شمسة و فطيم قصة واقعية ((لا تفوتكم))

[عشق الليل]

طبعا الكل يعرف أنه فيه جروح لا يمكن تتنسى و فيه طعنات لا يكمن تغتفر ... تدرون ليش لأنها يت من أشخاص أقراب لقلوبنا ...

القصة بالرغم من طولها فهي تعتمد على شخصيتين اللي هن ...

* شمسه : بنت طيبة و مسالمة عمرها 25 ..

* فطيم : أربيعة شمسه و هي صندوق اسرار شمسه و علاقتها بها مثل الخت و اكثر و عمرها من عمر شمسه ..

القصة هاي تتكون من عدة اجزاء ...

و اليوم إنشا الله بحط ألكم أول جزء ..

هاي نبذه قصيرة عن القصة و اتمنى أنكم تتابعون أحداثها ...


الحلقه الاولى

شمسة و فطيم هن صديقتين حميمتين علاقتهن بعض ابتدت في المرحلة الإعدادية و استمرت لما بعد التخرج من الكلية.. شمسة من عقب تخرجها يلست في البيت أما فطيم اشتغلت في أحد الدواير الحكوميه .. فكان كل وحده منهن تحاول تسعد الثانية وحتى كان اللي يشوفهن يتحراهن صدق انهن خوااات ...

أهل شمسه ما كان يرضون أنه بنتهم شمسه تزور أو حتى تبات عند أربيعتها فطيم مع أنهم عارفين بمعزة فطيم عند شمسه و العكس .. ولكن في نفس الوقت ما كان عندهم أي مانع لو فطيم زارت أو قيلت أو باتت عند شمسه...

في يوم من الأيام صار عند قوم شمسه عرس في العين ( في العين هناك خالة أبوها ) و شمسة ما كانت تبا تسير ويا اهلها العين و لكنها في الأخير اضطرت اتسير اوياهم لنه كل أهلها بيسيرون و كانوا حاجزين هناك في فندق لمدة 3 أيام ..

المهم في يوم العرس سارت شمسه و خواتها و خالاتها و عمتها للصالون ... و عند الساعة 8 العشا كانوا كلهم في قاعة العرس بنفس الفندق اللي قوم شمسه نازلين فيه ... وقفت شمسه و يا خوات المعرس و العروس و باقي حريم العاتيلة الكبار عند مدخل القاعة عشان يرحبون بالحريم...

حست شمسه بملل من الوقفه فسارت فوق اقصد ردت للغرفة عشان تتصل بربيعتها فطيم المهم عقب فترة ردت شمسه للقاعة و قامت تتجول ما بين الطاولات عشان تسلم عالحريم اللي تعرفهم ... و بعد ساعات مرت انتهى العرس و الكل طبعا كان فرحان و مستانس و اولهم شمسه مع انها في البداية كانت مب راضية تحضر للعين ..

و كان ود شمسه ترد دبي في نفس اليوم و لكن أهلها ما رضوا لنه هم حاجزينفي الفندق لمدة 3 ايام و في نفس الوقت أهلها كانوا حابيين ييلسون في العين كتغير جو ...

و بعد هالثلاث أيام ردوا لدبي .. و أول ما وصلت شمسه للبيت على طول دخلت حجرتها عشان تتصل بفطيم .و تخبرها شو سوت هناك مع أنه علومها كانت توصل لفطيم اول باول و لكن هذا كله من زود لهفتها على فطيم....

بعد مرور أسبوع من عقب ردتهم من العين و في خلال يلسة شمسة و يا امها في الصالة رن تلفون البيت ( تلفونهم كاشف الأرقام ) قالت شمسه لأمها ..: أميه هذا الرقم من العين ؟!! ...

المهم شمسه ردت عالأتصال .. فكانت خالة ابوها ( أم المعرس اللي حضروا عرسه في العين ) هي المتصلة .. فعقب ما سلمت و انشدت عن الحال .. طلبت أم شمسه في سالفه .. فطبعا شمسة ناولت امها السماعة ...

؟؟؟؟؟؟؟؟؟؟؟؟؟؟؟؟؟؟

أكيد تبون تعرفون شو السالفة ... ولكني ما بخبركم الحين .... بتعرفون في الجزء الثاني ..


يتبع...................

[عشق الليل]

الحلقة الثانيه

شمسه كانت بعدها يالسه حذال أمها تتصوخ لرمسة امها و يا خالة ابوها عالتلفون .. وعقب ما بندت أمها التلفون ...
أم شمسه قالت لبنتها : أكيد تبين تعرفين شو السالفة ؟؟؟ عاد شمسه هذيج الحزة الفضول ما كلنها ..

ردت شمسه على امها وهي تبتسم : إذا ما كان فيه مانع يا أمايا خبريني ..

أم شمسة: هاي خالة أبوج تقول في حرمة كانت حاضرة العرس اللي سرنا له في العين و هاي الحرمة الحين تبا تخطبج لولد اختها في دبي

شمسه : أمايا أنتي شو رايج ..؟؟

أم شمسه : أنا ما لي شور .. يا بنتي .. بس الحين خالة ابوج هي أصلا متصلة عشان تحدد موعد نقابل فيه الخطيب و يا اهله.. و تدرين يا شمسة أنه لازم نشاور أبوج..

وفي هاللحظة يدخل عليهم أبو شمسه و يشوفهم و هم يسولفون .. المهم هو سار و يلس حذال ام شمسه..

جان يسئل ام شمسه : شو السالفة أشوفكم مستانسين و تضحكون ، ليكون فزتوا بالمليون و انا مادري ...

ردت عليه شمسه : أبويه نحن لو فزنا بالمليون بتلقانا مسدحين في المستشفى

اضحكوا عليها أبوها و امها على رمستها ..

فترخصت من قوم امها عشان تسير اتسوي لهم عصير مع انها في الواقع هي نشت بس عشان تعطي المجال لأمها في أنها ترمس بو شمسه عن هالخطيب..

هم تشاورا و حددوا يوم الخميس اليوم اللي بيقابلون فيه هالناس ...

يوم ردت شمسه للصالة لقتهم يسولفون فقدمت العصير لأبوها قبل و بعدين لأمها ..
عرفت شمسه من أبوها انه بالخميس الخطار بييونهم ... عاد هي ما جذبت خبر على طول سارت تربع جدا حجرتها عشان تخبر حبيبة القلب فطيم ..

و اتصلت شمسه بفطيم ....

شمسه وهي تضحك : ألو .. السلام عليج فطوم

فطيم : و عليكم السلام و الرحمة ..

فطيم: بسم الله أشبلاج تضحكين .. ؟؟

شمسه : لا ما شي بس لني فرحانة و مستانسه

فطيم : أنا أعرفج يوم تفرحين اشقايل تكونين بس عاد مب جيه ..

شمسه : لا بس تدرين هالفرحة غير ..

