آه يا زمن

[بنت البلاد]

الجزء التاسع

في الصالون

فطوم: بخلي شعري مفتوح.. مابا اسوي تسريحه..
مريم: بلاج انتي غبيه سوي تريحه احلى..
فطوم: مابا.. بس بسوي فير من تحت شعري ..
مريم: افف .. كيفج خلاص.. وان شاء الله مب ناويه اتغطين شعرج.. ؟؟
فطوم: مريوووم عاد.. تدرين فيني مب متحجبه..
مريم: ليش مب جنج كبرتي ؟؟
فطوم: اوووووه.. وبعدين يعني..مالي خلق هالرمسه بعد
مريم: الله يهديج بس.. نحن يوم قدج لبسنا عبي
فطوم: زمانج غير عن زماني..
مريم: صخي عني.. حسابي وياج عقب..
فطوم: وين فيصل خل ايي يوديني .. انا خلصت..
مريم: قالي هو في الدرب ياي .. اتريي

في بيت العم خليفه..

خوله: الساعه كم احين..
نوره: هههه.. بسم الله عليج خولووو الساعه جدامج هذي .. الساعه 6.30
خوله: لا اله إلا الله.. متى بيمر الوقت اسرع.. ليش جيه بطيء..
نوره: احين مريوم وفطامي بيوون...
خوله: منو ياي لين احين..؟؟
نوره: الكل هني بس فطوم ومريوم..
حصه: يقولون علي ولد عمو هنادي هني يالس ويا غنووم..
خوله: ههههههه
نوره: لا والله.. شو اسوي به يعني..
حصه: بتخلين شعرج مفتوح .. ليش ما سويتي تسريحه؟؟
نوره: انا ما رحت الصالون اصلا.. روحي مسشوره شعري.. وطبجتي بعد بتخلي شعرها مفتوح
حصه: عيل وين متمكيجه.. ؟
نوره: روحي اتمكيجت بلاكم..
حصه: قولي والله.. ماشاء الله مول مب مبين..علمينا.. وين يوم كنا على عمرج جحال ما نعرف..
خولو: هي والله .. انا ما اعرف امكيج موول.. شو بسوي لا عرست
نوره: انتوا الغلطانين.. جان علمتوا اعماركم..
حصه: اعوذ بالله من هالجيل.. لا حجاب ولا شي..
نوره: متطورين نحن يا ماما
خولو: اقول انتوا الثنتين اظهروا والله راسي بينفجر منكم ..
حصه: اويه عصبت العروس.. تعالي خل نظهر نواري..
وطلعوا من الغرفه.. ونزلت نوره تحت وسارت وقعدت عند بنات خاله فطوم.. ريم وعواش.. كانوا قاعدين .. وعلي ما شل عينه من نوره.. اول مره يشوفها متكشخه.. وحصه توها بتدخل غرفتها شافت عبدالله ..
عبدالله: منو هالغزال؟؟
حصه: اويه؟؟ انت هني..
عبدالله: عروس انتي اليوم.. اقول شو رايج انعرس نحن اليوم بعد.. نتذكر يوم عرسنا وملجتنا..
حصه: ههههه.. انت مب صاحي ولا شو..
عبدالله: لا ولا شو..
حصه: انزل انزل.. خل اسير اتجهز.. والرياييل خلهم يسيرون الصاله البرانيه.. هي تعال ما وصل الملاّج؟
عبدالله: توني اتصلت في القاضي قالي في الدرب هو ياي.. بس حصه بيني وبينج انا زايغ.. لين احين ما وصل خالد..
حصه: صدق.. اتصلوا فيه شوفو وينه.. والله هالإنسان مادريبه كيف..
عبدالله: اتصلت فيه يقولي انا في الحلاق زحمه..
حصه: الله يستر بس والله
عبدالله: المهم لا اتخبرين خوله عن اتم اتحاتي.. اوكي... خلج وياها ولا اتخلينها اتعرف اوكي وصي الكل لايقول شي..
حصه: ان شاء الله


علي: نواري.. شو بلاج تتطالعيني بحقد.. شو مسوي لج انا ..؟
نوره: ها.. لا مافيني شي.. ياسه اطالع غانم بس..
غانم: وليش تتطالعيني ان شاء الله مشبهه علي..
نوره: هيه ؟؟
غانم: منوو؟
نوره: واحد هو ولد خالي اسمه غانم.. وااااااايد تشبهه
غانم: سخيفه تدرين..
نوره: منك ترا.. اونه مشبهه علي.. مشبه عليك بمنو؟؟
علي: ههه.. ويو قفطووه..

دخلت فطووم ويا مريم اختها وفيصل:السلام عليكم ..
الكل: وعليكم السلام..
مريم كانت متغطيه وتذكرت انها ناسيه الكيس في السياره وردت طلعت عشان اتييب الجيس من السياره.. وهي ماشيه مب منتبهه لجدامها جان تدعم شخص.. وطاحت شيلتها وغشوتها.. من الإرباك والفشيله ما عرفت كيف اتشل عمرها وتركض تدخل داخل.. قالت حق غانم اييب لها الكيس.. وطلع غانم من البيت شاف ولد جيرانهم ابراهيم واقف..
غانم: هلا والله برهووم.. اقرب اقرب بو خليل..
ابراهيم: يا هلا فيك والله.. بغيت اخبرك ان القاضي اتصل فينا لأنه يقول بيتأخر شوي.. كذا مره متصل حق عبدالله كان تليفون مغلق.. وانا اتصل فيكم كله مغلق..
غانم: هي والله اسمحلنا مرتبشين شوي.. بس ما عليه عساه خير ان شاء الله..
ابراهيم: يقول ان الشارع وااايد زحمه عشان جيه بيتأخر فحب يبلغكم عن اتحاتون ولا شي..
غانم: لا ما عليه.. اقرب تعال ايلس ويانا..
ابراهيم : لا انا بترخص عندكم وراي اشغال.. مباركين ان شاء الله.. الا ملجه منو؟
غانم: الرضيعه ..
ابراهيم: يالله مبروكين ان شاءالله.. عقبالك..
غانم: فال الله ولا فالك يا ريال.. خلنا فري احسن..
ابراهيم: اقول هالموتر مب غريب علي.. جني اعرف راعيه..
غانم: ها موتر فيصل ولد عمي..
ابراهيم: ليش هو رد من السفر.؟؟ متى؟
غانم: هي رد من اسبوعين تقريبا..
ابراهيم: وانا اقول هالموتر مب غريب علي.. وينه هو اهني خل اسلم عليه..
غانم: ثواني بس بزكره وبيي.. (طلع جيس من سياره فيصل ودخل داخل)

مريم: ها وين الجيس؟
غانم: هاج؟؟ وين فيصل..
مريم: اظني سار الصاله عشان يتابع مال الديكور.. مب هالكييييس..
غانم: مادري انتي اي جيس تقصدين..
مريم: روحي بروح بييبه... سير انت عند فيصل.
طلعت مريم من البيت.. وشافت ابراهيم مره ثانيه.. بس كانت متغطيه.. وسارت صوب السياره وشلت الجيس وصدت صوب ابراهيم: اسمحلي اخوي ليش اني دعمتك ما شفتك والله
ابراهيم: لا ما عليج.. مسموحه.. انتي مب مريم؟؟
مريم وهي مستغربه: هيه ليش؟
ابراهيم: انا ابراهيم ولد طلال..
مريم: هييييييييه.. هلا اشحالك.. ؟ شحال هيا اختك.. واشحال الوالده؟
ابراهيم: الحمد لله بخير..
مريم: سلم عليهم.. مع السلامه
ابراهيم: يبلغ.. في امان الله..

ودخلت البيت وطلع فيصل..
ابراهيم: هلا واللللللللله بفصووووووول.. وينك يا ريال .. عيب عليك اتيي من السفر ما اتسلم على ربيع عمرك.. الحمد لله على السلامه
فيصل: الله يسلمك.. افا والله .. اسمحلي.. ياخوي .. انشغلت والله من اول ما رديت اراكض مني مناك عشان احصل لي بعثه لفرنسا اكمل فيها بدال بريطانيا.. وملجه اخوي.
ايراهيم: ليش ما بتكمل في بريطانيا؟؟
فيصل: شو اقولك برهووم.. الله يخس هالإنجليز خربوا علي.. اتضاربت وياهم وطردوني.. خذت الشهاده وبكمل في فرنسا.. الحمد لله حصلت موافقه..
ابراهيم: الحمد لله.. انزين انا بظهر مستعيل.. المهم حبيت اشوفك واسلم عليك.. ومبروكين ان شاء الله.. عقبالك..
فيصل: وين تعال داخل يا ريال..
ابراهيم : فرصه ثانيه ان شاء الله ..

اول ما ظهر ابراهيم دخلت سياره ليموزين.. الكل مستغرب؟؟ منو راعي هالسياره.. شو مدخلنها؟؟.. تم فيصل امبهت يطالع.. الا عقب شوي واحد يفتح الباب ويشوف اخوه خالد الي نازل.. تم يضحك مستغرب..
فيصل: خالد.. ههههه.. شو يايبنك بالليموزين.. موترك وين؟
خالد: بلاك انت.. لازم بنحوط العروس شوي اليوم .. يبالها شي حلو جيه رومانسي..
فيصل: الله الله عليك.. اتفكر بعد.. انت مب هين بعد.. بس شو الي غيرك.. شكلك حبيتها..
خالد: فيصل.. ما يخص هالشي في الحب.. بس الي علي بسويه مابا حد يقول اني قصرت بشي.. يلا سو لي درب خل ادخل.
فيصل: تعال الكل اصلا داخل يتريونك..
خالد: عيل تعال وياي خل ندخل..

دخل خالد ويا فيصل.. جان يشوف فيصل ريم شاله غترته ويالسه اتبخرها.. استغرب.. راح صوبها..
فيصل: ليش اتعبين عمرج.. ما يحتاي.. فطوم بتبخرها..
ريم: لا عادي افا عليك.. ما شليت غتره واحد غريب.. ولا اتعدني غريبه ؟؟
فيصل: لا افا لا اتقولين هالكلام.. اخت عزيزه وغاليه.. هاتي عنج مشكوره بسه..
ريم عصبت من كلمه شرات اختي عطته الغتره وصدت عنه وسارت.. : العفو.
غانم: اقول فطوم ما بتبخرين غترتي انتي بعد..
فطوم: لا والله.. بشكارتك انا..
غانم: عفان الله .. يا حيك والله فيصل على بنت خالك .. مب هاي بنت عم اونها
فطوم سحبت عنه الغتره بالقو: اففففف.. هات هات..
غانم: بسم الله الرحمن الرحيم.. شوي شوي .. بيتشقينه..
نوره: هههههه.. اقول علي هات غترتك خل ابخرها انا بعد.. يوم البخور العالمي اليوم..
اليده: هههههههههه.. صدق اني اعرف اختار..
الكل : شووووو..
اليده: ماشي كليتوني بسم الله.. اقصد تنفعون بشاكير حقي.. عشان تبخرون ثيابي..
فطوم+نوره: وين وين.. ببخرهم..
اليده: فديتكم والله لعلني ما اخلا منكم.. انتوا الثنتين شموع هالبيت كله..
علي وغانم: وييييييييه نحن ولينا عيل..
غانم:اقول علي.. طاح سوقنا خلاص..
علي: ااااااااه يا دنيا ..
اليده: انتوا شو بلاكم.. هاييله الشموع وانتوا الولاعه الي اتولع هالشموع..
الكل: ههههههههههه

دخل بو خالد: اقول القاضي وصل.. خل الرياييل ايون الميلس..
الكل قام ودخلوا الميلس.. وعقهبا بشوي بدوا المعازيم الحريم يوصلون.. راحت فطوم عند مريم وخوله وحصه في الحجره..
فطوم: السلام عليكم.. الله الله الله؟؟ خولوووو شو هالجمال ماشاء الله.. ياحيه اخوي عليج
خوله: اقول فطوم انتي ادريبج ما اتعرفين اتجاملين.. الله يخليج بسألج سؤال ردي علي بصراحه..
دخلت نوره وانضمت لهم..
فطوم: شو اسألي..؟؟
خوله: تسريحه شعري مب شي صح.. ؟
الكل عدى فطوم: لا حووووووول ردينا على هالسالفه..
حصه: خوله عورتي راسنا .. هاي عاشر مره تسألين هالسؤال..
فطوم: ههههههه... كليتوها.. انا بقولج رايي.. بس بشرط اتصدقيني وما تزعلين..
خوله: قولي فديتج.. اصلا انا ما اقدر ازعل منج..
فطوم: رووووووووعه
خوله: بعد مب مقتنعه
فطوم: طاعوا هذي انتوا .. قلنا لها الصدق ما عيبها وما اتصدقنا.. اقول امي كيفج.. انا بسير يلا.. تعالو خل ننزل لأن الحريم كلهم يو.. عيب مودرين عماتنا ويدو وامي بس وياهم..
حصه: ماشاء الله والله وكبرتي يا فطوم.. قمتي اتعرفين العيب..
فطوم: من يومي عاقله وافهم.. الا انتوا مادري كيف..

خوله: بتودروني روحي هني.. ؟
مريم: ما بياكلج يني انزين.. نحن لازم ننزل حبيبتي..
خوله: افف امري لله اتحمل..

في الميلس.. بدا القاضي .. ووقع خالد على ورقه الملجه ووقعوا الشهود.. وخذا فيصل الورقه ودق باب المطبخ عشان يعطيهم الورقه يودونها لخوله عشان اتوقع عليها.. دق الباب.. فتحت له ريم..
فيصل: اقول ريم ودي الدفتر حق خوله .. خلوها اتوقع..
ريم: ان شاء الله.. انت خلك اهني برد لك الدفتر..
فيصل: اوكي..

راحت ريم وزقرت مريم وفطوم وحصه وساروه عند خوله.. دخلوا عليها..
خوله: افففف مليت..
حصه: خلاص حبيبتي اشوي وبنزلج..
ريم: يلا فديتج وقعي بسم الله..
خوله: ارتجف والله..
مريم: حليلج والله.. بتستوين مرت اخوي.. يلا هاج القلم وقعي
خوله خذت القلم ووقت الكل تم ايبب ويبارك لها .. ونزلت ريم وياها الدفتر وعطته حق فيصل.. ودخلت عند الحريم وقالت لهم ان الملجه تمت على خير.. تم الكل ايبب ويبارك لأم خوله وخالد..
ام خوله: اقول ام خالد . انزل احين خوله خلاص..
ام خالد: هيه خلاص تمت الملجه الحمد لله..
ام خوله: اقول امي ريم.. نزلوا خوله ..
ريم: ان شاءالله.. نوره تعالي.. اقول نواري.. حطي الشريط جهزيه بنزل خوله احين.. اوكي..
نوره: اوكي.. يلا روحو..

سارت ريم فوق وجهزا خوله عشان اينزلونها.. ونزلت خوله من على الدري.. والكل كان منبهر بجمالها .. كانت طالعه جدا جدا جميله.. الكل كان يقرا عليها عن الحسد.. كانت مريم ما اتفارقها .. كانت اتعلمها كيف تمشي واتدلها..
كانت مريم بعد طالعه جميله وبسيطه.. الكل ما عرفها في البدايه ليش انها ما تنشاف الا نادرا.. دومها في العين..

وقعدت خوله على الكرسي الي كانوا مزهبينه لها.. كانت روحها منبهره من الزينه الي كانوا مزينينه لها ما توقعت انه حلو بهالطريقه..

[بنت البلاد]

الجزء الحادي عشر...

