبدا يصيح) ... امي حيه خالد .. امي في قلبنا .. ما نقدر نموتها ... امي ريحتها في ثيابنا.. امي صوتها في اذنها.. صورتها في بالنا.. امي مستحيل اتخلينا خالد: ما عليه عبود بس انت هدي عمرك وطمن الأهل ان ريم وياي عبود: مشكور.. والله ما قصرت خالد: افا عليك تراها قبل لا اتكون بنت عمي هي اختي تراها.. عبود: تسلم لي ... سكر الخط عن خالد وراح عند راشد ويوسف يطمنهم... عبود: اطمنكم .. ريم ويا خالد وداها اليت خاف عليها.. راشد: زين طمنتنا... يوسف: زين سوى خالد .. عشان ما اتشوفكم في هالحاله عبود: بسير اطمن عمو ونوف راح عبود عند عمته وعند نوف عشان يطمنهم عل ريم... وراشد راح كمل اجراءات امه .. عشان يدفنونها اليوم الثاني.... ويوسف شل امه ونوف ووصلهم البيت... وعبود تم ويا راشد عشان يخلصون كل شي ويردون البيت... دشت نوف البيت ولقت خالد قاعد في الصاله نوف: خالد... وين ريم؟ خالد: راحت غرفة عمو.... سيري جوفيها.. حالتها مب عايبتني.. نوف: خلاص انا بروح بشوف شو فيها.. خالد: انزين انا ساير البيت نوف تامرني بشي.. ولا بغيتي شي لا تترددين.. على طول كلميني نوف: لا سلامتك.. ومشكور وما قصرت راحت نوف غرفه عمتها .. مع ان صعب عليها انها تدخل الغرفه وهي اتشوف الغرفه فاضيه من غيرها... بس حاولت اتقاوم عشان ريم... دقت الباب بس ما سمعت رد وتمت ادق الباب واتنادي على ريم وهي ما ترد عليها.. لين عقب فتره فتحت لها الباب وردت قعدت على الكرسي الي في حجره امها.. تفاجأت نوف من الي شافته وخافت على ريم اكثر واكثر زاد خوفها.. شافت ريم لابسه ملابس عمتها وزاخه عصاة امها ولابسه برقع امها وشيلتها واتهزز على الكرسي.. نوف: ريم حبيبتي... خل نسير نرقد الوقت متأخر ريم_____ تمت ساكته وعلى نفس الحاله وما ترد عليها نوف: ريم اكلمج انا.. صدي صوبي... تعالي وياي كلي لج لقمه ونامي... وبعدها ريم ساكته وتمت نوف اتحاول وياها وريم مب طايعه تنطق بحرف واحد... خافت عليها نوف.. طلعت من الحجرة وكان راشد واصل وياه عبود... نوف: راشد الحقني؟؟ راشد وهو خايف: شو .. ساره فيها شي؟؟؟ نوف: لا ساره مافيها الا كل خير... المشكله في ريم... حالتها ما تسر الصراحه.. تعور القلب.... مب طايعه تنطق بأي كلمه.. اخاف عليها عن تستخف ولا يصيبها شي ركض راشد صوب غرفه امه عشان يطمن على اخته.. احساسه بالمسؤوليه كان اكبر من طاقته... بس كان يحاول بكل الطرق.. دق الباب وشافها قاعده في نفس الحاله الي كانت قاعده فيها يوم شافتها نوف... راشد وهو يحاول يصطنع البسمه على شفاته: وين القمر غايب عن سمانا؟؟ ريم اول ما شافته قامت من مكانها وركضت وعقت عمرها في حضنه وانهارت من الصياح... اهتز كيان راشد للي شافه... عمره ما توقع انه بيي يوم اخته بتحتاج له هالكثر... تم يواسيها ويمسح بإيده على شعرها .. ويلس على الأرض وخلاها تتمدد على الأرض واتخلي راسها على ريله... وتم يمسح على راسها لين ما نامت. راشد ما عرف شو يسوي حس عمره ضايع.. تم ينادي على اخو عبد الله.. لأن عبد الله بعد محتاج له بنفس الكثر واكثر يمكن بعد.. راشد: عبدالله.. عبدالله... تعال الحجره ابيك اشوي عبدالله: احين بييك... راشد: هلا عبدالله اقرب حذالي... يلس عبدالله حذال راشد على الأرضو تم يطالع حالت اخته الي ما تسر... عبدالله بنبره حزن شديده: راشد .. شخبار ريم؟؟ راشد: ريم... الله يعينها .. مالها غيرنا من بعد امي وابوي الله يرحمهم.. عبدالله.. الي صار قدر ومكتوب لا انا ولا انت كنا نبا هالشي او حتى حاسبين له حساب... بس لازم اتعرف ان الموت حق.. ولابد منه.. وبيينا يوم نحن بعد راح نلحقهم فيه.. فنحن لازم انفكر في اعمارنا.. لازم انفكر كيف انخلي امي وابوي راضين عنا وهم في القبر .. كيف نخليهم يفتخرون فينا حتى بعد وفاتهم... نبا انبين لهم انهم قبل لا يتركون الدنيا .. تركوا عيال ينشد الظهر فيهم.. ما نبا تعبهم في تربيتنا يروح بلا فايده عبدالله وهو يصيح: راشد بس هاي امي.. تعرف شو معناة امي..... راشد انا ضايع من غيرها... منو بينظم حياتي.. منو بيعطر حجرتي يوم اظهر منها... ومنو الي يدعي لي يوم اظهر من البيت... خلاص يا راشد هذا كله راح وبكل سهوله تباني اتقبل اني فقدت الخير الي انا فيه.. الأمان الي انا فيه.. لي... قاطعه راشد .. وهو منفعل من كلام عبدالله: عبدالله... انت بلاك بس اتفكر في نفسك... تراها قبل لا اتكون امك تراها امنا بعد ولا نسيت... وهاي البنت المسكينه شو ذنبها ان نعذبها بعذابنا وهي محتاجه لنا وتبينا... كيف تباها تستمر في الحياة اذا نحن تخلينا عنها وتمينا انفكر فيها... لا تنسى انها بنت امنا المرحومه.. يعني ريحتها ليش تبا تحرمها من الحياة وهي بعدها صغيره... نسيت ضحكتها الي ماليه البيت علينا... نباها ترد ريم الأوليه واحسن بعد.. وهذا كله ما بيصير بجهد منها بس... هذا كله بيصير بمساعدتنا لها ووقوفنا يمها... احنا رياييل نتحمل بس هاي بنت .. تعرف شو يعني بنت.. كائن ضعيف عبدالله: سامحني على كلامي .. بس والله غصبن عني من الي فيني... راشد: عبدالله... امي راحت وهي معتمده علينا لا نخيب ضنها... خلك انسان مسؤول.. عن البيت واختك وكل شي.. نبا حياتنا تمشي كأن امي موجوده.. واذا انت بغيت شي ترا انا اخوك وما بقصر وياك انت عارف هالشي... بس الي اباه منك احين تفتكر في هالمسكينه عبدالله: ان شاء الله اخوي... بوقف وياك وبكون قد المسؤوليه راشد: هذا ضني فيك ... نش احين سير ارقد ترا ورانا نشه باجر الصبح عبدالله: تصبح على خير... لا بغيت شي خبرني وطلع عبدالله من الغرفه وسار غرفته ونام .. لأن الفير بيسيرون المقبره عشان يدفنونها والصبح بيبدأ العزا .. يعني الناس بيونهم.. اما راشد فقال لنوف اتسير اترقد ساره وترقد هيه بعد لأنه بيرقد ويا اخته ما يبا يخليها بروحها...
__________________
|
|
#5
30-03-2005, 12:39 AM
|
||||
|
||||
|
الجزء الثالث
============ مر على العزا اسبوع ... وخلال هالأيام نوره الي كانت متعرفه عليها ريم في النت اتصلت فيها وما كانت تدري بموضوع وفاة امها... ردت عليها نوف وخبرتها انهم في عزا... خذت نوره عنوان ريم وكانت يوميا اتزورها وتقعد وياها... نوره: ريم ... نحن عيال اليوم... حتى انا وانتي بعد بنموت وبنلحقهم... اطلبيلها الرحمه ريم وهي مب قادره تسكت عن الصياح: نوره .. هاي امي... تعرفين شو يعني امي... يعني كل شي لي في هالدنيا.. انا من بعد ابوي ما فتحت عيوني على حد غير امي.. هي كانت ابوي وامي واهلي كلهم... محد بيعوضني عنها.. نوره: انا فاهمه هالشي ومقدرتنه... بس شو بتقولين... قدر ومكتوب لا مفر منه ريم: صدقيني ساعات احس نفسي في حلم.. اقول با ربي متى بقوم من هالحلم عشان ارتاح نوره: ريم عشان خاطر اخوانج.. وحرمه اخوج الي مالها غيرج... تدرين فيها حالها من حالج يتيمه.. وما عندها حد موليه بس انتي عندج اخوانج وعمج وعيال عمج.... اما مرت اخوج ما لها حد غيرج... هي ما شافت حد في الدنيا غير امج الي كانت وياها دوم... انتي بنفسج قلتي لي هالأشيا... واحين تبين تتخلين عنها ريم حست بكلام نوره وعاها على شي هي كانت غافله عنه... فعلا نوف تحتاج لها... نوف ما لها غير راشد وعبدالله وهيه... بس حتى بوجود راشد وعبدالله وجودها هي شي ثاني... وجودها بجنبها هو الشي الي تحتاجه نوف... قامت ريم على طول وسارت صوب غرفه نوف وراحت وراها نوره... ريم وهي فيها غصه بس كابته في نفسها: وين احلى مرت اخو في الدنيا مالها حس...؟؟ نوف وهي مستغربه من كلام ريم: ريم... حبيبتي انتي والله ... ولهت عليج تعالي يلسي عندي مشتاقه لج.. احس بوحده ... ريم ارجوج لا تعذبين نفسج لنج اتعذبيني انا بعد وياج...(وبدت اتصيح وصاحت وياها ريم.. تموا يصيحون فيي حضن بعض ونوره ما قدرت تستحمل الموقف الي جدامها فقامت اتصيح وياها... رن تليفون ريم.. كان اخوها لأن وصل عشان ياخذها...)) نوره: ريم حبيبتي... اخوي عند الباب بروح انا الحين ريم: ويييين تو الناس حرام والله بتم روحي نوف: افا انا بكبري مب مازره عينج..؟؟ ريم: لحظه خل اشوف؟؟ لا مازره فديتج نوره: هههههه هيه جيه اباكم... يلا بخليكم تتغزلون في بعض على راحتكم ريم: زين يوم عرفتي.. يلا فارجي خليني اتفرغ للقمر الي جدامي نوف: اقول مو جنه ها كان لقبج؟؟ ريم: لا تنازلت عنه لج... بس ايه لا اتصدقين عمرج .. تنازلت ليوم واحد نوره: الله لا يغير عليكم.. يلا بينا كول حبيبتي ريم: مع السلامه نوف: سلمي على اختج نوال وخليها اتزورنا نوره: يبلغ ريم: ايه انتي.. منو نوال هاي.. ما عليه لقيتي حبيبه غيري يالخاينه.. ما صدقتي ابتعد عنج شوي الا على طول دورتي غيري افااااا نوف: وليش انا اروم استغني عن القمر.. عقب منو بينور ليلي؟؟ ريم: فديتج والله نوره نزلت من الدري عشان اتروح... وهي توها تبا تطلع دخل خالد ويا عبدالله كانوا توهم يايين من ميلس الرياييل.. واول ما شافها خالد فز قلبه .. وانبهر بجمالها... وتوها تبا تظهر سمعت ريم تزقرها ريم: نوره.. اتريي اشوي نسيتي شنطتج خالد يوم سمع اسمها تذكر نوره الي في باله تم يفكر اذا هيه ولا لا؟؟؟ نوره: هي مشكوره الغاليه.. يلا في امان الله.. ما اوصيج... لا تنسين الي قلت لج عليه ريم: خلاص اطمني .. صار خالد يوم سمع صوت نوره تذكر انه نفس الصوت الي سمعه على المسنجر على طول سار صوب ريم عشان يسألها عن نوره: اقول ريم... ريم: هلا خالد: منو هذي؟؟؟ ريم عرفت شو يبا يوصل له وحبت تقهره اشوي: ربيعتي... ليش في شي؟؟ خالد: لا مافي شي بس بغيت اسأل ريم سوت عمرها تبا تروح فوق جان تسمعه يزقرها مره ثانيه... يتها ضحكه بس زخت عمرها خالد: انزين ... بغيت اتخبرج عن شي ثاني ريم: ها شو بعد تراني مصدعه مالي خلق خالد: لا بس سؤال واحد وخلاص... اتحيدين نوره الي كلمتيها على المسنجر اتصلت فيج؟؟؟ ريم : وانت اشلك اذ اتصلت ولا لا؟؟ خالد: افا بس يا ريم.. انا بغيتج اتعرفيني عليها ولا نسيتي ريم: لا ما نسيت... بس انا يوم قلت لك كم تعطيني ما طعت تعطيني عبدالله: يالله انتي متى بتكبرين وتعقلين اشوي ريم: احين انتوا الإثنين كل ما يبت طاري البيزات تتنرفزون وشوي تبون تاكلوني.. ليش ما استاهل خالد: لا تستاهلين ونص.. بعطيج كل الي تبينه بس جاوبيني.. وانت عبود ما يخصك في ريم تراها القمر الي ما نقدر نعيش من دونه عبود: هي والله انا مافي شي مصبرني على الدنيا غيرج يا ريم... ريم ارجوج ابوس ريولج ردي ريم الأوليه... ترا يوم بنشوفج مستانسه نحن بنرتاح وبنستانس الله يخليج عشان خاطر امي المرحومه.. انحبست الدموع في عيون ريم بس هي كانت اقوى منها ... لأن ما هان عليها اخوها.. وخذت عهد بينها وبين نفسها انها ما تصيح من اليوم وساير وتعتبر امها لوانها مب عايشه وياهم الا انها عايشه في قلوبهم وتراقبهم وعشان رضاها لازم يعيشون بالطريقه الي كانوا عايشينها حتى قبل ما تروح عنهم خالد: اوووه انت وقتك احين عبود... خل البنت اول اتجاوب على سؤالي عقب عبر عن شعورك واحاسيسك ريم: انا بجاويك لا تموت علينا.. هي اتصلت وكلمتها ... وشفتها بعد خالد: بل بل بل بل ... كل هذا يصير وانا اخر من يعلم ريم: انت شبلاك.. خلاص كاني خبرتك.. وبزيدك من الشعر بيت بعد.. تراها البنت الي كانت توها هني هي نوره خالد وهو شبه منصدم: والله توقعت... مادري يوم شفتها شي قالي انها هي الي في بالي عبود: انت شكلك بتم واقف وانت ترمس.. ياخي ايلس انزين خالد: آخ يا قلبي... يا ويل حالي انا .... كم بعيش؟ ريم: عدال يا روميو ... عن يسمعك عنتر ويغار منك عقب عبود: ابا افهم شو دخل عنتر في روميو... ؟؟؟؟!!!!!! ريم: يا بابا ترا عنتر هو اخوك العاشق الولهان(راشد) وروميو هذا الفرخ الي يمك خالد: فرخ ريلج محد غيره.. ريم: قول عني ما تقول... عبود+ خالد: صوبي كم صعب الوصول.. ولي ما يطول العنب ريم: حامض عنه يقول... الكل: هههههههههه دخل راشد وياه يوسف.. وسمعوا الضحكه واستانسوا يوم شافوا الكل يضحك وخصوصا ريم راشد: الللللللللله ياني مشتاق لهالضحكه الناعمه ريم: فديتك تعال يمي بقولك شي... راشد: فدييييييييييييييييت اختي ... والله اول مره اسمعج اتقولين تعال يمي بقولك شي... منو قدي والله الفرحه مب شالتني ريم يوم شافت الفرحه الي اخوها فيه استانست من خاطر وحست بحبهم لها: دام ان ريم القمر14 اختك... تأكد ان الضحكه ما بتفارق البيت كله دامها حيه راشد: لعل يومي قبل يومج.. ولعل عيني ما تبجيج ريم: فديتك حبيبي... (صدت صوب يوسف الي كان واقف ويطالعها بس) .. حوووح وين وصلت؟؟ يوسف: وين وصلت.....احين بخبرج ارسم غرام الحب صوره ولونت وأسري ليالي في غياهب ظلامي إشتقت لك يا ناعم الصوت وين انت في العاصمــــــه والا نويت المشـــامي تشعل حرا يق ناس لي من تكــــــلمت حين إن صوتك للمولع هيامي ليتك علي من حبك اليوم هونت هون دخيلك صرت في الحب ظامي إنته أساس الحسن والحسن منك إنت وانته لكل الزين رمزووسامي من فيض حبك في المحبه تعلمت أفراح عمري والكدروالتزامي لونت لك قصة هوانا ولونت نور الصباح ابجنح داج الظلامي هذي حقيقة حب واليوم أعلنت إنك بقلب اللي يحبك ختام وسلمتم... احمرت ريم من كلامه ونزلت راسها... اما الباقي فهم يعرفون عن حب يوسف من صغره وهو يباها راشد: انت وين تتحرى عمرك نسيت ان اخوانها هني ولا شو السالفه... عبود: عاد انت بسميك قيس يوسف: اقول سير جابل حرمتك انت ابرك خلني اتهمنى بضوء القمر راشد: الله الله الله ... عدال يالرومانسي يوسف: وانت عبود جيه اتسميني قيس.؟؟ عبداللها طالع ريم وضحك: انت قيس.. وراشد عنتر.. والمحروس اخوك روميو ريم: ههههه فضحتنا راشد: ايه حرام عليكم.. انا احسن عن عنتر يوسف: انزين انت سميتنا كلنا الا انت ما عرفنا شو؟؟ ريم: انا بخبركم مجنون ليلى ملاحظه::: (((( الخاطره مقتبسه من عضو المنتدى* بريد الغرام 87* )))) عبد الله: احلفي انتي بس... لا الحمد لله ما تخبلت بعدني عشان احب ريم: افا يا عبووووود علينا... نسينا ما كلينا خالد: اخبركم ايه بلا الغاز شو السالفه خبروني ريم: انت اول واحد اتعرف راشد: يعرف عن شو؟؟ خبرونا يا عشاق يوسف: نسى عمره الظاهر عاشق نوف توها نوف نزلت من الدري وسمعت طاريها: بلاها نوف ؟؟؟ ريم: تعالي يا عبله... عنتر يترياج عبود + خالد+ يوسف: ههههههه راشد: اذا الغيره.... تعالي ما عليج منهم زين... تعالي اشتقت لج ما شفتج من الصبح يوسف: بدا شغل المغازل.. اقول تراك مب حجرتك ريم: انت اشعليك منهم خلهم... ترا هم هناهم في المغازل اهني... في الحجره عندهم شريك ثالث.. سارو ما تخليهم يتغزول الا وبدت اتصيح عبود: يحليلكم من عشاق... في معاناة اثاريكم وانا مادري.. خالد: ياخي منو قال لكم اتيبون بنيه.. اول اشبعوا مغازل عقب ييبوا الي تبونه يوسف: والله بنشوف انتوا لا عرستوا متى بتييبون عيال.. اخاف الا اتيبون عيال على طول.. ريم: ههههه وانا اسمي بضحك عليكم وقتها.. وتموا الكل يضحكون ويسولفون.. ردت المياه إلى مجاريها... تغير حالهم من السيء الى الأفضل والأحسن.. ============= ومرت 3 شهور من وفاة امهم... وريم طبعا داومت في الكليه .. كان ثالث سنه لها .. وعبدالله وخالد ثاني سنه لهم... وعلاقه ريم بيوسف ازدادت مع مر الأيام... ماقاموا خالد ويوسف يفارقون بيت عمهم... صارت ما تحلى القعده لهم الا وهم متيمعين... وطبعا ريم حققت امنيتها انها اتسوق بعد اصرار منها وافق راشد اخوها ... ريم: الو... نوره اشحالج.. نوره: هلا والله اشحالج انتي شخبارج؟؟ ريم: بخير يسرج الحال... وينج ما تبينين.. نوره: تدرين يا ريم بدينا دراسه وانا ثانويه عامه .. يعني لازم اكرف عدل عشان النسبه ريم: يالدحيحه انتي.. محتجه لنا بالثانويه هذي.. يا اختي لا انتي اول ولا اخر وحده ثانويه عامه نوره: شفتي عاد.. المهم ما علينا.. شو الكليه وياج ريم: والله تمام .. كل شي تيك تاك نوره: والله اشتقت للقعده معاج.. بس مشكله ان امتحانات الفصل جربت وانا ابا اشد حيلي ريم: يالله ربي يسهل عليج ويوفقج يا رب نوره وهي اتكلم امها.... : خوب الآن ميام ( ان شاء الله بيي احين) ريم: ما شاء الله.. بدت اتشفر الإخت.. بس حاسبي عن اتسبين.. تراني افهم للسبات شوي نوره: ههههههه الله ياخذ ابليسج انتي ما تتعلمين غير الذم.. المهم ما علينا امي تباني احين بسير لها وبكلمج مره ثانيه ان شاء الله.. ريم: خلاص اوكي.. سلمي نور: يبلغ .. باي ريم: باي بندت ريم عن نوره وتذكرت انها ما كلمت عزّة ربيعتها من زمان... فقالت بتتصل لها تتخبر عنها.. ريم: هلا والله بغناتي... اشحالج عزّة: اهلييييين... بخير يسرج الحال... اقول الشمس من وين طالعه اليوم؟؟ ريم: هههههههه .. سوري والله.. تدرين انتي بظروفي عزّة: لا مادري... المهم خبريني وينج واخبارج.. والله من يوم ما انتقلت لتقنيه دبي مووول مب شي من غيرج والله... ودي ارجع بس انتي تدرين مو بيدي ريم: هي والله جان زين.. وايد مفتقدتنج... احس بوحده عزّة: بس حتى لو.. هذا مب معناته ان نفترق.. بنتم رباعه شرات اول واحسن ريم: تدرين مالي غناة عنج.. الا ما خبرتيني شو اخبار نواف؟؟ عزّة: هييه زين ذكرتيني... نواف خلاص بيخطبني تخيلي.. ريم: والله .. مبرووووووك... تستاهلين كل خير عزّة بنبره حزن: بس انا خايفه ما يوافقون لأنه كويتي .. عزّة: لا اتخافين.. اذا الله كاتب كل شي بيصير.. انتي ما عليج .. ان شاء الله خير عزّة وهي تتألم وصوتها مغصوص تبا اتصيح: ريم .. انا متعلقه في نواف وايد.. هو كل شي بالنسبه لي.. عوضني كل حنان انا فاقدتنه.. ما اقدر اودره او اتخيل حياتي من غيره.. نواف هو حياتي كلها.. هو امي وابوي وحبيبي وكل شي.. احبه احبببببه ريم: عزّة حبيبتي... انتي هدي عمرج ما بيصير الا كل خير ان شاء الله.. انتي ما عليج بس هدي اعصابج.. الا اتخبرج.. ما تعرفين شي عن احمد؟ عزّة وهي مستغربه: غريييييبه ليش تسألين عنه؟؟؟ ريم: مادري يا على بالي.. عزّة: يا على بالج ولالا؟؟؟ ريم: والله مافي شي من الي اتفكرين فيه.. وخلاص مابا هونت مابا اعرف شي عنه عزّة: ماشي هو عرف ان امج اتوفت وحتى حضر عزاكم طول الأيام الثلاث الأولى... ودومه يروح الكليه ياخذ اخته سوسن عشان بس يشوفج.. الريال متولع فيج هههههه ريم وبإنفعال: قولي حق نواف خل يقوله لا يحاول وياي.. ويبتعد عن طريقي عزّة: حوووووح يالحبيبه انا ما يخصني ولا اتدخليني في متاهات ويا نواف.. تبين اتقولين له شي كلميه بنفسج ريم: اففف منج... المهم انا سايره اقعد ويا حرمه اخوي.. عزّة: خلاص اوكي برايج... باي باي وسكرت الخط عن عنها.. وتمت اتفكر في احمد.. حست باللوم للي سوته فيه يوم فرت رقمه على الأرض... بس بسرعه طردت هالأفكار من راسها.. وراحت عشان تيلس عند اهلها.. لأن خالد ويوسف عندهم .. يوم نزلت من الدري شافها راشد: الله الله .. اقول طفوا الأنوار .. نور القمر يكفي ويسد تراه.. ريم: فديتك والله اخوي.. (صدت صوب خالد ويوسف) هلا عيال عمي اشحالكم.. يوسف: بخير طاب حالج..