فطيم : أشقايل بعد غير .. ليكون لقيتي خاتم سليمان و لا ليكون حد ياي يخطبج تراني بذبحج ؟؟!!
شمسه : هيه ... الجملة الثانية هي صح .. ولكنج ما مب تقدريت تذبحيني لنه في ناس يبوني و بيونا يوم الخميس ..

فطيم : من صدقج انتي .. و هي مستغربه ..
شمسه : هيه عيل شو تتحريني اتمصخر..

فطيم : و أمنوه هذا اللي امه داعية له ومن وين ياي..

شمسه : من وين بعد اكيد من بطن امه .. و تضحك من خاطرها ..

فطيم ترد على شمسه بعصبيه : أباج تخبريني بالتفصيل شو السالفة..؟؟

شمسة : بصراحة نحن ما نعرفه أو نعرف اهله و لكن خالة ابويه تعرف خالة الريايل ..
شمسه : بس تدرين فطوم ما حتى أنا نسيت ما سئلت امايا عن اسمه..

و اهني تسمع شمسة امها وهي تزاقر عليها فستأذنت شمسه من فطيم و قالت لها : بخليج الحين امايا تزقرني و عقب بتصل بج ..

فطيم : انزين ما عليه اتريا اتصالج على احر من جمر .....

نسيت أخبركم ترا شمسة و اختها و اخوها و يدتهم مقررين يسيرون الحج

--------------
الخطيب هو جاسم عمره 26 هو وحيد اهله و ابوه متوفي عايش ويا أمه في بيت إيجار و عنده بيت يديد مب ناقصنه غير التاثيث و اشوية صبغ
..

المهم مرت الأيام و يا يوم الخميس و هو اليوم اللي الخطار بييونهم فيه و كانت فطيم مقيلة عند شمسة تدرون اربيعتها و في هذاك اليوم يتهم خالة ابوها و خالة الخطيب من العين و عقبهم بشوي و عند الساعة 8 العشا وصل جاسم و كانت وياه امه و عمه و مرت عمه..

المهم قربوا الرياييل في ميلس الرياييل و الحريم في ميلس الحريم و طبعا أهل شمسه ما قصروا في شيء قاموا بالضيافة على اكمل ويه ..

ميلس الرياييل :
------------------

أبو شمسه : نحن ما بنشترط عليك بشي يشيب الراس يا جاسم و اللي نحن نباه هي اخلاقك الزينة ...

رد عم جاسم : هذا عشمنا فيكم ..

أبو شمسه : و انا الحين ما بمنعك من شوفة البنت و بخليك الحين تشوفها مثل ما وصانا رسولنا الكريم ..
فترخص بو شمسه من الرياييل عشان يسير يزقر شمسه ..

يت شمسه لغرفة كانت قريبة من الميلس و كان أوياها فطيم عشان تخفف من الزيغة اللي عند شمسة و يدة شمسه كانت اوياهم بعد المهم دخلن للغرفة و يلسن عالغنفة ( الكنبة ) و عقب ما يلسوا بشوي سمعوا صوت جاسم و هو ياي يا أمه تغشت فطيم .. ومن زود زياغ و مستحى شمسه كانت هي بعد بتتغشى

جان ترد فطيم على شمسه :: شموس شتسوين .. با الله عليج الحين جسوم ياي يخطب امنوه ليكون يدتوج ..

أضحكت اليدة على سوالف البنات و عقب كلهن صخن .. لأنه جاسم دخل و يا امه الغرفة ..

المهم هو سلم على شمسه طبعا بالكلام و يلس يطالعها و لكن هي كانت مستحية منه

يدة شمسه : قالت لها : ويدي شمسه ارفعي راسج طالعيه ترا هذا من حقج ..

رفعت شمسه راسه و هي تتطالعه ابتسمت بتسامه صغيرة في ويه و عقب نزلت راسها ..

قالت اليدة لجاسم: ها و لدي شفتها عدل ..

رد جاسم : هي شفتها ..

و عاد اهنيه انغزت اليدة شمسه في خصرها عشان تطلع فنشت وياها فطيم وهن طالعت سمعن جاسم و هو يرمس يدة شمسه و امه : خلاص انا موافق عليها. متى بنملج ..

أضحكن عليه شمسه و فطيم ..
و أمه و يدة شمسة

المهم رد جاسم لميلس الرياييل ..

فقال ابو شمسه لجاسم : ترا البنت بتسافر عقب أسبوع للسعودية عشان تحج فجان صار النصيب ترا الملجة و عقب ما ترد بالسلامة من الحج..

جاسم : اللي تشوفونه انتو بيصير إنشا الله

أبو شمسه : نحن ما لنا أي شروط و كل اللي بنطلبه منك 20 الف و الباقي انا بروحي بتكفل به ..

جاسم استغرب من جيمة المهر فقال حق أبو شمسه

جاسم : بس ما اعتقد هذا بيكفي مشاري العروس

وقبل لا يطلع جاسم من بيت شمسة خذ رقمها من عند أبوها و أبوها طبعا ما مانع لنه قال يمكن هذا الشيء يقربهم من بعض ..

المهم طاف هذا اليوم على خير و لكن مرة وحدة حست شمسه بأحساس غريب

المهم يت عمة شمسه عند شمسه في الحجرة فطلبت منها انها تصلي الإستخارة و لكن شمسه ما صلت لأنه كان فيه احساس غريب يراودها

و التكملة في المرة الياية

في وداعة الله

يتبع.....................

[بنت البلاد]

كمليها حبوبه

في الإنتظار

[عشق الليل]

شو ما كو ردود لا يكون ما عيبتكم القصه

بس لا يهمج عشانج بكملها

[عشق الليل]

خذ جاسم رقم موبايل شمسة من عند اخوها ( عمره 17 ) و طبعا الشيء هذا صار من بعد موافقة أبوها .. لنه جاسم كان يبا يشاورها في أمور تأثيث البيت .. تدرون عاد ترا هو ما عنده خوات ...

ومرت الأيام بسرعة و ما ظل غير يوم واحد على سفر شمسه للحج .. ففي اليوم اللي قبل السفر .. شمسه أصرت على أبوها و أمها في انها تسير تتعشى ويا فطيم في أي مطعم و لكن اهلها رفضوا .. وهي كانت مصرة على الشيء هذا .. فسارت عند أبوها تترجاه يوافق و لكنه كان عند رايه ..

فقال أبوه شمسه لبنته شمسه : أنا بوافق انج تسيرين تتعشين ولكن مب في المطعم في بيتها ...

شمسه استانست يوم سمعت هالرمسه فسارت و حبة أبوها على راسه

أبو شمسه: بس بشرط أنا ما بخليج تسيرين ابروحج ..؟؟!! أنا اللي بوديج و باييبج..

طبعا شمسه ما مانعت المهم كان عندها أنها تكون اويا فطيم..

وافقت شمسه على شرط ابوها .. و اطلعت سيده جدا حجرتها و سارت و اتصلت بفطيم و بلغتها انها بتي تتعشى عندها في البيت ...