مرت ليلة الملجه بسلام والكل كان مستانس واكثر وحده خوله الي من فرحتنا ما نامت الليل كله .. من كثر ما تتطالع شريط فيديو الملجه.. دخلت عليها حصه وهي مندمجه عالآخر وسرحانه..
حصه: صباح الخير يالعروووس.. ؟؟ ههههه بسم الله ايه ماما انا هني .. وين وصلتي؟؟
خوله: وصلت هناك هناااااااااااك بعيييييييد.. اتشوفين
حصه: لا ما اشوف... اقول طاع عيونج شقايل محمرين من السهر حرام عليج مب زين عليج جيه بتمرضين ما فينا..
خوله: بذمتج عاد يوم انتي كنتي في نفس موقفي ما صار فيج جيه؟؟؟
حصه: اااوه لا اتذكرني.. احس عمري كنت مراهقه هبله.. عاد انتي اكبر مني حزه يوم اني ملجت على اخوج كان عمري 18 يعني توني في عز المراهقه... سهرت عالأغاني والصور والفيديو.. يوووووووه حاله ميؤوس منها كنت..
خوله: هههههههه
ام عبدالله: صباح الخير يابنات.. يما خوله اشفيج؟؟؟
خوله: بسم الله علي ما بلاني شي؟؟
ام عبدالله: شو ما بلاج شي طاع عيونج كيف محمرين..
حصه: ما عليج عمتي من الفرحه سهرت طول الليل وما رقدت..
ام عبدالله: حليلها عروس تستاهل.. عساج دوم مستانسه يا ربي.. المهم يلا انزلو عشان تتريقون..
خوله: لا امي انا برقد نعسانه الصراحه..
ام عبدالله: خلاص برايج امي ارتاحي.. يلا حصه تعالي خل نتريق عند يدو..

ونزلوا ساروا تحت عند اليده عشان يتريقون.. كان اليده كالعاده تترياهم لين ما يجتمعون عشان تتريق..
اليده: وينكم اتأخرتوا.. وين خوله ما نزلت وياكم؟؟
حصه: ماشي يدو خوله تعبانه من السهر ورقدت احين...
اليده: الله يهنيها ويفرحها يارب..
ام عبدالله: امييييييين..
اليده: وربي يبلغني بغانم لفطوم وعلي لنوره..
ام عبدالله: عمتي لا تجبرينهم ولا اتغصصين فيهم من احين ولا تشغلين بال البنات شرات ما صار لخوله خل يكبرن البنات وحزتها خل نرمس في هالموضوع...
حصه: صدقها عمو .. تدرين البنات قلبهم رهيف على طول يتأثرون..
عبدالله: صبااااااااااح الخير لأحلى ام ويده في الدنيا..
حصه: وانا في اي مرتبه.. ؟؟
عبدالله: عقب بقولج في الغرفه..
ام عبدالله: يوز يوز عن سوالفك .. ههههههه .. خليت البنت تستحي جدامنا
عبدالله: ما عليه بتكبر وبتنسى.. يلا انا ساير الدوام ما تبون مني شي..
اليده: وين يما ما كلت شي..
عبدالله: انتوا كلوا عني وانا بشبع.. يلا مع السلامه
الأم: في حفظ الرحمن..


في بيت بو خالد كان الجو هادي والكل راقد.. طبعا الا فطوم الي ما اتصدق وتستغل مثل هالفرص.. واتصلت في هزاع..
فطوم: صباح الورد يا ورد..
هزاع: هلا والله يهالصوت.. هيه جيه الواحد يصبح على صوت مثل هالصوت ويستانس في باقي يومه... اشحال القمر مالي؟؟
فطوم: منو القمر انا.. يارييييييييييييييييييييييت..
هزاع: انتي قمر وبدر وكل شي حلو.. بالنسبه لي انا وبس خسي لغيري
فطوم: خجلتني بس
هزاع: الله ودي اشوف الحمار الي على خدودج من الخجل..
فطوم: ههههه اسميك انت..
هزاع: متى بس بيصير هالشي.. قلت لج الخميس فرصتج..
فطوم: ان شاء الله انا وربيعتي بنسير وافي .. راضي جيه
هزاع: ريحتيني ربي يريحج.. هيه خلج جيه..
فطوم: بس هالمره لا تطلب مني مره ثانيه...
هزاع: انتي خل اشوفج الخميس وعقب يصير خير..
فطوم: اقول هاي جنها امي قامت من الرقاد.. بكلمك عقب يلا باي
هزاع: اتحملي على عمرج.. باي

بندت الخط وغيرت الرقم وراحا غرفتها ... وبطلت كبتها تمت تتطالع شو من لبس تختار حق يوم الخميس.. واتصلت في هند طلت منها انها اتييها البيت عشان اتكلمها.. ولبت طلبها بحكم ان بيتهم حذال بعض يعني جيران.. وبعد نص ساعه وصلت هند..
هند : مرحبا .. الله الويه منور اليوم ماشاء الله..
فطوم: بوجودج ووجوده .. ههههههههه
هند: خطييييييييييييييييره.. وجوده بعد اونننه.. الله عالحب بس ما انروم.
فطوم: ااااااه يا هندو.. ها عمري.. خلاص جزء مني.. احس وااااايد متعلقه فيه..
هند: ههههه والله وصرت علاقه يا هزاع...
شلت فطوم الموسده وفرتها على هند: سخيفه..
هند: عدال عدال عن يصيبج شي.. المهم اختصري الوقت وقوليلي شو السالفه.. ؟؟
فطوم: فضوليه بل علييييييييج.. لازم اتعرف كل شي على طول..
هند: هيه لازم .. ولا بالتفصيل الممل..
فطوم: سمعي.. اباج اتيين وياي وافي هالخميس لأن هزاع ياي يبا يشوفني واذا ما شافني ما بيرد يكلمني.. دخيلج وافقي.. انتي املي الوحيد..
هند: لحظه اتأمل الموضوع وافكر اشوي..
فطوم: لا اتخليني هالمره افرج بالأبجوره الي حذالي.. بسرعه
هند:انزين انزين..
فطوم: عيل يلا تعالي خبريني شو البس.. اي لون.. هالبيج ولا الفستقي؟؟؟


وتموا فطوم وهند يتفقون ويسولفون... وخالد اول ما قام من الرقاد اتصل في خوله..
خالد: صباح الورد يا احلى حرمه في الكووووووون كله.. اشحالج؟؟
خوله: هههههه.. في الكون عاد.. اظني هاي كبيره في حقي...
خالد: لا كبيره ولا شي.. اقول انا بتريق عندكم وبتغدى عندكم وبتعشى عندكم اليوم..
خوله: انت مب صاحي شكلك.. لا ارقد بعد شو رايك..
خالد: ودي والله,, وبعدين ليش مب صاحي هذا يزاي اني ابا اجابلج اليوم كله..
خوله: اخاف تشبع من ويهي عقب
خالد: اشبع من اي شي الا منج..
خوله: ههههه.. اقول تعال تعال بيتنا احين عن تستخف احين...
خالد: طيرااااااااان بيي عندكم.. انا اصلا مستخف من اللحظه الي شفتج فيها
خوله: ربي يحفظك لي ولا يحرمني منك.
خالد: ولا منج.. يلا حبي.. بتجهز وبييكم
خوله: اوكي.. هالله هالله في عمرك في الدرب شوي شوي


ام خالد: صباح الخير ..
خالد: هلا امي.. اقول امايه انا ساير بيت عمي خليفه بتم اليوم كله عندهم..
ام خالد: روح ربي يحفظك دايم ودوم.. ويسعدك ويبلغني في عيالك..
خالد: امين.. ادعي لي دوم من هالدعوات الحلوه عشان اتوفق..
ام خالد: انا دوم ادعي لك
خالد: خلاص عيل بغيتي شي دقي لي اوكي..
ام خالد: سلامتك يما روح الله وياك

[بنت البلاد]

الجزء الثاني عشر

خوله: صباح الخير يدووو
اليده: صباح الورد.. ماشاء الله خوله بنتي طالعه مثل الورد شو حلاتج..
خوله: تسلمين ..
اليده: ها كله الملجه جيه سوت بج عيل لو اتعرسين شو بتستوين..
غانم: ما عليج يدووو ها كله مال قبل الزواج تهتم بعمرها ورشاقتها ومادري شو وعقب الزواج اعوذ بالله ما ينشافن..
خوله: هههه؟.؟ الظاهر ان حرمتك هي بتكون جيه..
غانم: اتخسي الا هي ما بخليها..
خوله: ما بخليها اونه وايد مستقوي اشوفك..
اليده: اتهبي اصلا انك تستقوي على فطامي الحلوه..
غانم: منوووو.. فطاامي.. لا مابيها ..
اليده: مب كيفك.. محد خذا شورك..
خوله: لا حول الله لا هو يباها ولا هي تباه..
غانم: اصلا هي تباني وتتمنى واحد شراتي بس ما اتحب تبرز..
خوله: اوننننه واثق بعد..
غانم: معلوم ما بتلقى الي احسن عني..
اليده: بس خلاص فكونا انتوا الإثنين صدعتوا بي
خوله: بسم الله عليج من الصداع يدوو.. يعلهم عدوينج..
اليده: يسلملي لسانج بس انتي الوحيده الذربه من بينهم..
خوله: هههههه .. واللبيب بالإشاره يفهمو..
غانم: ها شو.. هيييييييه.. بسم الله عليج يدو..
الكل: هههههههه..
خوله: اقول غانم انا سايره فوق .. عقب ما تخلص الريوق تعال لي اباك اشوي بسالفه.. وصح يدو خالد قال بيينا عالغدى بيكون هني..
اليده: حياه الله البيت بيته..
غانم: امممم.. خلصت.. خلصت..
خوله: شو خلصت طاع اللقمه في ثمك بعدها ما انبلعت اتقول لي خلصت..
اليده: ما تدرين به اخوج .. فضووول الدنيا فيه وما فيه صبر فوق ها كله..
غانم: ها خلاص بلعتها.. يلا بييج احين..
خوله: خلاص اترياك في الغرفه فوق..

في غرفه خوله
غانم: ها خير .. خبريني شو السالفه.. خالد فيه شي.. ؟؟
خوله: لا بسم الله على ولد عمي.. مافيه الا كل خير..
غانم: قولي ريلي .. حبيبي.. مب ولد عمي.. خلاص ها استوى يوووووور هاسبند..
خوله: ههههه الله يقطع سوالفك غنوووم.. انزين انا بغيت ارمسك بخصوص فطوم بنت عمي..
غانم: لا حوووول حتى انتي.. كافي يدو الي مصدعه راسي من هالطاري..
خوله: غانم.. انا قاعده وياك عشان اتصارحني واساعدك واساعد فطوم المسكينه وما يصير فيها نفس حالتي.. صح ان خالد اخر شي محد جبره وهو من عمره خذاني لأنه بغاني.. بس ما يندرى انت كيف.. فخبرني انت تباها ولا لا؟؟
غانم: ------
خوله: غانم.. ليش ساكت ممكن ترمس واتقولي .. ترا انا اختك العوده.. وانت كبرت على ايديني .. يعني اعرفك زين ما زين,.. لا اتخش عني.. وانا بوقف وياك.. لأني اخاف البنت تتعلق فيك.. من كثر ما يقولون لها مثل ما استوى وياي..
غانم: الصراحه خوله.. انا اباها.. فطوم احبها.. ولو انها اصغر عني .. بس انا احبها والله.. ماشاء الله عليها بنت ولا كل البنات.. صح شوي ملسونه بس زينه.. ومنو الي بيدير باله عليها اكثر عني.. وانا اذا اتشوفيني اقول جدامها اني ما اباها ولا جدام الكل.. هذا لأني انا مب ضامن هل انا بعيش لليوم الي آخذها فيه.. فماباها تتعلق..
خوله: فديتك والله.. ريحتني.. احين ارتاح بالي من هالطاري.. صدق كنت احاتي هالنقطه وااايد.
غانم: خوله.. يعني انتي اتخيلي بنت عمي الي من الصغر كنت وياها.. يعني فتحت عيني على الدنيا وهي جدامي.. وذكريات طفولتي كله وياها.. يعني صعب اني ارفض واقول لا.. لأني فعلا متعلق فيها.. والله ويوم اسمع انها يايه.. اتصل في ربعي واعتذر منهم وما اروح لهم بس عشان اشوفها.. بنت عمي وانا اباها..
خوله: الله يخليكم لبعض..
غانم: بس خوله انا ابا منج شي..
خوله: خير اخوي امرني.. ؟
غانم: انا كذا مره مريت الظهر يوم ماكان شي حد اييبها عشان اردها من المدرسه.. شفتها ويا مجموعه من رباعتها الصراحه اشكالهم موول ما ارتحت لهم.. يعني مادري كيف..
خوله: فهمت عليك.. يعني امبين عليهم بنات عليهم حركات شوي..
غانم: هي.. مادري نظراتهم موول ما تطمنت لها.. فأنا خايف على بنت عمي لو انهم طلعوا مثل ما انا شايف انهم يأثرون على بنت عمي وانا مابا هالشي.. فحاولي تسألينها عن رباعتها وتنصحينها.. وبعدين هي في عمر مراهقه يعني عمر خطير .. ممكن تنغر بأي كلمه تسمعها وتتأثر منها.
خوله: خلاص صار انت بس لا تحاتي..

في بيت هزاع


هزاع: امي انا ساير يوم الخميس دبي ويا ربعي..
ام هزاع: بس يا امي ما يصير عندنا عرس عيال المنصوري.. كيف بتسير..
هزاع: ما عليه ترا اخواني بيسيرون يسد وجودهم.. قولو هزاع عنده شويه اشغال مايروم..
ام هزاع: بس يمي..
هزاع مقاطع امه: امي قلت انا ساير دبي وخلاص.. يلا احين طالع ويا ربعي بسير العين مول.. تامريني بشي
ام هزاع: لا سلامتك.. الله يحفظك ويردك لعقلك..
هزاع: ولدج عاقل يا امي لا اتحاتينه..
وطلع هزاع وركب الموتر وعلى طول سار صوب العين مول.. وهو في الدرب رن تليفونه وشاف ان فطوم الي متصله: مرحبا هلا والله بالطش والرش.. ها شووو .. مستعده؟؟
فطوم: على شو استعد.. ؟
هزاع: شو على شو.. لا يكون بس نستي.. بجتلج فطووووم..
فطوم: ههههه.. طاعوا هذا كيف عصب.. استهبل عليك..
هزاع: افف ريحتي قلبي.. انزين قلبي انا احين نازل العين مول عند ربعي دقيلي فليل اوكي..
فطوم: خلاص ان شاء الله بحاول..
هند: ها شو؟؟
فطوم: شوشو.. ماشي بيسير عند ربعه العين مول..
هند: اهاااا.. انزين اقول لبسي هالبودي الوردي ويا هالقميص الأبيض.. ويا بنطلون الي كنتي لابستنه امسات يوم ييتي بيتنا الأبيض عليه جيه ريم بس وردي.. بتطلعين رووووعه.. وحطي شادو وردي وجلوز.. وجحلي عيونج.. والله بتطلعين شي..
فطوم: اصلا منو قالج اني بظهر بدون عباة.. تبين خلووود اخوي يذبحني.. البارحه قايل حق امي هاي اخر مره فطوم تظهر من غير شيله..
هند: ويييييه شو غيره اخوج احيده ما يفتكر..
فطوم: مادري عنه جيه انجلب 180 درجه فجأة محد يروم يقوله كلمه..
هند: انزين واخوج فيصل.. شو
فطوم: اخوي فيصل طلع متفق ويا راي اخوي خالد.. اونه هو ما يقولي لأن ما يحب يزعلني المهم انا بلبس هاللبس ويا تنوره احسن وبلبس شيله ملونه.. جيه احسن
هند: حلو جيه بعد..
مريم: السلام عليكم يا بنات..
هند: هلا والله مريووم عاش من شافج..
مريم: عاشت ايامج.. تدرين الدراسه والبهدله كيف..
هند: الله يعينج.. افف متى بيي دورنا انخلص ونفتك..
مريم: بتخلصون.. انزين فطومه.. انا يايه اسلم عليج لأني احين بروح الجامعه بيوديني فيصل..
فطوم: اففف اشكثر اكرهج يوم اتروحين الجامعه.. روحي روحي خل تنفعج.. لا اتسلمين علي انا بعد
مريم: خيبه خيبه هالكثر اتحبيني وما تبين اتفارقيني..
فطوم: خوزي عني.. روحي بسرعه اركظي مستقبلج بيضيع..
مريم: هههه .. حليلج يا فطوم.. شو اسوي والله ودي ما اسير بس غصبن عني..
فطوم: يلا ديري بالج على عمرج..
مريم: ان شاااااااء الله تامرين امر.. احتمال ما ارد هالإسبوع لأن عندي امتحانات..
فطوم: بعد اتقولين لي في الويه.. روحي امي روحي ليش يالسه..
مريم: يحليلج يا فطوم.. يالله في امان الله
فطوم: الله يحفظج..
هند: شكلج وايد متعلقه في اختج..
فطوم: مافي حد في البيت غيرها يسليني صح فيصل اوكي وياي .. بس هاي بنت يعني غير وياي..
هند: واخوج فيصل ما يبا يعرس..
فطوم: ها خليه في صوب مادري عنه... ها مزاجي قراراته اتيي فجأة..
هند: اهاااا... انزين ممكن طلب طلب..
فطوم: تفضلي.. تامرين امر
هند: ابا اشوف صوره اخوج..
فطوم: عيل تعالي انسير غرفته لأن ما عندي صوره يديده له ما عطاني..
هند: لا شو غرفته واذا حد شافنا..
فطوم: ما بنرقد هناك انزين الا هي خمس دقايق وبعدين سمعتي مريوم قالت انها تسير ويا فيصل..
ودخلت فطوم ويا ربيعتها هند غرفه فيصل.. واستغلت هند فرصتها وحطت بطاقه مكتوب عليها رقمها وعداله معجبه.. ودسته عن فطوم عشان ما اتشوفها على التسريحه مالته..
هند: خلاص خل نطلع مره ثانيه يوم انتي اتشلين صورته اخاف الصراحه عن يدخل علينا حد
فطوم: خلاص براحتج..
هند: انزين فطوم.. احين الوقت اتأخر برد بيتنا وبكلمج ان شاء الله قبل الطلعه عشان نتفق على كل شي..
فطوم: وين تو الناس..
هند: لا امي بتحرج علي.. يلا مع السلامه
فطوم: في امان الله..