انتي اشحالج خالد: بخير ربي يسلمج ريم: يوسف.. بلاك الي يشوفك يقول واحد اعلن افلاسه يوسف وهو يطالعها بحزن: ريم.. احس بالغربه من احين.. لأن سفري جرب.. أجلته وايد وما اقدر أجله اكثر ريم شهقت : هيييييييييييه... لا يوسف لا اتروح يوسف: ريم .. تدرين انا طموحي عالي وابا اكمل دراسات عليا في التجاره عشان اقدر ادير شغل ابوي بطريقه احسن من احين.. عبدالله: ولا تزعلين يا ريم.. كل صيف بنروح عنده ولا هي سنتين وبيرجع لنا ان شاء الله يوسف: فديتج والله هالكثر بتشتاقين لي... ؟؟ ريم اتحاول تخفي حزنها عشان اخوانها ما يحسون بشي: لا بس مافي حد اتقارض وياه اذا رحت؟ نوف: افا وانا شو هني... ريم:خل اشوف ......امممم انتي ما تنفعين لي.. نوف: لا والله.. عاد انا الي ميته عليج.. وع راشد: وانا شو شعورج صوبي نوفييييي ريم: هاي ما عندها شعور اظن نوف وهي تتطالع ريم بنص عين : انا احمل كل احاسيس الحب صوبك وامتلك كل حب العالم مكنون في قلبي لك راشد: كم بعيش انا قولو لي كم...؟ خالد: اقول عنتره.. اسكت الله يخليك راشد: خييييبه بلاك يا ريال ما قمت تتحمل تسمع كلام حب الا وشبيت نار عبدالله: ههههه خله .. هذا العاشق الولهان.. يغار لأنه ما عنده من يقوله هالكلام الحلو خالد: اسكت يا فيلسوف العرب ريم: بس انا احيد الليسته عندك ممزوره .. عبدالله: ذاك اول يا ريم والأول تحول... خالد: عبوود اكرمنا بسكوتك يوسف: ليش اتسكته خله يرمس.. نبا انعرف.. ولا نسيت ان ماشي اسرار امبينا عبود: عاد الي يقول انا بمشي على كلامه.. انا بخبركم سلمكم الله.. ريم اتعرفت على بنت في ليستة مسنجر خالد.. لأن بغاها اتقردنها واتعرفها عليه... المهم البنت احين قامت تتصل في ريم واتزورها .. ومب طايعه اتعرف خالد عليها.. وخالد متخبل عليها ويباها.. فمستوي حضرته العاشق الولهان خالد: عبود.. دور مني مناك يمكن نسيت شي ولا شي.. ريم: هههه .. حليلك يا خلود.. والله اذا ما خليتك اتودر سوالفك البطاليه ما اكون انا ريامي راشد: ادريبج اختي لا حطيتي شي براسج مافي شي يردج عبود: هي والله.. اختي واعرفها زين ما زين... لا بغت شي وحطته في راسها بيصير نوف: هههههه .. غمضتني خلووود.. بس تدري.. اظن اني شكيت في البنت.. نوره اسمها ريم: ماشاء الله مرت اخوي.. من وين وارثه الذكاء ما شاء الله ما احيدج ذكيه خالد وهو حاس انه مفتشل جدامهم: اخبركم انا بروح احين.. في امان الله ريم حست فيه وقامت وياه تلحقه عشان ما يروح: خالد .. خالد تعال بكلمك خالد رد عليها من غيير نفس: نعم.. خير في شي ريم: بلاك زعلت مني.. عاد يهون عليك تزعل مني؟؟ خالد: ريم متى بتحسين فيني.. والله احبها ريم: خالد حبيبي.. اصبر علي اشوي.. انا مابا البنت تنجرح بسبتي وانت تدري مافي بنت ترضى ان الي اتحبه يرمس غيرها.. وثاني شي والي هو الأهم انها ثانويه عامه مابا اشغلها بالحب وغيره خالد: اولا انا والله ودرت الكل .. ماباهم مستغني عنهم.. وثانيا.. اخاف البنت اتطير مني واتحب غيري ريم: لا نوره بنت عاقله انا متأكده انها ما بتسويها .. انت اصبر مابقى وايد خالد: اكيد يا ريم.. ريم: اعتمد افا عليك انت بس خالد: انزين على الأقل امدحيني جدامها .. تمي ارمسي عن انجازاتي العظيمه ريم: هههههه الي يسمعك يقول رئيس دوله ولا شي خالد: ليش عندج راي ثاني فيني ريم: لا ما عندي غير انك شيخ الرجاجيل خالد: فديتج.. انزين انا بروح احين اوكي ومثل ما وصيتج ريم: افااااااا واحين انا تعنيت وراضيتك عشان اترد داخل.. اتقولي بتسير خالد: لا والله مواعد الربع في الكوفي.. وازقري عبود خل اييني بترياه في السياره ريم: احين انت بتحرمني منك وتبا تحرمني من عبوود... خلاص عيل في وداعه الله.. عاد مر مره ثانيه لا تنسانا خالد: عمرج شفتي واحد يستغني عن القمر.. يلا باي ريم راحت ودخلت الصاله ونادت على عبود.. الي بدوره سلم وراح ويا خالد عشان يروحون الكوفي.. يوسف: ريم بغيت ارمسج اشوي ممكن.. من بعد اذن راشد طبعا؟ راشد: افا عليك يوسف.. تراها بنت عمك اترمسها متى ما تبا ريم: انزين خل انسير الحديقه هناك الجو احلى ويساعد على الكلام.. هناك المنظر الطبيعي احلى على الأقل من هالمناظر الي هني.. اتغث نوف: احسن تدرين.. عشان استفرد بأخوج.. ياخي الواحد مايروم ياخذ راحته في هالبيت اشوي يوسف: خذوا راحتكم لأن يمكن انطول بالكلام.. راشد: هذا احلى شي سمعته... يلا فارجوا.. لا اتضيعون الدقايق الحلوه الي بعيشها وهني صاحت ساره الصغيره وفزت نوف من مكانها وراحت عند بنتها..وتمت ريم تضحك ويا يوسف على شكل راشد وهو منغاض ريم: حليلك.. ما تهنى المسكييين ههههههه راشد: ايه انتوا عقاب لكم انكم ضيعتوا الوقت علي ماشي ما ترمسون بعض بإنفراد لين ما تيي نوف ريم وهي تبا اتغايض راشد: اقول يوسف.. تعال نروح الحديقه(وهي تقلد راشد) ما با اضيع الدقايق الحلوه الي انا فيها راشد: ما عليه انا اراويج يا ريموووو رجعت نوف وشافت راشد معصب تمت تضحك على شكله.. نوف: ما عليك منهم زين.. خلاص عطيت سارووه للخدامه عشان اترقدها.. ونحن بنعبر عن مشاعرنا المكنونه راشد وهو يأشر بإبده صوب ريم ويوسف: يلا go out يلا... طلعت ريم ويوسف وهم يضحكون وقف يوسف وتم يطالعها وهو مبتسم.. استغربت من موقفه تمت اطالعه بنظره فيها 100 سؤال مب عارفه كيف اترتبهم وتسأله اياهم: ايه .. انت وين وصلت وشو تتطالع؟ يوسف: اتأمل في القمر الي جدامي.. ياني بشتاق له استحت ريم من كلامه واحمرت ونزلت راسها يوسف: تصدقين ريم.. شكلك وااااايد حلو وانتي تستحين.. ريم.. ابغي اقولج كلمه وحده بس.. اباج تفهميني ارجوج..... ممكن ريم: تفضل .... قول؟ يوسف: طولت بالي عليك لكن تعبت ارتجيك، مدري ابيك وتبيني او بس انا اللي ابيك..؟ ريم سكتت ما عرفت شو اترد عليه وتم هو يطالعها يتريا الرد منها يوسف: ريم.. شو معناة سكوتج.. ابي اطنت قبل لا اسافر بليز يكفيني من صوتك همسك ومن انامل ايديك لمسك ورمشي يعانق رمشك واقولك احبك ريم: راشد: يعني انت طول هالسنين وبعدك ما تعرف احساسي صوبك؟ يوسف وهو يبا يلعوزها: لا ... ما عرف.. تدرين فيني ما افهمها على الطاير .. لازم شي واضح ريم: هههههه ... عشان جيه انت حاس عمرك ما تقدر تنجز في شركه عمي.. لأنك ماتروم تفهم الشغل على الطاير تبا من يفهمك اياه يوسف: لا تغيرين الموضوع.. يلا ردي علي.. عندج 10 ثواني ريم: اممممم انزين ابدأ العد التنازلي ويوم اتخلص بقولك يوسف: وعد.. ريم: بروميس يوسف: 10,9,8,7,6,5,4,3,2,1 يلا ريم: احبك... (وبعد ما قالت هالكلمه حاولت انها تشرد وتدخل البيت بس يوسف لحق عليها ومسكها من ايدها ويرها.) يوسف: وين شارده عني اليوم.. ماشي شرده.... محبوسه في قفصي الذهبي ريم: عدااااال .. لا يطيح نصك من الخقه الزايده... يوسف: احبك لأنك الاجمل وانك في الحياة افضل وجا دوري انا اسال وش اللي محببك فيني ريم: اعيش بك ومن اجلك 00 واحبك اكثر من اهلك 00 واذا منت مصدقني غمض عيونك اشرح لك 00 يوسف: لي قلب مايقسى ... لي روح ماتنسى .. ولي حبيب .. من دونه ... والله مسوى ريم: أنت الايام ... لاشانت تحليها .. يامناة الروح ... يالغالي طلع راشد من البيت وسمع ريم وراشد وهم يتغزلون.. ضحك واستانس في خاطره ان المياه ردت لمجاريها.. وانه ما بيلقى احسن من يوسف لأخته.. راشد: صادووووه... شكه.. شو اتسوووون؟؟؟ ريم: اسرار.. انت سير جابل حرمتك. راشد: لا شبعت منها ... قلت ايي اجابلكم اشوي يوسف: انت شبعت ما اصدق.. اكيد تحت راسك شي.. ييتك هذي مب ببلاش راشد: لا حبيت اشم شويه هوى عشاق يداد عشان اتعلم واعلمهم اشوي من خبراتي استحت ريم من كلام راشد وعرفت انه يقصدها فسكتت يوسف: راشد بغيت اقولك شي.. وابا اقوله جدام ريم.. ولو الود ودي اقوله جدام الناس كلها ريم تمت تنغز يوسف بنظراتها.. بس هو ما عبرها.. وطنش نظراتها راشد: قول.. يا كثر ما اتقول هالأيام.. غرد اشوف يوسف: يشرفني.. ويفرحني.. ويعلي من شاني.. اني بكل فخر اطلب ايد ريم منك.. .. ها شو رايك.؟؟ موافق.. فديتك والله.. مبروك عليكم انا... (وتم يبوس راشد ويسلم عليه وراشد ميت من الضحك عليه) ريم طبعا مستحيه من الموقف ودخلت داخل البيت .. وشافت نوف قاعده اتأكل ساره بس ما عبرتها وركضت سارت صوب غرفتها.. راشد: بلاك .. بلاك متصرقع.. يابوي خل انشاور البنت اول يوسف وهو منصدم: افا يا راشد.. البنت موافقه ما تشوفها استحت وراحت.. يلا عااااد خل الخطوبه اتم قبل سفري ابا اطمن قبل لا اسافر راشد وهو يبا يلعب بأعصابه: اسمعني يا يوسف.. اتريا البنت بعدها تدرس.. ويوم اتخلص يصير خير.. وبعدين الصراحه يصعب علي ايوزها .. ياخي مالي غناة عنها.. وبعدين نحن لا بغينا انويز حد ما انشاور البنت يوسف وهو معصب: راشد... انا ما قلت ابا اعرس.. على الأقل ابا الناس اتعرف انها محيره لي.. وبعدين شو ما لك غناة عنها.. قول حق غيري هالكلام.. ولا انت نسيت ان عندك حرمه.. وانا شو فيني عسب انرفض راشد تم يضحك على شكله: والله حاس فيك.. يوم من الأيام انا كنت شراتك جيه اهبل.. هههه .. لا اتحاتي نحن منو بنلقى احسن لريم من ولد عمها.. محد بينفعها غيرك يوسف: احححح.. الحين الواحد يعرف يرتاح.. اقول بكلم امي وابوي اليوم وباجر الفير بييكم نخطبها راشد: هههههههه .. عنبووووك الفير عاد.. ليش مستعيل انت جيه يوسف من غير لا يحس قال: احبها والله احبها.. (ويوم انتبه لنفسه ولكلامه انحرج من راشد وسكت) راشد: معلوم بتحبها... هاي ريامي كل من يشوفها يحبها.. انا اعرف انك اتحبها وكلنا انعرف... ياخي حتى وانتوا كنتوا متزاعلين الحب كان باين عليكم يوسف: خلاص عيل انا بسير احين الحق على امي وابوي قبل لا يرقدون اخبرهم.. يلا باي وما اتريا راشد يسلم عليه وراح ركب السياره واسرع من الوناسه الي هو كان فيها.. مب مصدق انه اخيرا راح ياخذ القمر الي في باله يا ترى شو بيصييير؟؟ شو مصير احمد وياها؟؟ وشو عن موضوع سوسن هل هي بعدها على لعبتها ولا تغيرت؟؟ وشو بيصير بين نوره وخالد ..؟؟ بيتعرفون على بعض ولا لا؟؟
__________________
|
|
#6
30-03-2005, 12:41 AM
|
||||
|
||||
|
الجزء الرابع
========== طبعا يوسف الفرحه ما كانت شالتنه ... لأنه يحب ريم من كل قلبه ويباها من يوم ما هم صغار.. كان يتذكر يوم كان قاعد ويا ريم عند البحر لما كان عمره 18 سنه وريم كان عمرها 14 سنه .. كانوا طالعين طلعه جماعيه الكل كان وياهم حتى عمه المرحوم كان موجود.. هم الإثنين ودروا الكل وساروا يتمشون حذال البحر رواحهم.. ريم: يوسف.. اتشوف اشكثر البحر كبير.. يوسف: هيه ريم: احبك اكثر عنه.. يوسف: اتشوفين اشكبر السما الي فوقنا.. ريم: هيه يوسف: احبج اكثر عنه ريم وهي خجلانه .. سارت قعدت عند الصخره الي موجوده على الصوب الثاني يوسف: ريم شوفي شو بكتب.. ريم: وين بتكتب يوسف: على الشاطيء وبدا يوسف يكتب اسمه واسم ريم مجموعين في قلب كبير.. ورغم ان الأمواج كانت اتيي فوق الكتابه الا انها ما كانت تنمسح.. ريم: شوف حتى الأمواج تشهد بحبنا الأبدي يوسف وهو يصرخ بصوت عالي: ريم احبببببببببببببببببببج استحت ريم من الموقف لأن اهلها كلهم صدوا صوبهم وتموا يضحكون عليهم وهي كانت منحرجه من الي صار.. ورجع لواقعه وتم يضحك.. وصل بيتهم ونزل من السياره بسرعه .. وما انتبأه ان السياره بعدها شغاله ما سكرها... دخل الصاله ولقى امه وابوه في الصاله يوسف: الســــــــــــلام عليكم امه+ابوه: وعليكم السلام او يوسف: اقول يوسف شو الي مونسنك هالكثر؟؟ يوسف: امي انا اسعد انسان في الدنيا امي.. بس ماراح تكتمل فرحتي الا بعد ما اتقولون لي.. ام يوسف: قبل لا اتقولي.. بغيت اخبرك شي قبل لا انسى يوسف: خير يما ام يوسف: خالك ابراهيم.. قرر ياخذ ابوك وياه المانيا عشان يسوي علاج طبيعي هناك.. لأنه سامع ان هناك عندهم علاج حق حالات مثل ابوك.. شو رايك؟؟ يوسف: والله.. الله يبشرج بالخير امي.. صدق ان اليوم اسعد يوم في حياتي.. واكيد بكون موافق على هالراي دام انه يخص صحه ابوي وسلامته ابتسم بو يوسف على كلام ولده : ها يا ولدي.. شو الي بغيت اتقوله؟ يوسف: هيه... بغيت اقول لكم اني قررت اكمل نص ديني.. فأباكم تخطبون لي قبل لا اسافر ارتسمت البسمه على ويه امه وقالت له: والله يا ولدي ها اسعد يوم في حياتي يوم اسير اخطب لك.. واشوفك معرس واستانس لك.. بو يوسف: انزين لحظه منو هالمخبوله الي بتاخذك.. أأقصد سعيده الحظ يوسف: افا يبا.. ما عليه.. تضحك علي.. مقيوله يوم هي جذي.. اثاريها طالعه عليك وانا مادري ام يوسف وهي تضحك: ههه يحليلك يا يوسف اول مره اشوفك جيه مستانس من خاطرك.. انزين بلا منو هيه يوسف: ابا بنت عمي ريم بو يوسف: والله ونعم الي اخترت.. انا موافق ... لأني من زمان خاطري انك تاخذها.. ما بتحصل احسن عنها ام يوسف: هي والله.. خلاص على بركه الله يوسف: والله خلاص موافقين.. خلاص عيل يلا قوموا تراهم بعدهم وايعين خل انسير نخطبها احين ام يوسف : ههههههههههه .. اتجل اشوي يا ولد شو بلاك انت... حد يسير يخطب هالوقت.. وبعدين لا تنسى ان ابوك هو ابوها يعني انت لازم تخطبها من عمها.. يوسف: عمي الغالي العزيز.. هل تسمح لي ان اتزوج بنتك المصون بو يوسف وهو يضحك: طبعا.. انا موافق وتم الكل يضحك ومستانس... وراح يدخل حجرته عشان يرقد.. بس ماياه رقاد تم يفكر فيها.. في بيت راشد ريم قاعده في غرفتها.. دخل عليها راشد يبا يكلمها عن الموضوع..... راشد: ممكن ادخل ريم: حياك اخوي.. راشد: شو اخبار القمر؟؟؟ ريم: بخير الحمدلله...اقول عبدالله بعد ما رد من برع صح راشد: هيه.. افاااااا احين رشود عندج تسألين عن عبود ريم: لا فديتك كلكم اخواني حبايبي.. انزين ما قلت لي.. شو يايبنك هالوقت غريبه راشد: اشتقت لإختي قلت اييها.. ليش حرام ريم: لا مب حرام بس مستغربه راشد: انا ادري شو تبين توصلين له.. يوسف صح ريم استحت ونزلت راسها ومسك ويها ورفعه وتم يطالعها: والله وكبرتي يا ريم وصرتي عروووس ريم وبدلع: راااااشد.. راشد: عيون راشد.. حبيبتي.. انتي شو رايج.. لا تستحين مني ريم: والله يا راشد اظن لو الف الدنيا ما بلقى احسن من ولد عمي راشد: هذي اختي .. هذي بنت ام راشد الي احيدها (يوم سمعت ريم طاري امها تمت اتصيح في حضن اخوها) راشد: ريم حبيبتي .. لا اتصيحين.. لو امي عايشه جان افتخرت فيج.. وحتى هي في كفنها .. هي مفتخره فيج ريم: راشد.. كنت اتمنى امي اتكون وياي في هاللحظات.... دومها كانت تحلم بهاليوم.. كانت اتحب يوسف وايد وتعرف اني احبه وانه يحبني راشد: يلا عاد ريم.. ترى انا بعد بصيح.. ريم دموعج غاليه علي.. ريم: خلاص ها مسحت دموعي وما بصيح ابدا وعد مني.. بس انت اخوي حبيبي لا اتكدر عمرك راشد: هيه جيه اباج.. انزين يالعروس.. بسير احين ارقد .. وان شاء الله باجر بيي عمج ويا حرمته يخطبونج ريم: بهالسرعه راشد: هيه ما تدرين به يوسف... كان وده ايي الفير .. بس كلمني توه وخبرني انهم بيوون باجر.. وطبعا انا مالي شغل الخطبه بتكون من عمج.. لأنه هو ابوج ريم: اكيد.. فديته عمي والله.. الله يشافيه راشد: يلا تصبحين على خير ( وطلع راشد من غرفتها وسار يرقد في حجرته.. وريم سرحت في افكارها بيوسف.. وفجأة سمعت خطوات على الدري .. قالت اكيد هو عبود ... طلعت من الحجره عشان اتروح له لأنها بغت اترمسه.. ) ريم: عبود حبيبي تعال ابا اكلمك شوي عبود والحزن مرسوم على ويهه: هلا ريامي.. حتى انا ابا اكلمج ريم خافت لأن شكل عبود ماكان يطمن...: عبود شو بلاك شو صاير خبرني عبود والألم باين في عيونه.. : سوسن يا ريم سوسن خاينه... ريم تعجبت لأنها هي بعد بغت اترمس عبود عنها: شو صاير قولي عبود...: ريم.. تخيلي طلعت اترمس عبدالعزيز ربيعي... واترمس خليفه واترمس غيرهم.. الكل كان يرمس عنها.. وتطلقت من ولد عمها.. لأنه عرف عن سوالفها.. ريم.. سوسن لعبت بمشاعري وانا الي حبيتها من كل قلبي.. ولا اخوها احمد يحليله كاسر خاطري .. استوى مثل المينون.. قطعووه الشباب في الكوفي.. الكل يرمس عن اخته وهو مب قادر يقول كلمه.. ريم يوم سمعت اسم احمد تأكدت ان هو نفسه احمد الي شافته واتأثرت من كلام عبود وحمدت ربها انها ما كلمته ولا اتصلت فيه: عبود حبيبي.. انا بعد بغيت اقولك لا تحرق قلبك على بنت شراتها لأني سمعت عنها من بنات انها كانت اتحب ولد عمها موووت.. وكانت هي موافقه عليه.. بس كانت تلعب عليك.. عبد الله حبيبي.. البنت ما تستاهل الي انت قاعد اتسويه في نفسك.. انت رغم عذابك ما بغيت لها المشاكل وودرتها وسويت المستحيل عشان اتساعدها انها اتودرك.. بس طلعت نذله... بتحصل الي احسن عنها صدقني عبود: بس يا ريم انا رغم هذا بعدني احبها.. ريم وهي معصبه: عبوود ... البنت ما تستاهلك.. تحب وحده كانت تلعب بمشاعرك بلا رحمه.. ليش؟؟ والله بتلقى الي احسن.. ولا اقولك.. شو رايك ادور لك وحده ونخطبها لك عشان تنساها عبود تم ساكت فتره ويفكر وعقب رمس: ريم.. اخطبيلي سوسن ريم: انت اتخبلت.. شو بلاك توك ترمس عنها واتقول الشباب كلهم يعرفون عنها وبتاخذ وحده سيرتها على كل لسان... عبود: ريم.. بتتغير على ايدي صدقيني.. بغيرها.. اكيد لها اسبابها الي خلتها اتسويها جيه ريم: اسبابها على عيني وراسي.. بس عاد 1 ولا اثنين مب شله... وبعدين لا تخلي طيبه قلبك الزايده هي الي اتخرب عليك حياتك عبود: انزين اذا ما خذيتها هيه اخذ منو .. عطيني وحده ممكن تدخل قلبي غيرها ريم: انا بقولك ... نوره عندها اخت واااايد حلوه وحبوبه شراتها.. هي سنه اولى كليه يعني اكبر منها بسنه واصغر منك بسنه... شو رايك؟؟ عبود: شو شو رايي.؟؟ بنت ما اعرفها ولا تعرفني.. كيف احكم عليها؟؟ ريم: عبود يا حبيبي.. انا راح اخليك اتشوفها واتكلمها واذا عيبتك على بركة الله.. واذا ما عيبتك خلاص.. اندور غيرها عبود: مادري بفكر...؟ ريم: عبوود ... جرب عشان خاطري.. انا متأكده نوال بتعيبك.. حتى اسألأ عنها نوف.. وايد اتحبها.. ماشاء الله عليها بنت ولا كل البنات حلوه اجتماعيه وعاقله عبود: خلاص بمشي بشورج واشوف وين بوصل؟؟ ريم: بتوصل بر الأمان ان شاء الله.. عبود: الله لا يخليني منج.. ريم: ولا منك.. عاد ابا مقابل عبود : لا حوووووووول.. انتي مافي شي ببلاش عندج ريم: متى اتحيد سويت شي بلا مقابل..؟؟ عبود: انزين شو تبين في المقابل ريم: اممممممم.. بطلب شي واااايد صعب.. بس اذا ما سويته ماشي انسى فكرتي عبود: الله يستر .. قولي.. ريم: ابا احلى بوسه على خدودي الورديه ممكن؟؟ عبود: الصراحه وايد صعب.. بس بجازف... لأن انا من زماااااااان خاطري بالورد الي على خدودج؟ ريم: واااااااي جان استحي عبود: فديتج.. يا احلى اخت في الدنيا ريم: انزين ابا اقولك خبر مهم جدا.. توه طالع من الفرن عبود: خبريني؟ ريم وهي تضحك..: كم تعطيني هههههههه عبود: مصختيها ريم: لا لا خلاص مابا شي.. الخبر هو ان يوسف بيخطبني باجر... عبود وهو منصدم: صدق!!!!!!!!!!!! ريم: هي صدق شو بلاك مستغرب؟ عبود: شي جميل الصراحه.. بس انا كنت مستبعد انكم تاخذون بعش بعد الزعل الكبير الي ما اعرف سببه بينكم ريم: بعد ربك غير الحال من المحال عبود: سبحان الله.. بس تدرين والله ما بتلقين احسن من يوسف يحبج ويصونج.. انا موافق.. وهم يمثلون( مد ايده صوب ريم) : اهنئك يا اختاه على حسن الإختيار (وحضنها) ريم وهي تضحك: شكرا يا اخي العزيز وتموا يضكون اثنيناتهم.. وتمت هي ترمس عقب عن نوال واتخبره عنها.. وهو متفاعل وياها ومستانس وتموا يسولفون لين الفير. قام هم صلى الفير ونام وهي بعد.. ========== تعاهدنا نصير اثنين يوم الحب جمعنا أنا لك رمش وانت العين واحلف لي وعاهدني... غرامك ساكن ذاتي وعذب الود يرفعنا وهذي حالة العشاق كلمة منك تسعدني... تعاهدنا على حب جميل وصادق المعنى تلامس جرحك لجرحي قريبٍ ما يبعدني... هلا بالحب يا روحي هلا بوعود تنفعنا هلا يا أجمل أيامي هلا يا سيدي عندي... على كل الغرام ابغيك يكفي لا تضيعنا من أجل عيونك الثنتين بالأهداب جددني... تعاهدنا نصير اثنين خل الناس تسمعنا وسولف لي عن احوالك كفايه تعاندني... (نص شعري مقتبس) طبعا يوم الخميس الكل قايم بنشاط.. والكل فرحان ومستانس لريم ويوسف.. لأن الله جمعهم اخيرا بعد هالصبر كله.. الكل مرتبش في البيت .. لأنه اليوم الموعود بالنسبه لهم.. يوم خطوبه ريم ويوسف.. وريم كانت اتحس بنشاط كبير وحيويه.. واتحس ان نفسيتها متجدده لأنها راح تجتمع بالي ملك قلبها اخيرا.. ريم اتصلت في عزة عشان اتقولها اتيي عندها ريم: الووو عزة: هلا والله بالعروس.. ما عليه ما اترييتي وخذيتي اللقب مني ريم: ههههه .. اغار.. انزين ما علينا انتي منو قدج بتعرسين في الصيف مب انا يحليلي انقع بعد سنتين عزّة: يحليلج بتكونين عيوز ريم: يالله عاد زودتيها.. انا بتم شباب طول عمري.. ما علينا ها بتيين اليوم اكيد عزّة: افا والله انا ما بييج.. اكيد بيي ونص بعد.. ماافوت هاليوم علي ريم: خلاص عيل اترياج.. عزّة: انزين ريم بسكر عنج لأن عندي خط ثاني.. باي ردت عزّة على الخط الثاني .. مع انها ما عرفت صاحب الرقم بس ردت عزّة: الووو ....: الو.. اشحالج اخت عزّة عزّة وهي مستغربه.. : الحمد لله.. منو انت؟ احمد: انا احمد يا عزّة.. خذيت رقمج من نواف عطاني اياه عزّة: هيييييه.. هلا اشحالك.. اسمحلي ما عرفتك احمد: لا ما عليج.. بس انا متصل اتخبرج.. صدق الي سمعته.. ريم بتنخطب اليوم؟؟؟ عزّة وهي مب عارفه كيف اترد عليه: هيه..ليش؟ احمد وهو صوته مبحوح: ولد عمها صح؟؟ عزّة: هيه.. احمد: ذاك اليوم يوم كنا في السنتر عقب ما نزلت من السياره الي كان وياها هو نفسه ولد عمها ولا شو؟ عزّة: كان ولد عمها يوسف الي وياها.. هو نفسه الي بياخذها احمد: عزّة الله يخليج ممكن تعطيني رقم ريم.. او حتى رقم ولد عمها الله يخليج اسديلي هالخدمه عزّة بإنفعال: شو انت اتخبلت.. ناوي تفضح البنت.؟؟ احمد: حرام عليج لا تفهميني غلط.. انا مستحيل اني اسوي شي يضر ريم بأي طريقه كانت.. بس ابا الحق على الموضوع.. ابا اطمن من شي.. دخيلج يا عزّة.. انا احب ريم والله احبها فهميني عزّة: --------- احمد: عزّة .. تسمعيني.. الله يخليج هاتي رقمها عزّة: بس انت وعدتني ما اتسوي شي.. حرام البنت اتحب ولد عمها لا اتخرب حياتها احمد: شوووووووو اتحبه؟؟؟؟؟ عطيني رقمها بسرعه.. عزّة: انزين انزين.. هدي.. لا اتعصب علي انا اشلي.. هذا رقمها ********* احمد: خلاص مشكوره.. بتصل فيها احين وسكر احمد عن عزّة وبسرعه اتصل في رقم ريم.. ريم: الوو احمد: ريم.. اشحالج؟؟ ريم تعجبت من الصوت الي سمعته كانت حاسه انها تعرف هالشخص: منوو؟ احمد: ريم انا احمد.. ريم الله يخليج اسمعيني ولا اتصكين الخط بويهي ريم: افف... خير.. من وين يايب رقمي.. لا اتقول عزّة احمد: لا مب عزّة.. انا يبته بطريقتي الخاصه.. ريم سمعيني.. انا احبج والله احبج.. ريم بس بغيت اسمع شي واحد منج.. انتي اتحبين ولد عمج؟؟ ريم: هيه احبه.. وامووووت فيه بعد.. ليش في شي؟؟ احمد وهو بدا يصيح: ريم .. انتي كنتي امنيه حياتي .. كنت دايما احلم اني اخذج.. دايما كنت اتمنى انج اتكونين من نصيبي..... ريم.. انا عمري ما فكرت اني اضرج بشي.. ريم: احمد مابيني وبينك كلام.. انا خلاص ملك لغيرك احين احمد: ريم.. خليني اعبر عن الي في داخلي.. عشان ارتاح.. ممكن تسمعيني ريم: اخلص.. قول الي عندك.. لأني مشغوله.. احمد: ريم اترجاج.. لا تاخذين يوسف.. اترجاج.. انا اباج يا ريم.. ارجوج حققي لي هالإمنيه.. ريم: لا بلاه منت صاحي.. اقولك احبه اتقولي اخذك احمد: ريم.. والله بين والله بتخبل اذا ما خذتيني ريم: احمد انت السبب اوهمت نفسك بشي من المستحيل انه يصير.. احمد.. انا ولد عمي احبه من صغري.. محد يقدر يمنعني .. انا اباه.. وانت شفتني صدت عنك من البدايه احمد: ريم ارجوج.. انا قلت يمكن مع الأيام يحن قلبج.. ريم ارجوج.. خليني بكلم ولد عمج.. واذا على الحب ما عليه انتي بتحبيني مع الأيام وانا بصبر ريم: احمد.. اعقل.. ركز وياي.. ماباك احمد : ريم.. ار... وسكرت ريم التليفون بويهه واغلقت تليفونه.. احمد حاول يرد يتصل بس كان مغلق.. حس عمره مثل المينون تايه مب قادر يسوي شي او حتى يركز في شي.. طرش لها مسج مكتوب فيه أحبك لو يموت الحب وتصير القلوب قبور اشوف الحب هو موتي واشوفك انت تابوتي وقال بيتريا التقرير يوصل عشان يعرف متى تفتح تليفونها.. بس ماشي فايده مرت ساعه وهي ما فتحت التليفون.. وبعد شوي سمع صوت التقرير وصل له.. ما لقى نفسه غير يدق على رقمها.. بس ما كانت اترد عليه وعلى مكالماته.. حس نفسه منهاااار.. مب قادر يسوي شي.. اتصل فيه نواف.. ما رد عليه .. راح دبي صوب جميرا... نزل ويلس على الشاطئ وهو يفكر بالي قاعد يصير.. مب قادر يستوعب انه ريم ممكن اتطير منه.... اتصل فيه واحد من ربعه اسمه عادل.. وعادل يعرف يوسف ولد عم ريم.. احمد: هلا عادل اشحالك؟؟؟ عادل: بخير الحمد لله انت اشحالك؟؟ احمد: بخير عادل: شو بلاه صوتك متضايق فيك شي احمد: لا ماشي بس تعبان اشوي عادل: هيييه ما اتشوف شر.. انزين اخبرك انا اليوم ما بيي الكوفي خبر الشباب اوكي.. احمد: ليش؟؟ عادل: ماشي بس اليوم خطوبه ربيعي يوسف المزروعي.. معزوم عنده .. احمد اتغيرت نبرة صوته يوم سمع اسم يوسف: منوووووو... عادل: اشفيك.... اقولك يوسف المزروعي.. احمد: وبياخذ منو؟ عادل: انا سمعت بياخذ بنت عمه احمد انصدم..: انزيين.. اتعرف رقمه عادل: هيييه ليش بغيت منه شي؟؟؟ احمد : لا بس بغيت ابارك له على الخطبه.. عادل: هيييه خلاص هاك رقمه عيل.. ******* احمد: مشكور .. يالله في امان الله عادل: مع السلامه وسكر احمد من عادل وهو حاس بحقد صوب يوسف.. ويخالجه احساس الإنتقام.. وهو مب مدرك الشي الي قاعد يسويه.. اتصل في يوسف.. يوسف: مرحبا .. احمد: هلا.. يوسف معاي يوسف: هي نعم.. منو وياي.؟ احمد: مو مهم اتعرف منو وياك... بس المهم انك اتعرف شي واحد... ريم ماراح تاخذها مني يوسف انصدم يوم سمع اسم ريم: شوووووووووووو؟ احمد: الي سمعته.. ريم لي انا وبس.. م انخلقت غير انها اتكون لي انا وبس يوسف: انت اكيد مب صاحي احمد: لا صاحي واصحى منك بعد.. يوسف: احترم نفسك.. احمد: بخبرك شي.. ترا هالريم الي بتاخذها راكبه وياي السياره.. كانت وياي.. ماراح اظلمها واقول انها كانت روحها.. بس كانت هي وربيعتها وياي.. يرضيك تاخذ وحده جيه.. وبعدين.. هي صح ما سوت شي.. وكانت ساكته طول الوقت ومعصبه ونزلت من السياره على طول ما تريت.. وخلت ربيعتها في السياره.. شقايل تاخذ وحده اترابع هالأشكال يوسف حس بتناقض في كلام احمد... حس بإحساس احمد.. انه فعلا يحب ريم.. وانه يباها.. وانه ما يبا يضرها فيقول كلمه وعقبها يبرر عنها.. سكت وابتسم ولأنه بطبعه مسامح وطيب ولأنه واثق من بنت عمه ومن تربيتها.. ولحظتها تذكر سالفه الطلعه الي كانت عزّة تطريها لريم.. : بخبرك شي.. ريم اشرف بنت في الدنيا .. وحتى لو رابعت هالأشكال على قولتك.. ترا ريم جبل ما يهزها ريح.. وما تتأثر بربيعتها.. وبعدين ريم اعترفت لي بهالشي من قبل احمد وهو مستغرب: اعترفت لك؟؟ كيف؟؟ ومتى؟؟ يوسف وهو حاس نفسه بيضحك: هي نعم .. اعترفت لي .. عاد كيف ومتى مب لاززم اتعرف.. انزين .. المهم بقولك شي واحد.. خله في بالك زين.. اولا انا مقدر مشاعرك هاي وعاذرك.. هذا مب معناته اني انسام ما اغار او اني انسان ماله احساس... بالعكس يمكن انا اشد الناس غيره واكثرهم في الأحاسيس.. بس انا لأني واثق من بنت عمي واعرفها زين ما زين هذا الي مخليني اسكت عنك وما ارد عليك.. ولو كان واحد ثاني جان ما قصر وفضحها بس عشان يقدر يخرب هالزواج وياخذها.. بس انا مقدر شهامتك هاي.. انك ييت كلمتني بنفسك.. وثانيا.. ترا كل شي قسمه ونصيب.. والي الله كاتبه بيصير احمد حس نفسه مفتشل من كلام يوسف ومب عارف شو يرد عليه لأنه فعلا طلع ريال وعاقل: يوسف يا خوي.. اسمحلي على الي قلته وانا آسف كل الأسف.. بس والله غصبن عني طلع هالكلام.. وريم بنت ولا في الوجود مافي احسن عنها.. ارجوك سامحني على الي سويته.. وامسحها بويهي.. والله اني مفتشل مب عارف شو اقولك.. بس بقولك شي واحد ... خل ريم في عيونك.. تراها والله ما تتعوض يوسف: لا افا عليك .. لا اتقول هالكلام.. انت اثبت انك انسان شهم.. ويا حي الي بتاخذها.. وانا عاذرك.. ولا اتوصيني على ريم.. تراها روحي وعيوني الي اشوف بها احمد وهو يصيح: الله يسعدكم ويهنيكم.. (وسكر الخط قبل لا يرد عليه يوسف.. وهو حاس بالمذله والإهانه.. لأن الكلمه الطيبه هي الي تأثر في الواحد وتخليه يندم على الي سواه اكثر من السب والمسبه.. حس كم هو نذل من الحركه الي سواها.. احتقر نفسه وكان وده لو يرجع الوقت لورى ويمسح الي صار بس حمد ربه ان يوسف طلع انسان عاقل وفاهم الحياة.. وحس براحه نفسيه ان ريم بين ايدي امينه فكتب مسج وطرشه لريم <الله يسعدج ويهنيج.. اسمحيلي على كل شي واذكريني بالخير.. وانا اسف.. حطي يوسف في عيونج تراه ريال والنعم فيه> يوم قرت ريم الرساله استغربت .. كيف يطلع هالكلام من احمد.. بس ما اهتمت واتصلت في نوره عشان تعزمها هي واختها نوال.. وامهم ريم: الووو مرحبا نوره: هلا والله بالريم.. اشحالج.. ها شو معنوياتج اليوم؟؟ ريم: افففف اسكتي حاسه نفسي مرتبكه نوره: لا ما عليج انتي.. كل شي بيمر على خير ان شاء الله ريم: ان شاء الله.. انزين بغيت اقولج تعالي انتي واختج وامج اليوم . اوكي نوره: لازم ريم: هي لازم... ابا امج هي تكون امي اليوم اذا ممكن نوره وهي مستانسه من كلام ريم.. لأنها اتحب ريم وايد: فديتج والله.. اكيد ممكن.. ريم: خلاص .. انا كلمت عمتي وقلت لها ان امج هي بتمثل امي.. لأن انا ما عندي خاله ولا عمه ولا خال حتى.. وكلمت اخوي ووافق نوره: خلاص تم.. انا بكلم امي... هذي امي اهني بخبرها ماما.. ريم.. دوستم ميخات تو جاي مادرش باشي امروز نومزاديشه...(امي.. ريم ربيعتي تباج اتكونين مكان امها لأن اليوم خطوبتها) ام نوره: تفلااااك... باشه رو جشم.. ( يحليلها.. خلاص من عيوني) نوره: خلاص امي وافقت .. ريم: هههه .. كشخه التشفير اباج اتعلميني فاهمه نوره : افا عليج.. اقول هاج امي تبا اتكلمج.. ريم: اوي.. انا ماعرف ارمس.. نوره: شو قالولج امي ما تعرف عربي.. صح اتفشل بس اتعرف.. ريم: حرام عليج لا اتقولين اتفشل.. بالعكس.. على الأقل تعرف نوره: ههههههه.. الله يعينج جان فهمتي هاج كلميها ام نوره: سلام أليكم بنتي ريم: هلا والله خالو اشحالج ام نوره: والله بخير .. انتي شو اخبارج ريم: الحمد لله .. مشكوره خالو والله ما بنسى لج فضلج بالي بتسوينه اليوم ام نوره: لا تقولين جزي... انتي مسل نوره ونوال عندي والله شاهد ريم: تسلمين خالو والله.. ادريبج.. ما قصرتي ام نوره: خلاس .. انا اليوم بيي مع نوره ونوال.. وايد مستانس انا اليوم.. عشان بنتي بتتزوج نوره: امييييي.. مب وايد مستانس.. وايد مستانسه.. مستانسه ام نوره: تو بس ميكوني يا نه ( بتسكتين انتي ولا لا) ريم: ههههههههه .. اضربيها خالو.. ام نوره: شوفي حتى صديقتج اتقول ازربيها.. نوره: افااااااااا ليش (وهي اتقلد امها) يهون عليج تزربني؟؟؟ ام نوره: اي بي هيا... مو ارم با نوال.. تو نابرم (بروح ويا نوال وما بوديج انتي) وعطت التليفون لنوره وهي تتحرطم عليها ونوره تضحك: ههههههه يحليلج يا امي... ريم: حرام عليج تتمصخرين عليها واتلعوزينها.. تراها امج نوره: ما عليج تدري هي بمعزتها عندنا .. بس نحن انحب انلعوزها اشوي.. تذكرت ريم امها يوم كانت اتلعوزها .. حست ان ودها اتصيح بس مسكت عمرها لأنها وعدت راشد ما اتصيح: انزين.. خلاص الساعه 7 اترياكم.. نوره: خلاص عيل .. يلا يالعروس.. باي ريم: باي وهني اتصل فيها خالد واول ما شافت رقمه جان تضحك: الو.. هههههههه خالد: الحمد لله والشكر.. اللهم سكنهم وساكنهم يا رب ريم: تدري انك سخيف.. خالد: مادري عنج تضحكين من غير سبب ريم: لو تعرف السبب.. جان بتعذرني خالد: ليش شو خبريني؟ ريم: تدري كنت اكلم منو قبل لا تتصل فيني؟ خالد فهم ان نوره الي كانت اتكلمها: نوره؟ ريم: عدال عدال.. لا يطيح قلبك.. هي نوره.. وعلى فكره بتيي اليوم هيه خالد: سبقتيني... بغيت اقولج اتصلي فيها خل اتيي ريم: هههههههه .. سبقناك.. وبتيي وياها امها واختها بعد خالد: الللللللللله عمتي بتيي.. ريم: هههههه .. يحليلك... ولا بعد هي بتقوم بدور امي اليوم خالد: والله.. فديتج والله تمي اتمصلحي عشان اذا خطبنا نوره يوافقون على طول ريم: اسميك انت مب هين.. انزين انا قلت اختها بعد بتيي.. ليش ما تسأل عنها؟ خالد: خل اتزول وانا اشلي فيها ريم: استح على ويهك.. هاي بتصير مرت اخوي اذا الله راد ان شاء الله خالد: لا والله.. متى هالكلام ريم: بعد ربك.. انا براوي عبود اختها اليوم.. انت عاد اذا ما سويت الي عليك انسى نوره خالد: شو الي لازم اسويه.. خبريني ريم: تقنع عبود ياخذها وينسى سوسن خالد: يالظالمه.. انتي اخوج اتعرفيني ما يسمع راي حد.. واذا بيسمع بيسمع لج انتي ريم: انا ما يخصني هههههههههههه خالد: اففف.. خلاص كل شي في سبيل نوره يهون.. ريم: هذا الي اباه منك خالد: يلا فارجي.. عروس اخر زمن ريم: ههههه باي وسكرت عن خالد.. ودخلت الحمام عشان تسبح لأن مالت الصالون بتييها الساعه 5 العصر.. ========= في بيت يوسف.. عاد ابوه الفرحه مب شايلتنه انه بيزوج ولده لبنته.. كان اول مره يفرح هالكثر.. وامه كانت وايد مستانسه بعد.. وهو عاد مرتبش.. لو الود وده يرقص من الوناسه.. ام يوسف: ها يما رمست مال المطعم عشان البوفيه يوسف: هي امي انتي لا اتحاتين يا احلى ام في الدنيا ام يوسف: هههههه .. الله يهنيك يا ولدي ويسعدك بو يوسف: يوسف ولدي تعال.. يوسف: خير ابويه بو يوسف: اسمعني زين.. هاي بنت عمك الغاي .. عمك علي... اخوي العود الله يرحمه.. اباك اتحطها في عينك .. ماباك اتلعوزها ولا اتضايقها وانا ابوك.. ترا البنت يتيمه مالها غيرك.. والبنت ما تنعاب والف من يتمناها.. ماباك اتزعلها ولو بكلمه يوسف: افا عليك ابوي ما طلبت شي... ريم في قلبي قبل عيني.. لا اتحاتي .. ما بتشوف مني الا كل خير ام يوسف: هذا ضني فيك يا يوسف بو يوسف: الا ما قلتي لي يا ام يوسف.. منو بيكون بدال امها؟؟ ام يوسف: حرمه اتقول ام ربيعتها.. هي حرمه والنعم فيها ماشاء الله عليها.. وحده تعرف الأصول كانت طول ايام العزى ويانا واتساعدنا.. الله يجزيها الخير بويوسف: من مرته؟يمكن اعرف ريلها؟ ام يوسف: هي حرمه محمد سعيد الهرمودي بويوسف: والله.. اعرفه .. ها ريال والنعم فيه.. كان يشتغل وياي ايام ماكنت انا في الوزاره ام يوسف: زين عيل .. طلعوا ناس انعرفهم يوسف: اقول امي.. البس هالكندوره ولا هاي.. ام يوسف: يحليلك يا يوسف.. حتى من الفرحه قمت ما اتعرف تلبس اي كندوره يوسف: اااااااااااه يا امي... انتي ما تتصورين الي انا فيه... فديتني معرس.. مب اي معرس بعد.. باخذ بنت الحسب والنسب.. شيخه البنات ريم المزروعي بو يوسف: هههه .. ذكرتني يوم ما خطبت امك.. ام يوسف وهي منحرجه: ههه بو يوسف عاد يوسف: يحليلج امي.. استحيتي.. وطبعا الكل مستانس مب عارف كيف يعبر عن فرحته.. وفي بيت ريم.. الكوافيره يت وعدلت ريم الي كانت طالعه في قمه من الجمال والرقه.. شكلها ملائكي.. فستانها كان لونه توتي.. وميك اب فيه دراجات الوردي والبنفسي .. مكياج ناعم وحلو واااااااايد.. دخل عليها اخوها راشد وفي ايده كرتون كبير.. ريم: هلا راشد.. شو رايك.. مب شي صح.. انا قلت لها اتس.. قاطعها راشد: والله انج احلى من القمر حتى.. واااااايد حلوه ومافي شي غلط فيج وعن الدلع.. ريم: فديتك اخوي.. الا ما قلت لي شو هذا الي بيدك راشد: هذا شي بغيت اعطيج اياه يوم ميلادج .. بس الظروف ما ساعدت فقلت احسن مناسبه هي اليوم.. اتنمى تعيبج؟؟ ريم خذت الكرتون وطلعت الي فيه كانت اللوحه الي هو راسمنها فيه: الللللللللله واااايد حلوه اتخبل.. فديتك والله اخوي. راشد: عيبتج؟؟ ريم: اكيد دام ان الرسام المبدع راشد علي المزروعي راسمني.. اكيد بتعيبني ولوت عليه وباسته على خده .. وحضنها راشد وحس بإفتقادها لأمها في هذي اللحظه: ريم حبيبتي.. تدرين ان ام ربيعتج طلعت حرمة ربيع عمي سلطان ريم وهي مستغربه: صدق والله؟ راشد: هي عمي يوم سمع اسم ريلها عرفه... قال ان كان يشتغل وياه ايام الوزاره ريم: اللللللله .. الحمد لله .. عيل كل شي بيتيسر راشد وهو مستغرب: شو هو الي بيتيسر؟ ريم: ترا انا خاطري في بنتهم نوال وياي في الكليه حق عبوود وخالد خاطره في نوره بنتهم بعد راشد: حلو والله نخطب لهم خوات.. دامهم بنات زينات ما ينعابون.. ليش لا؟ ريم: لا هم خوووش بنات.. بس الله ييسر ان شاء الله راشد: ان شاء الله.. انزين انا بنزل احين وبخلي نوف اتييج لأنه الرياييل بيون احين ريم: خلاص عيل.. تسلم لي والله.. الله لا يخليني منك.. وراح راشد الميلس عشان يستقبل الرياييل... وريم ردت تتجهز.. دقت عليها الباب نوف وياها ساره بنتها ونوره ونوال وعزّة.. ريم: هلا والله بالحلويين.. عزّة: اللله ما شاء الله عليج.. طالعه قمر 14 صدق نوره: صدق يوم لقبتي عمرج قمر14.. اسم على مسمى نوف وهي تكلم ساره: شوفي ساروونه .. شوفي عمو ريم اشحلاتها .. متى اشوفج عروس متى ريم: ان شاء الله بنشوفها عروس من احلى العرايس بعد نوال: بس ما ظني حد بينافسج ريم: احم احم... اكييد .. ترا ماشي في السما غير قمر واحد نوف: بدت الخقه احين ساره: عمو ليم.. انتي واااااايد حلوه ريم: فديتج انتي الأحلى.. عزّة: ما قالو متى بينزلونج.. نوف: بلا يوم بيون الحريم كلهم بنزلها نوره: يالله عقبال ما انشوفج عروس.. ريم وهي مستحيه: ان شاء الله.. افرح فيكم قبل نوال: لا وين.. ماكو نسيب.. هههههههههه نوف: لا اكو .. بس انتي ما عليج عزّة: شو ها كلام الرموز هذا.. ريم: لا رموز ولا ارقام.. كلام عادي ينقال.. شو عرفج انتي.. كويتيه ما تفهمين لنا عزّة: هههه بدينا بالحجي الي يغث.. نوره: اوه اوه.. حجي بعد.. شنو هذا نوال: هههههه .. اشعليكم منها.. خلها على راحتها البنيه نوف: هي والله.. انتي اونج عروس احين اثجلي اشوي عزّة: ما عليج اصلا اذا ثجلت اشوي ما تصير ريم الكل تمك يضحك.. مني اتصلت ام نوره حق نوال عشان تنزل لها تحت.. وطلعت نوال من الحجره عشان تنزل تحت.. توها بتنزل من الدري شافها عبدالله وهو كان توه يطلع فوق .. انبهر بالجمال الي شافه.. كانت مب مغطيه شعرها.. على طول ركضت فوق ودقت الباب ريم: منووووو نوال: انا نوال افتحي الباب بسرعه يوم سمع عبد الله اسم نوال .. عرف انها الغزاله الي اتكلمت عنها ريم.. دخلت نوال الغرفه وهي تنتفض نوره: بسم الله بلاج الي يشوفج يقول شفتي حيوان مفترس.. نوال: لا ماشي بس نسيت عباتي قلت عن يدخل حد من الرياييل ولا شي وانا مب متغطيه ريم: هيييه .. خلاص يلا سيري ترا امج ردت اتصلت في نوره نوال: خلاص عيل انا سايره ونزلت نوال وهي اتفكر بالموقف البايخ الي استوى لها.. انحرجت صدق ما توقعت انها تنحط في مثل هالموقف.. وسارت عند امها وقالت لها انهم خل ينزلون ريم.. لأن الحريم خلصوا عشاهم ويبغون يروحون . راحت نوال فوق ونزلوها البنات والحريم اييببون .. سارت سلمت على عمرتها ام يوسف .. الي لبستها الشبكه .. وقعدت ويو الحريم سلموا عليها.. الكل كان منبهر بجمالها .. بشكلها الناعم .. وعلى الساعه 10.30 بغت نوره وامها واختها يروحون.. وتذكرت ريم انها ما ضبطت شوفه عبود ونوال وخالد ونوره.. على طول طلبه من نوف انها اتسوي الي في بالها.. وطبعا نوف اتفقت ويا راشد وضبطوا اللقاء.. توهم كانوا بيظهرون من الصاله.. جابلهم راشد وياه خالد وعبدالله.. وسار خالد سلم على ام نوره وباس راسها على اساس يشكرها على الي سوته .. وانها مثلت ام ريم في هاليوم.. طبعا كانت النظرات تلتقي ما بين نوال وعبدالله .. كل واحد كان يتذكر الموقف ويتبادلون الإبتسامات.. وطبعا نوره اعجبت بجمال خالد الي كانت تحاول انها تطالعه بس لولا الحيا الي كانت فيه.. اما خالد فماشال عينه.. كان يطالعها وهو سرحاااااان يتخيل اليوم الي يكون فيه هو المعرسو هي العروس.. وراحوا بسلامتهم.. وعبدالله تم سرحان بالي شافه.. ارتاح لها ولنظراتها.. دخلت خاطره .. اما يوسف فكان في عالم ثاني ينحسد عليه.. يحسب الدقايق والثواني الي يدخل فيها عشان يشوف ريم.. دخل ابوه عشان يسلم عليها.. وهو بعده محد قاله يدخل سار صوب راشد وعبدالله.. يوسف: ياخي مليت.. ودوني داخل.. بموت.. ابا اشوفها راشد وهو يبا يغايض يوسف: لا عيب.. ممنوع.. ماشي شوفه ليوم العرس يوسف: يووووه انزين بدخل اسلم عليها ياخي بنت عمي.. راشد: شو بلاك انت.. نسيت انك كل يوم مرتز اهني واتسلم عليها.. اشمعنى اليوم يوسف: ياخي اليوم اسبيشل.. يوم تاريخي عبود: اظن الي يرمسك اخوها العود.. وهو ولي امرها .. خلاص ممنوع يعني ممنوع يوسف: انا ابا افهم ليش انا معور راسي وياكم.. ياخي ادل البيت وبدخل روحي عبود: عدااال يالعاشق الولهان... حاسب لا يطيح قلبك راشد: تعال يا ريال.. بلاك حرجت.. بتدخل وبتيلس وياها.. يوسف: مادري عنك.. طفرت بي تراك راشد: عبود.. سير سو درب عشان يدخل ودخل عبود وتغطت ريم الي كانت تنتفض من الخجل.. ودخل راشد وياه يوسف.. الي سلم على نوف وعقب راح صوب ريم وسلم عليها وقعد جريب منها ويوسف مب قادر يتحكم بمشاعره حاس نفسه شوي وبيقول كل الي عنده بس زخ عمره. وحاول انه يسوي عمره طبيعي جدا عشان لحد يحس فيه.. بس مع هذا الكل كان فاهم شعوره يوسف: اقول انتي يالحلوه الي هني.. (وتم ينقل رقمه)*******.. اترياج ريم: مالت على هالأشكال.. ما ارمس هالأشكال انا يوسف: افاااااااا .. احين انا متعدل ومتكشخ.. ويحليلي حليييو ما بلاني شي.. الكل تم يضحك.. وهني رمس بو يوسف: اقول يوسف يا ولدي.. اتشوف بنت عمك يوسف: اكيد اشوفها.. مب عمي عن الجمال الي جدامي(انحرجت ريم لكلامه ونزلت راسها) بو يوسف: اباك اتحطها في عيونك.. اباك اذا قالت لك شي ما ترفضه لها.. ماباك اتقصر عليها بشي يوسف: افا عليك يا بوي.. ريم هاي عيوني المركبه.. ريم: سمعت شو قالك.. تسمع كلامي يوسف: الله يهداك ابوي.. احين ما لقيت ترمس الا جدامها.. احين بتذلني على هالكلام ريم: والله ما يخصني مشكلتك .. ولا ترا على طول.. بسوي تقرير وبطرشه لعمي وهو يتولى عاد يوسف: افااااا .. وحد يروم يقول للقمر لا راشد: احم احم.. اقول ترا نحن بعنا هني عبود: هذيله بعدهم مخطوبين وجيه.. عيل عقب شو.. يوسف: والله كيفي .. ابوي قال حطها في عيونك.. وانا مشكلتي اذا حطيتها في عيوني.. يطلع الكلام الحلو وياي.. الكل تم يضحك على ريم الي كانت محمره من الخجل.. وروحوا بو يوسف وام يوسف البيت.. وسار راشد ويا حرمته يرقدون لأنهم من الصبح واعين...وماتم في الميلس غير خالد وعبود ويوسف.. عبود: ياخي انت وايد رزه.. الناس تبا ترقد وانت مب طايع اتفج عنا.. يوسف.: روح ارقد انت اشعليك منا.. عبود: هههه .. اتنكت حضرتك .. ممنوووووع.. ما تيلسون رواحكم لين ما تعرسون خالد: اااااااااه .. محد شاف قمر اليوم غيري ريم: اشكرك الصراحه خالد: صدقتي عمرج انتي.. مب انتي الي ارمس عنها.. انا اقصد قمر.. الي في بالي ريم: الله يسامحك.. اصلا لولاي لما شفت القمر.. عبود: وانا بعد شفت القمر.. الصراحه ريم .. ذوقج وايد حلو يوسف: ايه انتوا شو السالفه خبروني .. انا مب فاهم شي خالد: انت وين بتفهم وانت من الصبح استويت لنا روميو.. كله اتفكر.. وسرحان انحرجت ريم .. لأنها عرفت ان خالد يقصدها: ماشي حبيبي.. ترا انا ناويه اخطب ثنتين من رباعتي هم خوات.. وحده لقيس.. والثانيه لمجنون ليلى.. يوسف: اهاااااا .. اكيد تقصدين عيال ابراهيم الهرمودي.. الصراحه حلوات.. اومبين عليهم خوش بنات ريم وهي محرجه: افااااا .. وانت ماشاء تتطالعهم خالد: اثاريك مب هين يا اخوي.. ما يبين عليك.. الي يشوفك يقول هذا عمي ما يشوف شي.. من السرحان الي انت كنت فيه عبود: هههههههه .. وانت بأي حق تتطالعهم؟؟؟ يوسف: اييييييه .. بلاكم طحتوا فيني.. فهمتوني غلط تراكم... انا سرت عند الباب.. شفت اخوهم طلع واحد يداوم في شركتنا اتخيلي.. فسلمت عليه.. وشفتهم يعني ريم: اهااااا.. والله شي جميل.. نعرف الأبو .. واحين انت طلعت شبه ربيع اخوهم.. خالد: الللللللللله.. عيل يلا قوموا رقدوا خل نسير نخطب باجر عبود: ايلس انت مكانك.. ماشي خطبه.. لين ما يخطبون لي اول.. ولا نسيت ان نوال هي العوده ريم: هي صدقه اخوي.. وبعدين نوره بعدها في الثانويه.. خل اتخلص ويصير خير وهنيه قام يوسف ويا خالد وطلعوا من الميلس لأنهم بيردون البيت .. الوقت كان متأخر وريم راحت حجرتها هي وعبود.. كل وااحد كان في عالمه الخاص.. ريم فعالم يوسف ويوسف كان في عالم ريم.. وعبود في عالم نوال .. وخالد في عالم نوره.. في بيت ابراهيم الهرمودي ================ نوره: نوال.. راقده نوال: لا بعدني ليش؟ نوره: مادري ما ياني رقاد نوال: ولا انا... تدرين شو صارلي اليوم نوره: شو صار؟؟؟ نوال: يوم امي زقرتني عشان انزل تحت .. شفت اخوهم عبدالله... وانا كنت كاشفه شعري وما كنت لابسه عباتي.. انحرجت صدق الصراحه.. نوره: والله صدق.. هههههههه .. يحليلج اتخيل شكلج قافطه.. بس تدرين ماشاء الله عليه وايد حلو.. يشبه ريم.. نوال: هي ماشاء الله عليه.. ماعرس شكله بعده نوره بخبث: لا بعده.. اكبر منج بسنه.. ليش هالسؤال.؟؟ لا يكون تبينه؟؟ نوال وهي مرتبكه: ها .. شو.. لا شو هالكلام.. نوره: نوااااااااااااااااااااااااال.. علينا؟؟ نوال: لا .. بس عيبني شكله .. نوره: بس عيبج؟؟ نوال: اقول .. جني عطيتج ويه وايد .. وانتي قمتي اتخورينها وياي نوره: هههههه ... انزين.. ما شفتي ولد عمهم.. اشحلاته.. احلى عن اخوها.. يشبه يوسف نوال: نورووووووووووووووووه؟ نوره: ههههههههه ؟.. شو بلاج؟؟ نوال: لا يكووووووووووون؟ نوره: لا .. تعرفيني مب من هالسوالف انا همي دراستي.. نوال: لو اني ما كنت اعرف جان شكيت فيج.. ادريبج دحيحه.. تعالي شو ناويه تدرسين نوره: والله انا خاطري الصراحه طب.. بس اخاف ما اييب النسبه الحلوه نوال: لا لا اتحاتين... انا اعرفج دحيحه.. وبتطلعين من الأوائل.. وبيطلعونج في تلفزيون الشارجه نوره: ههههه .. ان شاء الله الله يسمع منج وناموا وكل وحده فيهم كانت اتفكر في الي شافته.. وجرب موعد سفر يوسف؟؟؟ يا ترى شو مصير احمد؟؟ وشو مصير ريم؟؟
__________________
|
|
#7
30-03-2005, 12:42 AM
|
||||
|
||||
|
الجزء الخامس
========== سافر يوسف يكمل دراسات عليا في بريطانيا.. وريم انشغلت بالكليه الي ماخذه كل وقتها.. واما عزّة فكانت تستعد للعرس.. لأنها راح اتعرس في الصيف ان شاء الله... وطبعا خطبوا نوال لعبدالله.. إلي كان هو الثاني عايش في احلى ايامه مع نوال.. لأنها فعلا طلعت مثل ما وصفتها ريم.. الكل كان يحبها.. واما خالد فهو الثاني العاشق الولهان.. يتريا اليوم الي اتخلص فيه نوره الثانويه عشان يخطبها ويحقق امل حياته... ونوف طبعا احين حامل في شهرها الثالث.. وعمهم سلطان في امانيا ويا نسيه .. نتايج العلاج الطبيعي كانت جدا ايجابيه.. وفعلا في تحسن واضح في صحته.. وقام يقدر يمشي اشوي كم من خطوه.. ام يوسف: هلا بالغالي.. ابو عيالي اشحالك.؟؟ خالد بصوت واطي : حتى الشياب يشتاقون لبعض خخخخ ام يوسف: سمعتك تراني.. طمني عليك شو علومك؟؟ عساك مرتاح؟ بو يوسف(سلطان): بخير الحمد لله.. اخوج ما مقصر علي بأي شي.. يحليله دومه وياي.. والحمد للع علاجهم وايد زين.. ام يوسف: الله يردك لنا بالسلامه .. والله البيت مب شي من غيرك يا بو يوسف.. الكل مشتاق لك.. يالله ماعليه في الصيف بنزورك ان شاء الله بويوسف: والله هم انا مشتاق لكم.. اهني مافي حد غربه.. بس يالله هانت كلها شهرين وبنشوفكم .. الا اشحال عيال اخوي؟؟ وشو اخبارهم ام يوسف: لا اتحاتي الكل بخير... والكل يسأل عنك... بو يوسف: الا وينه هالدعله ولدج خلووود ما يتصل فيني؟؟ ام يوسف وهي تكلم خالد: تعال يا مسود الويه كلم ابوك.؟ خالد: هلا يبا.. اشحالك؟؟ بو يوسف: ايا الظالم نسيت ابوك... خالد: افااااااا .. انا ما نسيتك والله دومي اسأل عنك؟ بو يوسف: معلووم بس بتسأل ما تفكر تتصل اتخاف على الرصيد.. خالد: ههههه .. اقول ابوي.. الا ما قلت لي شو الألمانيا حلوات يقولون؟ ام يوسف وهي محرجه: ايه انت .. لا اتخرب ابوك بو يوسف: خس الله ابليسك ما تعرف امك احين بتردني البلاد والسبه انت؟ خالد: خخخخخخخ .. امي لا اتخافين امزح.. ابوي ما يشوف غيرج في الدنيا.. بو يوسف: هي دخيلك لا تفضحنا عن اتيينا بالمخمه احينه.. هههههه خالد: لا افا يالوالد.. جان اخترت وحده حق ولد المسكين خلوود بعد بس فالح تختار حق عمرك بويوسف: ايه انت ناوي على شر الظاهر.. بلاك اتخربط.. احين امك بتصدق بتسوي لنا سالفه. سحبت ام يوسف السماعه من خالد : ايه انت يالشيبه اسمعني.. لا اتفكر في يوم تلعب بذيلك ترا والله اييك وادفنك ويايها بو يوسف: ههههه .. هالكثر اتحبيني .. والله ما كنت ادري.. لا يا حرمه.. لا اتحاتين .. هذي سوالف خلود ما تعرفين ولدج.. وين انا وين اللعب.. ذاك اول.. احين مافيني حيل هالخرابيط ام يوسف: انا من لي غيرك قولي.. بويوسف: الله لا يحرمني منج ويخليج لي خالد: ايه انتوا.. خافوا على الفواتير.. بسكم مغازل ام يوسف: انجب انت يالدعله.. مابي اسمعك بو يوسف: ههه ... خليه يا ام يوسف.. حليله ام يوسف: خلاص عيل تامرنا بشي الغالي بو يوسف: سلامة راسج بس سملي على الكل ام يوسف: يبلغ ان شاء الله .. في امان الله.. خالد: امي صدق بنسافر السنه ام يوسف: هيه صدق.. ليش؟ خالد: افاااااااا.. لا حرام جيه كل شي بيخترب ام يوسف: شو هو الي بيخترب؟؟ خالد: مب انا قايل لج تخطبين لي؟؟ ام يوسف: بلا... خالد: انزين ترا البنت بتخلص في الصيف.. ام يوسف: تقصد نوره.. لا لا اتحاتي انت ما عليك.. البنت محيرينها لك خلاص خالد: والله صدق امي.. متى صار كل هذا.؟؟؟ ام يوسف: هي صدق.. شو اتحيدني اجذب.. تر ا انا كلمت ام نوره من يومين وقلت لها ان ودنا اناسبهم وجيه وحاطين عينا على نوره.. وهي قالت ما عندها مانع ولا ريلها بس نصبر لين ما البنت اتخلص الثانويه.. خالد: يعني خلاص هي محجوزه حقي ام يوسف: هي .. اهم عطونا كلمه بأنها راح اتكون مخطوبه لك خالد: كلولولولولولوووووووووش.. اخيرا ارتحت ام يوسف: ههههههههه.. يحليلك يا ولدي .. بتصير معرس خالد: الله.. كشخه.. (وبدا ايول ويغني) يا معيريس.. عين الله ترعاكم.. ام يوسف: هههههههه .. الله يدوم الوناسه عليك يا رب ... وافرح فيك وفي اخوك.. واشوف عيالكم قبل لا اموت خالد: الله لا قال.. .بسم الله عليج.. لعل عمرج عمر شعيب النبي ....... عبود كان يكلم نوال في التليفون: نوال حبيبتي.. انا ابغي اقولج شي.. نوال: قول تفضل؟؟ عبود: ترا انا مابغي اظهر من بيتنا... يعني اباج اتعيشين هني عندنا اذا ما عندج مانع.. البيت كبير.. واخوي راشد ما يباني اظهر منه ولا نوف.. لأنهم يخافون من الوحده ما يبونا نتشتت نوال: عبدالله حبيبي.. ترا هلك قبل لا يصيرون هلك هم هلي.. وانا تحت امرك اعيش وياك وين ما تبا.. والصراحه اهلك ناس زينين وما في شي يخليني ارفض اني اعيش وياهم.. وبعدين نوف المسكينه مالها حد غيرنا اذا تمت روحها بتتخبل.. لأن ريم بتعرس وبتسير بيت ريلها.. فراح تبقى البنت بروحها. عبود: فديتج والله.. ونعم الي اختارو لي نوال: انت يالحمار تعال بخبرك.. ذاك اليوم.. ما استحيت تميت تتطالعني بقوه عين عبود: اااااااااخ.. احلى يوم ذاك اليوم.. ترا من جمالج ما رمت اشل عيني نوال: هههههه .. يلا عاد عبود : والله جد ما اتمصخر .. صدق كنتي حلوه. الا مب بس حلوة.. قمه في الحلاة هني دقت ريم باب غرفة عبدالله.. الي قام وفتح الباب.. عبود: هلا والله.. بقمر البيت كله.. والله توج على بالي ريم: ادريبك اتحش فيني انت والسوسه حرمتك حطا عبود التليفون على الأسبيكر عشان تسمعها ريم: والله انا ما يخصني ما كنت ارمس عنج.. عبود: هههههه .. لا كنت احمد ربي في قلبي انج اخترتي لي القمر هذا ريم: حقوق الطبع محفوظه نوال: اشحالج ريم.. ريم: والله بخير .. احسن من حالج عبود: اقول نوال.. لو اتشوفين ريم احين.. ميته من الغيره.. ليش ان نحن انرمس بعض وهي يحليها بالحسره لين ما يكلمها يوسف ريم: لا حبيبي... يوسف دوم يتصل فيني.. واكثر شي نكلم بعض عن طريق المسجات عشان ما نصرف وايد نوال: الله يهنيكم.. ما عليج من عبود.. ترا انا براويه.. فتره الإمتحانات ما بكلمه ولا حتى بالمسجات عبود: افااااا .. اهون عليج يعني... وبعدين انتي واختج مصاروه ما ينخاف عليكم نوال: الا صدق على طاري نوره.. ترا مرت عمج خطبتها لخالد.. ريم: والله .. اوووووه وين خل اتصل في خالد واخبره عشان اخذ الحلاوه عبود: انتي هذا همج تاذخين وبس.. ريم: ترا الخبر هذا يسوى وايد عشان جيه نوال: ههههههه.. بس نوره ما خبرناها عشان ما تأثر على دراستها عبود: اقولج اختج مصريه ولا شي يأثر عليها.. اشك تطلع لنا اخر شي عالمه الذره نوال: ايه .. عن الغلط على نوره .. ترا ما يهون علي.. ريم: هي ولا انا اهون علي.. احين بسبتها بحصل ثروه من وراها.. يلا جااااااو بسير اتصل في خالد عبود: افف. اخيرا ما يغت اتفارج.. ياخي افهمي حبايب يبون يتغزلون وانتي مسويه اعاقه ريم: لا تستانسون وايد .. بي رايت باك حبايبي نوال: ههههههههه طلعت ريم من الغرفه عشان تتصل في خالد واتخبره . . وما تدري يحليلها ان خالد يعرف السالفه ريم: الووووووووو خلووود خالد: هلا والله بالقمر اشحالج ريم: يخير.. اقول عندي لك خبر يسوى الدنيا خالد وهو عارف شو الخبر ويضحك: خبريني اشوف؟؟ لا يكون خبر جديم بس ريم: افااااااا انت متى اتحيد ريامي تقولك اخبار جديمه.. لا خبر توه طالع من الفرن خالد: يلا قولي عاد بلا مذله ريم: اقول.. ابا مقابل.. كم تعطيني؟؟ خالد: ما بعطيج شي زين. ريم: متأكد.؟؟ بس الخبر يسوى وايد خالد: مابا اخبارج ريم: بلاك اول مره احسك مو متفاعل وياي.. شو صاير خالد: بإختصار لأني عارف الخبر ريم وهي منصدمه: منو خبرك؟؟ اصلا شو الي تعرفه.؟؟ خالد: بتقولين عن نوره.. خبرتني امي.. ويييييييييييييو قفطه .. عرفنا قبلج.. اقول اخبارج جديمه .. سيري سوي تجديد لها.. مغبره تراج ريم: تدري انك سخيف.. انا قلت احين بحصل من وراك شي.. بس والله انا براويك.. احين بكلم ام نوره وبقولها خالد مغازلجي.. وخالد جذي.. بتشوف خالد وهو خايف: ايه انتي اتخبلتي.. يلا عاد .. امزح تراني.. انتي احلى بنت في الدنيا مب معقوله جيه بتسوين ريم: ما يخصني.. اول شي عطني حلوان الخطبه المبدئيه.. عقب بفكر اقول ولا لا خالد: اففففف .. ياهي مذله.. انزين كم تبين ريم: ابا عقب نص ساعه اشوف رصيدي 500 درهم خالد: يالظالمه انا ما احط حق عمري هالكثر رصيد.. تبين اترمسين يوسف على حساب افلاسي ريم: انا ما يخصني.. اذا ما لقيت شي عقب نص ساعه والله اراويك.. خالد: خلاص تم.. افف منج يلا فارجي .. اصلا انا الغلطان ليش ارد عليج؟؟ ريم: ههههههه باي وسكرت الخط عن خالد وهي تضحك.. وسارت عند عبود عشان اتقول له الي صار.. ريم: عبود.. نجحت الخطه عبود: قولي والله شو حصلتي..؟؟ ريم: رصيد 500 درهم.. شو رايك عبود: والله... يا حظج... جان خليتيني انا الي العب الخطه عليه ريم: بس الهرم طلع يعرف الخبر قبل لا اقول له عبود: ها .. عيل شقايل شفطتي عنه؟ ريم: انا ريم ام الأفكار.. ماشي بس هددته .. قلت له ترا ها.. اذا ما عطيتني بخبر ام نوره انك ترمس بنات وغازلجي وبذمك جدامها ... خاف حليله ونفذ عبود: ههههههههه.. يحليله اتلاقينه اليوم ما بيظهر من البيت.. اعلن افلاسه ريم: هههههه.. اباافكر في خطه ثانيه اهف فيها بعد 500 من .. عبود قاطعها: والله انا ما عندي.. هاج بوكي اطاعيه ريم: هههههههههه لا مب منك يا ذكي.. من رشود عبود: افا.. عيل لا تنسين اخوج عبود ريم: لا والله.. انا الي اتشطر وانت الي تاخذ.. كل واحد يشتغل حق عمره عبود: افا والله.. هذا انا عبود.. ريم: هيه.. ماشي.. يلا بروح.. عبود: ايه ترا والله بفضحج عند رشود ريم: لا لا لا.. افففف.. الشر علي انا الي اخبرك.. اف منك.. خلاص بخليه يعطيك رصيد 250 وانا 250 زين جيه عبود وهو يضحك: هي وايد زين.. ريم طلعت وسارت عند اخوها راشد ولعبت لعبتها وقدرت فعلا اتحصل 250 لها ولعبود.. ويوم خبرت عبود استانس عليها وقالها انه يباها دوم جيه يسوي وياها.. ومني رن تليفونها .. وصل لها مسج من يوسف فتحته ولقت مكتوب فيه صحيح انك بعيد عن مدى شوفى لكن صدقنى إنك متمكن فى وسط يوفى لا تظن يوم أخون خلي كل ما ابتعد عنك ردت عليه وكتبت له: يصيح الشوق يا حبي يردد اسمك ويلبي ويدعي يحفظك ربي بعيد كنت او جنبي ورد كتب لها: بين اللهفه والغيره بين الشوق والحيره ارسل لك حبي مع بوسه كبيره وهي كتبت له: تدري لوفقدتك وش يصير ؟؟ انسى اني في الوجود وانسى اني بشر مولود 00 وهو مل عاد المسكين من هالحال واتصل فيها.. وردت عليه على طول ريم: هلا والله .. هلا وغلا يوسف: مراحب.. اشحالج حبي ريم: بخير .. مشتاقه لك موووت يوسف: والله انا اكثر.. لو الود ودي اركب طياره واييج احين ريم: تعال شو تتريا.. يوسف: اخ يا ريييت والله لو اقدر ريم كان صوتها مبحوح كأنها تبا اتصيح: يوسف.. ابا اشوفك يوسف: ريم .. شو بلاج.. شو صاير ... ليش جيه صوتج اتغير ريم: يوسف.. مادري بلاني.. مادري ليش احس ان في شي بيفرقني عنج يوسف: ريم . لا اتقولين هالكلام مافي شي بيفرقني عنج غير الموت بعيد عنج.. ريم: لا اتقول جيه.. بس والله انا قلبي مقبوض.. مادري بلاني يوسف: ريم .. لا اتخليني احاتي حبيبتي.. والله تراني بييج احين ريم: لا اتحاتي.. ان شاء الله خير,.. صح ما قلت لك.. خطبوا لخالد اخوك يوسف: والله ما عندي خبر.. اكيد نوره ريم: اكيد.. ليش اخوك يبغي غيرها يوسف: الله يهنينهم.. المهم انتي شو علومج وشو امسويه خبريني.. ريم: انا بخير .. بغيت اخبرك قبل لا انسى اليوم انا بظهر بسير اتشرى قطعه عشان افصل حق عرس عزّة جريب يوسف: اااااااخ.. متى بيي عرسنا متى؟؟؟ ريم: هههههه.. ان شاء الله .. انت بلاك مستعيل.. يوسف: انت تراج مب حاسه فيني.. ماروم استحمل ابتعد عنج اكثر ريم: فديتك والله يوسف: انزين حبيبي.. انا بسير عندي كلاس احين .. وانتي حطي بالج على عمرج زين.. بتصل فيج عقب.. وهالله هالله في اللون الحلو... اباج احلى من العروس ريم: ههههههه.. افا عليك.. امبوني حلوه انا.. بلا عيل الله يحفظك عمري وسكر يوسف عنها وهي سارت تتلبس عشان اتسير السوق وتتشرى القطعه واتفصل لعرس عزّة.. نوف: وين سايره ريامي.. ريم: بسير السوق باخذ لي قطعه .. عقب بسير عند المصمم في دبي.. عشان افصل عنده ماشي وقت نوف: هيييه.. اي لون بتاخذين ريم: مادري والله بسير بشوف شو الموضه احين.. نوف: خلاص عيل لا تتأخرين.. ريم: ان شاء الله عمتي نوف: هههههه.. الله يحفظج حبيبتي وطلعت ريم وراحت واختارت القطعه والموديل واتفقت ويا المصمم وخلصت شغلها وهي راده الشارجه.. لاحظت في سياره اتلاحقها واتأشر لها .. ما عبرت لهم.. وتمت ماشيه .. وشافت ان السالفه طالت.. وقفت على جنب عشان اتشوف منو الي قاعد يأشر لها.. نزلت الجامه وهو يا وقف حذال سيارتها.. الا شافت انه احمد.. استغربت.. كيف الصدفه جمعتهم احمد: هلا والله ريم.. اشحالج؟ ريم: احمد؟؟؟ شو يايبنك وراي انت ما تستحي على ويهك؟ أحمد: هههههه .. اعصابج بلاج.. يوم شفتج قلت خل انزل اسلم عليج... شو حرام.. ريم: هي حرام.. لأن ما بيني وبينك شي احمد: لا عاد.. السلام لله.. ريم: اخلص ترا وراي درب والوقت متأخر احمد: ماشي .. بغيت اخبرج تراني خطبت.. بس والله يا ريم ليومج مب قادر احبها.. دومج في بالي.. والله ريم: احين انت متعني عشان اتقولي هالكلمتين..؟؟ احمد وعيونه مزغلله من الدموع: ريم ليش مب مصدقتني؟؟ والله اني احبج .. والله ريم: ما يهمني... انزين .. المهم فكر في حرمتك احسن.. ترا محد بينفعكم غيرها احمد: الله يهنيج يا ريم.. بس والله لو تبين عيوني ما ابخلها عليج ريم: هههههه .. احتفظ فيهم.. ما احتاج منك شي.. وشغلت السياره وراحت عنه .. وهو مارد يلحقها مره ثانيه.. ووصلت البيت بالسلامه وسلمت على نوف وراوتها الموديل.. ومدحته لها نوف.. وتموا يرمسون عن الفستان .. دخل عليهم راشد وعبدالله.. الي كانوا توهم رادين من الصلاة.. ريم: هلاوالله بإخواني.. احباب قلبي.. نوف: عيل انا شو من بالنسبه لج..؟؟ ريم: امم.. انتي روحي.. انتي توأم روحي راشد: الله الله على الحب.. الله لا يغير عليكم عبدالله: اقول انا ملان شو رايكم نلعب هاند ريم: هذي الأفكار ولا بلاش.. يلا استعدوا للهزيمه نوف: لا تتفائلين وايد.. ترا انا واخوج احسن اثنين يلعبون هاند عبود: هيه.. اقول ريم.. يلا خل نكسر راسهم راشد: تحلمون.. وتموا يلعبون الي في النهايه فازت ريم عليهم.. ريم: وييييييييييو منو كسر راس الثاني احين نوف: لا ظلم الصراحه.. اشوفكم انتي وعبود كل لعبكم غش في غش عبود: افا مرت اخوي.. انا اغش.. ويوم شفتينا على قولتج انغش جان رمستي نوف: قلت حرام يهال.. اخاف اذا خسرتوا اتصيحون راشد: شفت شقايل اتراعي مشاعركم ريم: ههههههههه.. فديتها.. وايد حنونه.. نوف: تتمصخرين حضرتج.. احمدي ربج خليتج اتفوزين.. رأفة بالقوارير عبود: اقول .. خل نلعب دور ثاني .. هذا هو الدور الحاسم راشد: انا موافق نوف: لا انا مب موافقه ريم: يلا عاد نوف؟؟ نوف: بس بشرط.. ريم: شو اشرطي.. نوف: انا وعبود فريق وانتي وراشد فريق عبود: يعني اعترفتي اني اشطر عن ريلج نوف: لا مب اشطر.. بس ابا اراويك.. انك بدون ما اتغش ماتروم اتسوي شي راشد: خلاص انا موافق ريم: وانا بعد عبود: افففففف.. حرام.. جيه بتفوزون علي نوف: هههه .. شفتوا قلت لكم ما يعرف يلعب من غير غش الكل تم يضحك والكل مستانس على هاللمه الحلوه |
|
#8
30-03-2005, 12:43 AM
|
||||
|
||||
|
الجزء السادس
======= وصل الصيف والكل كان مخلص امتحاناته وقرب موعد زواج عزّة المرتقب.. وطبعا خالد عاد كل يوم يحشر امه على سالفه نوره.. خالد: امي يلا عاد خلصت البنت امتحاناتها.. ام يوسف: اثجل يا ولد بلاك انت .. توها البنت مخلصه من يومين .. خل تستلم النتيجه عقب خالد: افففففف.. تراها ناجحه امي.. هاي مصريه تاكل كتب ام يوسف: عيب عليك يا خلود.. خالد: اففففف.. والله امي انا وايد صبرت اخرتها بسير عند اخوها في الشركه وبرمسه ام يوسف: استح على ويهك.. صدق انك جليل حيا خالد: امي انزين تراج انتي مب طايه اتروحين ام يوسف: بروح بروح.. انا قلت ما بروح.. بس بصبر كلهم اسبوعين والبنت بتستلم النتايج وبسير خالد: افف.. انا ساير المستشفى ام يوسف وهي خايفه عليه: بسم الله عليك يا ولدي تشكس من شي.. خالد: لا امي.. بسير بخليهم يعطوني ابره منومه لمده اسبوعين ام يوسف: هههههه .. خس الله ابليسك خرعت قلبي خالد: بسم الله عليج .. يا احلى ام في الدنيا.. سلامه قلبج فديتج ام يوسف: ههههههه ما تيوز من سوالفك وطبعا ريم كل يوم طايحه عند عزّة عشان اتساعدها.. لأنها حاسه بإحساس عزّة أنها روحها لا ام ولا ابو ولا حتى اخوي اكبر عنها.. كانت هي اختها واخوها وما تقصر عليها بأي شي.. طبعا الخيمه جاهزة عند بيت عمها.. ويوم الأربعا عزيمه الرياييل والحريم في الخيمه الثانيه لليلة الحنى.. ونواف منو قده معرس اماراتي احين.. وصلوا اهل نواف من الكويت.. واجتمعوا كلهم ويا اهل عزّة الي كان الكل مستانس لها.. خواتها الصغار واخوانها الإصغار.. لأنها كانت مثل الأم الحنونه بالنسبه لهم.. منهم الي يصيح لأنها بتعرس ومنهم الي فرحان.. الرياييل يوله وغنى والنعاشات .. يعني صدق كانوا مسوين جو من العرس الإماراتي الأصيل.. وعيال عم نواف الي يوم ن الكويت كانوا جدا متفاعلين ويا الرياييل .. وتعلموا الرقص الإماراتي .. وقاموا ايولون وياهم.. وحتى راشد الي كان من يومه بمثابه اخو لعزّة كان يحبها مثل ما يحب ريم.. كان مستانس لها من كل قلبه وايول ويا الرياييل.. خالد وعبدالله وطبعا ربيعه احمد الي مافارقه لحظه.. اتصل راشد في نوف عشان اتشوفه وهو يرقص.. ركضت نوف هي وريم ونوال ونوره راحوا الحجره عشان يوايجون من الدريشه.. وفعلا شافوا راشد وخالد وعبدالله ثلاثتهم حذال بعض .. وكل واحد كان ايول احلى عن الثاني.. ونوره ما فارقت نظراتها عن خالد.. كان ودها انها اتشوفه دوم.. بس كانت تستحي اما هالمره كان احساسها غير.. حست انها وايد قريبه منه.. كانت اتشوفه بكل نظرات اعجاب وحب.. انتبه خالد ان في حد يطالع من فوق.. ويوم دقق شافها.. شاف روحه.. حس نفسه مستانس وقام يستعرض احلى شي عنده عشانها... واما نوال فكانت تضحك على عبدالله .. وهو متغيض منها ومتوعد فيها.. والتقت النظرات ما بين احمد وريم.. ريم الي ملكت روح احمد .. حس عمره مخنوق.. مب قادر يكمل.. لكنه قاوم عشان خاطر ربيعه نواف.. كانت نظراتهم لبعض جدا غريبه .. كأن كل واحد يودع الثاني فيها وانه آخر لقى لبعضهم .. ما اهتمت ريم وصدت ونزلت راحت عند عزّة .. الي كانت لابسه الثوب الإماراتي التراثي.. والذهب التراثي.. كان شكلها طالع وايد حلو.. التقت فيها اصالتها العربية وملامحها العربيه.. السمار العربي الجميل.. والخشم الي مثل السيف المسلول.. كانت طالعه قمه من الجمال.. وخلصت الحفله والكل روح .. لأن اليوم الثاني لازم الكل يقوم من وقت لأنه اليوم المرتقب بالنسبه للجميع.. ريم: نوف.. اقول هاتي المدخن,.. ترا اتأخرت.. بسير عند عزّة نوف: انزين .. اتريي احين بييبه عبود: الي يشوفج يقول انج انتي العروس.. ماشاء الله عليج اختي.. وينك يا يوسف اتشوف الي اشوفه ريم: فديتك والله اخوي.. انا من غير شي حلوه نوف: تعالي ادخنج.. ريم: شو بلاج ما بتيين وياي نوف: لا حبيبتي .. حاسه بتعب.. البارحه وايد وقفت ريم: خلاص عيل برايج.. انا بسير ما بتأخر يوم يدخلون المعرس انا بظهر.. نوف: الله يحفظ.... عاد لا تسرعين عشان توصلين بسرعه ريم: لا ما عليج عبود: اترومين اتسويقين.. ولا اوديج ريم: لا اروم .. مشكور.. يلا باي عبود: ريم.. حطي بالج على روحج.. ريم: بلاكم انتوا اليوم.. الي يسمعكم يقول سايره جهاد نوف: انخاف عليج حرام.. عبود: ريم دخيلج انا بوصلج ريم: عن العياره .. سير وصل حرمتك نوال احسن .. ما عندهم حد عبود: والله .. ليش ما خبرتني ريم: مادري عنها .. يلا انا سايره اتأخرت وراحت ريم وصلت الخيمه.. كان الديكور الي في الخيمه كلاسيك وقمه في الجمال.. كان من تصميم اخوها راشد.. بحكم ان عنده محل تصميم وديكور.. اول ما دخلت جابلتها اخت عزّة.. عفرا: هلا ريم.. وينج تترياج عزوز ريم: زحمه في الدرب.. وينها وديني لها عفرا/ تعالي بوديج.. شو هالحلاة ريم.. ماشاء الله عليج تعالي خل عموتي تقرا عليج ريم: هههههه .. فديتج.. في البيت ما قصروا .. قروا علي وايد عفرا: لازم بيخافون عليج.. يلا حبيبتي ادخلي انا بسير الإستقبال ريم: اوكي.. (ودخلت ريم وشافت عزّة الي كانت طالعه اميره بجمالها ومكياجها الحلو وشافتها تنتفض وخايفه) بلاج عزوز.. هدي عزّة: ريم.. مرتبكه مب عارفه شو اسوي ريم: لا اتحاتين.. اقري المعوذات واتوكلي على الله.. عزّة وهي مغصوصه: ريم.. مشتاقه لأمي .. كنت اتمناها اتشوفني في هاللحظه ريم تذكرت امها بغت اتصيح بس تفادت الموقف عشان ما اتزيد على عزّة: حبيبتي عزوز.. لا تكدرين عمرج.. تراها اتشوفج احين وتدعيلج صدقيني.. انا بعد كنت اتمنى بس الله ما كتب عزّة: اخ يا ريم.. احس بالوحده القاتله.. ريم: لا يا حبيبتي .. نسيتي انا وياج.. وحتى اخوي راشد يحبج مثل ما يحبني.. وهدية زواجج اسبوع في برج العرب.. شو تبين بعد عزّة: يحليله اخوج .. ا قصر والله .. الله لا يحرمج منه ريم: ولا يحرمه منج بعد عزّة: عيل وين نوف.. ونوره.. ونوال ريم: نوره ونوال في الصاله.. اما نوف تعبانه اشوي.. تدرين البارحه طول الوقت واقفه عسب جيه نوف: هي والله ما قصرت حليلها.. دخلت عمه عزّه: يلا العروس ازهبي بنظهرج عزّة: انا زاهبه عمو ريم: الله الله منو قدج عزّة: الله يستر.. اخاف من الربكه الي فيني .. اطيح من على الإستيج ريم: احلى شي الصراحه هههههههه عزّة: سخيييييفه.. ويا هالويه وطفوا الأنوار.. وطلعوا عزّة الي ظهرت على اغنيه كانوا مسوينها لها.. كانت مفاجئة من ريم.. كانت طالعه عروس ولا الف ليله.. كانت في قمه الجمال والرقه.. وبخطواتها الناعمه.. وابتسامتها الشفافه الممزوجه بالخجل.. كانت ولا في الأحلام.. واول ما وصلت الكوشه الكل كان مستانس ويرقص ويحتفل فيها.. ويود دخل نواف.. كان اول مره يلبس غتره وعقال والبشت.. كان شكله بالنسبه لعزّة يضحك.. لأنها ما تعودت اتشوفه جيه.. اما هو فكان مب مصدق ان الي جدامه هي عزّة الي يعرفها.. ويوم وصل حذالها ورفع الطرحه وباس راسها.. عزة: نواف.. ابا اضحك ممكن نواف: ما عليه يا عزوز.. انا اراويج عزّة: حبيبي والله شكلك يضحك.. ما يليق عليك البشت مووول نواف: عزووز.. صخي عني لا افلعج بالعقال الي لابسنه عزّة: اقول منو مضبط لك الغتره. . ما ظني انت نواف: شو قالولج ماعرف عزّة: لا بس ما احيدك تلبس غتر نواف: لا البس انتي وين عايشه عزّة: انا عايشه في قلبك.. نواف وهو يبا يغايض عزّة: اقول منو هالغزاله الي هناك.. رقصها وايد حلو عزّة وهي شابه نار عليه: ماعرف نواف: ازقريها خل اشوف منو عزّة: اقول مب جنه طولنا .. خل انروح الفندق نواف: هههههههه .. بلاج .. هدي هدي.. اسف... فديتج هالكثر اتغارين عزّة: لا اتعيدها مره ثانيه .. هالمره سماح نواف: علا هالخشم عزّة: وين .. خل اشوف. مافي خشم نواف: هيهيه .. ما يضحك وبعد نص ساعه راحوا المعاريس وركبوا الليموزين وساروا صوب برج العرب.. يقضون فيه اسبوع وعقبها يسافرون جواله حول العالم.. وطلعت ريم بعد ما مسحت مكياجها وربطت شعرها واتشيلت عدل عشان اتسوق براحتها.. ركبت السياره عشان اتروح بيتهم.. شافت واحد يلاحقها .. حاولت اتضيعه بس ما رامات كان وراها.. وهو يحاول يلف عليها.. كان الشارع فاضي جدامها... فبدت تسرع.. وهو مب طايع يهدها اسرع وراها.. وعند الإشارات شافت الإشراه حمرا.. والشارع كان فاضي.. فهي عدت الإشراه بس ما لحقت اتعدي الا وطلعت لها سياره كبيره هي كانت مسرعه .. دعمت السياره واندعم الي كان يلاحقها فيهم بعد بعد ما انجلبت سياره ريم عده جلبات.. بالإضافه لسياره ثالثه كانت مسرعه وما قدرت تتفادى الحادث فدعمت السيارتين.. كان عبدالله يرمس ويا نوال : ها يعني عرسنا بيكون احلى نوال: ان شاء الله.. عبود: اقول حبيبتي عندي خط ثاني نوال: الساعه ثنيتن منو متصل.. عبود: مادري بشوف(رد عبود على الخط الثاني) الووو ----: السلام عليكم عبود: وعليكم السلام -----: الأخ عبدالله عبود: هي نعم.. ----: بغيت اخبرك ان اختك ريم علي في المستشفى.. بس تطمن حالتها مستقره نوعا ما.. هي عطتني رقمك عشان اخبرك.. واتقول لا اتخبر حد .. عبود وهو منصدم: شووووووووووو .. كيف؟؟ متى ؟؟؟؟ وليش؟ -----: اخوي هدي عمرك مافيها شي الا كل خير حادث بس الله كتب لها عمر يديد عبود: خلاص خلاص انا ياي احين وصك التليفون وركض طلع من البيت ونسى انه لابس جلابيه البيت حتى من كثر ما كان مستعيل عشان يتطمن على اخته ... وكان جدا مسرع .. واول ما وصل المستشفى وبركن نزل وهو يركض دخل المتشفى وهو يصرخ : وينها .. وين اختي؟؟؟ وين خليتوها؟؟؟ طلع له دكتور حاول يهديه وبدا يكلمه: حضرتك اخو الست ريم المزروعي عبود: هي انا اخوها .. وينها ابا اشوفها يا دكتور الله يخليك وينها الدكتور: انت هدي نفسك وانا حوديك ليها.. بس انت ما تخافش وبلاش الإنفعال ده كُله... اسمعني يا ابني انا عندي كلمتين عاوز اقولهوم لك؟؟ عبود وهو خايف: شو .. قولي بسرعه (ويمسك اكمام قميصه ويهزه) خبرني اختي بلاها.. لا تسكت.. الدكتور: يا استاز عبدالله... انت انسان فاهم وعاقل وبتفهم في الدنيا كويس.. اسمعني يا ابني ... اختك ريم حصل لها ارتجاج خفيف في المخ بس الإرتجاج ده للأسف أسر على النزر بتاعها... يعني الشبكيه عندها تلفت اتأسرت جامد... ونتيجه للجروح العميقه الي في جسمها فقدت كتير من الدم ونحنه طبعا طلبنالها دم من بنك الدم الي موجود هنا... ووصلنالها اياه عبود وهو حاس عمره مب قادر يستوعب: شو .. شو شبكيه؟؟ اختي وين؟؟ شو يعني كل هذا دكتور..؟؟ يعني اختي انعمت...؟؟ دكتوووووووور فهمني.. الدكتور: انت عاوز تفهم ازاي وانت منفعل كده هوت... تعال معاي وشوفها ... هيه تحت تأسير البنج دلوقتي.. عبود: هي والله دخيلك خلني اشوفها.. خل قلبي يرتاح الدكتور: رجاء .. ما تعملش دوشه عبود: يوووووه عاد انا الي فايج حق دوشه ومحد غيرك الي مدوش راسي الدكتور: ههههههه .. طلع دمك خفيف قوي عبود: صدق انك فايج.. (وهو يطالع ريم) ريم .. حبيبتي(وبدا يمسح على راسها ويقرا عليها) شو صار لج.. قلت لج خل اوصلج بس انتي الله يهداج.. حسيت ان في شي اليوم... ريم.. الله يخليج قولي شي .. خل قلبي يرتاح كانت ريم تسمع اخوها بس لسانها مثجل عليها من البنج .. مب قادره اترد .. كانت تدمع عيونها.. وعبود يمسحهم ويقرا عليها عبود وهو يكلم الدكتور: دكتور.. ليش ما ترمس.. بلاها الدكتور: ما تخافش يابني ده تأسير البنج .. ولما يروح عنها هيه حتبأى زي الفل عبود: وعيونها دكتور::؟؟؟ الدكتور: والله انا مش عارف اقولك ايه... بس في احتمال كبير جدا حسب الفحوصات انها ما تقدرش اتشوف بعد كده عبود: وهذا الشي ماله علاج دكتور.. حرام بعدها صغيره هالبنت الدكتور: الطب اتقدم أوي... ما تخافش.. كل شي لع علاجه... تقدروا تعملوا لها زراعه شبكيه انسان سليم.. وتتوافق انسجته مع انسجتها عبود: انزين دكتور منو الي بيتبرع بعينه؟؟ الدكتور: مهو هو ده العائق في العلاج ده؟؟ لأنه زي ما انت عارف العين اهم حاجه.. بس انا املي ان التشخيص بتاعنا ما يطلعج صحيح عبود: هي والله اتمنى... يحليلج يا ريم ما تستاهلين الي ياج.. عين ما صلت على النبي... الا اقول دكتور.. منو الي دعمها؟؟؟ الدكتور: والله انا الي عارفه ان في ثلاثه جوم معاها وهم في الأوضه التانيه.. عبود: والخيبه .. ثلاث.. معذوره اختي يوم صابج ها كله.. منو الي فيهم كان السبب الدكتور..: والله اقولك ايه الي انا سمعته اني اختك هي السبب .. عدت الإشاره عبود: شوووووووووو؟؟؟ اكيد في شي جايد خلاها اتعدي؟؟ بسير اشوف شو السالفه وراح عبود عشان يدخل على الشباب الي في الحجره الثانيه الي شاف كل واحد غرقان في دمه وقاعدين السسترات يخيطون الجروح ويعالجونهم.. شاف اثنين مواطنين والثالث شكله سائق مركبات هندي.. سار صوب الهندي عبود: منو الي دعم اختي اعترف الهندي: بابا .. والله انا مافي سوي دعم... هزا انا فيي سير اشاره جرين.. بس هزا هرمه سريع واجد انا يدعم هو.. هو سير اشاره اهمر... بس.. وهزا تو نفر بعدين يدعم انا ويدعم اخت مال انت .. سياره مال هيه سوي جلب عبود: وشو الي خلاها تسرع جيه الهندي وهو ضام ايده: والله بابا انا مافي شغل.. سوري والله... انا مافي معلوم عبيد: اخوي.. الهندي ترا ماله شغل (وهو منزل راسه) انا السبب.. انا كنت الاحقها وهي كان اتحاول تشرد مني.. ارجوك لا تحرج علي انا جدا اسف.. والله جازاني.. سيارتي اتكنسلت وانكسر ضلعي... عبود وهو بينفجر كان ساير صوبه عشان يضربه مسكه الهندي: لا بابا.. خلاص سوي سوري مشان اخت مال انت.. بليز هدا عبود اشوي : انت شو.. مب آدمي.. ما عندك اهل ما عندك بنات اتخاف عليهم.. خاف ربك... اختي انعمت والسبه انت(حس نفسه منها وبدا يصيح) شو من رياييل انت خبرني.. مستانس احين.. انت اتعورت شوي.. لكن اختي شو.. انعمت .. انحرمت من الرؤيه وهي بعدها فيي ربيع عمرها.. عبيد كان منزل راسه ومب عارف شو يرد عليه من الخجل.. عبود: اااااااخ يا ريم... ليش انتي ليش؟؟؟ يوم سمع الشخص الثالث اسم ريم فز.. تدرون منو هو.؟؟ هو احمد .. احمد الي يحب ريم اكثر من نفسه.. ما عرف شو يسوي ما لقى نفسه غير ساير صوب عبيد وبدا يكفخه وهو ينزف.. ركض عبود صوبه ومسكه .. ويوم شافه عرفه.. كان ياي عزا ابوه وغير جيه كان يشوفه في الكوفي.. والي اكثر من هذا كله.. عرفه هو.. نفس الملامح.. تذكر... تذكرها وكأنها هي الي جدامه سوسن... هذا احمد اخو سوسن عبود: هدي يا احمد هدي... خلاص... هذا قضاء وقدر احمد: لا.. هذا النذل ما لقى غير ريم من بين البنات يلاحقها؟؟ عبود استغرب يوم سمعه ينطق اسم ريم: شووووووووو؟؟؟ انت منو عسب تطري اختي احمد وهو مب داري بعمره ومنهار من الصياح: هاريم... ريم قلبي... هاي الي ماخذه عقلي بالي فيه... ريم الي فقدتها في البدايه والسبه ولد عمك.واحبن ماروم ارجع لها لأنها مرتبطه.... واحين هي تفقد نظرها.. عبود: احمد انت شو اتقول؟؟ انت مب صاحي؟؟ احمد: لا صاحي يا عبدالله .. صاحي... بحب ريم انا صاحي... ريم الي تنحط على الجرح يبرا.. حرام الي سواه فيها هالنذل.. ريم قلبي.. وينها ابا اشوفها .؟؟؟ خلني اشوفها عبدالله ابوس ريلك(وفعلا حاول يبوس ريوله بس مسكه عبدالله) دخيلك.. لا تزعل مني.. بس افهمني انا احبها.. بس هي ما تباني صح.. بس خلني اشوفها ولو من بعيد .. ارجووووووووك عبود كان متردد.. لأنه يحس انه اهانه بالنسه له يسوي هالشي بس كان يتذكر سوسن يوم كانت تطلب منه شي شو كان يسوي عشان ينفذه لها وصد صوب احمد : اقولك شي واتجاوبني بصراحه؟؟ احمد: شو قول.؟ عبود: انت ليش ما وافقت علي يوم رمستك عني سوسن انها تباني وما تبا ولد عمها؟؟ ودامك عارف الحب ليش ما جمعتني فيها؟؟ ليش غصبتها على شي ما تباه.؟؟ واحين اتشتت البنت؟؟ احمد وهو مستغرب ومب عارف شو يقول: انت شو اتقول؟؟ انت عبدالله .. اخو ريم ؟؟ ما اصدق انك انت الي قالت لي عنك؟ عبود: يعني لو كنت اتعرف اني انا اخو ريم... كنت راح اتوافق علي؟ احمد: انا ما عرف عنك اصلا... انا كنت حاس ان اختي اترمس حاولت اكلمها بهدوء كذا مره ما لقيت منها اي جواب.. ويوم خطبها ولد عمها صارحتها.. اذا تبين حد قولي لي.. انا بوافق عليه.. المهم سعادتج.. قالت لي انا احب ولد عمي واباه.. عشان جيه انا وافقت والله ما اجبرتها انصدم عبود من هالكلام؟..حس بطعنه في صدره بس قرر انه يسكت ومشى ويا احمد ودخلوا عند ريم الي اول ما شافها احمد ما قدر يتمالك نفسه .. لأنه عمره ما تخيل يشوف ريم في هالموقف.. حاول يجرب منها بس انتبه لوجود عبدالله فتراجع وطلع من الغرفه وهو يصيح.. طلع له عبدالله ويهديه.. عبود: احمد... ما فيها شي.. بس للأسف الشي الكبير انها انعمت؟ احمد: هذا الي مزعلني.. انها ما راح تقدر اتشوف؟؟ ماله علاج هالشي؟؟ عبود: بلا قالو لي زراعه شبكيه مادري شو.؟؟ احمد: اانا بتبرع؟؟ عبود وهو مستغرب منه: انت بلاك مب صاحي فيك شي اكيد.. متأثر من الحادث.. قبل لا انت اتقول انا مستعد قبلك بس اختي واعرفها زين.. مستحيل اتوافق.. راح اتعيش جيه ولا انها توافق احمد: انزين .. سفروها برع البلاد عبود: ان شاء الله بس اكلم راشد اخوي احمد: ما يعرف هو شكله... لأني ما اشوفه هني عبود: لا محد يعرف هي طلبت من السستر اتخبرني انها ما تبا حد يعرف غيري في بيت راشد كانت نوف قايمه اتسوي حليب لساره.. شافت غرفه عبود الباب مفتوح والليت مفتوح ودخلت غرفه رين لقتها فاضيه.. خافت.. تمت ادور ما لقت حد في البيت وشافت سياره عبود وريم مب موجوده في الكاراج .. سارت عند راشد وقومته نوف: راشد.. قوم حبيبي.. اختك بعدها ما ردت.؟؟ احاتيها وتليفونها مغلق.؟؟ قوم شوف شو صاير فز راشد من على الفراش يوم سمع هالكلام وركض شل موبايله ويتصل في عبود: الووو عبود: الووو؟؟ راشد شو موعنك؟؟ راشد: شوشو موعني؟؟ وينك ؟؟ وين ريم؟؟ عبود اتعلثم ما عرف شو يقول: ها.. رررريم... ممادري راشد: شو صاير خبرني؟؟ قلبي مب مطمن؟؟ عبود: ريم .. ريم... ريم في المستشفى يا راشد مسويه حادث راشد: وانت مستانس يعني.. ليش ما خبرتني .. انا اخوها العود.. انا ابوها.. مالي حق اعرف عبود: راشد هدي.. ترا مثل ماهي اختك تراها اختي.. بس هي قالت لي لا اخبركم اليوم راشد: انت مينون لأنك يوم اطاوع هالياهل.. يلا انا ياي احين ويا نوف عبود: يلا اترياكم وطلع راشد ويا نوف بسرعه عشان يتطمنون على ريم.. وكل واحد فيهم كان شايل هم الدنيا على راسه.. ويدعون ان ريم ما تكون حالتها خطيره .. واول ما وصلوا البوابه شافوا عبود مجابلهم... راشد: وين ريم؟؟؟ ودني لها؟؟ عبود: لا مب الحين .. هي احين تحت تأثير البنج عقب ما تقوم بنسير لها نوف: لا والله ونحن نيلس على اعصابنا عبود وهو معصب: يوووه راشد سكت حرمتك ترا الي فيني كافيني... مب فايج لها... وبعدين هاي اوامر الدكتور.. ولا انا ودي ما افراجها اصلا راشد وهو يكلم نوف: نوف حبيبتي خلاص هدي نفسج.. نوف: والله انا اشعلي منكم بدخل بشوفها احسن من مجابلكم عبود: نوف.. قلت لج لا اتسيرين... انا ابا اكلمكم عن ريم راشد: خير عبدالله شو السالفه؟ نوف: شو تتريا انطق.. عبود: لا حول ولا قوه الا بالله.. انتي عطيني فرصه ارمس انزين.. السالفه ان الدكتور قال لي ان في احتمال كبير ان ريم تفقد بصرها نوف: شووووووو (ومسكت عبود واتهزه) انت شو اتقول.. لا بلاه هب صاحي.. ريم.. لا مستحيل مسكها راشد وحاول يهديها ويكلم عبود: منو خبرك هالكلام؟؟ عبود: الدكتور الي كان مشرف عليها.. قالي الشبكيه عندها متأثره من الضربات.. وكان مستوي لها نزيف بسيط في الدماغ فهمت علي راشد: لا حول ولا قوه الا بالله.. انزين وكيف صار هالحادث منو كان يسوق عبود: والله مادري كيف بالضبط بس الي فهمته انها كانت مسرعه وعدت الإشاره الحمرا وم انتبهت لسياره اتعدي الإشاره من الجهة الثانيه فدعمته نوف: لا اله الا الله.. انزين متى بيخلوني ادخل عليها ابا اشوفها على الأقل ابا اتطمن دخيلك راشد: انتي هدي بس.. انا بسير ويا عبود وبنكلم الدكتور وبشوف.. وسار راشد ويا عبدالله عند الدكتور المناوب.. ويوم دخلوا عنده لقوا احمد واقف ويا الدكتور يكلمه.. الدكتور: اهلا يا عبدالله.. عبدالله شاف احمد بس ما عبره .. لأن غيرته ما تسمح له اولا وثاني شي كان يشوف سوسن الي جدامه: اخبرك.. متى بتخلينا انشوف اختي.. ترا هذا اخوي العود راشد وصل ويبي يشوف ريم.. الدكتور: هو تأسير البنج لسه موجود بس حعمل ايه مهو لازم تتطمنوا بردوا.. امري لله اوديكم بس زي ما قولتلك ما تتأخروش كتير عندها وما تعملوش دوشه.. هي تحتاج للراحه والهدوء التام راشد: حاضر.. تحت امرك بس دخيلك ودنا لها طلع راشد ويا الدكتور وعبدالله وزقر راشد على نوف عشان يدخلون عند ريم.. ودخلوا وشافوها نايمه على السرير وموصل لها كيس الدم بعده والجروح على ويها وعيونها مغطايه ما قدر راشد يتحمل يشوف اخته في هالحاله .. تذكر امه يوم كانت على نفس الفراش.. تذكر ملامحها كيف كانت.. لوهله خاف انه يفقد ريم.. بس استغفر ربه وقام باس راس اخته ومسك ايدها وتم يقرا عليها.. وفجأة حس ان حد يرص على ايده يوم فتح عيونه شاف ريم اترص على ايده واتحاول اتقول شي بس لسانها كان ثجيل عليها.. الكلمات ما كانات واضحه راشد: شو .. ريم .. حبيبتي شو قلتي؟ ريم: يو.. يوسسسس.. يوسف راشد: شو .. يوسف.. يوسف يا ريم (هزت ريم راسها على انه سمعها صح) حبيبتي انتي.. يوسف يحبج يترياج على الكوشه ريم: لا .. لللللا تتتتخبرورورووووووررررنه راشد: حاضر.. ما بنخبره انتي بس هدي ونامي.. لا تحاتين حبيبتي.. ارتاحي ونوف كانت واقفه مكانها وما تنطق بأي كلمه سحبها عبدالله وطلعها برع وعقب لحقهم راشد وطلع برع وشل حرمته وطلب من عبدالله يخلص كل شي يلزمه المستشفى ويرجع البيت عشان الصبح يردون لها ======= ومر الليل على خير وقام راشد وعبدالله من الصبح عشان يسيرون عند ريم مع انه كان هذا اليوم يوم افتتاح معرضه الي كان يترياه من متى.. معرض ساره.. بس مهما صار اخته اهم ما كان يفكر بالمعرض.. وفي الدرب راشد: عبدالله.. اتهقى في علاج ؟؟ عبدالله: والله مادري يا خوي... الدكتور يقول نادر الي يتعالجون.. راشد: انزين ماشي مجال يعني؟؟ عبدالله: والله انا تبا رايي الصراحه.. انوديها برع البلاد .. اي مكان يمكن هناك احسن... راشد: هذا شي اكيد.. كنت افكر في هالشي البارحه انا ونوف.. عبدالله: الا اتخبرك مب اليوم مفروض افتتاح معرضك؟؟؟ راشد: هي .. بس اختي اهم.. والإفتتاح بعده شي وقت فليل هو عبدالله: ااااااااااه.. والله ما تستاهل ريم الي صابها.. الله يجازي الي كان السبب راشد وهو مستغرب: السبب؟؟ سبب شو؟ انتبه عبدالله انه قال شي ما كان لازم يقوله بس حاول يبررالموقف: اااقصد يعني انها اسرعت الله يهداها راشد: هي.. بس انا مستغرب ما احيد سواقتها متهوره.. هذي سواقتها احسن عني وعنك عبدالله: مادري عنها والله.. يلا انزل وانا ببركن وبييك راشد: خلاص.. يلا لا تبطي ونزل راشد ودخل المستشفى سأل عن اخته قالوا ان حالتها اتحسنت وايد واتجاوبت ويا الدوا وايد وان بنيتها قويه.. فنقلوها الجناح فوق.. استانس راشد للي سمعه وطلب انهم يرخصونها قالوا له خذ اذن من الدكتور وراح راشد عند الدكتور ودخل عليه راشد: السلام عليكم دكتور الدكتور: وعليكم السلام.. اهلا.. تنفضل اقعد راشد: والله يا دكتور انا خبروني انك انت الطبيب المعالج لأختي.. بغيت اخذ اذن خروجها اذا امكن الدكتور: انت اخو ريم المزروعي.. خبركم الدكتور المناوب عن حالتها؟؟؟ راشد: هي خبرنا الدكتور: انزين انا احين لازم اسير اسوي لها كشف واطمن .. ونكشف الغطا عن عينها ونشوف اذا بإمكانها تشوف ولا لا.. والله يعين راشد وهو خايف: انزين دكتور واذا ثبت هالشي.. شو علاجه الدكتور: ممكن زراعه شبكيه بس نادر هالشي راشد: عيل قم دكتور خل اشوفها دخيلك الدكتور: ترا الحاله النفسيه اتأثر عليها حاول انك اتكون طبيعي جدا راشد: حاضر.. وهني رن اليفون راشد كان عبود متصل يتخبره عن غرفة ريم راشد: اخبرك تعال عنبر * غرفة رقم *** عبود: احين بييكم دخل راشد ويا الدكتور على ريم.. وهو يدعي في قلبه ان ما يثبت شكهم ويدعي في قلبه.. واول ما دخلوا ما لقوا حد على السرير .. سمعوا صوت انين حد يصيح.. وشاف الدكتور غطا الي كان على عينها مرمي على الأرض.. تم يطالع راشد يمين ويسار الغرفه يدور على ريم.. لقاها منزوره على زاويه في الغرفه واتصيح.. سار صوبها ولمس كتفها .. راشد: ريم حبيبتي ليش انتي هني.. تعالي على السرير ريم زاد صياحها وتمت ادور على حضن اخوها وهني ادرك راشد ان ريم فقدت بصرها : راشد اخوي.. ما راح اشوفك من اليوم وساير .. ما بشوفك حبيبي.. يوم شاف الدكتور هالمنظر فضل انه ينسحب من الغرفه وجابله عبدالله الي يوم شافه خاف.. قلبه قبضه لأن شكل الدكتور ماكان يبشر.. دخل شاف راشد ماسك ايد ريم ويوديها صوب السرير وهني عرف سبب ملامح الدكتور الحزينه.. وسار مسك ايد ريم الثانيه حست ريم فيه وعرفت لمسته.. عرفت ان اخوها عبدالله بعد موجود لوت صوب ايده وحظنته وهي اتصيح.. ريم: عبدالله.. ليش انا ليش؟؟؟ راشد: ريم.. خلي ايمانج بالله قوي.. وان شاء الله العلاج موجود لا اتحاتين ريم: راشد انا ما احاتي نفسي؟.. احاتي يوسف.. كيف بيعيش وياي.. انا بفصخ خطوبتي فيه ما اقدر اظلمه وياي.. ما اقدر .. افهمني .. انا بدبر نفسي.. لكن ريلي.. يبا حد يراعيه وانا نفسي ابا من يراعيني.. عبود فاهم ريم ويعرف معنى كلامها وانها على حق.. بس هو متأكد ان يوسف لا يمكن يتخلى عن ريم: ريم حبيبتي.. انتي لا اتفكرين في اي شي احين صحتج اهم من كل شي راشد: هي والله يا ريم صدقه عبدالله ريم حاولت اتغير الموضوع لأنها حست ان اخاوها متضايقين وهي ما تحب تضايقهم : اخبرك راشد انت شو يايبنك لازم اتكون في المعرض تشرف على الترتيبات الأخيره اليوم الإفتتاح راشد: انتي لوحاتي.. انتي رسماتي.. انتي معرضي انتي كل شي.. ريم : يوووووه يلا عاد .. استحي تراني.. يلا قوم بنسير البيت بلبس اللبس الي شريته عشان هاليوم.. وبشل سارونه وبنسير وياك يلا عاد.. عبود وراشد استغربوا من تصرفها واستانسوا في نفس الوقت.. حزتها حسوا بفخر كبير اتجاه اختهم .. رغم الألم الي فيها الا انها تملك قوه خارقه ... على طول ما صدقوا لموا اغراضها وراحوا وياها .. مني رن تليفون راشد كانت نوف متصله راشد: الوووووووووووه .. هلا والله نوف: صدق انك فايج.. شو هالنفسيه..وينك من الصبح اتريا حد يطمني راشد وهو يغني: انسى الزعل انسى الي راح انسى الألم انسى الجراح طمني بس(وعطى السماعه لريم عشان اتكمل) ريم: طمني بس خل ارتاح.. طمني قول صبري راح.. طمني بس.. صرخت نوف يوم سمعت صوت ريم استانست.. حست ان روحها ردت وهمها انزاح: ريم حبيبتي الحمد لله على السلامه.. خوفتينا عليج ريم: لا والله.. خفتي علي.. فديتج والله.. عاد حاسبي عن المظاهر هاي جدام اخوي اونج اتحبيني احين شرات المسلسلات صايره لنا.. نوف: حرام عليج عبود: بدت احين.. افف.. كنا مفتكين من لسانها يومين ريم: اصلا لساني مافي احلى منه عسل يقطر.. ولا شو رايج نوف ريم حطت على الإسبيكر عشان الكل يسمع: لا في هالشي عاد انا وياج.. هي والله البيت من غير لسانج ما يسوى التراب حتى هني صرخت ساره يوم سمعت صوت عمتها ريم حبيبتها: آلو ليم.. تعالي ابا العب وياث دمعت عين ريم.. لأنها عرفت انها ما تقدر تشوف ساره الصغيره ولا الياهل الي في الدرب من اليوم وساير .. عطت السماعه لراشد نوف: الو .. ريم.. حووووح.. عاد قلنا عسل ما قلنا اختقي علينا راشد: نوفي.. يالله فتحي الباب انا وصلت البيت نوف: شو.. يايين البيت.. فديتكم الا مب بس بفتح الباب الا بفرش الدرب ورد احمر وهني طلعت نوف عشان تفتح الباب ويدخلون البيت .. نزلت ريم من السياره بمساعده من عبود وادركت لحظتها ان ريم ما قامت اتشوف.. ويوم ساره شافت ريم ركضت صوبها.. ساره: آلو ليم.. ديوووووووووو صدت ريم صوب اليمين مع ان ساره كانت على يسارها.. ساره: آلو ليم.. ما اتثوفيني انا هني.. هيهيهيهيهيهي انتي اتثوفين مناكي رونج مني زاد حزن ريم وكآبتها... بس حاولت ما اتبين لساره : لا حبيبتي شفتج حلوه مثل القمر بس انا اسوي عمري ما اشوفج.. _صدت على فوق ) راشد ودني غرفتي خل اتلبس وبيي وياك راشد: تعالي.. هاتي ايدج ===================== يا ترى شو موقف يوسف من الي صار؟؟ وشو عن خالد ونوره؟؟؟ واحمد ؟؟؟ واهم من هذا كله الإفتتاح الكبير لمعرض راشد المزروعي؟؟ منو راح يقابلون هناك؟؟؟
__________________
|
|
#9
30-03-2005, 12:44 AM
|
||||
|
||||
|
الجزء السابع
=========== تلبست واتكشخت ريم احلى كشختها وبقدره قادر الكل تعجب من هالشي .. كانت مجحله عيونها من داخل ولا مغلطه في شي.. وحاطه جلوز وردي فاتح.. كانت خدودها مورده وطالعه حلوه رغم الجرح الي على خدها.. حتى ان الكل بدا يشك انها مب عميه لولا كلام الدكتور الي أكد لهم تلف الشبكيه.. نزلت من على الدري بمساعده عبدالله اخوها و كانت شاله ساره في حضنها .. كانوا يوم يمشون ويا بعض كأنها ام وبنتها او خوات من كثر الشبه الي بينهم.. راشد: الله الله.. هل يمكنني مرافقتك أيتها الأميره؟ (يكلم ريم) ريم وهي ماده ايدها: طبعا ايها الفارس المغوار.. ههههههه ومشى وهو ضام ايده بيدها.. كانوا فعلا كأنهم امير وأميرته وركبها السياره وساروا صوب المعرض ,, كانت اللوحه الخارجيه روعه .. كان قاعد يوصف لها جمال اللوحه وكيف مكتوب فيها عنوان المعرض .. وقف في موقف من المواقف ونزل ويا ريم وساره .. ودخلوا المعرض الي كان العمال فيه يشتغلون مثل خليه النحل.. راشد: اقول ريم... اذا منزعجه من حشره المكان بوديج داخل في المكتب احسن ريم: لا مابا.. انا مرتاحه هني.. جيه احس بالمكان ساره: بابا .. ثنو هذا .. ؟؟ منو ثوا ثاره داخل هني؟؟(كانت اتشوف اللوحه الي هي مرسومه فيها) راشد: بابا حبيبي.. هاي سارونه الحلوه .. انا رسمتج حبيبي.. ساره: مع قلم؟؟ ريم: ههههههههه يحليلج يا ساره.. هي مع قلم راشد: ريم قعدي هني وانا بسيراتابع شغل العمال.. ريم: خلاص اخوي .. روح انا هني ويا ساروه الحلوه راشد: ساره بابا اسمعي كلام عمو ريم.. لا تلعوزينها ساره: ان ثالله.. (وهي اتأشر حق عمتها ريم صوب لوحه) عمو ليم ثنو هذا بابا سوا؟ ارتبكت ريم لأنها ما اتشوف الي اتأشره لها ساره: وين حبيبي؟؟ ساره: مني عمو .. ثوفي هناك ريم: هي وايد حلو.. ساره: انا اقول ثنو هذا؟ ريم وهي مرتبكه مب قادره اتقول لها انها ما اتشوف: ما عرف حبيبي.. يوم بابا ايي اسأليه راشد: خلاص تعالي نسير المكتب نيلس هناك بنتغدى ونسولف لين ما ايي وقت الحدث المهم... ريم: هي والله لأني انا يوعانه من خاطر والله راشد: عيل يلا قومي.. وسار راشد ويا ريم وتغدوا وتموا يسولفون ويضحكون على كلام ساره الحلو.. وصارت الساعه خمس العصر.. يعني وصل وقت الإفتتاح.. واتجهز راشد ويا عياله عشان يروحون للإفتتاح.. وريم كانت واقفه على جنب ويا ساره.. راشد كان ويا الصحافيين وكل باله ويا ريم .. وتم الإفتتاح ودخلوا الناس عشان يطلعون على اللوحات... وكانت ريم مرافقه راشد طول الوقت هي وساره بس كانت اتقوم عنه يوم انه يبا يتصور عشان لا تتطلع في الصور.. كان من بين الحضور شخص يشكل ماضي لراشد.. الماضي هذا يعود لأيام الدراسه في كندا.. كانت نظراتها ما تفرق راشد وريم.. كانت تنظر لريم بكل حقد وكراهيه كأنها هي سبب جرح الماضي.. ما انتبه لها راشد ولا ريم طبعا لأنها ما تقدر اتشوف.. حاولت اتجرب من ريم لعل ريم تنتبه لها بس ماشي فايده.. ريم ما كانت اتشوفها.. وبعد فتره لاحظت هذي البنت ان ريم ما تقدر اتشوف .. هذي البنت هي عواطف الي كان في يوم من الأيام راشد يتمناها ويحبها.. وكان على علاقه وياها... كانت هي بنت سفير الإمارات في كندا.. كانت تدرس في نفس الكليه الي كان فيها راشد .. كليه الفنون... راحت صوب راشد وبقصد منها دعمته عشان ينتبه لها عواطف: اسمحلي انا آسفه.. صد صوبها راشد وكانت الصدمه كبيره معقوله عواطف جدامه: أأأأنتي؟؟؟؟ عواطف: والله دنيا يا راشد .. نسيتني؟؟ راشد: انتي شو يايبج هني؟ عواطف: والله اظن اني انا فنانه نفسك يهمني اتابع اعمال غيري.. ومب اعمال اي حد سمعت ريم ان راشد يكلم هالبنت حست ان في شي صاير: راشد.. شو الي صاير؟؟ عواطف: هذي (وهي اتأشر بصبعها بإحتقار) خلتك تنساني... راشد: احترمي نفسج.. ترا الي جدامج اختي ريم انصدمت عواطف وافتشلت: اأأنا آسفة والله ما كنت ادري اتحريتها حرمتك راشد: حتى لو حرمتي انتي مالج حق اتعقين عليها ولا كلمه.. لأن حرمتي هي تاج راسي عواطف: وأنا.. عطوفه... شو بالنسبه لك راشد: كل شي بيني وبينج انتهى .. رجاءً حلي عني.. انا في مكان ما يسمح فيه الكلام العائلي والخاص.. انا في مكان شغل.. (وراح عنها راشد وسحب وياه ريم الي كانت مدهوشه وساكته وهي شاله ساره) ريم: منو هذي؟ راشد: هذي سالفه طويله عقب بخبرج اياها؟؟ اقول اتريي اهني بسير عند واحد بسلم عليه... عواطف شافت ريم بروحها انتهزت الفرصه عشان تكلم ريم: السلام عليكم ريم: من انتي؟؟ شو تبين من راشد؟؟ عواطف: اعصابج يا حبوبه.. انا كل الي اباه ان اخوج يذكر على الأقل الإنسانه الي حبها.. ويذكر على الأقل العشره الي بينا.. طلقني وقلت ما عليه.. عاد ينسى ان عنده ولد.. وما يذكره ولا حتى يسأل عنه.. ما يقصر في المصروف اما وين الأبوه الي في دمه.. انا مابا اخوج بس اباه يهتم في ولده الي ماشافه من 5 سنين شو صار وكيف صار .. الولد يوم يسألني عن ابوه شو ارد عليه.. المهم بلغي اخوج سبب رجوعي راحت عواطف والي تركت عاصفه من الأفكار تدور في ذهن ريم.. الي ما قدرت تتحمل الي سمعته ومن الصدمه الكبيره الي كانت فيها اغمى عليها وطاحت.. انتبه لها راشد وركض لها واعتذر من الموجودين وشل اخته وسار .. راشد: ريم.. قومي يا اختي بلاج.. ريم حبيبتي كانت ريم في حاله اغماء ما اترد على راشد الي تم يحاتي حالتها... وفي نفس الوقت اتصل خالد الي سمع خبر حاله ريم من عبود لأنه بغى يكلم ريم ويتطمن عليها.. راشد: الوو.. خالد.. تعال الله يخليك بسرعه صوب المعرض.. ريم تعبانه مغمى عليها.. حاس عمري ضايع مب عارف شو اسوي خالد: خلاص هدي.. انا ياي احين .. مسافه الدرب واكون عندك وطبعا خالد اسرع عشان يوصل لهم ووصل عندهم بعد 10 دقايق .. وماشاف حد يوم اتصل في راشد قال له انهم نقلوا ريم بسياره اسعاف للمستشفى.. وهو غير دربه للمستشفى واتصل في عبدالله.. خالد: هلا عبود عبدالله: هلا والله .. اشحالك؟ خالد: بخير بخير..اسمعني تعال المستشفى بسرعه ريم جنها تعبت مره ثانيه وراشد خذاها المستشفى عبدالله: شوووووووووووو... وين؟؟ متى ؟؟ وكيف..؟؟ يحليلج ياختي.. خالد: انا ما عرف حالي حالك.. بس انت يلا تعال عبدالله.. : دقايق وانا هناك خالد: الله يخليك انتبه وانت اتسوق مافينا بعد انت تتعور عبدالله: يحليلك يا خلود اتخاف علي؟؟ خالد: ومن لي غيرك اخو.. والله ما بقى لي غيرك عبدالله: يالله مو وقته انا ساير عند ريم.. باي وسكر عبدالله الخط الي ماكان عارف كيف راح يوصل عمره عند المستشفى.. ووصل ونفس الوقت وصل وياه خالد الي لقوا راشد يترياهم راشد: وينكم تأخرتوا؟؟ خالد: والله الدرب زحمه.. شو اخبارها؟؟ عبدالله: شو صاير طمني.. بلاها ريامي.. ؟؟ راشد: مادري في المعرض فجأة طاحت مغمى عليها.. الدكتور يقول نتيجه صدمه وهي كانت ضعيفه جسديا ما قدرت تتحمل قوه الصدمه عليها عبدالله: ليش ؟؟ صار شي يصدمها؟؟ راشد: علمي علمك.. انا مب عارف شي... خالد: اقول هات ساروونه انا بوديها البيت عند نوف راشد: هي والله اتسوي خير وطلع خالد عشان يودي ساره البيت ويرد المستشفى.. ودخل عبدالله ويا راشد عشان يتطمنون على ريم... كانت ريم واعيه يعني عدت الفتره الحرجه من الإغماء.. هي ما انتبهت عليهم يوم دخلوا عليها وكانت سرحانه راشد: احم احم .. ممكن اشوف القمر؟؟ ريم وهي تبتسم: تعال اقرب... ولا تقول قمر.. خلاص ما عدت قمر فيني عاهه احين عبدالله وهو معصب: ريم.. مابي اسمعج اتقولينها مره ثانيه .. راح تبقين ريم القمر وخلاص ريم: خلاص خلاص.. iam sorry خلاص رضيت عبدالله: هي رضيت.. شخبارج انتي المهم؟ ريم: والله الحمد لله راحت الدوخه راشد: ريم .. شو الي صار خبريني.. .؟؟ ريم: ماشي تعب وارهاق... عبدالله: متأكده؟؟؟؟؟ ريم: هي متأكده.. الا اخبركم وين مرت عمي.. ماعرفت الي صار لي؟؟ عبدالله: لا ما كانت اتعرف انا يادوب اليوم خبرت خالد وهو كان ياي يشوفج وسار البيت اكيد بيخبر امه وبيي وياها.. راشد: انا ساير عند الدكتور بخليه يخليج اهني كم يوم.. ريم: لا لا لا لا لالا ... برد البيت راشد: بشوف الدكتور شو يقول اول؟؟ ريم: اففففف.. انزين عبدالله: ريم .. خبريني شو صار.؟؟ انا متأكد ان في شي؟ ريم: عبود بلاك انت.. مافي شي.. يمكن من التعب والإرهاق والتفكير.. لأني طول الوقت افكر في حال يوسف اذا عرف.. ومن الصبح وهو يتصل و انا اعرفه من رنته المميزه الي كنت حاطتنها ايام ما كنت اشوف.. وانا ما ارد عليه عبدالله: حرام ليش عاد؟ ريم: خلاص اباه يعيش حياته وينساني؟ عبدالله: صدق انج اتخبلتي.. امي هذا حب الطفوله كيف ينساه!!!! ريم: ما ادري المهم ماله امل.. ماباه يتعذب في عيشته وياي عبدالله: الله يهديج.. انزين خبريني عن يوم الحادث.. ريم: اخيييي اليوم المشؤوم (قاطعها عبود) عبود: ريم لا اتقولين هالكلام .. اذكري الله .. هذا قدر ومكتوب تراه ريم: ونعم بالله... ماشي ذاك اليوم واحد الله يسامحه كان يلاحقني ويضايجني طفرت جان اسرع ويوم شفت الإشاره حمرا والشارع فاضي اسرعت وشو دراني عن هذا الي ياي عبدالله: وفي واحد ثالث داعمنكم تعرفينه؟ ريم وهي مستغربه: ثالث.؟؟؟؟ منو عبدالله: احمد.. اخو سوسن ريم وهي مندهشه: شووووووووووووو.. معقوله؟؟ عبدالله: هي.. والله الدنيا صغيره يا ريم وهني دخل راشد وسكت عبدالله وريم بعد.. راشد: ها ليش سكتوا عندكم اسرار من وراي.. ريم: لا اي اسرار.. ونحن انروم انخش شي عن اخونا حبيبنا راشد: انزين بلا هذربه يلا قومي نشي.. مافيها شي واتسوي عمرها غشيانه .. دلع بنات.. يلا انجلعي بنسير البيت ريم وهي تضحك: حرام اتغلى عليكم اشوي.. لازم ترا انا الإخت الوحيده لازم اشويه حنان عبدالله: انتي ولا شويه بتكفيج.. ريم: حلال علي.. ولا بتخلي الحنان كله لنوال؟؟ عبدالله: يالظالمه تدرين اني من يوم طيحتج ما كلمتها عدل .. ويوم درت عنج بغت اتيي انا منعتها قلت لين ما تستقر حالتج ريم: انا مستقره يلا ودني لهم.. انا ومرت عمي.. عشان نخصب حق خلود.. العاشق الولهان وهني دخل خالد:السلام عليكم ريم: الللللللللللللللله.. صدق ان عمرك طويل.. توني اطريك؟؟؟ خالد: ادريبج تكرهيني.. كله اتحشين فيني؟ ريم: انا اكرهك.. الله يسامحك بس والله براويك.. اقول عبود خلاص هونت لا اتوديني خالد: وين يوديج؟؟ ريم: اقول راشد.. خل هالذبانه يسكت.. ودني البيت راشد وهو يضحك: يلا .. خالد: لحظه لحظه.. ماشي طلعه لين ما اعرف السالفه؟ عبدالله: انا بخبرك يا بو الوليد.. حضره جناب البرنسيسه ريم بنفسها كانت بتسير عند امك عشان اتكلمها عن نوره ويسيرون يخطبون لك؟ خالد وهو مندهش؟؟: والله صدق.. انا اسف ريم.. يااحلى ريم وغزال وقمر في الكون كله.. فديتج.. الله يخليج انا اسف.. سوري,... ريم: اسف وسوري وين تنصرف هاي.. ابا كاش .. شي ينصرف؟ خالد: يالله انتي بعدها هالعاده فيج.. فالج طيب بس انتي تامرين كم ريم عندي من عيوني ريم: اممممم.. اخ منك انت مصلحجي كل ها عشان نوره خالد: راشد.. قول لها عاد والله حسوا فيني انتوا عشاق واتعرفون معنى الحب ريم: ههههه .. عدال يالعاشق... ترا نحن بعد اوادم وانحب.. بس احب اعوزك انت على طول تجلبها جد راشد: ريم عندها قلب يحب العالم كله عبدالله بصوت واطي: حشى كاراج مب قلب ريم: شنو شنو؟؟ عبدالله: ماشي فديتج.. اقول فديت قلبها الحنون المحب ريم: هييييييييييييه حسبالي بعد.. راشد: اقول انتوا رمستكم الظاهر ما بتخلص يلا بنسير البيت نوف روحها خالد: لا لا لا؟... تعالوا بيتنا.. نتعشى ويا بعض ريم: اخ منك انت.. مستعيل خالد: وايد صبرت خلاص مب قادر اتحمل زود عبدالله: يلا امش جدامي عيل راشد: سرينا ريم: سرينا وراحت ريم ويا عبدالله وخالد بيت عمها سلطان .. وسار راشد عشان يشل نوف وساره وياخذهم بيت عمه,.. نزلت ريم ووصل راشد ونوف وقعدوا كلهم سوالف وضحك ووناسه.. وتعشوا وفتحت ريم موضوع نوره ويا مرت عمها. ريم: عمو.. متى بنسير عند اهل نوره .. عشان خالد ام يوسف: والله يا بنتي متى ما تبين انا حاضره .. بس انتي حددي اليوم المناسب لج.. خالد وهو منفعل: باجر.. ريم : ههههههههههه .. اثقل اشوي انت.. وبعدين منو قال ان باجر مناسب لي خالد: لا والله.. اجازه شو وراج انتي ريم: ما يخصك.. انا بحدد متى ما انا ابا خالد: افففففف بدت شغل النذاله.. نوف: ههههه .. صدق انك عاشق ولهان.. يا روميو راشد: حقوق الطبع محفوظه.. هذا لقبي تراه... هذا عنتر. خالد: متفيجين.. عبدالله: اوب.. الريال عصب.. خالد: اسكت انت الثاني اشعليك .. خطبولك وخلصت مب انا اليتيم حليلي بعد مذله ريم: خلاص انا بكلم نوال عشان اتكلم امها الخميس انروح لهم.. شو تبا اكثر بعد خالد: لا باجر.. ريم: صدق انك مب ويه خير.. طرار ويتشرط.. كيفك تبا يوم الخميس حاضر ولا بهون خالد: اففففففف. رضينا الكل تم يضحك على خالد وشكله.. الا ريم الي متعذبه من داخلها لأنها ما تقدر اتشوف شي.. وهني رن تليفنونها كان يوسف الي متصل.. يوم شاف عبدالله اسم يوسف.. وشاف ان ريم ارتبكت يوم سمعت الرنه ما عرف شو يسوي جان يرد. عبدالله: هلا والله بو النسب يوسف وهو متغير صوته: اهلين.. اشحالك؟؟ وينها ريم؟؟ شو صاير ؟؟ قلبي مو مرتاح اكيد في شي خاشينه عني عبدالله: حوووح.. هدي هدي اشوي اشوي كليتني بالأسئله .. ما بلاها شي يوسف: عيل ليش ما اترد علي.. ليش يوم اتصل ما ترد علي.. ؟؟ زعلانه مني عبدالله: لا شو تزعل منك.. انت ما سويت شي يزعلها.. ماشي كان التليفون في السياره وهي كانت راقده يوسف: عيل عطني اكلمها احين.. عبدالله: هاك كلمها.. يلا في امان الله وعطا عبدالله التليفون لريم الي كان ويها متغير والكل ساكت ومقدر احساس ريم. ريم: الو يوسف: هلا حبيبتي.. وينج.. حرام عليج والله طيحتي قلبي... شو بلاج حتى مسج ما طرشتي ريم وهي اتقول في خاطرها كيف تباني اطرش وانا ما اشوف..: اطمن مافيني شي.. فديتك انا يوسف.: حتى صوتج واسلوبج متغير.. ريم متأكده مافيج شي.؟؟ ريم: ههههه .. متأكده بلاك انت يوسف: اخخخخ .. وتسألني بلاني.. الي بلاني حبج الي ما اقدر اعيش لحظه بدونه وين انت قبل الي مضى من سنيني يا مسعد باقي حياتي بالأفراح ما قول قبلك في حياتي ضنيني ولا ني مع غيرك من الناس مرتاح ريم: فديتك .. ربي لا يحرمني منك.. يوسف: انتي صار كلامج وايد مختصر وياي... شكلج مهمومه؟؟ شو صاير خبريني؟ ريم: لا اله الا الله .. مافي شي والله مافيني شي يوسف: هذي مب ريم الي اعرفها.. اسمحيلي اقولج بسكر عنج ويوم تعتبريني يوسف الي تبينه كلميني.. مااحب هالإسلوب وسكر الخط قبل لا تنطق ريم بأي كلمه.. وكانت ريم عاذرته على هالتصرف لأن من حقه يقول هالكلام بعد هالمعامله الجافيه الي كانت تعامله فيه... ريم تكلم نفسها بينها وبين نفسها: لازم اخليه ينساني.. لازم.. لازم اخليه يحس اني ما اباه عشان يبعد .. لكن والله احبك احبك.. كيف بعيش من غيره بس لازم اتحمل.. ما اباه يتعذب وياي.. مستحيل اخليه يتعذب.. مستحيل.. وطبعا يوسف كان يفكر.. وحس ان اكيد في شي كبير صاير خلا ريم تتغير عليه.. قرر انه يرد الإمارات .,.. وقام شل عمره اقرب مكتب سفريات عشان يحجز التذكره على اقرب يوم.. بس قرر بينه وبين نفسه ان ما يخبر حد عشان يفاجئهم ويشوف الي صاير بنفسه.. يا ترى شو راح يكون موقفه يوم يشوف ريم؟؟ وشو عن عواطف.. منو اتكون؟؟ كيف بيتصرف راشد:؟؟ وموضوع الخطبه؟؟؟
__________________
|
|
#10
30-03-2005, 12:46 AM
|
||||
|
||||
|
الجزء الثامن
========= وصل اليوم المرتقب بالنسبه لخالد.. اليوم الي صار له جريب السنه وهو يترياه... والسبت الي وراه راح تعلن نتايج الثانويه العامه.. الكل كان واثق من نجاح نوره لأنها فعلا تعبت في الدراسه ... وفي بيت العم سلطان الكل مرتبش ريم ونوف وراشد وعبدالله وخالد وام يوسف كلهم كانوا متيمعين عشان يسيرون سوى.. خالد: افففففففف. انتوا يالحريم جيه؟؟ ساعه لين ما تجهزون يلا الناس يتريون ريم ببرود: اقول نوف.. خذي راحتج .. ردي البيت وييبي لج لبس ثاني.. ولا لا ييبي البخور الي انا احبه عشان اتبخر فيه وعقب بنسير نوف وهي فاهمه ان ريم تبا اتغايض خالد: هي صدقج لبسي هذا مب شي.. والبخور زين ذكرتيني فيه خالد: لا والله .. صدق.. احلفوا انتوا بس... راشد شوف اختك وحرمتك شو يقولون؟؟ راشد: عدال يالعاشق عدال.. بنروح احين.. يلا جاهزين ام يوسف: هي خلاص الكل جهز... نتوكل على الله نوف: لحظه بييب شنطه سارووه خالد: اففف .. انا اخرتها بمط شعري منكم ريم: عاد من طوله عشان اتمطه... وتوهم بيظهرون من البيت الا كانت المفاجأة كبيره عند الباب... معقوله الي هم يشوفونه احين جدامهم.. الكل كان متفاجئ الا ريم لأنها ما تقدر تشوف شي.. طاحت شنطه ريم تمت ادور عليها والطريقه الي كانت اتدور فيها الشنطه كانت اتبين انها ما اتشوف.. فجأة شافت حد مد ايده يعطيها الشنطه.. اتحرت حد من اخوانها ولا ولد عمها خالد.. ريم: شكرا.. اما الباقي مب رايمين ينطقون اويتحركون من الصدمه.. ريم: بلاكم استويتوا طرمان.. يلا راشد امسك ايدي ترا ما اشوف.. بتخرطف احين.. وبتتكنسل الروحه.. يوسف: انا بوصلج؟؟ ريم سكتت الصوت مألوف عليها.. الصوت هذا قريب من قلبها .. زادت دقات قلبها وتمت ترتجف: ممممنننو.؟؟ يو يويويوسف يوسف: هي .. يوسف يا ريم.. بغيتي اتخشين عني هالشي.. معقوله اتخشين عني.. وشو اتحريتي لو عرفت بغير رايي فيج.. انا اباج لنفسج لذاتج.. اباج لأنج ريم.. بنت عمي وحب الطفوله ريم وهي منفعله وترتجف وبصوت عالي: خوز من جدامي.. لا تلمسني.. خلاص الي بينا انتهى.. روح لحياتك .. مابا شي منك .. يوسف وهو مستغرب: ريم.. شو بلاج.. انا يوسف الي يحبج والي تبينه.. ريم شوفيني.. (انتبه راشد لآخر كلمه قالها وندم عليها لأنه شاف ملامح ريم تغيرت) أأأنا آسسف ريم: ماروم اشوفك .. عرفت احين.. كيف تبا اتعيش وياي.. كيف كيف خبرني.. شوف حالتك وانت مشفق علي.. مابا هالحياة.. انساني خلاص .. انا ريم بنت العم بس... لا اكثر.. (تنادي على راشد) راشد يلا اتأخرنا.. (حاولت تمشي على الدري بروحها وتوها بتطيح بس مسكها عبدالله الي وداها السياره.. وسلم يوسف على امه واهله وقالهم انه بيسبح و بيلبس وبيلحقهم بيت نوره.. ) عبدالله ويا ريم في السياره .. حب انه يطلع ريم من الحزن الي كانت فيه عبود: ريم.. كم تتوقعين نسبه نوره؟؟ ريم: مادري.. بس هي شاطره اكيد نسبتها حلوه بتكون.. عبود: يعني توقع؟؟ ريم: واذا طلع توقعي صح كم تعطيني؟ عبود: انا ليش اسأل اسئله غبيه وكلها خساير.. ويهي مو ويه اسأله.. ريم: توك اتعرف.. زين قدرت اتقيم نفسك.. عبود: افاااااااااا هذا رايج في اخوج يعني ريم: لا فديته اخوي ماشي مثله اثنين عبود: معلوم مافي مثلي اثنين.. شرات اختي طالع عليها.. الكل يقول تشبه ريم ريم: منو الي ما يقدر يفرق وغبي قالك هالكلام.. عبود: اقول نحن وصلنا يلا نزلي.. يلا .. انا ما عندي سالفه مركبنج الإكس فايف مالي ريم: عداااااااال راعي الإكس فايف... انت انزل وتعال صوب الباب مالي ونزلني واتبوس ايدي وانت اتنزلني.. فاهم... عبود: حاااااضر.. كم قمر عندنا.. ريم: شاطر.. يالله بعطيك حلاوه عبود: وايد عليج يا مرت حاتم الطائي.. طلعت نوال من البيت تستقبلهم ومسكت ريم عشان اتدخلها البيت.. نوال: يا هلا والله.. اقول انا من وين هالنور كله ياي عبود: ادري.. محد غيرج فاهمني.. مشكوره والله نوال: منو قالك انت.. انا اقول حق القمر الي وياك.. ريم: وييييييييييييو قفطوه.. تعالي وديني عند الغزاله الي داخل.. خالد وهو سمع طاري الغزاله عرف انها تقصد نوره جان يقول بصوت عالي : فديتهاااا ريم صدت صوب مصدر الصوت وعبدالله صد صوبه ونوال وتموا يضحكون.. خالد حس بإحراج بس طنش السالفه.. والكل دخل داخل البيت الرياييل ميلس الرياييل والحريم عند الحريم في الصاله.. كانت نوره حابسه عمرها في الحجره لأن امها طلبت منها هالشي انها ما تنزل لين ما يزقرونها وكانت ميته اتحوس تبا اتعرف شو يصير تحت.. وفي ميلس الحريم بعد ما خلصوا الحريم رمستهم عن الخطبه وتم تحديد يوم الملجه الي هو بعد اسبوعين.. ام نوره: نوال برو جار نوره بيزن.. بكوش بيا زير (نوال سيري ازقري نوره .. وقوليلها خل تنزل) نوال: امي عاد عيب اتشفرين جدامهم عن يتحرونج اتذمينهم.. ام يوسف: لا والله .. لكم الحشيمه.. ندريبكم ما تسوونها.. بس عاد علميني يا ام محمد.. ام محمد: ان شاء الله.. بتتعلمين.. هو سهل مافي سعب.. ريم بنبره حزن: ليتني كنت اقدر اشوف نوره .. اكيد محلوه اليوم الكل صد صوبها وحس بحزن في داخله على حاله ريم.. بس ما حبوا يبينون لها عشان ما تزعل زياده .. هني نزلت نوره والي تمت نوف اتيبب.. وكانت محمره وخجلانه.. سارت صوب ام يوسف وسلمت عليها وعقبها سلمت على الباقي ويلست حذال ريم.. نوره: فديتج ريم.. اشتقت لج .. عنبوا ما تزورينا.. ريم: شو اسوي تدرين انتي بالظروف.. بس يالله من الحين وساير كله بيي عندج.. ولا تزعلين.. نوره: ونحن نقدر نزعل من القمر.. ريم بصوت واطي: ها شو رايج في خالد نوره وهي مستحيه: ريم... عن هالرمسه عاد ريم: الله الله الله .. كل هذا خجل.. امي الخجل مب علي انا يلا قولي بسرعه واعترفي شو رايج في خالد.. انتي شايفتنه ادري؟؟ نوره: اف منج..ز شو رايي اوكي ريم وهي اتقلد نوره: اوكي.. انا اقول شو رايج اتقولين اوكي.. ابا اجابه واضحه نوره: الصراحه..دخل خاطري من اول مره شفته وحسيت بشي غريب.. وحلو ماشاء الله عليه.. ومبين عليه طيب و. قاطعتها ريم: توج مستحيه اونج.. واحين اشوفج شوي وبتقولين فيه قصيده.. نوره: هههههه ..انزين انتي قلتي لي اقولج وانا قلت لج ريم: ههههه .. الله يهنيكم نوره: ريم بسألج؟؟ (وبخجل) هو شو رايه فيني؟؟ ريم: هههههههههههههههههههه ... كم تعطيني اذا قلت لج؟ نوره: لا اله الا الله... يا ماما .. انتي استوي كريمه مره وحده.. بعطيج الي تبينه بس خبريني ريم: مب كيفج اخبرج.. عيب .. ما بحش في الريال في غيابه.. حرااااام نوره: لا والله احلفي انتي بس.. انتي خو ما بتذمينه .. قول اند تبين اتخسسين فيني هيه لا. ريم: ههههه .. انتوا العيم متى بتنفج عقده هيه لا مالتكم مادري نوره: لا والله.. يلا عاد ريمو قولي.. ريم: اففف.. ذليتي ابوي.. بقول.. الله يسلمج الريال يحبج من قبل لا يشوفج نوره وهي مستغربه: كيف كيف كيف؟ ريم: الحمد لله والشكر البنت ما قامت تستوعب.. تذكرين يوم على المسنجر.. خلاني اكلمج واتعرف عليج وعقب اعرفج عليه بس انا ما طعت .. عقب استوى العاشق الولهان من اول همسه من صوتج العذب الي سمعه.. ولين يومج يراكض ورانا عشان نخطبج.. لين ما يينا وخطبناج له... مالت عليج نوره: يحليله... ريم: احلفي انتي بس نوف: ايه انتوا من الصبح وتتساسرون شو عندكم ريم: اسرار بنات ممنوع تدخل الحريم فيها نوال: نحن بعد بنات ريم: لا انتي مب ضمن القائمه انتي مخطوبه يعني حرمه.. اما نوره بعدها فرش.. ماصار شي.. ام يوسف: انزين يا ام محمد ومتى بنملج بعبدالله ونوال.؟؟ استحت نوال من هالكلام وقامت صعدت فوق في حجرتها والكل تم يضحك الا ريم لأنها ما عرفت شو صار فقالت لها نوره الي صار وضحكت وياهم.. ام محمد: والله يا ام يوسف.. بنت بنتكم وانتوا كيفكم.. حددوا ونحن جاهزين ام يوسف: خلاص شو رايج الخميس الياي ملجت نوال.. والي بعده ملجت نوره.. ام محمد: خوب.. أأصد زين في ميلس الرياييل الضحكه كانت تارسه المكان.. كان محمد اخو نوره ويوسف وراشد وخالد وعبدالله واخوهم سعيد.. طيحين قرض وسوالف راشد: احلى شي الصراحه .. يوم انه مره عبود يوم كان صغير يركض وهو زايغ امي تمسكه على الي سواه... وهو يركض ليش ان البمبرس ماله وسيع طلح عنه.. والكل تم يضحك عليه بدال ما يهزأه الكل ضحك الا عبود: انت والله انك مذله.. اخ يالقهر انك انولدت قبلي.. المشكله ماعرف سوالفك يوم صغير.. خالد: انا اعرف بعد سوالف عنك مثل راشد واكثر يمكن بعض.. اتذكر يوم كنت اخوفك من ثعبان البلاستيك.. غبي من وانت اصغير عبود: اقول ترا اظن اني بنفس عمرك انا بعد اعرف سوالفك.. يوم انه طلال ولد خالك شل عنك السيكل شو سوت شوي وكنت بتدفن عمرك من كثر ما كنت اترافس الأرض وانت اتصيح.. يوسف: لا كله ولا يوم ميلاد خلود.. زاخينه عن يمسك الكيكه .. الا اشوف ويهه دخل في الكيك وصوروه نفس الوقت والصوره خاشنها عندي راشد: حدكم عاد على المعرس اليديد.. عاد انت يسوف العاشق الولهان.. اذا قلنا له شي ولا سوينا شي بريم اتقوم القيامه عنده.. تقول حد ماكل حلاله يوسف: معلوم بنت عمي الوحيده.. حبي الأول والأخير محمد: ماشاء الله عليكم سوالف والله.. سعيد: انا بخبرك سوالف عن نوره يا خالد بس بعد الملجه وحتى انت عبود بخبرك بعد الملجه عبود: هي والله دخيلك.. ترا اختك احاول اتفادى قرضها ماروم.. تقطعني خاطري مره اقطعها بو محمد: احم احم.. شكلي انا هني.. ترا هاي نوال نظر عيني.. شو تقطعها جيه لبس هيه عبود وهو منحرج: لا عمي .. اااافصد بقطعها من الحب والحنان ... الكل تم يضحك على موقف عبدالله المسكين..الي افتشل,و وهني رن تليفون راشد نوف متصله اتقوله انهم يبون يروحون خلاص.. وقاموا الرياييل والحريم وظهروا ركبوا سياييرهم وراحوا البيت .. يوسف قال لأمه إنه بيسير بيت عمه عشان يكلم ريم.. وامه سارت ويا خالد... في سياره عبود .. ريم وعبدالله كل واحد فيهم يسولف يقول شو صار عنده.. ريم: ههه ... والله وناسه اليوم... يحليله خالد يستاهل عبود: هي والله صبر ونال... بس تدرين اخوج وخالد هالإثنين قطعوني بالرمسه .. كل واحد يفضحني من صوب... ريم: يحليلك... ما عليه انا براويك فيهم... بنتقم لك.. عبود: هذي الإخت ولا بلاش... الا ما قلت لج ترى يوسف بيينا البيت.. ريم: شوووووو... لا لا لا لا.. ماباه يشوفني الله يخليك لا اتخليه ايي عبود: ريم ... تراه يوسف خطيبج بلاج انتي.. ريم وعيونها شوي وبتدمع: عبود.. انت ليش مب حاس فيني.. خلاص انا ماباه خل ينساني.. بنفصل عنه.. ومب بكيفه يجبرني اتم وياه لأننا بس خاطبين هب مالجين.. الحمد لله اننا ما ملجنا على الأقل افصخ الخطبه اهون شوي عبود: ريم.. الريال يباج ما يهمه الي فيج ريم: انا ما اقدر اعيش عاله عليه.. وهو الحب مازر عقله احين .. وعقب الزواج اشكثر بيتحمل.. عبود: والله انتي ادرى بمصلحتج بس انا اقولج ترا يوسف شاريج .. لأنج ريم.. بغض النظر عن اي شي.. ريم: اااااااه .. ليش يا ربي انحط في هالموقف..لو اني من البدايه ما اتصالحت وياه جان يمكن ما وصلت لهالموقف.. عبود: يلا ريم هاتي ايدج عشان انزلج وصلنا.. ريم وهي ماده له ايدها: اقول .. يوسف هني عبود: سيارته عند الباب.. اكيد هو داخل.. ريم: عيل ودني اي مكان مابا اجابله عبود: بتجابلينه غصبن عنج فاهمه.. يلا جدامي اشوف.. ريم: عبود.. ما اقدر والله عبود: انتي تبين تنهين كل شي .. ترا هاي فرصه.. ريم: يلا دخلني.. دخل عبدالله ويا ريم.. ولما دخلوا الصاله الي كان يوسف قاعد روحه يتريا ريم اما راشد ونوف صعدوا يرقدون في حجرهم.. اول ما شاف يوسف ريم طلب من عبود يخليه هو الي يمسكها بس من غير ما يقولون شي.. ريم حست بالإيد الي ماسكتنها مب ايد عبود: يوسف؟؟ يوسف:هي يوسف ....يا روح يوسف سحبت ايدها عنه بسرعه ولفت ويها وتمت اتقوله بصوت عالي: انا ماباك... خلاص اطلع من حياتي... افهمني ارجوك ماباااااااااااك....انساني انصدم يوسف من كلامها: انتي شو اتقولين... وحبنا يا ريم ريم: حبنا مات .. خلاص... مابا اعيش عاله عليك مابا افهمني.. يوسف: لا مستحيل .. انتي مب ريم الي اعرفها.. انا يوسف يا ريم ؟؟ انا يوسف.. ريم: ادري انك يوسف.. ولأنك يوسف انا ماباك يوسف: انتي تتحرين ان حالتج هاي بتأثر على علاقتنا.. لا يا ريم انا راضي بقسمه الله انا اباج انتي لذاتج.. انتي حبي الوحيد ريم: هذا كلام احين... مابا شفقه حد منكم... عبدالله .. ودني الحجره بسرعه يوسف حس نفسه مخنوق من كلام ريم وطلع من البيت وهو مصدوم.. ما توقع ان ريم اتكون ضعيفه جيه.. وانها تعتقد هالإعتقادات عنه.. وراح ركب السياره وسار صوب البحيره.. وقف صوب القهوة الشعبيه ونزل وتم يتمشى.. وهو يتمشى انتبه حد ينادي عليه.. يوم صد شاف احمد الي يناديه... احمد: هلا والله يوسف.. الحمد لله على السلامه متى رجعت.. يوسف : الله يسلمك .. اليوم رديت احمد لاحظ ملامح يوسف متغيره وفهم انه اكيد عرف عن ريم: افا.. ونحن ما ندري.. يوسف: شو بلاها ايدك مجبسه.. ؟؟؟ احمد: ماشي والله حادث بسيط.. يوسف: بسيط وانكسر ايدك؟؟؟ اسميك انت .. متى هالحادث.. احمد ماعرف شو يقوله بس هو يعرف يوسف مب من النوع المتعصب وانه بيزعل لأنه انسان فاهم وعاقل ومتحضر: من فتره... يوسف: منو الي دعمك؟؟؟ احمد: ليش ما خبرك عبدالله؟؟ يوسف: شو يخبرني؟؟ احمد: ماشي.. اتحريتك تعرف... انا وثلاث سيايير بعد الي اندعمنا.. ومن بينهم سياره ... يوسف: سياره منو... بلاك سكت؟ احمد: شو اقولك.. سياره ريم.. يوسف: شووووووووو؟؟؟ ريم شو يابها عندك؟؟ احمد لا يروح بالك بعيد... جنه واحد كان يلاحقها.. فهي عدت الإشاره الحمرا عشان تشرد عنه وما انتبهت لسياره يايه من الصوب الثاني دعمت السياره وانا بعد فقدت السيطره يوم شفت الحادث ودعمتهم.. بس ما كنت اعرف عن ريم الا يوم في المستشفى عرفت يوسف: ااااااااخ.. يا ريم .. ما تستاهلين الي ياج.. ليتني انا الي تعورت ولا هي احمد: شو حالها احين.؟؟ يوسف: ما تسر يا احمد... جسديا بخير .. بس قلبها يتعذب.. ريم اعرفها افهمها بنظره.. مهمومه .. اتخاف انها اتكون عاله علي.. عشان جيه تبا تنفصل عني احمد وهو مستغرب: ليش عاد؟؟ انت اتحبها وهي تحبك .. يعني ماشي مجال للشفقه.. احيدها عاقلة مب من الي يفكرون بهالطريقة.. يوسف: وانا هذا الي معذبني... اباها يا احمد .. احبها .. ما اقدر افارقها.. تباني انفصل عنها بعد ما ملكتها... مستحيل احمد: ليش هي تباك اتودرها؟؟؟ يوسف: هي .. تبا تفصخ الخطبه احمد: الله يعينك والله.. بس جاهد عشان حبك لا تخليه يضيع يوسف: معقوله انت اتقول هالكلام؟؟ اخر شي اتوقعه انك تبا ريم اتم وياي رغم انها تبا اتودرني.. توقعتك تباني اودرها عشان تسنح لك الفرصه اتم وياها.. احمد: لأني اعز ريم اباها اتكون سعيده.. وانا ادري ان سعادتها وياك يا يوسف.. واوعدك اني ما اقصر في اي شي انا اقدر اسويه عشان ترجع لك.. هذا عهد مني يوسف: تسلم والله...اخو عزيز وغالي.. الله يهنيك في حياتك.. احمد : المهم انت لا تكدر روحك بإذن الله كل شي بينحل.. انت بس لا تحاتي.. بترخص منك تأخرت علىالأهل في البيت روحهم يوسف: اذنك معاك الغالي.. راح احمد وترك يوسف محتار ومهموم ... ---- في بيت علي المزروعي.. ريم قاعده في الصاله ويا عبدالله ونزل لهم راشد لما سمع حشرتها ويا يوسف.. وتم قاعد وياها ويحاولون انها اتغير رايها في هالقرار الي ماخذتنه راشد: ريم... حرام عليج الي اتسوينه بعمرج وبيوسف بعد ريم:------ عبدالله: هي والله صدقه راشد حرام... فكري عدل ريم: لو انا مب مفكره عدل جان ما سويت هالشي.. واعرفوا ان محد يقدر يخليني اغير رايي.. المهم مابا اسمع طاري هالسالفه .. وراشد ابغيك في سالفه؟؟ راشد: خير ان شاء الله.. عبدالله وهو يقلد ريم: راشد ابغيك في سالفه يعني يا عبدالله اجلب ويهك روح.. ريم: ههههههههه ... لا اخوي مب جيه.. بس في سالفه بسيطه ماباك اتعرفها عبدالله: ما زعلت انا انزين.. اصلا روحي تعبان ابي ارقد.. يلا تصبحون على خير راشد+ريم: وانت من أهله راشد: خير شو السالفه.. اشغلتي بالي..؟؟ ريم: منو عواطف..؟؟ ومن متى اتعرفها؟؟ وشو سالفه ولدها؟؟ راشد وهو مستغرب: ريم اشوي اشوي خل استوعب.. انتي شو عرفج في كل هذا؟؟ ريم: يوم المعرض هي خبرتني كل شي.. وانا ابا اعرف منك انت بعد كل شي راشد وهو يتنهد: ااااااه يا ريم... عواطف هاي غلطه عمري... خذيتها بالسر بدون ما حد يدري بس ما قدرت اتحمل الحياة وياها... هي وايد متحرره في تصرفاتها وانا هالشي اتعرفيني ما احبه.. وما قدرت اتحمل العيشه وياها... حسيت اني عايش في غلطه لابد اني اصلحها.. حاولت وياها ما طاعت.. خبرت امي عنها.. قالت لي ما تييبها بينا غير يوم تلتزم بعاداتنا.. وما طاعت تلتزم.. بل بالعكس زادت في تمردها وتحررها... ويوم طلقتها قالت لي انا حامل.. بس الصراحه ما بخش عنج قبل لا اطلقها انا كنت شاك في تصرفاتها ان في شي غلط هي اتسويه.. وانها ممكن اتخوني.. بس خوفي من ظن السوء خلاني اتجاهل الموضوع.. وليومج انا مب عارف الحقيقه.. المهم.. .. بعد ولادتها طبعا انا سجلت الولد بإسمي.. وكنت اصرف عليه واحبه وايد.. كنت حاس بالأبوه فعلا... بعد فتره ياني واحد وقال لي ان الولد هب ولدي.. وهو ولده هو... ما تدرين الدنيا كيف دارت فيني.. كنت اتوقع اي شي الا هالشي كنت ما احب مجرد تفكير افكر بهالشي.. قلت له مستحيل والخ... بس هو ياب لي دليل قاطع .. ويوم شفت فحص الدم طابق دم الريال... وقتها عافت نفسي منها ورديت البلاد وقلت لأمي اني طلقتها وما قلت عن الولد.. وخطبت لي نوف.. الي افديها بعيوني.. واكيد هي يايه طمعانه احين .. لأني ما صرفت على ولدها.. ولا ابا اصرف عليه.. واذا حبت ترفع قضيه راح افضحها .. كان بإمكاني افضحها من زمان بس انا انسان اخاف ربي في اهلي.. عرفتي احين السالفه (راشد وهو يخبر ريم السالفه.. ما انتبه لنوف الي كانت واقفه على الدري منصدمه من الي تسمعه) نوف وبنبره حزن والم: راااااااااشد... كيف اتخش عني ماضيك.؟؟ مني انتبه لها راشد وصد صوبها وحس انه بيموت .. اول مره يشوف نوف تحزن بسبته.. يعز على نفسه حزن نوف نظر عيونه.. ريم: نوف .. تعالي حبيبتي... هدي .. حتى انا اخته مااعرف.. راشد: نوف.. ماكان قصدي.. بس انا يوم ما خبرتج ترا امي هي الي طلبت مني ما اخبرج .. نوف وهي تدمع : بس بعد .. هذا مو معناته اتخش عني... حرام عليك.... داميا افتخر بإن ريلي ما يخش عني شي وواضح وياي في كل شي.. راشد: ريم .. فهميها بليز... نوف يا حبيبتي ... ما اقصد اخش عنج.. بس هالسالفه انا اخجل منها كيف تبيني اخبرج اياها.. نوف: حتى لو... انا نوف.. حرمتك.. ام عيالك(شلت عمرها وركضت وراحت حجرتها وقفلت الباب) راشد: نوف.. تعالي.. نوف.. ريم: بلاها.. راشد: راحت الحجره.. ريم: لا والله .. وانت شو تتريا تعزمك عندها.. روح لها.. راضيها راشد: عيل خل اوصلج حجرتج وبسير لها ريم: احين انت راشد الي اعرفه.. الله وياك وصل راشد اخته لغرفتها وسار صوب غرفته كان يدق الباب وهي ما كانت تفتح الباب.. راشد: نوف حبي.. افتحي الباب... حياتي انتي.. يالله عاد بلا دلع.. حياتي.. عن يقوم عبدالله ويشوفني هني نوف قامت وفتحت الباب .. وكانت عيونها منتفخه من الصياح: تعال.. راشد: لحظه.. وين سايره.. حطي عينج بعيني.. كانت نوف منزله راسها مب طايعه ترفع راسها: خير راشد: شو خير بعد.. اقولج حطي عينج في عيني يا بعد عيني رفعت راسها ونزلت الدمعه من عينها الي مسحها لها راشد بإيده: راشد.. ليش خشيت عني هالشي.. حتى لو مب مهم لي ..بس لازم اعرف.. تخيل لو انها قابلتني وخبرتني.. شو بيكون موقفي وانا اعرف شي من غريب وما اعرفه منك.. راشد : نوف... ما حبيت اضايجج... الموضوع جدا حساس بالنسبه لي.. واخجل منه نوف: ليش تخجل.. انت خذيتها على سنه الله ورسوله هي الي طلعت مو ويه تاخذ واحد مثلك وفي نفس اخلاقك راشد: اتحبيني.. ؟؟؟ نوف: هذا سؤال.. انا اموووت فيك.. انت كل شي بالنسبه لي. ضمها راشد لصدره وتمت هي اتصيح وهو يمسح على شعرها.. ويبوس راسها.. يوم الجمعه الظهر على صلاة الجمعه في بت علي المزروعي.. راشد وعبدالله زاهبين للصلاة.. راحوا الصلاة وردوا.. لقوا ريم قاعده في الصاله وساروا قعدوا وياها.. راشد: هلا والله بإختي العزيزه ريم: هلا راشد.. طمني شو الأوضاع مستقره راشد: على احسن حال... الأوضاع من احسن ما يكون.. انا راشد ما تعرفيني عبدالله: شو السالفه ريم: ممنوع اليهال يدخلون في سوالف كباريه عبدالله: عدااااال يدوه... انزين ما قلتي لي شو اسوي على موضوع الشبكه اخليها تختار.؟؟ ريم: هي زين ذكرتني... انت اتصل في محل المجوهرات الي متعودين دوم ناخذ من عنده خل يودي لهم في البيت مجموعه من الشبكات اليداد.. وخل نوال ونوره يختارون الي يعيبهم ويحجزونه عبدالله: خلاص عيل انا بخبر خالد.. ..الا صدق.. خالد ما بيرمس نوره.. ريم: هي ما تبا.. قالت برمسه عقب الملجه خل يصبر.. راشد: اضن نتايجها بتظهر باجر ريم: اقول عبود ادخل موقع الوزاره حاطين اكيد اسامي الأوائل العشره شوف اسمها مب بينهم.. عبدالله: متفائله الإخت.. ريم: يلا عاد .. بلا مذله عبدالله: حااااااااضر كم ريم عندي .. ثواني بس راشد: الله يوفقها ويبلغها بالنسبه الزينه ريم: آمين.. الا صدق ما بنسافر عند عمي .. اشتقت له الصراحه راشد: بلا بنسافر بعد ملجه عبود وخالد.. وبعد بالمره بنجيك عليج يمكن في علاج ريم وهي معصبه: ليش مليتوا مني... عشان جيه انا مابا اخذ يوسف واخليه يتعذب وياي راشد: ريم لا تفهميني غلط.. مستحيل نمل منج.. انتي اختنا الي ما لنا غناة عنج.. بس يا ريم انتي تدرين اني ابا لج السعاده وانتي مب طايعه تاخذين يوسف عشان هالشي.. ريم: انا مرتاحه من حالتي.. عبدالله: بللللللل على هالبنت دحيحه.. ريم: ها بشر عبدالله: الرابعه على الدوله.. ماشاء الله عليها ريم: اتصل فيها وخل ارمسها راشد: يحليها تستاهل.. بتصل في محمد اخوها وابارك له ريم: الووو .. مبروووووووووووووووووووووك نوره: الله يبارك فيج... ماصدقت النتيجه يوم شفتها ريم: شفتي يوم قلت انج بتظهرين في تلفزيون الشارجه ما صدقتيني نورة: هذا بفضل دعواتكم لي ... الحمد لله ريم: زين رفعتي راس خالد نوره: رييييييييييييم .. عاد ريم: هههههههههه بدأ شغل المستحى اشوف نوره: انزين عرف بنسبتي... ولا بعده ريم: ما امداه يعرف... نحن تونا من النت عرفنا.. المهم مبروووووك وهديتج بتوصلج نوره: الله يبارك فيج... ما نبا غير سلامتج الغاليه ريم: اونه عاد الي يسمع انا بسير اخسر بيزاتي عسب اشتري هديه انا بعطيج خالد بكبره هديه نوره: ههههههه ... والله بذبحج انا .. يالله باي ريم: ههههههههه .. طفرتي.. هذا الي اباه.. يالله باي راشد: حرام عليج تحرجين البنت.. ريم: خلها هاي تعتبر احلى ايام عمرها راشد: المهم انا ان شاء الله باجر بحجز على التذاكر حقنا وحق مرت عمي وخالد عسب انسير عقب ملجه خالد.. عبدالله: لو خالد يسمعكم احين بيجتلكم ريم: ليش؟؟ عبدالله: عاد انتوا تبون اتسافرون عقب ملجته... يحليله يبا يستانس ويا حرمته.. ما بتخلونه يتهنى.. ريم: ههههههههه ... خل يتحمل.. شو وراه... الهرم.. ما يستحي ما شايف ابوه من 3 اشهر ومب مشتاق لأبوه ولا كيف.. راشد: هههههههه.. الله يعينه .. ما علينا المهم.. مرت عمي ويوسف وخالد بيتغدون عندنا اليوم وبخبرهم.. ريم: شوووووو... ويوسف شو الي اييبه لنا اليوم..؟؟ راشد: الله يهديج بس يا ريم.. لو انتي ما تبينه كزوج هم ما تبينه كولد عم؟؟ ريم: ما قلنا شي حياهم الله.. وين نوف؟؟ راشد: انا ساير فوق احين وبزقرها خل اتييج.؟؟ ريم: زين اتسوي.. يالله فارجوا.. اف ابا اسمع اصوات عذبه راشد+عبدالله: ههههههه .. عذبه الصوت زيدي.. ابتسامتك عيدي.. ريم: لو سمعكم خالد الشيخ بيعتزل.. سار راشد وقال حق نوف تنزل لريم اتشوف شو تبا.. نوف: هلا والله .. اشحالج الريم؟؟ ريم: بخير,,, وينج ما تسألين عني.. نوف: الله يسامحج الي يسمعج يقول نحن مب نفس البيت..ما علينا المهم.. خبرني راشد عن نسبه نوره ما شاء الله عليها تستاهل ريم: هي والله.. تعبت ونالت .. الحمد لله.. المهم بغيت منج خدمه.. نوف: افا عليج.. عيوني لج... ريم: ههههههههه .. مابا عيونج .. اخاف لاخذيت عيونج بدال ما اشوف فيهم .. اطلع حوله.. نوف: الله يسامحج بس.. يالله قولي ريم: اونها زعلت.. انزين... بغيت منج تاخذين لي لبستين على ذوقج حق ملجه عبدالله وملجه خالد.. نوف: افا عليج اخذهم ليش لا.. بس شو من الوان..؟؟ ريم: اممممممم.. حق ملجه عبدالله ابا فستقي.. وحق ملجه خالد.. ابا كحلي.. نوف: خلاص صار.. وشو من صالون تبين احجز لج.. ريم: مورا.. خل اتييني البيت نوف: خلاص انا بكلمهم وبشوف.. ريم: فديتج والله .. لولاج جان انا كيف بعيش.. انزين خبرتي الخدامه ان قوم عمي بيون اليوم نوف: هي خبرتها.. وانتي قومي شو تترين..خل نختار لج لبس حلو وامكيجج شوي.. عشان الحبيب ريم: اي حبيب.. خلاص هذا كان اول.. انا بقولج شو ابا البس.. وديني غرفتي نوف: ريم .. حلاام الي اتسوينه في الريال.. يحبج.. والله حرام ريم: ما يخصكم فيني.. بتيين وياي ولا اسير روحي نوف: سكتنا خلاص.. ييت وياج.. هذي الحجره ووصلناها.. شو تبين من لبس ما قلتي؟ ريم: ابا تنوره وقميص اسود.. نوف: حشى... جيه سايره عزا ريم: اقول ام العريف.. لا تيلسين اتعوين راسي.. هاتي اللبس خل اسبح وعقب بلبسه وبجهز.. نوف: هاج.. تعالي خل اسبحج ريم: ههههههه.. ذكرتيني يوم امي المرحومه كانت اتسبحني وانا اصغيره.. اه يا زمن احين عمري 22 وصرت احتاج حد يسبحني كنه عمري 2.. نوف: ريم.. لا تقولين هالكلام.. انتي اعقل عنا واكبر عنا.. نحن من غيرج والله نضيع.. يالله تعالي.. مني رن تليفون ريم.. وكانت رنه يوسف.. ريم: اقول صكي بويهه نوف: حرام والله ريم: قلت لج صكي وخلاص صكت نوف الخط على ويه يوسف.. وهي حاسه بلوم.. لأنها مب عايبنها تصرف ريم يا ترى بتم ريم على عنادها.؟؟ وشو الي بيسويه احمد عشان ينقذ حب ريم؟؟ وعواطف كيف بتقابل راشد؟؟ ======
__________________
|
|
| العلامات المرجعية |
| الأعضاء النشطين حاليآ الذين يشاهدون هذا الموضوع : 1 (0 عضو و 1 ضيف) | |
| أدوات الموضوع | |
| طرق العرض | |
|
|
العرض العادي