يوم يت الساعة 7 المغرب كان شمسه عند باب بيت فطيم...
دقت الجرس فيتها البشكارة و بطلت عنها الباب .. فشلت البشكارة عنها صينية الباتشي و خلت باقة الورد اياها حق تعطيها لفطيم ....

فدخلت شمسه لداخل البيت و يلست تتمشى في الحوي فطلعت الها فطيم و سلمت عليها سلام حــار اللي بيشوفهن بيقول هذيل ما شافن بعض من سنين ... عطت شمسه فطيم باقة الورد .. ودخلن عقب للصالة فكان ام فطيم و اخت فطيم يالسات في الصالة ... سلمت عليهن شمسه ... و عقب يلست اوياهم اتسولف و تضحك لين حزة العشا ..فدعوها عقب للعشا و كانوا حاطينه في غرفة الطعام ..

المهم يلست شمسة تتعشى أويا فطيم و أم فطيم و اخت فطيم .. مرت نص ساعة و هن يتعشن تدرون نص العشا كان عبارة عن سوالف ... في هالحزة سمعت شمسة تلفونها يرن وهو في الشنطة فنشت و طلعت تلفونها من الشنطة و حتى من دون ما تغسل ايديها .. ردت عالأتصال لنه ابوها كان هو المتصل ..

بو شمسه : شمسة تراني واقف عند الباب ..

تفاجات شمسه لنه ابوها رد بسرعة عليها لنه كانت حاطة في بالها انها ترد البيت الساعة 10 .. ويوم صدت جدا الساعة جافتها الساعة 9إلا ربع...

فردت شمسه على ابوها: أبويه الحين بطلع..

بو شمسه : عاد لا تبطين..

و بندت شمسه عن ابوها و هي مستعيلة لنه تدري بأبوها ما يحب يتريا حد وااايد

فغسلت ايديها بسرعة و سلمت عقب على فطيم و امها و اختها ..
فقالت فطيم لشمسه: إنشا الله اشوفج باجر في المطار

و اطلعت شمسه من بيتهم و اركبت سيارة ابوها و سارت .. ويوم وصلوا قريب من البيت بغت تتصل باختها عشان تشغل ألها الكنديشن ...

ولكنها يوم حطت ايديها في الشنطة ما لقت الموبايل .. فقالت في خاطرها اكيد نسيته عند فطوم ... فطبعا هي ما رامت تقول لأبوها يرد مرة ثانية لبيت فطيم .. لأنها تدري بتيها فتنة من عند ابوها .. فسكتت لين وصلت البيت...

المهم يوم وصلت على طول سارت جدا تلفون البيت عشاتن تتصل بفطيم .. فعاد يوم توها كانت يايه بتحط أيديها على سماعة التلفون ... يرن التلفون .. فيوم شافت الرقم عرفت أنه فطيم ...

شمسه : ما شا الله عليج توني كنت بتصل بج

فطيم: ما اعتقد كنت بتتصلين عشان انج ولهتي عليه

شمسه: لا وأنتي الصادقة و لهت على ولدي اللي عندج ..كانت تقصد الموبايل

فطيم: هيه أنزين انا عشان جيه متصلة كنت بخبرج عن موبايلج ..

شمسه : فطوم ..انتي خليه عندج و يوم برد من الحج إنشا الله باخذه عنج....

يتبع إنشا الله...............

[بنت البلاد]

كمليها الغاليه .. تأخرتي علينا..

[الظبي الجفول]

القصه حلو ننتظر التكمله بسررررررررررعه

[عشق الليل]

شمسة: فطوم ... أنتي خلي موبايلي عندج ويوم برد من الحج باخذه عنج ... عاد ما وصيج على ولدي..

فطيم : لا تخافين حبيبتي .. بغديه و بعشيه و بريقه بعد

ويضحكن على بعض ..

شمسه : و الله أني بوله عليج .. بس يا الله إنشا الله اليام بتمر بسرعة

فطيم : عالله هالله على عمرج .. ترا أنا راس مالي شمسة وحده

شمسه : عاد الحين اسمحيلي لني بخليج فيه ارقاد

و فطيم ما ودها تصكر الخط ..

شمسه : أقولج فطيم موبايلي لا تغلقينه يمكن حد يتصل ينشد عني و هي كانت تقصد خطيبها جاسم..

فطيم : لا تخافين غناتي اللي بيتصل بطمنه عليج...

و عقب سكرن عن البعض ... المهم سارت شمسه لحجرتها و ارقدت ..

ارقدت وهي عمرها ما فكرت بانه فطيم ممكن تتغير في يوم من اليام .. و تصير من صديقه لعدوه...

و بعد مرور هالليل و عند دقات الساعة 6 الصبح نشت شمسه وهي كلها نشاط و حيويه لنه سفرها اليوم .. طلعت من حجرتها الساعة 7 .. فشافت قوم أمها واااعيين بعد ... المهم سارت و يلست اوياهم و عقب يت اختها و اخوها اللي بيسيرون الحج بعد ..

و مرت الساعات بسرعه و يت الساعة 9 في هالوقت هم كانوا في المطار حتى اربيعتها فطيم كانت مستأذنه من الدوام بس عشان تودع اربيعتها شمسه .. شمسه كانت تسلم على فطيم و دموعها تغرغر في عيونها لنه هاذي اول مرة شمسة تبتعد عن فطيم لمدة بالنسبة الها طويله مع انه بس أسبوعين ..

عقب ما سلمت فطيم على شمسه و تاكدت انهم ساروا لصالة المغادرين أطلعت فطيم من المطار و يوم وصلت للسيارة تذكرت انها كان يايبة أوياها موبايل شمسه على اساس أنها ترده الها ولكنها نست....

و عند الساعة 11 كان قوم شمسه في الطيارة و هاذي كانت اول مرة تسافر شمسه فيها للسعودية و بالخص لأداء منسك الحج و العمرة...

طارت الطيارة و طارت شمسه معاها وهي ما تدري شو اللي بيصير ألها ...

سافرت شمسه و هي ما تدري شو امخبيه الها القدر في غيابها عن فطيم ...

و الحين أنتو شو تعتقدون ممكن يصير في غياب شمسه عن فطيم ..

هل بتتأثر فطيم لبعد شمسه عنها..؟؟؟؟

انتظروا الباقي في الجزء الرابع

[عشق الليل]

ومن بعد ما سافرت شمسة للسعودية حست فطيم أبعد شمسه عنها ...
أول ما وصلت شمسه للسعوديه اتصلت بفطيم قبل عشان تطمنها بوصولها .. ومن عقب اتصلت بأهلها...

المهم وفي اليوم الثاني من سفر شمسه و يوم كانت فطيم يالسة في حجرتها حزة العصر رن التلفون... فشلت تلفونها عشان ترد عالأتصال و لكنها انتبهت انه مب تلفونها اللي يرن تلفون شمسه ..فهي يوم شافت اسم المتصل جاسم ترددت في انها ترد عليه ... و لكنها في الأخير ردت ....