في بيت العم خليفه
خالد: السلام عليج يدوو..
اليده: هلا والله بولدي المعرس.. حياك اقرب..
خالد: الله يحييج الا وين عمتي خل اسلم عليها..
ام عبدالله: كاني يايه .. اشحالك خالد.. ؟
خالد: بخير الحمد لله..
غنوم وهو نازل من الدري: اووووووه هلا والله بأبو النسب.. اشحالك؟
خالد: اهلين اشحالك..
غانم: شو بلاك اتسلم علي وتتطالع يمين ويسار .. خوله فوق في غرفتها..
اليده: روح لها يمي الغرفه فوق انت ريلها انزين مب غريب..
غانم:هههههه يا حيك منو قدك..
خالد: لا لا .. خل تنزل وبيلس وياها في الميلس ما عليه..
ام عبدالله: ولد اصول ويعرف الأصول.. يبالك اتعلم هاللحف غنوم اشوي..
خالد: افا عمتي .. غنوم ماشاء الله عليه.. ابو الأصاله كلها..
خوله: السلام عليكم..
خالد: هلا والله..
اليده: كملوا سلامكم في الميلس..
غانم: والله يدو شيطانه بعد مب هينه..
خالد وهو ساير الميلس ويا خوله...
خوله: مو جنك تأخرت شوي.. ؟
خالد: هيه ادري.. بس عشان اييب هالهديه البسيييطه حق احلى واجمل ورده لي في الوجود..
خوله: اويه ياهي فشيله وانا في حياتي ما يبت لك شي.
خالد: بلا يبتيلي..
خوله: ما يبتلك متى يبت لك؟؟
خالد: ما تذكرين هالميدايه عطيتيني اياها يوم ميلادي .. يوم كملت 19 سنه.. اتحيدين ولا نسيتي..
خوله: اويه انت بعدك محتفظ فيها..
خالد: طبعا عشان اتعرفين انج دوم كنتي في بالي..
خوله: وانت اتحيد يوم طحت من الدراجه في المزرعه يوم كان عمري 16 سنه.. ويبت غترتك ولفيت فيها ريلي.. بعدها عندي..
خالد: الظاهر عقب يبالنا انسوي لنا معرض في البيت فيه كل ذكريات الطفوله نتنافس فيها..
خوله: ههههههه
خالد: يعلها دوم هالضحكه ..
خوله: وياك..

[بنت البلاد]

الجزء الثالث عشر

كان يوم الثلاث
في بيت بو خالد..


فيصل توه كان راد من برع.. وكان منهااار بالمره .. كان الحزن مخيم على ويهه .. تغير من بعد ملجة اخوه خالد .. لأنه تذكر هنوف.. يوم كان يقول لها ويخطط وياها على الزواج..
فيصل: السلام عليج امي..
ام خالد: وعليكم السلام.. شو فيك؟؟ ليش جيه معتفس خير ..
فيصل: ماشي ماشي.. بس تعبان من درب العين تدرين ..
ام خالد: الله يعطيك العافيه..
وراح فيصل ودخل غرفته.. وفر السويج على التسريحه وشاف الورقه الي على تسريحته.. وراح صوب التسريحه عشان ياخذ الورقه.. فسمع صوت فطوم تصرخ.. وركض سار يشوف شوفيها..
فطوم: الحقني.. ابوي مادري شو بلاه في الغرفه..
فيصل: ابوووووي؟؟ شو فيه..
فطوم: مادري (وهي اتصيح).. الله يخليك سير بسرعه..
فيصل دخل غرفة ابوه لقاه عالسرير ومصفر شكله.. : ابوي شوفيك..
ام خالد: فيصل دخيلك اقنع ابوك خل انوديه المستشفى دخيلك..
فيصل: قوم ابوي .. انا ساير اشغل السياره واترياك..
بو خالد بصوت متألم وخفيف: لا يا فيصل.. ازقر اخوك خالد ودي اشوفه..
فيصل: ابووويه لازم انوديك المستشفى ولا ترمس وايد مب زين لك.. وانا ما علي منك بوديك غصبن عنك..
فطوم: اتصلت في خالد قال انه ياي احين ويا عمي خليفه..
فيصل: يلا ابوي حط ايدك عجتفي وخل انسير المستشفى..
بو خالد: بس..
فيصل: ولا كلمه ابوي بتسير يعني بتسير..
وشل ابوه وركبه الموتر وبسرعه وداه مستشفى البراحه .. ولما وصل خالد البيت لقى فطوم وامه لابسين عبيهم يتريونه عشان يوديهم المستشفى.. وخذاهم وراحوا صوب المستشفى.. وبوخالد دخلوه غرفه العنايه..
فيصل: هلا خالد .. وينكم اتأخرتوا..
خالد: ماشي الدرب زحمه شوي.. خير شو فيه ابوي..
فيصل: مادري والله لين احين هو في غرفه العنايه والدكاتره داخل عنده..
العم خليفه: ماعليكم .. انتوا هدوا وادعوا له بالشفا.. وارتاحوا واتعينوا من الله خير..
ام خالد: واعليه يا بوخالد.. ما تستاهل..
فطوم: هدي عمرج امايه ان شاء الله مافيه الا كل عافيه.. هدي ..
خالد: امي شو صار لأبوي..
ام خالد: مادري والله .. هو كان راقد.. يوم دخلت عليه الغرفه لقيته مب قادر يتنفس وقابض ايده عصدره.. اكيد هو ماخذ دوا القلب البارحه.. وانا قلت له بوخالد روح البيت السهر مب زين لك.. قالي لا اليوم انا مستانس خليني .. واعلييييييه.. يارب مالي غيره.. يارب سترك يا رب
خليفه: ما عليه. انتي هدي بس مافيه الا كل عافيه.. هذوا الدكتور طلع بنسـأله؟
فيصل: ها دكتور بشر..
الدكتور: والله مش عارف اقول ايه.. بس مين انت..
فيصل: انا ولده (ويٍأشر على خالد) وها ولده الكبير..(ويأشر على خليفه) وهذا اخوه.. بعني عمي..
الدكتور: والله هو تحت العنايه دلوقتي.. ونحن عملنا الي علينا والباقي على الله.. انتوا ادعيلو ان الله يشفيه..
خالد: انزين هو شوفيه بالضبط ممكن انعرف..
الدكتور: هو ألبه ضعيف شويه.. وكانت حتحصله سكته لو تأخرتوا كمان شويه.. بس ربنا ستر الحمد لله.. وان شاء الله لما يعدي مرحله الخطر بتاعته حيبأه زي البم.. انتوا ماتخفوش احنا بنراقبه وعاملين كل احتياطاتنا.. تأدروا تروحو البيت.. وان شاء الله مافيش الا كل خير..
ام خالد: شوفيكم ابهتين.. طمنوني قولو شي..
خالد: امايه ابوي مافيه الا كل خير.. الحمد لله هو واااايد زين.. بس انتي هدي وخل انسير البيت وباجر من الصبح نحن سايرين عنده..
ام خالد: انا مب متحركه من مكاني.. غناتي بو خالد.. مالي غيره في هالدنيا مستحيل اودره..
خليفه: ام خالد.. سمعيني.. انتي قعدتج هني ما منها فايده ما بيخلونج تقعدين عنده.. انتي سيري البيت ويا فطوم.. ما ايوز حريم ارواحكن تقعدن هني..
فطوم: يلا امي.. باجر من الصبح ان شاء الله بنيي... وبنلاقي ابوي احسن منه ماشي..
ام خالد: يلا اتوكلنا.. ربي يحفظك يا بوخالد..
فيصل: وييييييينك بوخالد اتشوف حرمتك كيف زايغه عليك..
ام خالد: صدق انك متفيج..
خالد: هههه .. وااااي حلاتج يا امي يوم الضحكه اتكون على شفتج..
ام خالد: امش امش.. بلا رمسه زايده..
وردوا البيت والكل هلكان وتعبان.. خالد ماكان منتبه انه ناسي تليفونه في السياره .. يوم ركب الموتر شاف اكثر من 5 مس كول من خوله.. وعلى طول اتصل فيها..
خالد: هلا والله بالغلا كله..
خوله: وينك انت .. حرام عليك اتخليني جيه على اعصابي طمني شوفيه عمي..
خالد: والله ماشي بخير .. هو في العنايه احين.. تدرين بعد ابوي في القلب واذا اتأخر عن دواه شوي يأثر عليه.. بس الحمد لله ماصار شي جايد.. وانا احين ياي ويا عمي خليفه بوصله البيت
خوله: خلاص اترياك..
خالد: لا ارقدي انتي .. الوقت متأخر..
خوله: لا شو .. قلت بترياك.. ولا ما ودك اتشوفني..
خالد: افا .. احين مب راد عليج لأن عمي وياي..
خليفه: غمض عيونك واعتبرني محد..
خالد: افا عمي تاج راسي انت..
خوله: يالمنافق ما تم حد ما قلت له تاج راسي.. كم تاج لراسك عندك انت..
خالد: هههههه .. لازم شويه دهان سير هالأيام..
خوله: انزين عيل.. اترياك.. انا براويك .. دهان سير ها..
خالد: واااااااي خوفتيني.. يلا في امان الله..
خوله: هالله هالله في السواقه.. يلا باااااي
..

فيصل رد البيت وكان فعلا منهك وتعبان.. ورد دخل الغرفه وتذكر الورقه الي على التسريحه وقال بيسير يشوفها.. راح صوب التسريحه وشل الورقه وشاف مكتوب عليها رقم وحذاله معجبه.. استغرب منو ممكن يدخل غرفته ويحط هالبطاقه.. تم يضحك .. قال اكيد هاي فطوم محد غيرها لأن مب معقوله حد يدخل غرفته غير فطوم ولا امه..
شل البطاقه وياب التليفون واتصل عالرقم الي مكتوب فيه ..
هند: الووووو
فيصل سمع الصوت.. وحس انه غريب عليه.. تم يفكر منو ممكن اتكون راعيه هالصوت..
هند: الووو.. اااانت منووو.. ففففيصل؟؟
استغرب فيصل يوم سمعها اتناديه وهي بهالربكه شك في السالفه انها مب ممكن اتكون فطوم.. وهذا يعني ان راعيه الصوت كانت تنتظر مكالمته..
فيصل: الو.. منو وياي..
هند: معجبه..
فيصل: لو سمحتي عن السخافه.. ممكن ترمسين عدل ولا اصك الخط..
هند: لالالالا .. لا اتصك بليز.. انا ما صدقت اسمع صوتك.. انا من اول مره شفتك فيها انعجبت في شخصيتك وهيبتك... وجمالك طبعا..
فيصل: انتي منو.. ؟
هند: انا بقولك.. بس اخاف تاخذ عني فكره غلط.. بس انا والله انت اول شاب اتجرأ واكلمه.. انا مب راعيه هالسوالف بس ما قدرت ازخ عمري وما اكلمك.. بليز..
فيصل: ممكن اتقولين لي منو وياي.. لأن صبري نفذ.. وماباخذ عنج فكره..
هند: انا هند العامري.. بنت جيرانكم..
فيصل: شووووووووووو (وهو مصدوم)..
هند: انا اسفه يلا باي..
وصكت الخط عن فيصل.. وفيصل بعده مصدوم.. مب مصدق.. توه ساير عند فطوم وصله مسج مكتوب فيه.. ( لو سمحت فيصل لا اتقول لفطووم.. لأنها ما تدري عن شي.. لا اتخرب صداقتي فيها.. وانا ماراح اتصل فيك وانا اسفه اعذرني بليز بس غصبن عني)..
فيصل اتراجع ورد وبدل ثيابه وانسدح على السرير تم يفكر.. غريبه ما توقع في حياته ان بنت العامري يظهر منها هالتصرف.. بس عذرها على صغر سنها.. وتذكر يوم كانت اتيي البيت عندهم يوم صغار.. وشكلها السماري الحلو.. وعيونها الوسع.. بس تذكر ابوه وحاول يتجاهل هالأفكار.. ولكن لا محال .. هو مب حاس في عمره لقى نفسه يرسل لها مسج
( بالخير مسيتك لا تكون تضحك وقاطعتك؟
أو تسولف ولهيتك؟
بس حبيت اقولك ما نسيتك..)
من استقبلت هند هالمسج طارت من الفرحه.. وردت طرشت له مسج
( أ-ع-ز-ك-
أغلى كلمه
بأغلى مسج
لأغلى إنسان
اليوم وبكره وللأبد)

صباح يوم الأربعا
ام خالد: فيصل يما قوم.. قوم.. خل انسير عند ابوك..
فيصل: ان شاء الله .. بقوم بتغسل وبتلبس وبييكم.. انتوا اجهزوا..
ام خالد: يلا لااتبطي..
فطوم: يما انا مب سايره المدرسه اليوم.. خلني بيي وياج..
ام خالد: هي يما لازم انكون قرب ابوج..
فطوم: اشششوه.. اخيرا بغيب..
ام خالد: شو قلتي ..
فطوم: ها ماشي.. قلت وحليله ابوي ما يستاهل.
ام خالد: هي والله واعليه..
خالد: يلا امي جاهزه..
فطوم: منو بيودينا خالد ولا فيصل..
ام خالد: مادري والله انا وعيت فيصل..
خالد: خلاص تعالي وياي وبنقول حق فيصل ايي بروحه.. فطوم .. لا يكون ناويه تطلعين بهالمنظر.. استحي على ويهج سايرين المستشفى مب عرس ملونه ويهج
فطوم: ما عليك مني..
خالد: شو قلتي.. اذا انا ما علي منج منو الي عليه منج...
فطوم: انا حره نفسي وبعدين انا مب يايه وياك بسير ويا فيصل..
خالد توه ياي يصفعها بس مسكته امه,,
ام خالد: مو وقته احين استحوا على ويوهكم ابوكم في المستشفى وانتوا تتضاربون..
خالد: ماتشوفين بنتج المصون شو اتقول..
ام خالد: اقول فطوم.. صدقه اخوج.. يلا اشوف سيري مسحي هالخرابيط الي على ويهج..
فطوم: اوووووووه.. شو ها الواحد ما يقدر يكون حر..
فيصل: شو فيج اتصارخين..
خالد: ماشي اختك الظاهر يبالها تأديب دلعوها زياده عن اللزوم.ز
فطوم: انا من يومي جيه انت الي ما تدري عنا.. احين اونك قمت اتحس انك مسؤول عنا..
ما حست فاطمه بعمرها الا ويايتنا ذيج الصفعه من اخوها فيصل الي طيحتها على الأرض..
فيصل: هاي اخر مره اسمع فيها صوتج يعلا في هالبيت فاهمه.. احترمي خالد لأنه مهما كان اخوج ويخاف عليج..
ام خالد: وبعدين وياكم.. خلنا انسير المستشفى يوم بيرد ابوك بالسلامه اتصرفوا انتوا عاد
فطوم تمت اتصيح وركضت صعدت غرفتها.. : مب يايه وياكم..
خالد: احسن بعد.. خلج هني.. يالياهل..
ام خالد: فيصل بس مب حلوه منك تضربها.. انا في عمري ما تعاملت وياكم بالضرب..
فيصل: امي فطوم زودتها كم نسكت لتصرفاتها.. مب ياهل.. كبرت.. دومي اخاف على مشاعرها عن تزعل مني.. بس صبري نفذ.. وقامت وايد تاخذ حريتها اشوف.. فخل اتعرف حدها..
خالد: صح اني كنت غافل عن البيت .. بس احين ابا اعوض كل شي..
ام خالد: ربي لا يحرمني منكم.. الله يطول بعمر ابوكم ويفرح بعيالكم.. والله يا خالد انت جيه طمنتني على مستقبل خوله بنتي..
خالد: افا عليج امي لا اتخافين .. خوله في الحفظ والصون..