فطيم ترد عليه وهي مستحية و بصوت هااادي: ألو ..

جاسم استغرب من نبرة الصوت هو اعتقد انه هاي شمسه و أنه صوتها متغير بسبة الجو

فرد جاسم : يا مرحبا بشمس حياتي كان يقولها وهو شاك في الصوت

فطيم يوم سمعته و هو يرحب استحت ... فطيم :......

جاسم: حياتي شمسة اشبلاج ما تردين؟؟؟؟؟!!

فطيم: اسمح لي أخويه أنا مب شمسة أنا اربيعتها فطيم

جاسم تفاجأ فسكت مرة وحدة وما نطق بشيء..

فطيم : أحم أحم .. موبايلها عندي لنه هي ناستنه عندي

جاسم : اسمحيلي يا الشيخة ما كنت ادري ..

فطيم : لا عادي مسموح .. و بعدين ما صار شي

جاسم: انزين شمسه شخبارها ما اتصلت بج

فطيم : اتصلت بي امس يوم وصلوا المدينة...

جاسم: ما عطتج رقم تلفون

فطيم : لا ما عطتني رقم

و فطيم كانت تتافف من كثر أسئلته ...

جاسم : عيل كيف اتصلت بج من اي رقم

فطيم و كان الود ودها تسد الخط : كانت متصلة من التلفون العمومي

جاسم: بحاول اني اتصل في وقت ثاني عشان تخبريني إذا عطتج رقم التلفون..

فطيم : إنشا الله ..ولا أقول. ما يحتاي تتصل بطرش لك الرقم بمسج من تلفون شمسه

جاسم : خلاص عيل انا بتريا منج المسج.. و السموحة عالأزعاج

و تبند فطيم عنه و هي مب امصدقة متى صكر الخط....

كانت شمسه في المدينة فكانت حياتها هناك منصوفة نصين نص عبادة و نص للسوق
وحتى هيه هناك ما نست اربيعتها اشترت ألها قلادة و خاتم من الذهب الأبيض لخالص .. و ما نست تتشرا بعد لخطيبها جاسم ...

و شمسة كان ودها تتصل بجاسم و لكنها مب حافظة رقمه .. سألت اخوها إذا عنده رقمه و لكن هو بعد ما يعرفه....

اتصلت بفطيم عشان تسئلها إذا جاسم اتصل .. ولكن فطيم تعرفون بشو ردت ....!!؟؟


شمسة : فطوم ... جاسم ما اتصل يسئل عني

فطيم : لا ما اتصل ..

مع انه اتصل يسئل عن شمسه و لكنها ما خبرتها

شمسه : انزين فطوم حبيبتي اعطيني رقم جاسم من موبايلي .. بتشوفيني امسيفتنه باسمه...

فطيم قالت لشمسه : اسمحيلي شمسة انا الحين مب في البيت طالعة في السيارة .. مع انها كانت في البيت و الموبايل عدالها عالطاولة ..

شمسة : انزين ما عليه بتصل بج عقب بس ما ادري متى لنه باجر بنسير مكة ...

فطيم : ديري بالج على عمرج

شمسة : إنشا الله لا تحاتين .. بدعيلج بأن الله يرزقج بالريل الصالح

فطيم : آمين .. عاد اسمحيلي لني بخليج الشارع و ااايد زحمة و انا اميودة التلفون بأييدة ما عندي سماعة...

مع انها كانت حاطة سماعة...

المهم و بندن عن بعض و شمسة كانت حاسة بتغييير بسيط في نبرة صوت فطيم... و لكنها ما اهتمت و لا داار في بالها بشيئ ثاني ..

في هالفترة كان جاسم دوم يتصل على تلفون شمسة عشان يتطمن على شمسة و لكن فطيم طلبت منه طلب ......

الطلب كانت تباه يتصل بها على موبايلها مب على موبايل شمسه بحجة انها بترد موبايل شمسه لأهلها مع انها عمرها ما فكرت بالشيء هذا و لكنها كانت تخطط لشيء ...

و عاد هو ما رفض على طول و اااافق ...

فهي شو سوت سارت و مسحت جميع اتصالات جاسم الواردة و اللي لم يرد عليها و مسحت المسجات اللي هو طرشها لشمسه...ولكنها خلت باقي الأتصالات اللي يتها من اللي تعرفهم شمسة

و هذا كله عشان يوم اتي شمسه و تشوف أنه جاسم ما افتكر فيها أبد ...

شوفوا مكر فطيم لوين وصل ....

و البقية بعدين ....لنه ايديه عورتني ..

بس اتمنى انه هالجزء ينال على اعجابكم

[عشق الليل]

وفي مرة من المرات اتصلت شمسة بفطيم و.... لكن فطيم كانت يوم ترد على شمسه أمبين انه ردها من ورا خاطرها ....المهم انه شمسة حست بالتغيير هذا.... و في خلال هذا الإتصال دار بينهم هذا الحوار .....

شمسة : فطيم حبيبتي .. اشبلاج .. فيج شي..

فطيم : لا ما فيه شي ... ليش أنتي حاسة أنه فيه شي..؟؟

شمسة : يعني لكن شوه ما ادري .. و بعدين نبرة صوتج غير.!!

فطيم : المهم ... متى بتردون البلاد ؟؟

شمسة : و الله ما أدري .. بس يمكن عقب يومين أو ثلاثه

فطيم : عاد يالله متى بطوف هالأيام بسرعة و بتردين .. عشــان .. وسكتت

شمسة : عشان شو؟؟؟ قولي لي بسرعة تراج طيرتي حمامة أفادي ...

فطيم: بصراحة هو خبر حلو .. و اكيد بتفرحين بي ... كأنها يالسة تشرح لغز..

شمسة : انزين خبريني

فطيم: لا غناتي كل شيء في وقته حلو .. ويوم بتردين بتعرفين كل شي

شمسة : يا الله متى بنرد عشان اعرف

شمسة قالت لفطيم : اسمحيلي عاد .. بسد الخط لنه البطاقة بتنقطع الحين و انا ما باالخط ينقطع في ويهج ...

و بندت شمسة عن فطيم .. و لكن شمسه ما كانت مرتاحة من أسلوب فطيم في الكلام ...

وفي آخر يومين ومن عقب ما أدوا مناسك الحج ....كانت شمسة أمطيحة في السوق عشان تتشرا لزهبتها ما خلت قطع و لا عطور حتى ما نست تتشرا لها شيل و كم عباة ... واتشرت بعد لفطيم و أهلها و طبعا ما نست جاسم و امه ..

و في هالأيام الأخيرة لوجودهم في السعودية كانت شمسة تحاول تتصل بفطيم عقب كل فرض و لكن كان دوم الخط يا أنه مشغول أو يرن و محد يرد عليها .. فكانت تتصل بها عالبيت و لكن البشكارة كانت ترد عليها بأنه فطيم راقدة او ساعات تقولها طالعة ....

فانشغل بال شمسه أكثر و قامت أتحاتيها أكثر من قبل....

و يا اليوم اللي ردت فيه شمسه من السعودية و كانوا رادين في الضحى ... يوم وصلت شمسة للبيت سارت تتصل بفطيم على طول حتى عباتها ما فصختها .. ولكن هالمرة يوم اتصلت كان موبايلها مغلق و تلفون البيت يرن محد يشله قامت تتصل مرتين ثلاث ولكن نفس الشيء..

فخافت على فطيم و اهلها قالت في خاطرها يمكن صاير لهم شي ... المهم قامت عقب عشان تتسبح و ترتاح حتى الغدا ما بغته لنها كانت تحاتي فطيم ..

فقررت انها تسير بيت فطيم العصر عشان تنشد عن حالها و تتطمن عليها ....

و لكن ...........

ولا أقولكم شرات ما قالت فطيم كل شي في وقته حلو .....

لكن صح ...... شو تتوقعون بيصير يوم بتسير شمسة لفطيم ..

هل شمسة بتلقا فطيم في البيت ...و هل فطيم بتستقبل شمسة ...

يا ترى شو بيصير ...؟؟؟؟؟

انتظروني في الجزء السادس...

[الظبي الجفول]

ننتظر التكمله:)

[عشق الليل]

ويوم وصلت شمسه لبيت فطيم ... شافت سيارة واقفة عند الباب و كانت هي أمبشهه عليها و لكنها مب متأكدة وين شايفتنها .. المهم نزلت من السيارة من عقب ما بركنتها و سارت و دقت جرس الباب .. فيتها البشكارة و بطلت عنها الباب .... فناولتها أكياس الصوغة المهم دخلت شمسه داخل البيت و مشت ورا البشكارة لين باب الصالة ....

المهم دخلت شمسة داخل الصالة و كانت أم فطيم يالسة في الصالة أبروحها .. فسلمت عليها و يلست أوياها لفترة مب طويلة .. أم فطيم كانت وحليلها على نياتها ما تدري باللي بنتها تسويه ... ما تدري بأنه الخطيب هذا هو في الأصل خطيب اربيعة بنتها اللي هي شمسة.. المهم دار هالكلام أمبينهم ..من عقب ما نشدتها عن حال اهلها .....

أم فطيم : قالت لج فطيم بأنها انخطبت..؟!

شمسة : لا خالوه .. بس هي قالت لي يوم كنت في السعودية بتفرحين بي يوم بتردين .. عيل بالبركة و عقبال خواتها والله فرحتلها من كل قلبي .. يعني يوم أنا انخطبت هي انخطبت

ام فطيم: ربكن يحبكن ..عسى الله لايفرق امبينكم

شمسة : آمــــــين .. انزين الحين هي وين .. أبا أسلم عليها ..

أم فطيم: في الميلس ويا خطيبها .. يالسين يتفقون على حفلة الملجة و العرس

شمسة: الله يتمم فرحتهم على خير

ام فطيم : و فرحتج انتي بعد يا بنتي شمسة ..

شمسة: خـالوه .. مادام أنه فطيم مشغوله الحين اويا خطيبها أنا ما بخرب عليها .. بترخص بس خليها تتصل بي يوم بتفضا...

أم فطيم : اشعنه مستعيلة ترا البيت بيتج .. توج يايه ..

شمسة : لا خالوه بعدني أبا اسير الجمعية .. عاد سامحوني هاي صوغتي ألكم و الكيس الوردي فيه صوغة فطيم..

أم فطيم : عاد نحن ما نبا منج شيء اشعنه كلفتي على عمرج..

شمسة : هذا أشويه بس إنشا الله تعيبكم صوغتي.

أم فطيم : ما دام أنتي يايبتنها اكيد بتعيبنا .. أميه شمسة لا تنسين سلمي على امج

شمسة : إنشاالله يبلغ ...

و أطلعت شمسة من الصالة و كانت أم فطيم واقفة عند باب الصالة تودعها...

وهي نازلة من عالدري مال مدخل الصالة سمعت صوت ريال توه بيطلع من الميلس ... فتغشت فقالت في خاطرها أكيد هذا صوت خطيب فطيم ... المهم وهي تمشي تقابلت أوياه و كانت فطيم ورا .. فيوم شافته شهقت شهقة قويه حست روحها بتطلع وراها فشلت الغشوه عن ويها ..

تدرون امنوه شافت ؟؟؟؟ شافت خطيبها جاسم ..

فقالت له ..أنته شتسوي اهني ؟ و كيف وصلت لبيت اربيعتي و اشعرفك أبها ؟؟؟
لكن فطيم ما عطت جاسم فرصة عشان أنه يرد لنه هو روحه تفاجا يوم شاف شمسة..

فهي ردت على شمسة بكل كبرياء و غرور كانت ترد عليها ولا كأنه اللي واقفة جدامها هي شمسة الروح الثانية ألها و اللي علاقتهن كانت مثل الخوات ..

قالت فطيم لشمسة : حبيبتي ليش تسألين خطيبي كل هالأسئلة و بعدين مالج خص فيه هذا اليوم خطيبي و بعد كمن يوم بيكون ريلي.. نحن أخرنا موعد الملجة عشانج كنت اتريا وصولج يالشيخة و الحين أنتي و صلتي بالسلامة ...

أهنيه شمسة انصدمت من الكلام اللي سمعته ... فسارت صوب جاسم و كانت تهزه و تقوله .. صدق هالكلام اللي اسمعه ليش يا جاسم .. أنا شو سويت لك .. البيت أثثته اوياك .. وفي المهر ما ثقلت عليك و العرس بغيته في البيت و الشبكة عليه انا يعني أنا ما بغيت أثقل عليك بشي ليش جيه تسوي بي يا جاسم ليش كانت ترمسه و تهزه بكل قوتها .. كانت يوم ترمسه ادموعها تربع على خدها مثل الواحد المينون ...

في هاي اللحظة يت فطيم و يرت أيدين شمسة بقو عن جاسم .. فصاحت شمسة في ويه فطيم ... أنا شو اللي سويته علشان يكون يزايه جيه ... عمري ما فكرت أني أضرج في يوم من الأيام..

كانت شمسة تحس بطعنات قاتله في قلبها ...

فطيم : اسمعيني عدل تراج معزومة عالملجلة و بتكون بتاريخ 20 - 2 تدرون هذا كان موعد ملجة شمسة على جاسم .. والعرس تعرفينه متى ترا في نفس اليوم اللي كنتي متفقه تسوين فيه عرسج..5 أبريل..

في هاي هاللحظة حست شمسة انه اللسانها انربط ما عرفت بشو ترد على فطيم .. لنها كانت مصدومة بربيعتها اللي ترعرعت أوياها .. و كانت تصيح بطريقة هيستيريه و تقول لفطيم : قولي لي غير هالكلام أنا مب أمصدقة اللي قلتيه قولي لي اني احلم..