وصلوا المستشفى ونزلوا عشان يسيرون عند بوخالد..

[بنت البلاد]

الجزء الرابع عشر

دخلوا المستشفى وتوهم سايرين صوب غرفة العنايه الي ابوهم كان فيها .. الممرض منعهم يدخلون وقالهم انه ابوه محد في الغرفه.. والي في الغرفه احين حاله ثانيه وهو ما يدري عن ماكن ابوه .. الكل كان زايغ .. راح خالد عند الإستعلامات يسألهم اذا كانوا ناقلينه للغرف فوق..
فيصل: امي هدي عمرج ان شاء الله مافي شي.. خالد سار يسأل..
ام خالد: انا قلت لكم خلوني اتم في المستشفى ما خليتوني..
فيصل: امي اتفائلي .. واتعوذي من الشيطان.. مافي الا كل خير ان شاء الله..
ام خالد: سير عند اخوك بلاه اتأخر.. انا بموت والسبه انتو..
فيصل: بعد عمر طويل امي.. لعل يومنا قبل يومج.. هذوا وصل خالد..
خالد: افف الحمد لله.. ابوي نقلوه للجناح لأن حالته اتحسنت..
فيصل: شفتي امي قلت لج ما في شي..
ام خالد: الحمد لله لك يا رب.. اقول يما اتصل في البيت اطمن على فطوم خليناها روحها..
فيصل: ان شاء الله احين بتصل..
(اتصل فيصل في البيت لقى الخط مشغول استغرب.. وطالع الساعه لقاها 8.15 الصبح.. )
فيصل: امي الخط مشغول..
ام خالد: ما عليه اتصل عقب اشوي..
وساروا وصعدوا المصعد وراحوا غرفه ابوهم.. كان ويهه منور وامبين عليه متحسن..
خالد: هلا والله ابوي.. ماشاء الله ويهك منور؟
بو خالد: ها كله بشوفت امكم ويهي نور..
فيصل: اخ يا قلبي ما نروم على كلام الغزل مال الشياب..
خالد: لا اتقول عنهم شياب هاييل توهم في عز الشباب..
ام خالد: انتوا الإثنين يوزو عن سوالفكم هاي..
الكل: هههههههههههه
بو خالد: الاوين فطوم..
فيصل: احين نحن كلنا هني ما ترسنا عينك الا تبا دلوعتك..
بو خالد: كلكم قره عيني.. بس فطوم تراها الصغيره لازم شوي زياده..
خالد: يلا تستاهل تراها اختنا..
ام خالد: فطوم في البيت راقده شوي تعبانه فما طرشتها المدرسه..
بو خالد: وحليلها بنتي.. زين سويتي..
فيصل اتصل البيت مره ثانيه وبعده حصل الخط مشغول.. استغرب منو بيشغل الخط هالحزه..

في البيت
فطوم:الا ما قلت لي.. شو من الوان اتحب..
هزاع: والله احب كل الألوان تقريبا الا الألوان الفاقعه.. ليش هالسؤال..؟
فطوم: لا بس عشان اعرف شو البس باجر.
هزاع: انا اتخيل كل شي حلو عليج.. لأن القمر كل شي يليق عليه..
فطوم: باجر بتتأكد اني مب القمر الي في خيالك..
هزاع: ليش يعني.. عندج شك في جمالج انتي؟؟
فطوم: لا مب جيه.. بس..
هزاع: لا بس ولا شي.. لو شو ما كنتي انتي في عيني حلوه..
فطوم: انا سوده متفحمه..
هزاع: مع اني ما اعتقد.. بس ما عليه انا احبج لقلبج مب لشكلج..
فطوم: انزين انا كيف بعرفك..
هزاع: بتعرفيني ما عليه..
فطوم: جيه قولي شي معين بيخليني اعرفك..
هزاع: والله انا بعدني ما قررت انتي قبل لا تظهرين اتصلي فيني وبقولج شو لون الغتره والدشداشه مالتي.. خلاص اوكي جيه..
فطوم: خلاص تم.. وحليله ابوي مادري شو فيه.
هزاع: هيه انتي ليش ما سرتي وياهم المستشفى صح..
فطوم: بس مابا اركب موتر فيه خالد
هزاع: اي خالد.. اخوج؟؟
فطوم: هيه
هزاع: وليش ان شاء الله؟
فطوم: بس كله يحب يتحكم فيني.. كنت متجحله وحاطه شادو فاتح وجلوز.. اتحرطم علي.. ومادري كيف.
هزاع: بس ها اخوج من حقه.. يغار عليج..
فطوم: خل يغار على حرمته من علي انا..
هزاع: ام لسان .. واذا انا طلبت منج ما اتحطين هالأشيا لأني انا بعد احب البنت اتكون طبيعيه..
فطوم سكتت ما عرفت شو اترد .. جان تتطالع الساعه ولقتها 8.35 وشافت انها وايد طولت..
فطوم: اقول هزاع احين اخاف هلي ايون ولا يتصلون يلقون الخط مشغول .. بكلمك عقب
هزاع: خلاص اوكي.. يلا حطي بالج على روحج.. ولو اني ما شبعت سوالف وياج..
فطوم: وانت بعد.. باي

صكت الخط فطوم من هالصوب واتصل فيها فيصل على طول.. يوم ردت على الخط ارتبكت اشوي..
فيصل: منو شاغل الخط هالكثر..
فطوم: كنت شابكه عالنت..
فيصل: المهم هاج سلمي على ابوي...
فطوم: هلا والله بأبوووويه.. مااتشوف شر.. والله كنت احاتيك وايد..
بو خالد: هلا ببنيتي حبيبتي.. فديتج والله.. شو فيج عمري قالولي تعبانه ماسرتي المدرسه..
فطوم فهمت ان امها قالت هالكلام لأبوها : هي ابوي شوي بعيد الشر عنك.. ما عليك مني انا بتحسن.. بس المهم انت بخير
بو خالد: انا احسن من اول بعد.. بس تدرين هالمستشفيات يعقدون الواحد ما يخلوني اظهر.. اونه لا لازم اكون تحت المراقبه لمده 24 ساعه عقب بيرخصوني..
فطوم: ما عليه ابوي ها كله عشان مصلحتك؟؟
بو خالد: المهم فطومتي.. حطي بالج على عمرج.. انزين..
فطوم: خلاص ان شاءالله لا اتحاتي.. بييك اكيد عقب الغدا بتشوفني متفيزره عندك...
بوخالد: اذا حسيتي عمرج تعبانه لا اتيين المهم انج اتكونين مرتاحه..
فطوم: افا عليك ابوي.. انت بوخالد الغالي.. مب اي حد..
بو خالد: تسلمين لي والله.. يلا ابوي سيري ارتاحي لج احين..
فطوم: ان شاء الله ابوي... مع السلامه..

[بنت البلاد]

الجزء الخامس عشر

انتبه فيصل انه وصل له مسج.. فتح المسج لقاه من هند..
( شخبار..
اللي غيابه حيل يتعبنا
عزيز ان سأل عنا
وعزيز لو غاب وما تذكرنا؟؟ )
ورد طرش لها..
( ما نسيتك بس تعمدت نسيانك
اشوفك بتسأل عليّ
أو ما يهمك غيابي)
ام خالد: فيصل شو فيك مشغول بهالتليفون.. يلا قم ودنا البيت خل ازهب الغدا وبإذن الله العصر رادين..
خالد: الظاهر فيصل مل من الوحده وده يعرس..
ام خالد: هاي الساعه المباركه الي اشوفك فيها معرس يا فيصل..
فيصل:شوفيكم انتوا انا زواج ماراح اتزوج..
بو خالد: ليش ابوي.. خاطرنا انشوف عيالك
ام خالد: ما عليك منه مصيره بيعقل شرات خالد وروحه بيي بيقول لنا نخطب له..
فيصل: انا هالصيف بسافر..
ام خالد: على وين..
فيصل: ماشي بسير بريطانيا ويا ربعي..
ام خالد: شو عندك .دراسه وراح تدرس هني.. شو تبا في هناك..
خالد: خله امي ياخذ راحته يستانس..
بو خالد: شو فيج يا حرمه لا تغصصين في الولد..
ام خالد: كلكم احين انجلبتوا ضدي اشوف.. قم قم خل انروح البيت ابرك لنا..

راح خالد ويا امه وفيصل عشان يردون البيت.. ولما وصلوا البيت شافوا فطوم قاعده مجابله هالتلفزيون..
ام خالد: السلام عليكم
فطوم: وعليكم السلام
فيصل تم ساكت وصعد وسار فوق فطوم استغربت..
فطوم: اميه .. شوفيه فيصل..
ام خالد: مادريبه هالولد شو ياينه..
فطوم: انا بسير بشوفه.. وين خالد..
ام خالد: اليوم بيتغدى بيت عمه..
فطوم: اشعليه معرس بيشوف حبيبته.. عقبالنا يا رب..
ام خالد: عيب عليج شو هالرمسه..
فطوم: شو حرام نحلم ..
ام خالد: ههه... الله يبلغني فيج عروس تنزفين لأحسن واحد..
فطوم ادق باب غرفه فيصل.. : ممكن ادخل.
فيصل: دخلي..
فطوم: شوفيه الحلو مبوز.. شكله مب شي جيه..
فيصل.:مافيني شي..
فطوم: بعدك زعلان مني.. انا اسفه حقك علي.. بس غاضني خالد بإسلوبه..
فيصل: فطوم.. انتي اتعرفين خالد اسلوبه دفش وانا ما اقدر اشوف فطوم تربيه ايدي اتطول لسانها.. هاي اخرتها.. وبعدين ها اخوج العود لازم تتحملينه..
فطوم: انا اسفه.. هات راسك ابوسه..
فيصل: خوزي عني.. بصلع..
فطوم: افا.. انت الخسران.. اصلا بوساتي اتغلظ الشعر..
فيصل: يا فهيمه انتي..
فطوم: شو فيك احس بك متضايق..
فيصل: ماشي بسافر الصيف..
فطوم: ويييييييين ودني وياك..
فيصل: والله ودي.. بس انا ابا اسير لغرض في نفس يعقوب بس لا اتقولين حق حد خله بيني وبينج..
فطوم: هنوف..
فيصل: هيه..
فطوم: خلاص انزين بسافر وياك .. عشان امي ما اتشك.. وهم عشان انا ما اشككها بعد.. ومنها بتعرف على هنوف الساحره هاي..
فيصل: يالمصلحجيه.. فكره الصراحه..
فطوم: اللللللللله وناسه بنسافر هالصيف..
فيصل:ايه انتي صخي.. لاتنطقين.. اذا خليتي حد يعرف بجتلج..
فطوم: ان شااااااء الله.. انزين وثمن سكوتي شي واحد..
فيصل: يا ربي من هالبنت ما عندها شي ببلاش..
فطوم: ودني باجر وافي.. بسير ويا هند..
فيصل يوم سمع اسم هند ارتبك.. ما وده يوافق.. بس المشكله ان فطوم طلبت منه..
فطوم: شو فيك فيصل ساكت..
فيصل: ها.. اوكي.. وربيعتج روحها بتسير..
فطوم: لا هي بتيي ويانا..
ام خالد زقرت عليهم عشان ينزلون يتغدون..
الكل نزل وبدا يتغدى..

في بيت العم خليفه..
ام عبدالله: ها امي خالد.. شخبار ابوك.. ان شاء الله بخير.؟
خالد: الحمد لله عمتي .. ابوي وايد زين..
العم خليفه: الله يهداه دومي اقوله لا اتعب روحك.. التعب مب زين عليك.. لكنه عنيد ما يسمع الرمسه..
غانم: وحليله عمي.. نشيط.. ما يحب ييلس من غير شغل..
خوله: اليوم العصر بنسير انزوره ..
ام عبدالله : اكيد كلنا بنسير واجبنا... اقول خالد اغرف لك عيش شو ها اكل عصافير الي حاطنه عصحنك..
خالد تم يطالع خوله بنص عين ويضكون اثنيناتهم..
غانم: امي شكلها بنتج مهددتنه انه ما ياكل عشان ما يمتن زود..
خوله: انت اسكت الله يخليك..
ام عبدالله: ما عليك منها هاي.. كل كل امي..
خوله: لا ما منعته روحه ما ياكل..
خالد: هي والله عمتي وحليلها خوله موووووووول ما يخصها
خوله: اوب شكلك انت بعد جالب علي ويا غنوم..
غانم: غانم لو سمحتي..
خوله: ويا غاااااااااااااااانم..
اليده: تعالوا يا عيال .. اسمعوا في الرادو... حاطين اغنيه محمد عبده..
غانم: وحليلها يدوو ... عاشقه اغاني هالآدمي .
اليده: اسكت انت خلني اسمع.. الله الله.. يطرب..

في بيت العمه هنادي(ام علي)

العمه هنادي(ام علي): اقول بو علي.. دريت ان اخوي بو خالد في المستشفى..
بو علي: لا تقولين.. شوفيه؟؟
ام علي: مادري والله يقولون ارهاق ..
بو علي: وحليله بو خالد ما يستاهل.. لازم عي انزوره..
ام علي: هيه انا كلمت كلثم وهي بعد ما كانت تدري قالت بتيي اليوم هي ويا نوره عشان انسير سوى.. تدري انت ريلها ما يدانينا ..
بو علي: الله يهديه بس..
علي: جني سمعت اسم نوره..
ام علي: ههههههه.. هيه الخطيبه على قوله يدوتك..
علي: فال الله ولا فالج يدوه.. انا اخذ هالخقاقه..
بو علي: ما علينا منكم احين انتوا يهال يوم تكبرون كل واحد بيعقل وبيتغير تفكيره..
علي: وغنوم بيي.. ؟؟
ام علي: اظني.. انا لأن ام عبدالله وحليلها هي الي خبرتني ولا انا شو عرفني.
علي: خلاص عيل دام ان غنوم بيي انا بيي..
بو علي: ههههه

في بيت كلثم(ام نوره)
نوره: امي اليوم بنسير انزور خالي..
كلثم: هي امي.. بنسير ويا خالتج هنادي..
نوره: لا يكون هذا الي اسمه علي بيي ويانا... ؟
كلثم: هيه ليش؟
نوره: اففف انا ما بيي.. هالإنسان ما ادانيه..
كلثم: عيب عليج امي.. ها ولد خالتج.. وبعدين انتي سايره اتشوفين خالج ما يخصج فيه
نوره: والله لولا خالي جان ما بيي..
كلثم: خل عنج..
نوره: امي .. ابوي ليش ما يداني ابوي..
كلثم: هيييييي يا نوره.. شو اقولج.. هاييل من زمان جيه.. ليش اني يوم خذته محد من اخواني كانوا راضين ولا حتى امي.. الوحيد الي كان راضي هو ابوي المرحوم.. لأنه كان يدج الي هوه ابو ابوج يشتغل عندهم من سنييييين يعني ما قدر يرده.. بس نصيحه مني يا نوره لا تاخذين واحد الا وهلج مقتنعين فيه كلهم.. لأنهم ابخص في الناس مثلج..
نوره: بس امي انتي عرستي ويبتي عيال.. وليش يعني هالعداوه لين احين موجوده.ز
كلثم: مب عداوه بمعناتها.. بس اتحسين ابوج متغصص منهم لأنهم ما حضروا عرسنا.. وماسووا مثل ما سوا يوم عرس خالتج هنادي..
نوره: الله يهديهم.. المهم متى اجهز..
كلثم: سيري اجهزي احين.. لأن اول بنسير عند خالتج هنادي عقب بنسير وياهم المستشفى...
نوره: خلاص صار..

[بنت البلاد]

الجزء السادس عشر

اجتمعت كلثم ويا نوره بنتها في بيت هنادي عشان يروحون المستشفى ..
علي: هلا والله بنت خالوو .. اشحالج..
نوره تتطالعه بإحتقار واترد عليه من غير نفس.. : الحمد لله..
علي: اقول خالو كلثم شوفيها بنتج جيه خقاقه ترد من غير نفس..
هنادي: علووووو.. عيب عليك لا اتقول جيه عن بنت خالتك..
كلثم: هنادي شو فيج كلتي الولد وهو الصادق.. انتي ايه نورووو شو هالحركات بعد.. شو قلت لج انا..
نوره: اميييييي..
علي: هههههه وييييو اتهزئت..
نوره: طاع الكل انجلب ضدي شو ها..
هنادي: انا وياج ما عليج منه ها روحه خقاق يشوف الكل شراته
نوره: وييييييو..
بو علي: ههههههه يحليلكم والله .. ربي يبلغني فيكم معاريس..
علي: ابوي معاريس شو قصدك؟؟ لا يكون ناوي تخطب لي هالسحليه مابيها..
نوره: عدااااال دون جوان.. انا الي اباك احين..
علي: باخذج بس بشرط.. قصري من لسانج ها شوي.. وكل يوم اتدلكين لي ريولي .. وتطبخين لي حتى عالريوق.. وتشتغلين وتعطيني راتبج كله..
نوره: لا والله .. اكد عليك انا..
علي: كيفج انتي الخسرانه.. ما باخذج عيل.. تمي عنسي على جبد خالو كلثم..
كلثم: لا عاد جيه ما ارضى.. بنتي الف من يباها.. بسم الله عليها ما بتعنس..
هنادي: اصلا علي يتمنى وحده شراتها شو اتقولين انتي.. لو يلف الدنيا ما بيلقى احسن من نواري..
علي: مادري على شو عاد...
نوره: اسكت اسكت محد طلب رايك فيني.. يكفي راي خالو هنادي حبيبتي والله..
بو علي: اقول مو جنه اتأخرنا قومو خل انروح..
هنادي: هي والله.. يلا سرينا انا جاهزه..
الكل قام عشان يروح المستشفى.. وركبوا الموتر وساروا المستشفى..
هناك كانت فطوم وامها وفيصل.. وخالها راشد وبناته طبعا وعمها خليفه وياه خوله وخالد وغانم اما مرت عمها ما قدرت اتيي لأن يارتهم كانت يايه فتمت هي ويا اليده في البيت.. بس اتصلو واتطمنوا على بوخالد..
وصل بو علي ويا هنادي وكلثم وعيالهم (علي ونوره)..
بو علي: هلا والله بالنسيب.. سلامااااات ما تشوف شر.. خطاك السوء..
بوخالد: خطاك اللاشر.. اشحالك.. ؟
بوعلي: والله بخير بوجودك..
كلثم: هلا والله اخوي.. سلامات ما تستاهل والله.. اسمحلي ما دريت الا اليوم...
بوخالد: الله يسلمج.. الا وينه ريلج ما اشوفه..
كلثم: تدريبه انت مشغول..
بوخالد: مشغول ولا ما يبا يجابلنا كعادته...
هنادي ما حبت ان السالفه تنفتح عشان صحه بوخالد فقاطعته: هلا والله اخوي.. سلامات.. والله ما تستاهل.. كم مره انقول لك لا تجهد عمرك.
بو خالد: الله يسلمج.. تدرين فيني انا القعده هي الي اتمرضني زود ماروم ..
نوره: خالي فديت روحك والله ما تستاهل..
بوخالد: نواري الحلوه هني.. اشحالج .. ؟
نوره: بخير يوم شفناك بخير..
علي: هلا خالي.. (باس راسه) ما اتشوف شر.. (يطالع نوره) اقول نوره يوم يسلمون على الكبار يبوسون راسهم بعد.. انتي بعدج نونو لازم انعلمج شوي..
نوره من فشلتها ودها تزغده: اوه اسفه خالي نسيت.. اكبر بوسه على راس خالي الغالي..
علي يضحك ضحكه خبيثه ويطالع غانم.. وغانم ميت ضحك هو الثاني كان وده ان فطوم الي تنحط في هالموقف..
غانم: هلا والله بولد العمه.. ويييييييين ضعفان . الحب يسوي كل هذا..
علي: اي حب اي خرابيط..
غانم: اويه .. طاعوا هذا قام ينكر..
هنادي: افا يا ولدي اتحب من وراي وانا امك ما اتقول لي من هاي تعيســ.. ااااقصد سعيده الحظ..
علي محمر ومغيظ صدق والكل يضحك عليه: شو السالفه انتوا متفقين علي شكلكم..
نوره: افاااا ولد خالو اتحب وما اتقول لي... تعال انا نوره الحبوبه قول لي منو اتحب..
علي: ما بقى الا انتي الي ترمسين..
فطوم: خوزو عنه انا الي اعرف له هذا.. (وبغضب) تعال هني.. يلا قول اعترف..
علي: لا والله.. احلفي.. شو رايج ييبي المخمه وضربيني فيها بعد..
فطوم: والله لو شي ما بقصر..
عواش: شو فيكم على الولد كلتوه بسم الله.. خله يحب اشعليكم منه..
علي: عاشوووو لقينا من يوقف بصفي.. يلا من الثاني الي بيوقف وياي بعد..
فيصل: شو فيكم الي يقول انكم في مباراة.. اصحوا.. نحن في مستشفى مسوين لنا حشره يوم بنرد البيت قوموا اتضاربوا..
خوله: ههههه خلهم والله القعده ويا هاييل الي اتونس... خصوصا هالأربع غانم وفطوم وعلي ونوره..
غانم: لو سمحتي قولي غانم ونوره.. مابا اسمي يكون بعده ولا قبله اسم فطوم..
فطوم: عدااااااال انا الي ابا احين.. يلا خوله غيري كلامج بسرعه جدامج 30 ثانيه..
خوله: ويه خل الحق عمري.. غانم ونوره وفطوم وعلي..
الكل: هههههههههههه
ريم بنت خال فطوم ما كانت شاله عينها من فيصل.. وفيصل كان ملاحظ هالشي بس كان مطنش..
ريم كانت ترمس بينها وبين نفسها ومتغصصه من تجاهل فيصل لوجودها .. وشلت عمرها وظهرت من الغرفه ولحقتها عواش..
عواش: ريم.. وين سايره..
ريم: خليني في حالي..
عواش: كل هذا عشانه.. والله ما يستاهل الي اتسوينه في روحج.. خليه.. اشعليج منه.. الي ما يباك لا تصيح تباه..
ريم: عواش بس..
عواش: لا بس ولا شي.. شليه من بالج.. هالإنسان معقد مادري شو تحت راسه.. يمكن يبا وحده ثانيه .. خليه..
ريم: عيل ليش تخطبني عمتي له دام انه ما يباني..
عواش: تبين الصراحه انا احس انه ما يدري انهم خاطبينج له.
ريم: معقوله يعني..
عواش: والله انا ما استبعد شي .. ها تربيه برع البلاد مب ولد الإمارات تراه..
ريم: هي والله صدقج الغربه اتغير..
وبعد ساعه الكل كان مروح البيت.. اما ام خالد تمت عند بو خالد ما طاعت اترد .. اما الباقي ردوا البيت لأن وراهم دوامات.. بس فيصل تم ويا امه عشان يردها عقب..
بو خالد: فيصل يا ولدي شو فيك مهموم..
فيصل: مافيني شي ابوي..
ام خالد: انا هالولد غاسله ايدي منه.. نسى تربيتي له
فيصل: افا يا امي.. كيف بنسى تربيتج .. انتي امي الغاليه ..
ام خالد: كيف الغاليه وانت مب طايع اتسوي الي انا اباه
فيصل: وشو الي تبينه وانا ما سويته
ام خالد: ريم
فيصل: امي .. هالبنت اعتبرها اختي ماروم اخذها.. لا تجبريني على الي ماباه

بو خالد: شو فيج يا حرمه خلي الولد على راحته
ام خالد: تباه يسود ويهي جدام العرب.. شو بيقولون عنا.. ناخذ من برع ونحن عندنا الي يسوونهم
فيصل: امي .. ريم بنت خالي والنعم فيها .. بس انا مابيها.. اعتبرها شرات اختي
ام خالد: وشو رايك اقول لك اني بغضب عليك ليوم القيامه جان رديتني.. لأني البنت خطبتها وخلاص.. وجان تبا اتموتني سير افسخ الخطبه..
فيصل تم مفجج عيونه مستغرب مب مصدق الي سمعه وحس لسانه مربوط مب عارف شو يرد
بو خالد: الله يهديج يا موزه..
ام خالد: ما عليك انت انا اعرف له ولدك ها.. ما ايي الا جيه.. دلعناه وايد..
فيصل تم منزل راسه والدمعه في عينه.. هنوف.. لا مستحيل.. كيف هالشي.. يعني خلاص لازوم ينساها .. بس نسيانها مستحيل..
ام خالد: انزين بو خالد الوقت تأخر لازم نرد البيت وانت لازم ترقد.. يلا فيصل امي قم ودني البيت
فيصل: ان شاء الله.. ( وعقبها سكت باس راس ابوه ومشى.. )
بو خالد: موزه.. شوي شوي عالولد لا تضغطين عليه مب زين..
ام خالد: ما عليك انا اعرف لهم عيالك..
فطوم طبعا مب قادره اتنام الليل.. كيف بتنام وباجر الأربعا يعني يوم لقاها بالحبيب هزاع..
فطوم: الو
هزاع: هلا والله هلا
فطوم: اشحالك؟
هزاع: باجر بستوي بخير..
فطوم: اسكت عني مرتبكه..
هزاع: خلج عاديه.. ترا هو الا شوفه من بعيد..
فطوم: انت شقايل بتعرفني..
هزاع: ما يحتاي القمر ينعرف من نوره
فطوم: اي قمر اي خرابيط.. بتشوفني وبتتأكد اني مب قمر..
هزاع: ما عليه باجر كل شي بيبين.. إن الغد لناظره لقريب
فطوم: اخبرك جنه قوم امي وصلوا.. عقب بكلمك يلا باي
بندت الخط عن هزاع وسارت غرفتها..

الجزء السابع عشر

دخل فيصل ويا امه البيت.. وكان الحزن مخيم على ويهه.. كل تفكيره هنوف.. وريم.. شو موقفه جدامها.. وفي هذي الأثناء وصل له مسج من هند مكتوب فيه..
( وينك يا أحلى ملاك
غبت والضحكه معاك
أصعب أيامي وداعك
وأجمل أيامي لقاك )
عصب فيصل من تذكر.. وحس بعمره مراهق وانه الي يسوي غلط في حق هالبنت شو ذنبها يطلع حرته فيها.. رد كتب لها..
( رجاءً اختي لا تردين ترسلين لي مسجات
ومابا اشوف رقمج مره ثانيه على تليفوني
ولا بيكون عندي تصرف ثاني ما يرضيج )
من قرت هند هذا الكلام تمت امبهته مب مصدقه.. ردت تقرا مره ومرتين وثلاث وعشر.. حاسه ان راسها افتر من الي قرته معقوله الي كاتب هالكلام فيصل.. شو الي خلاص يكتب جيه ما حست بعمرها الا وهي داقه على رقمه.. رد عليها فيصل
فيصل: الو.. الو..
هند ساكته مب عارفه شو اتقول..

فيصل: هند عن هذي الحركات.. صدقيني هذا اخر انذار مني لج.. رجاء اعقلي وبلا حركات اليهال هاي.. كوني اكبر من جيه ترا ما ارضى انج تغضبين هلج وربج.. انتي ياهل وما تفكرين فاسمحيلي انا مب مستعد اضيعج بيدي .. مع السلامه
وبند الخط.. وهند انحبست الدموع في عيونها ما تدري تضحك ولا اتصيح.. تحزن ولا تستانس..
في داخل قلبها حزينه ليش انه بيودرها.. وماراح تقدر ترد تكلمه.. ومستانسه في نفس الوقت ليش انه نصحها وهاي اول مره تسمع حد ينصحها.. لأنها وحيده امها وابوها ما عندها اخوان اكبر ينصحونها..
فعلا مسحت رقمه من تليفونها وعاهدت نفسها انها ما تكلمه وتسمع كلامه.. ورقدت..
اما فيصل فطول الوقت ماسك بيده صوره هنوف ويطالع فيها.. معقوله لازم ينسى حبه الجديم..
هنوف.. الي ملكت قلبه وروحه وكله... كيف بيقدر على نسيانها
سمع حد يدق الباب..
فيصل: منوو؟
فطوم: القمر.. ممكن ادخل ..
فيصل ابستم: دخلي..
فطوم: اشحالك اخويه حبيي..
فيصل: والله تمام.. انتي اشحالج.. ما عليه ما تسألين عن اخوج المسكين..
فطوم: انت مسكين.. وااااااااي عليك انت..
فيصل: هههههه شو فيج انتي.. خلصيني قولي شو تبين بلا مقدمات..
فطوم: لا تنسى باجر ودني وافي..
فيصل: اف منج... ما نسيت
فطوم: ( ولا تقل لهما افٍ ولا تنهرهما وقل لهما قولاً كريما ) صدق الله العظيم..
فيصل: لا يكون انتي امي وانا مادري,.,
فطوم: يكفي اني انا اشبهها بعد شو تبا زود..
فيصل: اقول سيري سيري ارقدي احسن
فطوم: فيصل.. شو فيك احس فيك متضايق مو شرات كل مره
فيصل: ماشي .. سيري ارقدي
فطوم: والله مب سايره ارقد.. انت فيك شي..

فيصل: دخيلج فطوم.. والله الغصه واصله عندي لي هني.. مب قادر ارمس
فطوم: فيصل.. لا تتحراني انا ما عرف شي وان بعدني ياهل.. تراني عارفه كل شي.. وفاهمه السالفه كلها..
فيصل: امي ليش تبا تعذبني .. ليش ما تخليني على هواي اختار الي اباها انا مب الي هي تباها .. انا مابا اظلم البنت وياي..
فطوم: انزين تباني انا ارمس ريم.. او انك انت رمسها شخصيا
فيصل: المشكله يا فطوم امي هددتني اني لو فسخت الخطبه .. بتغضب علي.. وانا رضا امي فوق كل شي.. بس المشكله مابا رضا امي يكون على حساب حياتي الخاصه..
فطوم: انزين انت حاول لو شوي تنساها.. وشيلها من بالك..
فيصل: وين اشيلها من بالي حرام عليج.. انتي تبيني انسى حب عشته 4 سنين من عمري.. يعني من اول ما حطيت ريولي في مطار هيثرو وهي كانت وياي.. من ذاك الوقت انا تعرفت عليها وحبيتها.. وما ودرتني ولا لحظه كانت في كل خطوه وياي.. هي كانت متحكمه في طلعاتي ويياتي وكانت متحكمه حتى في الربع الي ارابعهم.. ها زين وها شين.. كيف انسى قولي؟؟
فطوم ساكته ومب عارفه شو اتقول.. وفيصل هموم الدنيا على راسه.. شلت عمرها وطلعت من الغرفه وخلت فيصل بروحه..
فطوم بينها وبين نفسها: اخاف امي اتسويها فيني وتخليني اخذ غانم غصب.. لا مستحيل.. لا لا.. ماباه.. ما اطيقه.. وهزاع.. حبيبي هزاع.. مستحيل كيف بتركه..
ونامت فطوم وهالأفكار اتدور في راسها والدمعه تنزل من عينها..

يوم الأربعاء الصبح..

كانت فطوم حاسه بنشاط كبير.. وراحت بسرعه المدرسه اول مره كانت بهالنشاط الكبير للمدرسه.. الكل كان مستغرب ..
خالد: صباح الخير امي..
ام خالد: هلا والله.. صباح الورد.. اخبرك امي اليوم عندك شغل
خالد: لا اليوم ماخذ اجازه عشان انرد ابوي البيت من المستشفى .. ولازم اسير اييب مريوووم من الجامعه..
ام خالد: الله يعطيك العافيه..
خالد: ها واجبنا امي.
فيصل:امي .. الخدامه اتقول اليوم شي عزيمه في بيتنا.. عازمه منو؟؟
ام خالد: خالك وحرمته وعيالهم يايين لنا اليوم عالغدى
فيصل اتغير لون ويهه من سمع اسم خاله..يعني ريم بعد بتكون متواجده وياهم
فيصل: انزين عيل انا اليوم مواعد ربعي.. بوصل فطوم ويا ربيعتها وافي وعقب ساير الميلس عند ربعي..
ام خالد: بس اليوم خالك بيينا..
فيصل: امي انا من متى ما ظهرت من البيت.. واليوم انا من زمان واعدت فيه ربعي.. المهم انا الحين طالع ابا اخلص اشغالي مال تسجيل الجامعه...
ام خالد: احسن عشان البنت تاخذ راحتها وما تستحي منك..
فيصل انجلب ويهه وشل عمره وصعد فوق عشان يشل اوراقه ويبدل لحقه خالد يشوف شو فيه..
خالد: فيصل افتح الباب ابا اكلمك شوي..
فيصل: دخيلك خالد اذا بترمس عن بنت خالي ترا انا روحي واصل حدي من هالسالفه وطفران منها..
خالد: انت افتح الباب بس
فيصل: حياك..
خالد: شو فيك.. خبرني لا اتخش على اخوك شي..
فيصل: انا مابا ريم .. ليش يخطبونها لي ويخلونها تتعلق فيني..
خالد: انت رمست امي..
فيصل: امي تعرفها ما تحب حد يكسر بكلمتها وقالت انها بتغضب علي اذا ما خذت بنت خالي..
خالد: ادري حاس فيك.. انا بعد في البدايه يوم كانوا جابريني ما كنت اباها بس يوم وعيت عرفت ان محد بينفعني غير اهلي..
فيصل: انت غير .. انت الي كنت اترمسهم كلهم كنت تلعب عليهم ما حبيت وحده مثل ما انا احب احين
خالد: والله مب عارف شو اقول لك.. المهم انت سير كمل اشغالك وكون عالغدى هني على الأقل والعصر سير عند ربعك.. وتعال شو سالفه فطوم وطلعاتها ويا ربيعاتها.. احيد مريوم كان ممنوع عليها مثل هالطلعات ليش مخلين فطوم..
فيصل: والله انا بعد ما احب.. بس تكسر خاطري بروحها في البيت ماروم اردها..
خالد: اليوم ما بخرب عليها وناستها بس بعدين انا بتفاهم وياها.. وبخلي حد لمثل هالطلعات.. حالها حال مريوم ولا هي شو الي زود فيها عن اختها..
فيصل: هي والله دخيلك انت رمسها انا اذا زعلت مني على طول براضيها وبخليها تظهر..
وراحت ام خالد ويا ولدها خالد المستشفى عشان اييبون بو خالد..
ام خالد: الحمد لله على السلامه يالعزيز..
بو خالد: الله يسلمج يالغاليه والله الرقاد من غيرج ما ينفع ابدا..
ام خالد: عيب عليك
خالد: الله على الحب ما نروم.. الله يدوم المحبه بينكم.. طاع امي كيف احمرت ..
بو خالد: هاي العزيزه.. عشرت عمر بيني وبينها ..
خالد: يلا ابوي خلصت كل شي.. تعال.. بس شوي شوي..
وصل بو خالد البيت بالسلامه وراح يرقد له شوي لغايه ما ايون له الضيوف .. ويستقبلهم ..

[بنت البلاد]

الجزء السابع عشر

الكل كان مجتمع في البيت على الساعه 2 الظهر .. وفطوم توها كانت راده من المدرسه سارت سبحت وتلبست وقعدت وياهم..
عواش: هلا والله بطمطومه .. اشحالج؟؟
فطوم: شو طمطومه هاي بعد.. اسم دلع يديد اشوف..
عواش: مالت عليج مو ويه حد يدلعج..
خالد: ههههههه لو سمحتي عن الغلط على فطامي دلوعه البيت كله..
ريم: لا فطوم الغاليه .. حبيبه الكل..
فيصل من سمع صوت ريم صد صوبها وتذكر الي هو فيه.. وريم حست بنظرات فيصل صوبها بس تجاهلت الأمر..
تم الكل يضحك ويسولف الا فيصل ما كان ينطق بأي كلمه مع انه مو من عادته هالشي.. بس شو بيسوي حاس عمره مخنوق من عقب ما عرف بالسالفه.. شل عمره وطلع من الميلس وسار قعد في الصاله الي فوق..
ام خالد شافته فانتهزت الفرصه وقالت حق ريم اتروح له فوق وتقعد تسولف وياه شوي..
ريم: السلام عليكم..

فيصل كان معطيها ظهره من سمع صوتها انعفس زياه: وعليكم ..
ريم: اشحالك؟؟
فيصل: بخير
ريم: فيصل ممكن اسألك سؤال؟
فيصل: شو؟
ريم: انت ليش اتعاملني بجفاف..
فيصل: شقايل تبيني اعاملج عيل.. انا هاي طريقتي....
ريم تمت ساكته وما ردت عليه... ونزلت وراحت تقعد ويا اهلها.. وكملوا القعده والكل روح قبل ما يأذن المغرب... وفطوم طبعا على طول اتصلت في هزاع عشان تخبره عن اللقاء..
فطوم: هلا والله
هزاع: ااااااخ يا قلبي توني افكر فيج اقول وينها يا ربي..
فطوم: بشوف الحبايب اليوم...
هزاع: انا الي مستانس لأني راح اشوف قلبي الي ضايع ..
فطوم: انزين خبرني كيف بعرفك..
هزاع: لابس كندوره بيج وغتره بيج ونعال بني.. واحد خسف جدامج.. ها انا
فطوم: لا والله.. انا اباك شو ما كنت..
هزاع: وانتي؟
فطوم: بلبس شيله ورديه ولبس وردي وعباتي مفتوحه..
هزاع: انزين انتي قعدي ويا ربيعتج صوب المطاعم..
فطوم: انزين اخبرك ها رقم ربيعتي ******* اتصل فينا يوم اتكون هناك انا عقب نص ساعه بطلع من البيت.
هزاع: خلاص صار..
بندت الخط عن هزاع وكلمت هند خلتها تتزهب عشان يظهرون.. وراحت فطوم وتلبست واتعدلت واتكشخت.. ووصلت هند عندها وفيصل كان يترياهم في الموتر طبعا..
فطوم: يلا بابوو.. جلدي كرو..
فيصل: ان شاء الله ارباب.. عطي حق انا 5 ريال.
فطوم: روح يلا بلا كلام زايد.. سوق وانت ساكت..
هند ما كانت شاله عينها من الجامه تتطالع فيها فيصل.. وفيصل كان ملاحظ هالشي بس مطنش.. ووصلوا وافي
فطوم: انزين فيصل احين الساعه 7 عالساعه 9 تعال خذنا..
فيصل: انا ما باخذج بقول حق خالد لأن انا مواعد ربعي
فطوم: خلاص اوكي.. المهم الساعه 9,.

فيصل: يلا صكي الباب يلا... كش كش
فطوم تمت تضحك ودخلت المركز .. واول ما دخلت كان المركز مزدحم بالناس وايد.. ودخلت فطوم.. ولو انها صغيره في العمر بس ما شاء الله عليها لها جسم كبير يبينها اكبر من عمرها.. وكانت جذابه في مشيتها وملامحها الرقيقه.. كملت مشيها ودخلت محل اتشرت منه دباديب واشويه هدايا وخذت عطر وعالسريع عطت محل الهدايا عشان يعدل لها البوكس وحطته في جيس هدايا حلو عشان تهديه لهزاع..
هزاع: اقول انا ساير فوق اوكي.. انتو خلكم هني...
عبدالله: منو قده مواعد.
هزاع: دخليكم الي يسمع عاد بقعد وياها يادوب اشوفها
عبدالله: روح روح ابوي. الله وياك اخاف اترد لنا مصدوم
صعدت هزاع الدري وراح صوب المطاعم كانت فطوم قاعده ويا هند وطالبين حق اعمارهم كوكتيل وكيك.. ومندمجه هند في الأكل.. اما فطوم من ارتباكها انسدت شهيتها يا دوب كلت شوي.. وشافت تليفون هند يرد شلته على طول وردت..
فطوم: الووو
هزاع: هلا وغلا بحيبتي.. ها وينكم؟
فطوم: احنا في المطاعم..
هزاع: اي صوب داخ راسي ادور.. وايد بنات شيلهم ورديه..
فطوم: اظني شفتك.. صد ورى شوي..
هزاع صد بسرعه ورى وفعلا شاف وحده راعيه شيله ورديه منزله راسها تشرب كوكتيل..تخبل ما صدق ان الي جدامه هي نفسها الي يكلمها .. معقوله كل هذا الجمال..
فطوم: ها شو شفتني؟..
هزاع: دخيييييلج دخييييييلج ودي اشوفج عن جرب الله يخليج..
فطوم: انت تخبلت..
هزاع: فطوم اذا اتحبيني احلفج شوي بس دقيقه والله مابا زود
فطوم: انا اسفه.. بس اسمعني انا بقوم احين وبودر هالكيس تعال شله..
هزاع: مب شايل شي.. الا اذا انتي سلمتيه لي بإيدي..
فطوم: انا اسفه هزاع انت وايد زودتها.. دخيلك لا تغير نظرتي فيك...
هزاع: خلاص خلاص مب ذال عمري يوم انتي مب مفتكره فيني .. اي جيس الأحمر؟؟
فطوم: هي مافي غيره المهم يلا باي..
بندت الخط عن هزاع وقامت من مكانها وهزاع مب مصدق عيونه .. راح صوب الكيس وشلاه بهدوء وتم يمشي وراهم.. دخلت فطوم محل وتمت تتشرى منه وهو تم واقف من بعيد يطالع فيها.. وهي تتطالعه من طرف عينها ما تباه يلاحظ اهتمامها فيه.. لأنه هزاع بعد يحمل ملامح عربيه جميله.. .
ولما طلعت فطوم من المحل مشت صوب التسجيلات .. مجموعه من الشباب شافو فطوم بروحها ويا ربيعتها ولاحظو جمالها .. كلهم تموا يلاحقون فطوم وهزاع لاحظ هالشي وتحلف اذا شاف حد ضايجهم انه ماراح يعدي السالفه على خير..
فطوم: اقول هند انا زايغه هاييل يلاحقونا هاتي خل اتصل حق خالد ايي ياخذنا..
هند: هي والله انا بعد قلبي ناغزني زايغه..
فطوم:انا بتغشى احسن لي.. وانتي بعد اتغشي..
واحد من الشباب: الحلو صد صوبنا..
فطوم من سمعت تعليقه زاد خوفها وتمت تمشي بسرعه..
..: اقول والله مابتخسرين شي.. انتي خذي الرقم بس.
من سمعهم هزاع ما لقى عمره الا زاخ الريال ومسدحنه عالأرض ويضرب فيه.. وهني تمت فطوم اتصيح من خوفها وركضت بسرعه ويا هند وراحت صوب البوابه.. واحد من ربع هزاع كان يستوي حق هند.. ولد عمتها..
عادل: هند.. شو اتسوين هني؟؟
هند: عادل؟؟ ماشي يييييياااايين نتشرى انا وربيعتي..
عادل: ليش تركضون انزين..
هند: مادري شفنا ضرابه صايره فوق من خوفنا نزلنا واحين اخوها العود بياخذنا..
عادل: ضرابه.. ويا منو
هند: مادري مجموعه شباب يتكافخون..
خليفه: لا يكون بس هزاع. ها ادريبه مال مشاكل.. يتريا اشاره عشان يتضارب..
فطوم من سمعت اسم هزاع شكت عن يكونون ربعه..
عادل: المهم انتوا روحوا البيت انزين .. اقول خليفه قم خل انسير انشوف شو السالفه..
عادل ما لحق يروح فوق الا وشاف هزاع نازل تحت وكندورته متخيسه دم.. هني من شافته فطوم انصدمت وتمت اتصيح .. وهند اتهدي فيها..
عادل: شوفيا ربيعتج اتصيح..
هند: ااااه ها.. ماشي شافت ها متروس دم خافت .. هاي وايد اتخاف..
عادل: انزين المهم انا بتم هني لين ما اطمن عليكم واتروحون البيت.ز
هزاع: عادل قم قم الله يخليك خل انرد العين.. عفان الله شباب دبي وحوش.
عادل: اشلك بالضرايب .. حتى خليفه قال اكيد الي يتضارب هزاع..
هزاع: ومنو هاي الي اترمسها .. اتغازل ويا هالويه..
عادل: بنت خالتي..
هزاع: خلهم يردون البيت.. والله الواحد يخاف على عمره من هالأماكن.. شو هاييل حوش..
واحد من السيكيوريتي: اقول اخوي.. ها الكيس مالك نسيته.ز
هزاع: مخي طار.. مشكور اخوي..
وصل خالد وراحت فطوم بسرعه وركبت الموتر ويا هند وشافهم هزاع.. وكان معجب زود بشخصيه فطوم من رده فعلها مع الشباب انها عرفت كيف تتصرف ما تعطيهم فرصه اكبر..
خالد: غريييبه قال لي فيصل الساعه 9 احين الساعه 8.30
فطوم: تووووبه مب سايره روحي مكان .. زيغه .. عفان الله هالشباب حوش.. ضرابه اقولك من الزيغه قلنا خل انرد البيت..
خالد: سمعيني فطوم الحمد لله انها يت منج وانتي الي طلبتي انج ما تبين تطلعين روحج مره ثانيه.. عشان جيه انا مب راضي على هالشي.. واتحيدين يوم قلت لج البسي عباة وماباج تتعدلين .. ماشاء الله عليج كبرتي.. وعيال الحرام وايد..
فطوم: خلاص اخوي.. سمعا وطاعه
هند: هي والله صدقه اخوج.. نحن ما سوينا شي ولا رمسنا تضاربوا والسبه نحن عيل لو سوينا شرات الباقي جان بيجتلون بعض..
وردهم خالد البيت وراح عند خوله لأنه كان متفق وياها عشان يتعشى وياها برع..

[بنت البلاد]

الجزء الثامن عشر

في بيت العم خليفه

خوله: هلا والله .. حياك ادخل..
خالد: درب درب... احم احم .. السلام عليكم
اليده: هلا والله بوليدي.. اشحالك.. ؟ واشحالك ابوك هالشيبه الي ما يستحي.. شرات اليهال ما يعرف ييلس مكان واحد الا ويأذي روحه..