و لكن فطيم بدال ما تهدي كانت تزيد و ردها كان عبارة عن سجاجين تنغرز بصدر شمسة ... فطيم ردت على شمسة: جانج مب امصدقة اتريي لين ما يوصلج كرت العرس...حست شمسة الدنيا تدور ابها..

ما عرفت شمسة شو تقول حست عمرها بعالم ثاني و انها في بيت مب بيت فطيم ...و لكن الكلمة اللي أطلعت منها الله يسعدكم كانت تقولها و هي تصيح.. في هالفترة يابت البشكارة موبايل شمسة من غرفة فطيم لنه فطيم امرتها بالشيء هذا..

فطلعت شمسة من بيت فطيم وهي مطعونة و مصدومة و ركبت سيارتها و هي مب عارفة وين تسير ...

سارت صوب البحر ويوم وصات هناك نزلت من السيارة و يلست مجابيل البحر .. يلست تتذكر كل اللحظات الحلوة اللي جمعتها بفطيم .. تذكرت يوم تعبت فطيم خلال أيام دراستهن بالكلية و نقلوها عقب المستشفى .. فيوم قال الدكتور انه لازم ينقلون الها دم .. و طلع دم شمسة هو المناسب و تبرعت لفطيم بدمها و لكنها طلبت من الدكتور مايخبرها أو يخبر أهلها بانه شمسة هي اللي تبرعت ألها بالدم.. يوم تذكرت هالموقف قامت تصيح بزيادة ..

قامت تصيح حسافة على الروح اللي أغدرت بها و باغتتها بطعنة قاسية خلفت وراها جرح اللي لو برا بيترك له اثر قوي و صعب عالنفس ....

كانت تتذكر كيف كانت فطيم فرحانه يوم كان جاسم ياي يخطب شمسة....وعلى طول يلستها عالبحر عينها ما وقفت من الصياح لنه متحسفة على اللي سوته اربيعتها اللي تناست كل اللي كان بينهم ...

و عند اذان المغرب ركبت سيارتها و سارت ولكنها ما سارت صوب بيتهم ..لااااااا..

سارت صوب بيت فطيم لأنها لحد هالحظة هي مب امصدقة اللي سمعته ...

هي وقفت دقايق عند البيت و عقبها مشت و كملت دربها لبيتهم...

وصلت البيت وهي منهاره من اللي صار فدخلت الصالة و كانت امها يالسة و يا خوات شمسة ... فالأم استغربت من شمسة لنها دخلت وما سلمت عليهم و يوم دخلت كانت تصيح .. هي على طوول دخلت حجرتها و قفلت على عمرها الباب..

فلحقتها الأم لنه في خاطرها اعتقدت أنه يمكن صدق في شيء صاير بفطيم أو بحد من أهلها فسارت اتدق عليها الباب..

ولكنها ما بطلت الباب عيزت الأم وهي تدق الباب و عقب خواتها ين يدقن الباب و لكنها ما استجابت لحد..

.... يا ترى شو اللي صار بشمسة .. هل بتبطل الباب عن اهلها ؟؟؟ و بالنسبة لفطيم هل علاقتها انتهت بشمسة من بعد الموقف اللي صار ...

كل هذا بتعرفونه في الجزء السابع...

[عشق الليل]

اتعبوا أهل شمسه و هم يدقون الباب على شمسة و لكنها ما بطلت ألهم الباب بس ردت عليهم بأنها تبا اتم أبروحها... كانت شمسه واعية عطول الليل .. كانت كل ما تحاول اتغمض عينها و هي مليانه دموع كانت تتخيل الموقف اللي صار في بيت فطيم.... المهم تمت على هالوضع لين ما أذن الفجر فعقب صلاة الفجر.. قدرت تغفي لين الصبح ..

المهم هي نشت و اتسبحت و عقب ما خلصت بطلت الباب و ردت أيلست عالشبرية .. في هاللحظة أدخلت عليها أمها فشافت عيون شمسة محمرة و أمبين عليها انها صايحة صياح من الخاطر.. تقربت أمها منها و يلست عالشبرية ... فكانت تمسح بأييديها على راس بنتها وفي نفس الوقت كانت شمسة أميودة عمرها عن انها تنهار من الصياح جدام أمها .... ولكن يوم شافت أنه امها مصرة تعرف شو السالفة على طول لوت على أمها و تمت تصيح صياح ...

الأم ما عرفت شو السالفة . و استغربت من طريقة صياحها كأنه حد ميت عندها .. كانت شمسة تخبر أمها بالسالفة وهي تصيح ...

فعقب ما سمعت بالسالفة قالت الأم : أنا أقول أشبلاها فطيم ما تتصل...

يلست الأم تهدي بنتها و تحاول تخفف الحسرة و الألم اللي حلوا على بنتها ... المهم في كل يوم كانت شمسة ترقد و دموعها و القمر هم الوحيدين اللي يواسونها ... و اكلها قل مب شرات اول ... فكانت شمسة ما تحب تيلس ويا حد من اهلها يعني كانت طول الوقت حابسة عمرها في الحجرة تصيح حسافة على روح اللي اعتبرتها روحها الثانية...طبعا في هاي الأيام أملجت فطيم...

المهم مرت الأيام و حال شمسة ما تحسن واايد .. فبعد مرور شهر و أسبوعين على ملجة فطيم.. رن تلفون بيت شمسة يوم كانت أم شمسة يالسة في الصالة و يا بناتها

فكانت المتصلة هي فطيم فكان سبب اتصالها على تلفون البيت لنه شمسة كانت غالقه موبايلها من عقب السالفة اللي صارت...

ام شمسة يوم سلمت عليها ما عرفت صوتها إلا يوم قالت فطيم أنا فطيم..

أم شمسة: بعد لج ويه تتصلين.. ما سدج اللي سويته أنتي حشا مب صديجة أنتي عقربة تاكل و تلدغ

فطيم : تمت ساكته لثواني .. وبعدين ردت .. خالوه الله يخليج بغيتها في سالفة و انا الحين واقفة جدام باب البيت اترياها

اهنيه تغيرت نبرة ام شمسة فقالت في خاطرها يمكن يايه تتسامح من شمسة

أم شمسة: الحين بخليها اتيج عند الباب و بندت عنها..

المهم الأم سارت عند بنتها و قالت ألها انه فطيم برع تترياج و تباج في سالفة .. في البداية شمسة ما بغت تسير و لكن الأم اصرت عليها .. فسارت ....


فيوم وصلت عند الباب و بطلته شافت فطيم ..أهنية بدت الدموع تغرغر في عينها ولكنها تماسكت ما بغت تصيح جدامها...

يتها فطيم و سلمت عليها وكان سلامها باااااااارد ... فناولتها كيس صغير و كان فيه كرت فطبعا هذا كرت العرس.. طلعت شمسة الكرت.. فتظاهرت بانها تقرا الكرت و مرة وحدة رمت الكرت على فطيم .. فطيم سكتت ما قالت شي لنها تدري بانها غلطانه و انه الحق ويا شمسة.... فطاح الكرت عالأرض وداسته بريلها ودخلت البيت من دون أي اعتبار لفطيم و صكت الباب في ويها بقو...


فتمت شمسة متسانده عالباب تصيح...

لنه ما تخيلت أنه فطيم تكون بهالقساوة.. المهم دخلت للصالة و كان قوم امها بعدهم يالسين .. فأمها يوم شافتها داخله تصيح وقفتها قبل ما تدخل لغرفتها و سئلتها..

أم شمسة : شو كانت تبا منج فطيم..؟؟

شمسة و هي تصيح: سيروا عند الباب و بتعرفون شو كانت تبا

فدخلت الحجرة وهي تقول بصوت عالي دخيلكم خلوني ما با حد يرمسني ... دخلت و صكت على عمرها الباب... تمت شمسة بالحجرة لين حزة العشا فعقب ما صلت العشا و هدت اشويه اطلعت و يلست بالصالة و يا اهلها .. كانت صح يالسة أوياهم و لكن قلبها و عقلها في واادي ثاني..

فانتبهت عليهم وهم يرمسون في موضوع شد انتباها

و الحين...شو الموضوع اللي لفت سمعها؟ و هل فطيم خلاص ما بترد على شمسة...

إنشا الله بتعرفون اليديد من الأحداث في الجزء الثامن

[الظبي الجفول]

اختي عشق الليل متى بتكملين القصه ؟؟؟
بسرررررررررعه فديتج لا طولين علينا

[عشق الليل]

من عيوني افا عليكم غالي والطلب رخيص

[عشق الليل]

انتبهت شمسة على أهلها و هم يرمسون عن خالها اللي بيسافر لبنان ويا عايلته المكونة من زوجته و عياله( ولدين واحد عمره 3 سنين و الثاني 5 و البنت عمرها سنة و نص)... شمسة حطت في بالها هالسالفة ...

وفي اليوم الثاني نشت من ارقادها وهي مقررة تسافر ويا خالها... فهي ما جذبت خبر سارت عند أمها و أبوها و خبرتهم عن قرارها اللي اتخذته .... فأمها و أبوها عارضو فكرة سفرها ، لنهم ما يدرون شو ممكن يصير ألها هناك و هم يدرون بحالتها النفسية كيف صايرة .. و لكن شمسة كانت مصرة على السفر وما طاعت تتنازل عن هالفكرة ...

المهم سار أبوها يحجز ألها و هو مب مقتنع بسفر بنته ، فطلع الحجز في نفس يوم عرس فطيم و كان الشيء هذا بالصدفة...

مرت الأيام و يا يوم السفر.. خال شمسة و عايلته يو لبيت شمسة عشان أنهم كلهم يسيرون في سيارة وحدة .. لنه خالها يبا يوقف سيارته في المطار...

المهم أطلعت سيارة خال شمسة و طبعا كانت شمسة اوياهم من بيت قوم شمسة متجهة جدا المطار... و هم في طريجهم للمطار صار ألهم حـادث... و اخوان شما طبعا ما قصروا اطلبوا الشرطة و الأسعاف....

وصلت سيارة الأسعاف اللي ناقلة قوم شمسة للمستشفى ... دخلوا شمسة للعناية لانها كانت فاقدة وعيها و الأصابة عندها كانت في الراس و أيديها و كدمات و شوية جروح بجسمها .... أما خالها كانت عنده جروح بسيطة في ويهه و حرمته كان عندها كسر في ريلها و جروح في ويها و اما عيالهم إصاباتهم كانت خفيفة و البنت ما صار ألها شيء لنها حزة الحادث يوم طلعوهم من السيارة كانت شمسة حاضنه البنت ...

عايلة شمسة يوم عرفوا باللي صار ينوا فعلى طاروا عالمستشفى..و هم مب امصدقين ..

فشمسة دخلوها العناية لنه الدكاترة خافوا عليها يوم شافوها فاقدة وعيها لنهم قالوا يمكن تكون في غيبوبه...

خالها و حرمته و عيالهم عقب ما عالجوهم ساروا عند اهل شمسة اللي كانوا واقفين عند غرفة العناية المركزة ...

كانت حالة اهلها معتفسة الأم تصيح من صوب و الابو من صوب مب عارفين شو حال بنتهم... لنه الدكاترة ما خلوهم يدخلون عليها...

الوقت كان يمر ببطء .. أطلعوا الدكاترة من عند شمسة و تمت النيرس عندها حاولوا اهل شمسة يدخلون عندها و لكن منعوهم ...

مرت خمس ساعات وهم على هالحالة و لا حد منهم قادر يتحرك من مكانه حتى قوم خالها بالرغم من تعبهم لكن ما رضوا يروحون.. وعيالهم رقدوهم عالكراسي اللي بغرفة الأنتظار...

و مرة وحدة تبطل باب غرفة شمسة و أطلعت النيرس تركض جدا غرفة الدكاترة المناوبين....

فاطلعوا الدكاترة من غرفتهم و وراهم النيرس و دخلوا عند شمسة... اهني ام شمسة انهارت من الصياح و كانت تتحلف لفطيم لو صار لبنتها شي... الدكاترة خذولهم تقريبا نص ساعة و هم داخل و الكل كان حاط ايديه على قلبه مب عارفين شو اللي يصير داخل الغرفة ... وأم شمسة كانت تقول و هي تصيح : بنتي عدالي و ما اقدر اشوفها ....

و الحين ... ياترى شو اللي صار بشمسة ؟؟؟ و ليش الدكاترة تيمعوا عندها ؟؟؟

المهم بنعرف كل هذا في الجزء التاسع و الأخير

[راعي شلات]

مشكوووووورين
مع تحياتي
راعي شلات

[عشق الليل]

تسلمون على المرور

تحياتي عشق الليل

[عشق الليل]

مثل ما الكل يعرف أنه شمسة بالعناية و الدكاترة من دخلوا عندها من عقب ما نادتهم النيرس ما طلعوا...و أهلها كانوا حاطين أيديهم على قلبهم....

و بعد مرور ساعة أطلعت النيرس من غرفة العناية فشافتها ألأم و هي يالسة بغرفة الأنتظار فسارت ألها على عشان تنشدها عن حال بنتها فقالت ألها شمسة بخير و الحمدلله هي صحت الحين و بننقلها للجناح بعد أشوي أهني الأم يوم سمعت هالكلام لوت عالنيرس و قامت تحببها كانها بنتها أو وحدة تعرفها ... ما صدقت أم شمسة أنه بنتها بخير ما صدقت انها حية ما ماتت ... طلبت من النيرس اتدخلها و لكن قالت ألها الحين بتشوفينها يوم بنطلعها من غرفة العناية...

أهلها ما صدقوا الخبر أفرحوا أنه بنتهم بخير امها و أبوها كانوا أوياها لحظة بلحظة ما فارقوها أبد تحسنت حالة شمسة و بعد ثلاثة أيام طلعوها من المستشفى.... طلعت منه و هي حاسة بالحباط . بس الحمدلله بفضل الله و وأهلها نفسيتها تغيرت و لكن مب شرات اول...