خالد: ههههه.. الحمد لله بخير .. انتي اشحالج يدوو طمنيني عليج..
اليده: والله بخير يا وليدي.. ودي اشوف يوم عرسكم قبل لا ياخذ ربك امانته..
خالد: بعد عمر طويل..
خوله: دخيلج يدو عن هالرمسه تعرفيني اتضايج منها..
اليده: خلاص صكيت بوزي..
غانم: افا والله .. من غير حسج ما نعيش نحن لا تصكين هالبوز لعلني افداه..
اليده: كاهو هالطفس غنووم وصل..
خالد: هلا والله بالنسيب اشحالك.. ؟
غانم: والله بخير.. واشحالك انت والأهل كلهم ان شاء الله بخير.. خصوصا عمي.ز
خالد: الحمدلله الكل يسلم عليك.. وسلام خصوصي من عند فطووم..
غانم: وعييييييج شو ياب طاريها قبل ما اتعشى خلوني اتهنى بأكلي..
اليده: والله انك ما تستحي شو هالرمسه جدام خالد.ز
خالد: لا افا عليج يدوو.. ما عليج.. ترا نحن دوم نسمع هالرمسات منهم هم الإثنين اتعودنا خلاص..
اليده: انزين امي خالد.. ما حددتوا متى تبون اتعرسون؟؟
خالد: والله الشور شوركم انا زاهب اي وقت..
خوله استحت وشلت عمرها ودخلت المطبخ..
غانم: اونها استحت.. اقول عرسوا وفكونا شلوها من بيتنا ابا البيت يفضى لي شوي.. لأني ناوي اخذ غرفتها اكبر..
اليده: انت اسكت الله يخليك.. ولا كلمه نستفيد فيها منك..
غانم: لا حووووول... امممممم صكيت بوزي..
اليده: لا دخيلك لا تصك بوزك..: فديت بوزك.. هههه
غانم: طاع يدو تتمصخرين علي انتي..
اليده: ما علينا منك يالخبل.. ها امي خالد شو رايك في عطله المدارس.. لين ذاك الوقت اربع تشهر بيمديلها تتزهب..
خالد: خلاص انتي شاوري عمي وعمتي.. وانا بشاور ابوي.. وان شاء الله برد عليكم خبر.ز
اليده: خير ان شاء الله.. بس لا تأخرون زود.. تدري مب زين جدام العرب..
خالد: لا ما عليج يدوو.. هذوا عمي وصل..
العم خليفه: هلا والله بولدي خالد.. اشحالك ابووي؟
خالد: بخير الله يسلمك..
اليده: توني كنت ارمس خالد واقول له عن العرس فقلنا خل انخليه في الصيف شو رايك بو عبدالله زين..
خليفه: هي وايد زين.. الشور شوركم ابوي.. انتوا الحريم ابخص.. نحن ما علينا غير الدفع والتنفيذ..
خالد: خلاص عيل انا احين بكلم ابوي وبسأله.. عشان بعد يمديني باجر اسير ادور الصاله واحجز تدرون صعب نلقى حجز في الصيف وخصوصا لأيام الخميس ولا الأربع..
خليفه: هي صدقك..
اليده: غانم امي ليش ما تعطينا رايك..
غانم: نسيتي اني سديت بوزي.. اخاف انطق تاكليني..
الكل: هههههههههههه
خالد: هلا والله ابوي.. اشحالك.. عساك الا بخير.. ؟
بو خالد: بخير ربي يسلمك..
خالد: ابوي بغيت اشاورك.. يدتي اتقول خل انخلي العرس في الصيف شو رايك وراي امي..
بو خالد: والله انا ما عندي مانع بس لحظه بسأل امك.. ام خالد .. خالد يقول انهم يبون يحددون العرس في الصيف شو الراي؟
ام خالد: هي والله وايد زين.. نعيل احسن بعد.. خلاص قول له توكلنا على الله..
بو خالد: خلاص ابوي.. اتوكل على الله وبالبركه.ز
خالد: خلاص ابوي.. يلا في امان الله...
اليده: شو رد عليك؟
غانم: من الصبح يالس يكلم ابوه شقايل ما رد عليه يعني.. عيل يرمس عمره..
اليده: انت يالطفس اسكت.. يوم انك ما تفهم شي اسكت احسن لك عن افلعك بهالعصا.. انا اقصد يعني رد عليك موافق..
غانم: يوم اقولج بصك بوزي احسن ما طعتي..
اليده: خلاص عيل صك بوزك..
بو عبدالله: غنوووووم بسك لا تلعوز يدتك..
غانم: ابوي خلني والله استانس يوم اشوفها محمره من كثر ما معصبه..
خالد: خلاص يدو توكلنا على الله.. وانت غنووم سير ازقر اختك شوفيها انخشت .. انا ياي ازورها..
غانم: طاع من الصبح مجابلنا واشكره تقول في ويهنا .. يعني انت مب ياي عشانا.ز
بو عبدالله: والله انك ما تستحي يا غانم.. الريال ياي يشوف حرمته وهاي ايامهم ترا.. ويييين ايام ما كنت اجابل باب بيت يدك الله يرحمه كله عشان اشوف امك..
ام عبدالله: شو ذكرك في هالأيام..
غانم: ابوي انتوا كنتوا اتغازلون بعض شراتنا نحن..
بو عبدالله: والله وزخيتك يالخايس.. جيه انت اتغازل منو عشان اكون شراتك...

غانم: ها.. شو.. لا.. ااااقصد المسلسلات المكسيكيه..
اليده: لا ولدي غنوم ما بيغازل غير حرمته والي هي فطوم ان شاء الله.
غانم: الناس يتغزلون في اوادم شراتهم مب في سبلان..
خالد: اقول حدك عاد.. انا اخوها يالس حذالك..ز
غانم: اوه .. لا انا اتحريت امي اتقول عن فطوم خدامه جيرانا.. لا فطوم اختك.. لا هاي تستااااااااهل.. واااااااااااااااااااااايد تستاهل.. وااااايد اف اف
الكل: ههههههههههههه

في بيت بو خالد

فطوم كانت حاسه بخوف.. وتحاول بأي طريقه تتطمن على هزاع..
فطوم: الووو.. حبيبي.. اشحالك.؟
هزاع: منو.. القمر.. اشحالج حبيبتي.. تمام انا بخير
فطوم: والله طول الوقت افكر فيك شو صابك.. وانت الله يهداك ليش تضاربهم..
هزاع: كل شي عشانج يهون.. تبيني اشوفهم يتحرشون فيج واسكت.. لا مستحيل..
فطوم: بس عاد مب جيه.. والله حرام عليك الي سويته بعمرك.
هزاع: فداج... المهم شو شفتي الخسف اليوم..
فطوم: لا اتقول جيه عن عمرك.. انت كامل والكمال لله..
هزاع: والنعم بالله... اما انتي ماشاء الله عليج.. ما عليج كلام..
فطوم: بس تدري..
(هني رن جرس الغرفه الي كان فيها هزاع في الفندق وعلى طول طلب منها اتبند وبندت.. ويوم فتح الباب كانوا مجموعه من البنات ويا ثنتين من ربعه..
هزاع: وينكم تأخرتوا..
سلطان: شو اسوي . لينا اخرتنا.. من متى نترياها الا وياسه تترقص لنا ما تشبع رقص..
هزاع: افف منج.. اتحرقص انا روحي قاعد هني ملان..
سلطان: قلنا لك انزل ويانا المرقص ما طعت..
هزاع: دخيلك انا ماداني هالأماكن والله عن حد يشوفني واروح وطي..
عبدالله: بييك يوم وبتحبها.. شو عرفك انت اصلا.. دنيا ثانيه هناك.. ولا انت مب فاضي غير لـــ؟؟
هزاع: اقول سيرا.. وينج ما نشوفج الا نادرا..
سيرا: شو بدي اعمل.. بتعرفوا وراي مزاكره.. مشان التخرج مش فاضيه كتيير..
هزاع: انتوا المصاروه مشكله والله.. بس يلا زين شفناج..
مايا: شو بك هزاع .. لك اسمك بدي غيرو لإلك كتير صعب... بس قولي.. شو به وشك مو على بعضه.. اتخانئت مع حدن؟؟
عبدالله: الا شو ما اتخانأ.. هذا زين ما دش السجن عليها..
هزاع: اسكت الله يخليك.. مايا ما عليج منه.. ماشي ها من الحادث الي كان مستوي بي..
سلطان: لينا.. شو فيج ساكته .. وها هزاع جدامج احين حاشرتنا من متى تبين اتشوفينه..
هزاع: اتشوفيني انا.. ليش؟
لينا: ما بعرف انت بتعجبني كتيييير .. اخر مره شفتك ما أعدت معك.. بس هيك شفتك عالسريع..
عبدالله: عاشوووووووو عندك معجبين يا هزاع منو قدك..
هزاع: صخ الله يخليك.. اكرمنا بسكوتك..
لينا: انا عم بحكي عن جد.. انت كتييير عاجبني.. ما بعرف كيف بحس رغم انك صغير بس عندك شخصيه جميله..
هزاع: صغير في عينج.. استحي عويهج ريال شو كبري جدامج..
لينا: لا انا ما بقصد هيك.. بقصد اصغر مني في العمر ..
هزاع: قولي جيه من الأول..
..



الفصل الثاني من الجزء18

ومرت الأيام والكل يتزهب عشان العرس.. وفطوم وهزاع على حالهم على اتصال بالدسه من غير لا احد يعرف.. بس لين متى .. الله اعلم..
وفيصل هموم الدنيا على راسه كل ما يذكر ان ما تم شي على عرس اخوه خالد يكتئب زود ليش انه عارف ان دوره ياي بعد اخوه.. شل التليفون وما حس بعمره الا وهو داق على رقم هنوف
هنوف: الووو؟
فيصل: الو.. هنوف.. لحقي علي.. بموت مب قادر اتحمل(وما حس غير وهو يصيح).
هنوف: فيصل.. شو فيك.. شو صاير .. امك وابوك فيهم شي.. هلك بخير..
فيصل: الكل بخير يا هنوف الا انا .. تعبااااان منهد حيلي والله مب قادر اتحمل.. خلاص طفح الكيل.. كم وكم اصبر..
هنوف: هدي نفسك فيصل عشان افهم شو السالفه..
فيصل: امي يا هنوف امي..
هنوف: بسم الله عليها شو فيها.. خير قول لي..
فيصل: هنوف امي تبا اتيوزني بنت خالي وانا ماباها.. وحالفه علي ميت يمين اذا ما خذتها بتغضب علي..
هنوف: ليش ما تاخذها دام بنت زينه؟
فيصل انصدم من كلام هنوف.. لي قالت جيه: شووووو.. انتي شو فيج ما تفهمين قلبي مكان وانا في مكان
هنوف: فيصل انساني خلاص نحن مب لبعض ومستحيييييل ناخذ بعض..
فيصل: ليش مستحيل انا احبج وانتي اتحبيني..
هنوف: ما قلنا شي.. بس هلك مب راضين ما يصير جذي.. والحين لو شو ما سويت ما بتقدر تاخذني
فيصل: هنوف.. شو اتقولين انتي فهميني.. شو هالكلام.. ؟
هنوف: فيصل.. انا الإسبوع الياي بملج بولد عمي.. يعني خلاص انساني.. وانا موافقه عليه..
فيصل: شووووووووووووووو.. وحبنا .. كله جذب يعني
هنوف: لا مب جيه.. بس مراهقه حبينا وما فكرنا بعواقب الأمر..
فيصل: انتي متأكده انج هنوف الي اعرفها..
هنوف: شو فيك انت اعقل من هذا كله..
فيصل: انتي خليتي فيني عقل.. يالنذله.. انا هني اتعذب عشانج وانتي هناك مستانسه ويا ولد عمج.. هنوووف اسمحيلي انتي احقر بنت في عيني
هنوف: فيصل. افهمني
قاطعها فيصل: شو افهم .. شو افهم اكثر من جيه انج وحده لعابه.. اقول انا الغلطان الي ضيعت وقتي وياج وحرقت قلبي.. انتوا البنات كلكم جيه.. الخيانه في دمكم .. شرات ما سوت دعاء في ناصر المسكين.. وشرات هيفا الي سوته في سيف وشرات ملايين غيرهم.. انتوا كلكم طينه وحده بس انا اعرف شو اسوي كيف انتقم لنفسي ولكل الشباب..
هنوف: فيصل.. البنات مب كلهم سوى.. حرام عليك..
فيصل: الله يوفقج مالي شغل فيج يالنذله.. بس انتي مالج شغل لا تخافين مب من طبعي ادمر حياة بنت تبا تستقر مثلج يعني.. ما يخصني فيج.. بس انا عندي البنات كلهم سوى..
هنوف: فيــ..
صك الخط فيصل بويهها وسار عند امه في الغرفه على طول..
فيصل: امي ابا اكلمج في سالفه..
ام خالد: خير يمي شو صاير
فيصل: ماشي بس متى بتملجين بي وبريم..
ام خالد مستغربه اول مره تسمع فيصل اييب طاري ريم بنفسه.. : ويه ليش مستعيل..
فيصل: امي جاوبيني متى ..
ام خالد: انت حدد وانا برمسهم..
فيصل: انزين امي انا ابا ملجه وعرس على طول..
ام خالد: شو فيك مستعيل جيه..
فيصل: بيمديلهم 3 شهور يتزهبون.. خلاص قولي لهم شهر 7 العرس يعني عقب عرس خالد..
ام خالد: بسم الله عليك فيصل شو فيك..
فيصل: امي يوم انا قلت اني بعرس اتقولين لي لا..
ام خالد: خلاص خلاص احين برمس مرت خالك عن اتغير رايك والله ودي افرح فيكم سوى
فيصل: هاج التليفون دقي لهم خل يتزهبون عرس وملجه ويا بعض
ام خالد: ويه.. انزين شوي شوي..
اتصلت ام خالد على تليفون بيت خالهم...
عواش: الووو
ام خالد: هلا والله عواشي.. اشحالج امي..
عواش: بخير الله يسلمج عمتي انتي اشحالج؟
ام خالد: بخير ربي يعافيج.. اقول وينها امج موجوده..
عواش: هي موجوده تبينها
ام خالد: هي شوي برمسها..
عواش: سلمي على عمي.. في امان الله.. امييييي تعالي تليفون عمتي تبا اتكلمج..
عواش ركضت وسارت غرف ريم..
عواش: ريم عندي لج خبر..
ريم: شو يا ام الأخبار..
عواش: شو بتعطيني..
ريم: اوهوووووو ما عندي شي اعطيج قولي ولا اطلعي برع موول مب فايجه لج..
عواش: اعصابج .. بقولج .. اول مره في التاريخ تتصل عمتي في هالوقت الساعه 4 العصر... والا هي في حياتها ما دقت هالوقت
ريم: يا دمج.. احين ها خبر ذبحتيني عليه.. خير يا طير خل تتصل شو صار..
عواش: يا هبله افهمي.. اكيد في موضوع مهم والا ليش بتتصل.. وبعدين تعالي انا شو يابني عندج بسير اقعد حذالهم اسمع شو السالفه.. باي خل الحق..
وطلعت عواش من الغرفه وسارت تسمع شو الي ترمس فيه امها..
ام ريم: لا والله يختي ما عندنا مانع.. انتوا فصوا ونحن نلبس والشور شوركم
ام خالد: خلاص عيل على بركه الله.. انتوا شوفوا كم المبلغ الي تحتاجونه عشان اللبس والذهب والشروات هذي وخبريني عشان انا اييبه لج..
ام ريم: خلاص بشاور اخوج وبرد لج خبر..
ام خالد: خلاص تمام.. يالله سلمي على الكل.. في امان الله..
ام ريم: مع السلامه.. (بندت الخط وصدت صوب بنتها عواش).. اقول عواش ازقري ريم..
عواش: ان شاءالله.. بس شو السالفه..
ام ريم: عن اللقافه وسيري..
عواش مشت خطوتين وغيرت رايها وردت: امييييييي .. شو السالفه
ام ريم: لا اله الا الله.. بتسيرين تزقرينها ولا انا بسير لها
عواش: خلاص ما يحتاي روحها يت..
ام ريم: تعالي ريم امي.. بكلمج شوي..
ريم: خير امي..
ام ريم: توها عمتج اتصلت وقالت لي ان فيصل مستعيل يبا يعرس وقايل انه بيعطينا فرصه 3 شهور عشان تتزهبين للشروات وتملجون واتعرسون نفس الوقت شو قلتي؟
عواش تنغز ريم: ما قلت لج..
ريم: جب انتي.. والله الشور شوركم امي الي اتشوفونه زين سووه
ام ريم: وها ظني فيج.. خلاص امي.. انا برمس ابوج وبشوف النفقات الي نحتاجها وبكلم عمتج عشان يدبرون البيزات وانتي تلحقين تتزهبين
عواش: بس انا احيد خالد بيعرس عقب 3 شهور.. لايكون نفس اليوم..
ام ريم: يالملقوفه انتي.. لا مب نفس اليوم بعدهم بإسبوع..
عواش: اففففف واخيرا هالخقاق قرر..
ريم: عواش مصختيها...
عواش: لازم امي ما ترضين عليه.. ريلج.. يالله بالبركه مقدما..
ريم: عقبال ما تعقلين..
عواش: الحمد لله اعقل عنج على الأقل ما وافقت على واحد خبل مثل فيصل..
ام ريم: شو بينج وبينه كاهتنه جيه
عواش: بس مب داخل مزاجي.. خقاق
ام ريم: الله يهديج.. يلا بنات قومو ساعدوني ارتب الميلس مرت جيرانا بتمر علي اليوم..

[بنت البلاد]

فطوم: اففففففف امي.. شو ها ملل هالبيت عفان الله.. خاطري اروح بيت عمي .. من زمااااان ما شفناهم.. خاطري اقرض في غانم شوي..
ام خالد: هههه.. هي والله وانا بعد ودي اقعد ويا ام عبدالله من متى وانا ما شفتها.. وبالمره اسير اشوف شو ترتيبات العرس والإتفاقات..
فطوم: اقول لحظه بتصل بيتهم اول..
خذت التليفون ودقت على رقم بيت عمها ردت يدتها على التليفون..
اليده: ألوو..
فطوم مغيره حسها: ألوووووو.. مرحبا كيفك عمتووو..
اليده: ويدي.. عمتو منو بعد.. منو وياي..
فطوم: لك شو بكي ما عرفتيني .. انا اختوا لــ.. ايييه شو بدي قول.. لك وينه Papy
اليده: شو هالخنث بعد.. منو بابي..
فطوم: لك شو هيدا ما بتفهم عليي.. انا بقصد بابا.. يعني ابي..
اليده: منو ابوج ان شاء الله..
فطوم: عبدالله.. هاد ابي..
اليده: لا والله ومن متى عبوود هالهيس ماخذ امج..
فطوم: شو عم بتقولي ما بفهم عليكي.. عطيني بابا لك انا بدي اياه ضروري كتيييير..
اليده: والله وسواد ويهك يا عبدالله يوم هاي سواتك ( وفرت عليه التليفون وهو مب عارف شو السالفه ومستغرب )
عبدالله: الوو..
فطوم: واي.. يدوو سوتها وعطتني عبدالله.. ماروم ارمس..
عبدالله: شو اتقولين انتي؟؟
فطوم: هههههههههه.. ماشي قصيت على يدو اونه انا وحده لبنانيه بنتك يعني .. اونك معرس على حصه..
عبدالله: غربل الله ابليسج.. شو يفكني من لسان يدتي احين.. روحها تتريا علي شي..
فطوم: ههههههه خلاص هات انا بكلمها ..
عبدالله: دخيلج فطييم.. مستقبلي بإيدج لا تضيعينه..
فطوم: لا تحاتي يا ولد العم..
عبدالله: هاج رمسيها تبا اتكلمج..
اليده: ويه.. وليش ارمسها شو ابا فيها.. خلها الله يخليها لك..
عبدالله: انزين انتي كلميها..
اليده: لا حوووول .. هات.. الووو
فطوم: هلا والله بيدتي الغاليه..
اليده: مسرع ما جلبت الرادو مالها من وين تعلمت رمستنا..
فطوم: يدوو شو فيج ما عرفتيني..
اليده: منو.. فطوم... غربل الله ابليسج.. توني زاخه عصاتي وواقفه على راس عبدالله ابا اصلخ له ظهره..
عبدالله يصارخ: فطووووووم دخيلج فكيني من هالعصا الي مسبب لي الرعب..
اليده: هههههه شليته عنك خلاص..
فطوم: يدووو منو عندكم في البيت..
اليده: الكل ما عدى خوله ظاهره ويا ريلها..
فطوم: هاي خلها على صوب مب محسوبه منكم خلاص صارت ملك لنا..
اليده: ليش تسألين امي... ؟
فطوم: بإختصار نبا انيي عندكم.. لأنج بصراحه وحشتيني موووووووووووت..
اليده: هي والله اتسوين خير اتيين اتسليني بسوالفج.. انا بعد مشتاقه لج ولأمج وابوج..
فطوم: خلاص عيل.. خل يسوون لي لازانيا.. وبيتزا.. وابا سمبوسه خضرا عالعشا..
اليده: اقول هني ترا بيت خليفه .. مب مطعم..
فطوم: ادري عشان جيه ياسه اطلب ولا مستخسرين علي الي في خاطري..
اليده: خلاص تامرين امر.ز
ام خالد: الله ياخذ ابليسج من بنت عيب..
فطوم: لا عادي الا هو بيت يدو.. خلاص جااااااااااو بنشوفج عقب ان شاء الله
اليده: والله واختربتوا وشو جاو بعد.. هاي احيد اني اسمعها في مسلسلات مكسيكيه
فطوم: يدوو جكيتج اتابعين مسلسلات من ورانا..
اليده: اقول يلا صكي بلا هذره زايده يلا..
وبندت فطوم الخط واليده كانت مستانسه وتضحك.. توه كان غانم نازل من الدري يبا يظهر.. شاف يدته قاعده ومبتسمه..
غانم: عساها دوم هالضحكه مب دوم.. ضحكيني وياج..
اليده: ماشي عمك وعياله بيون.. توها فطوم كلمتني..
غانم: ايهئ ايهئ.. امط شعري.. اشق هدومي.. اضرب راسي باليدار.. شو اسوي..
اليده: بسم الله يمي شو فيك..
غانم: فطوم بتيي تبيني استانس..
اليده: هي تراها مرت المستقبل..
غانم: يدو كم غانم عندج في الدنيا..
اليده: واحد وا فديته..
غانم: خلاص يدو ارحمييه.. كيف بتعطينه وحده مخبوله..
اليده وتضرب مؤخرته بالعصا.. : محد غيرك المخبول.. انا ما عندي غير فطومه وحده وغانم واحد.. وانتوا لبعض ان شاء الله..
غانم: يدووو..شوفيني.. انا الرشيق الوسيم.. تبين تعطيني طيطاره (يعني سحليه جان ما فهمتوا) الله يسامحج.. انا الي البنات لا شافوني يغمى عليهم ويطلــ..
قاطعته يدته بضربه قويه على ايده من عصاها: جب جب ..
غانم: جدتي العزيزه.. (وينزل لها ويمسك ايدها ويبوسه).. هل تقبلين بي زوجا؟
اليده: هههههه.. آخ منك ماروم عليك
غانم يصد صوب مرت اخوه حصه ويغمز لها: ذوبتها في دباديب قلبي..(والا ما يفز الا بضربه على ظهره من عصاها).. افففف يدووو .. شوفيج كله اليوم طايحه فيني ضرب.. يعني انتي ما ترتاحين غير يوم اتسخنين العصا عظهري..
اليده: حلاته اصلا..
دشت فطوم البيت : الســـــــلام عليكم..
غانم من سمع صوت فطوم فر عمره على الكنبه اونه رقد..
فطوم: وي بسم الله .. مات.. احسن فكه.. الله يرحمه كان طيب..
غانم: مات ابليسج قولي امين.. شوفي يدو. هاي تباني اموت كيف بتيوزيني اياها.. قاصر عمر انا.. اذا خذتها اليوم باجر بيكتبون في الجرايد.. الشهيد غانم خليفه..
فطوم: لا شو شهيد.. اونه شهيد.. الا قول لقي غانم خليفه مصرعه اثر سقوطه من فوق الشرفه بقصد الإنتحار ليله زواجه..
غانم: يدووووووووووووووووو.. شوفي شو اتقول عني.. اشفي غليلي وابرحيها ضربا بتلك العصا السحريه..
اليده: فطامي.. حياتي انتي تعالي في حضن يدتج والله اشتقت لج..
غانم: ويضرب راسه على الكنبه.. : تبا تبا لك ايتها الفاطمه..
فطوم: غامضني غنووووم..
ام خالد: انتي شو فيج من اول ما داخله قابضه الريال بشراع وميداف شوي شوي..
فطوم: امي انا داشه بشنطتي من وين يبتي الشراع وميداف..
غانم: اصلا انتي لو زخيتي شراع وميداف بيبب بقول سوت شي.. بس انتي يادوب عندج المخمه وشعرج الكشه واتطيرين فيها..
فطوم: بووووووو (اتزيغه اونه)..
الكل: ههههههه
اليده: والله وتولهت عليكم يا ام خالد.. الا وينه ولدي الضائع بو خالد..
ام خالد: برع هو وفيصل وخليفه..
فطوم: اقول غانم..
غانم: لا تقولين احسن..
فطوم: اف.. غانم صدق ارمس بقولك شي..
غانم: انتي في حياتج ما تعرفين اتقولين شي استفيد منه.. قولي فكيني..
فطوم: تعال هالصوب جريب مني.. شوفيك قاعد جيه بيني وبينك كيلو متر..
غانم: ترا اخاف منج تاكلين انتي..
فطوم: يالسخيف.. تعال..
غانم: مابيي.. انتي الي تبيني تعالي.. الي يباني اييني..
فطوم: وقطيييييعه على شو اباك..
غانم: خلصيني شو عندج..
فطوم: شو الألوان الي اتحبها..
غانم مستغرب من كلامها اول مره فطوم تسأله عن شي هو يحبه : فطوم.. انتي شو ماكله اليوم.. لحظه اقيس حرارتج؟؟ .. لا عادي مب مسخنه.. اكيد شاربه شي..
فطوم: هي شاربه الي في الغرشه الخضرا..
غانم: ديو..
فطوم: احين بتجاوبني ولا اشلون؟؟
غانم: لا اشلون احسن..
فطوم : ياربييييييييي.. سخييييييف ..
غانم: ليش هالسؤال؟
فطوم: بس جيه ...
غانم: لا صدق ليش هالسؤال؟؟
فطوم: بتجاوبني ولا لا؟
غانم: هيه بس قولي ليش اول..
فطوم: مب قايله شي.. واذا ما تبا اتجاوبني كيفك انا سايره انزين..
غانم اول مره يشوف فطوم صدق تتضايق منه ماهان عليه : خلاص بجاوب.. احب السماوي.. والكحلي.. واحب الرمادي.. والبني..
فطوم: انزين.. ممكن ادخل غرفتك شوي..
غانم مب مصدق الي يسمعه شو صاير في فطوم شو الي ياها تسأله اسئله مثل جيه ولا تطلب تدخل غرفته هاي اول مره تطلب فيه هالطلب: لا والله شكيت الصراحه انتي مووووول مب صاحيه..
فطوم: ممكن ولا لا؟؟؟
غانم: ممكن.. خذي راحتج..
فطوم: بس انت ما تدخل طبعا..
غانم يطالعها باستغراب وهز راسه موافق.. وقامت فطوم من مكانها وصعدت عشان تدخل غرفته وغانم الأفكار تتضارب في راسه شو ياها فطوم اليوم.. حسها مب على عادتها وطبيعتها.. ودخلت فطوم غرفه غانم وتمت تتطالع في كبته واتشوف ثيابه والوانها.. وشو عنده .. وتتطالع التسريحه.. واخر شي رتبت له فراشه الي كان منعفس وطلعت من الغرفه..
غانم: ها شو عيبتج غرفتي..
فطوم: على شو تعيبني.. على نظافتها ولا ترتيبها احمد ربك لعد رتبت لك غرفتك..
غانم بعد استغرب فطووم اترتب غرفته بعد.. لا بالله البنت موووول مب صاحيه..
وكملوا قعدتهم وسهرتهم بالسوالف والضحك واتعشوا.. يوم خلصوا عشاهم وصلوا المعاريس خوله وخالد.. واحلوت القعده طبعا واكتملت الا ان كان في شي غريب في لمتهم هاي ان فيصل كان مبتعد عنهم ويالس في الحديقه روحه ويفكر.. والكل مستغرب..
ام خالد: تدرون ما خبرتكم.. ؟
الكل: شووو
غانم: يا كثر اخبارج مرت عمي اليوم..
ام خالد: فيصل نوى يعرس خلاص..
فطوم: شوووووووو..
غانم : بسم الله .. شو فيج.. شوي شوي.. عن ينط لج عرج... انتي احيدج ام الأخبار اونج ما تدرين عاد...
فطوم: لا وحليلي اول مره يفوتني خبر مثل هذا..
ام خالد: هي والله مادري شو ياه اليوم فجأة ياني وقالي ابا اعرس كلمي خالي عشان يقول حق ريم تتزهب بنعرس عقب عرس خالد على طول..
فطوم: منوو.. بياخذ ريم.. ؟؟
ام خالد: هي ريم ..ليش شو فيها..
فطوم: مافيها شي.. بس مستغربه..
خالد: امي صدق ترمسين..
ام خالد: ههههههه.. شو فيكم بسم الله بققتوا عيونكم.. هي صدق..
خالد: امي فيصل روحه قايل هالكلام ولا انتي..
ام خالد: لا والله يمي روحه ياني وقالي هالرمسه..
خالد: هو وينه ما اشوفه فاعد وياكم..
غانم: قاعد في الحديقه..
خالد: انا بروح له .. بتي وياي غانم..
غانم: هي ياي..

قام خالد ويا غانم وساروا عند فيصل في الحدقه لقوه قاعد وسرحاااااان .. استغربوا من قعدته هاي.. فيصل المرح البشوش .. شو ياه..
خالد: فيصل ..
فيصل مسح دمعته عشان ما يحس به اخوه: هلا..
خالد: شو فيك اخوي قاعد هني.. شو ياك..
فيصل: ماشي الجو عايبني قلت خل اقعد اتهوى شوي برع
غانم: فيصل لا اتحاول انك تتظاهر جدامنا نحن الإثنين خصوصا .. ندريبك انت كيف.. مافي شي بيخليك تنعزل جيه الا اذا كان شي قوي.. شو فيك.. ؟
فيصل: ماشي شو بلاكم انتوا..
خالد: انزين خبرني صدق الي سمعته من امي ولا لا؟
فيصل: وشو الي سمعته؟
خالد: انك قررت تاخذ ريم..
فيصل: هيه ولا مو من حقي اكمل نص ديني..
خالد: عاد ريم؟؟
فيصل: ليش شفتوا عليها شي
خالد: لا حشى والحشى عن ألف يمين.. بنت رزينه وماشي احسن منها.. بس هنوف..
فيصل: ترا هاي رغبة امي يعني ماشي مجال.. وهنوف خلاص انسى.. شليتها من بالي نهائي..
غانم: ما اصدق.. حب السنين ها كله في يوم وليله اتشيله امسات اتفكر فيها..
فيصل: لا خلاص ذاك اول .. ايام هنوف طارت.. اقول منو عنده ولاعه .. ؟
خالد: ليش لا يكون ادوخ بعد.. انا ادوخ وماباك تغلط غلطتي وانا ياس اودر احين
فيصل: شو فيك .. انا تدري بي ما ادوخ.. بس عطني ولاعه ..
خالد طلع الولاعه من مخباته وعطاها لفيصل.. وطلع فيصل بوكه وشل صوره هنوف الي داخلها وبدا يحرقها ؟..استغربوا كل من غانم وخالد من تصرفه
خالد: لا انت موووول مب طبيعي شو فيك اخوي.. لا تخوفني..
فيصل: احين يوم قررت انساها مب عايبنكم ويوم بغيتها ما عيبكم.. شو تبون عيل..
غانم: ما نبا غير راحتك.. بس تصرفك غريب ولد عمي..
فيصل: اقول برايكم انتوا ما تبون اتصدقون كيفكم.. بس ها الصدق..
خالد حاول يغير السالفه: انزين ما قلت لي شو عن دراستك سجلت..
فيصل: ما بكمل؟
خالد استغرب زود وغانم اكثر: شوووووووو.. احين بس تأكدت انك مب صاحي..
فيصل: خلاص شو ابا زياده البكالوريوس وخذته كنت ابا اخذ الماجستير في فرنسا لأن ماصار لي نصيب اكمل في بريطانيا..
غانم: بس انت كنت اتقول غير جيه.. كان طموحك اكثر.
فيصل: ذاك اول.. احين بعرس وخلاص...
خالد تم ساكت ونفس الوقت يحاتي اخوه مب قادر يعرف شو الي يدور في راس اخوه وشو الي غيره فجأة..