فبدات تتخلص من كل شيء يذكرها بفطيم مثل الهدايا و باقي الأغراض اللي فيها ريحة فطيم.... وهي يالسة تعدل كبتها شافت كيس محطوط في زاوية من الكبت ... شلته فيوم بطلته شافت فيه الصوغة اللي كانت يايبتنها لجاسم و أمه من السعودية .. أهنيه انزلت منها دمعة و مسحتها بسرعة .. فردت الكيس في مكانه و صكت باب الكبت...

مر على عرس فطيم شهرين .. فهالشهرين علاقة جاسم بفطيم تغيرت للاسوء.. حس جاسم بالندم و أنه غلط بحق شمسة ..حس انه كان من المفروض ما يوافق على نزوات فطيم و لكن شو الفايدة هو ما انتبه إلا بعد فوات الأوان...

فحاول أنه يتصل بشمسة عشان يعتذر ولكن كل ما كلن يتصل يلقاه مغلق فتم يطرش ألها مسجات ندم و أسف و اعتذار....

ففي مرة من المرات تذكرت شمسة موبايلها اللي فارتنه في الكبت .. سارت عند الكبت و طلعته .. فيوم شغلته شافت وايد مسجات واصلتنها يعني تقريبا 15 مسج . هي أفرحت من العدد قالت في خاطرها زين يوم أنه في حد يفتكرني ... و لكن يوم قرت أنه اسم المرسل هو جاسم .. تغيرت ملامح ويها .. فعلى طول و قبل ما تقرا باقي المسجات مسحت كل الرسايل الواردة و الصادرة..

و في خلال هالدقيقة رن تلفونها فيوم شافت اسم المتصل كان جاسم...

رررررررررررن ررررررررررن هي ترددت في أنها ترد عليه و لكنها في الأخير ردت....



جاسم: ألــــــــو السلام عليكم...

شمسة ترد عليه بهدؤ: عليكم السلام .. أمنوه اويايه

جاسم: ما عرفتيني .. أنا جاسم

شمسة : أي جاسم أنا ما عرف حد بهذا الأسم و أظاهر أنك غلطان

و بندت عنه... فرد جاسم و اتصل بها مرة ثانية .. و ردت عليه

شمسة : قلت لك ما عرف حد بالأسم هذا ...

جاسم: دخيلج يا شمسة لا تبندين ..أنا أعرف بأنج كارهتني و لكن يا شمسة سامحيني .. سامحيني على كل شيء

شمسة : أسامحك ...هه!!! تباني أسامحك ..!! و الحين ...

شمسه : أنته متأكد أنك صاحي؟؟؟

جاسم: صدقيني انا نادم على كل اللي صار و لو....

و هنيه قاطعته شمسة

شمسة : الحين مرتك ...تقصد فطيم .... تدري أنك متصل بي الحين

جاسم: و ليش تدري هاي حياتي

شمسة : الحين عرفت حياتك .. للأسف انك تاخرت واااااااايد يا جاسم

جاسم يرد عليها بنرة حزن: عرفت أنه فطيم ما تناسبني .. عرفت أنه بالفرق اللي بينج و بين فطيم .. عرفت أني غلطت بحقج

شمسة : و الحين انته ليش متصل

جاسم : عشان أقولج أني أباج و فطيم تراني بطلقها إذا مب اليوم ترا باجر.. ترا الحياه أوياها صارت مستحيلة

شمسة: يوم كنت عندك بعتني و الحين تباني .. أنا الجرح اللي انجرحته بسببك و بسبب حرمتك عمري ما بنساه .. ولا تتحراني أني ممكن أوافقك عليك أو أسامحك .... فأنا أقولك لاااا ....فانته غلطان ..و قبل ما أنسى ترى الصوغة اللي كنت يايبتنها لك و لأمك لحد الحين عندي و اليوم العصر بطرشها أويا أخويه لبيتكم .. و الحين أقولك مع السلامة

و بندت الخط في ويهه من دون ما تعطيه فرصة في أنه يرد عليها...

فاغلفت شمسة موبايلها ... حست شمسة أنها اخيرا قدرت تواجه هالريح .....

بدت شمسة تبني حياتها من يديد من دون وجود فطيم أو أي شيء يذكرها بفطيم... و صارت علاقتها بأهلها أقوى من قبل...و صلها خبر طلاق فطيم و لكنها ما تاثرت من الخبر هذا ...


من الأبيات اللي اكتبتها شمسة ...

يا ما عيوني اذرفت دمعها ذرف .. ويا ما سهرت الليل اشتاق و أوله

أنا دخيلج ودي اليوم أعرف .. و كيف تخونيني بهذي السهوله

هي الخيانه و الكذب عندكم عرف .. أو الوفاء في هالزمن ما نطوله

___________________

و السموحة على كل الأغلاط الإملائية و اعذروني عالأسلوب .. و اتمنى أنه القصة كانت عند حسن ظنكم...

[بنت البلاد]

تسلم أخوي على النقل الرائع للقصه..
وما قصرت رايتك بيضا

[هجورة]

حلوووووووة وااااااااايد

تسلمين

اسلوبج تري حلوة

[عسل ورد]

مشكوره خيتوو

[سجينه الحب]

مشكورة أختي عشق الليل والله يوفقج إنشالله

[الأنامل الفضية]

الســــــــــــلام عليكم ..


ربي يعطيج الف عافيه ..


ومب ناويه على قصه يديدة :marsa37:

[شـــــاكي الهـــــم]

مشكووور اختي على هالقصه

حمستينا نباج تكمليها

انا ما احب القصة اللي تييك متقطعه

القصة من بدايتها جذابه

اسلووبج في القصه يجذب اللي يقراها

تسلمين اختي

نتريا الجزء الأخير

[شوق العيون]

مشكوره الغاليه على القصه الحلوه والله يعطيج العافيه
يلا أتحفينا بجديدج لا تحرمينا لا قصصج
اختج
شوق العيون

[ميرو]

مشكورة اختي على القصة صراحة اهي روعة بس هي صج حقيقية بس حبيت اني اسال ادا كانت حقيقية يعني في ناس جدي ما يخافون ربهم

[ولد شقردي]

مشكوووووووووووووور اخوي عشق الليل بصراحه القصه حلوه
ونتمنى انك تجمل المنتدى بالقصص الجميله اللي زي كذا ويعطيك الف الف عافيه وإلى الامام
تقبل تحياتي ومروري
اخوك ولد شقردي

[إحتمال]

مشكوره الغاليه على القصه الحلوه والله يعطيج العافيه

[عذبة الخيال]

يسلم يداك على القصة الروعة

جرح لا يداوي الا بالجرح:marsa44:

مشكوره

[الغاوية]

ثانكس عالقصة
الروعة
أريد من كل من يقراها ياخذاها عبرة
:marsa10: