مشكله الكل ضايع بسببها.. الواسطه

[بنت البلاد]

السلام عليكم..

هالموضوع حبيت اطرحه ونتناقش فيه.. لأنه في نظري وايد ناس يعانون من هالمشكله.. وكثيرين انظلموا والسبب هالشي..
:marsa8:

ابسط شي خل اقوله لكم.. يعني وحده من رباعتي قدمت على برنامج المنحه لجامعه الشارجه وهي يايه نسبه 98 وقسم العلمي بعد.. ما وافقوا عليها شو السبب محد طاع يرمس لأنه مافي سبب مقنع او اي حجه ممكن يطلعونها ليش لأن السبب ماشي توصيه أو واسطه...
:marsa150:


وايد ناس يدرسون ويجهدون اعمارهم ويتعبون وبالآخر ايون ناس اقل منهم ولا شهاده ولا شي مجرد واسطه ويمتلكون مناصب ولا حتى يحصلون شغل قبل هالمساكين الي تعبوا.. يعني الواحد لازم يروح يرابع هالكباريه عشان يتمصلح وياهم ويمشون له اموره.. اما انه هو يتعب فهالشي ما يفيد..

:marsa138:

أمسات قاعده ويا مجموعه من رباعتي كانوا يرمسون عن هالموضوع وحده خبرتني سالفه تافهة وسخيييفه يعني هالشي بالذات احس انه شي تافه جدا ان الواحد يدخل واسطه والخ عشانه.. تدرون شو هو.. تخيلوا واحد متحدي ربعه انه راح يمتلك رقم جلوس مميز جدام لكن بدون ذكر الرقم.. وعقب فتره مدخل واسطه والى اخره عشان بس يكسب التحدي.. يعني وين هالشي يسوى ترا بيي عقبك الي بيمتلك نفس الرقم ولا كان في ناس قبلك امتلكوا نفس الرقم شو هالإنجاز الي سواه احين..


بالله عليكم صارت اهتماماتهم تافهة جدام وما منها فايده..
:marsa51:


ولا بعد من فتره كنت اسمع احدى الإذاعات اتصلت وحده وكانت تشكي حالها.. كانت اتقول انها خريجه كليه التقنيه قسم علوم المختبرات (درست هالتخصص لأنهم قالو لها مطلوب وايد) وجهدت نفسها ويابت درجه الإمتياز مع مرتبه الشرف وهذا غير شهادات التدريب العملي وشهادات التقدير والتميز الي حصلت عليهم خلال فتره الدراسه.. وكل ما اتسير مكان يقولون لها لا نبا شهادات اعلى.. والبنت عندها دبلوم عالي .. شكلهم ما يقبلون بغير الدكتوراه.. يعني لازم يشيب راسها عشان اتحصل شغل.. وكانت تشكي ان في بنات تخرجوا وياها ولكن بدرجات اقل وهم يشتغلون احين ولا بعد مب مني والدرب حصلو شغل.. بواااااااااااااااااااااسطه..
:marsa97:


يعني احين كل دفعه يبون يتخرجون ايوم مال الإرشاد المهني .. يتفلسفون علينا كملوا وكملوا هاي التخصصات المطلوبه وهاي الي لها مستقبل.. نحتاج لمواطنين في هاي التخصصات ومادري كيف.. واخر شي محد يحصل غير الي عنده واسطه وفي ناس يحصلون من غير واسطه بس جيه ضربه حظ.. يوم انه كل شي بواسطه قولو لنا بعد جيه عباره زياده الي عنده واسطه تضمن له الوظيفه بس يكمل والي ما عنده شي يقعد في بيته ولا يتعب عمره..

:marsa128:

الصراحه مب حاله يعني.. في كل شي يدخلون واسطه حتى لو انت بتمووووت ولازم تتلقى علاج في المستشفى لو رحت جيه بيعطونك الموعد بعد اسابيع وساعات بعد شهر اما اذا عندك واسطه عادي يدخلونك نفس الوقت عند الدكتور ولا تتلقى علاج خمس نجوم..
:marsa200:


بس والله ظلم .. وين ما يخافون ربهم.. حكامنا الله يطول بعمرهم عطونا كل شي ومب مقصرين علينا بس الي ينفذون اوامرهم بعضهم هب كلهم مادري كيف مخوخهم تشتغل وعلى اي موجه يمشون..
:marsa193:


الله يعين ويعاون الصراحه..

:marsa150:

يلا اسمحولي طولت عليكم بس هالموضوع صدق مغصص بي قلت لازم اطلع الي في خاطري..

بنت البلاد:marsa112:

[قوت القلوب]

بنت البلاد...
والله فعلاً موضوع مهم و يستاهل ينطرح ..و أنا كان ودي أطرح الموضوع بس ما عليه سبقتيني ..
يعني في هذا العصر اذا ما عندك ظهر ما تسوى بيسه!!:marsa51:
في الجامعات ..الوظائف ..المستشفيات ..مراكز الشرطة ..وفي كل مكان وااااسطات
هذا لأنا مجتمع متخلف..
وللأسف الشيء اللي ما نرضاه لنفسنا نرضاه في غيرنا ..يعني ممكن كل واحد منا مر بموقف استعان فيه بمعارف عشان يسهل أموره ..فلازم ما نرضى بأي واسطة مهما كانت صغيرة..
الله يصلح مجتمعنا ياااااااااارب:marsa180:

ومشكورة أختي على الموضوع و ما تقصرين ..و ان شاءالله دايما نشوف مواضيعك في العام..

[بنت البلاد]

العفو اختي قوت القلوب..

اشكر مشاركتج في الموضوع والرد واتمنى بعد ما تحرمينا من كلامج ومناقشاتج في مواضيعنا..

عيل نبا انشوفج في موضوع الإسبوع القصصي الي طرحته بعد يرمس عن قضيه في مجتمعنا لكن في صوره قصه

جني سويت دعايه.. ؟؟

المهم اتريا المشاركات اليايه.. على كل المواضيع لأن كل اعضائنا ماشاء الله عليهم مواضيعهم حلوه وتستاهل المناقشه

[الشاعر]

السلام عليكم .. ومشكوره أختي بنت البلاد على موضوعك ...

رئيس الدوله حفظه الله تحدث ( نحن تغلبنا على كل شيء إلا الواسطه ) ... المشكله ياأختي الفاضله تكمن في أنفسنا لأننا دائما نضرب بالقوانين عرض الحائط ونلجأ إلى أمور الواسطه التي أصبح لابد منها في مجتمعنا وبصوره مخيفه والأمثله كثيره في هذا الشأن ويكفي الأمثله المتعدده التي طرحتيها لتحسسنا بالمعاناه التي نعيشها جراء هذا ...

انا أرى للتغلب على هذه الظاهره هي التفكك الأسري أو القطيعه بين الأقرباء لأنه في هذه الحاله لن يخدم الأخ أخيه ولن يخدم أبن عمه أو أبن خالته ........... الخ ... ولكن صدقيني على المدى القريب لن نجد الحل الشافي لهذه المشكله ... يلا شدي حيلج ودوروا واسطه ولا بتتقاعدون قبل ماتشتغلون :marsa127:

[بنت البلاد]

تسلم اخوي على المشاركه الفعاله.. وعلى اضافتك لمقوله ابونا الشيخ زايد حفظه الله ورعاه.. والله اظني لولاه جان نحن ضايعين

الله يطول بس بعمره مادري شو بيستوي بنا من عقبه.. الله يخليه لنا ان شاء الله..

وجوده يكفينا

[قوت القلوب]

غصون!!!!!!!!!!!!!!!!!!

[عويد الموز]

ابدن ما غلطتي يا بنت البلاد
بس عن سالفة جامعة الشارجه .. جيه ما قبلوها !!!!!!!
شو السبب يعني انا نسبتي اقل عن نسبتها بس دشيت والحمدالله وربيعاتي كلهن دشن واغلب الي اعرفهن ولي كانن ويايه
قبلوهن اول مره اسمع عن وحده ما قبلوها في جماعة الشارجه وانا الي اعرفه انهم يقبلون الكل حتى لو وحده نسبتها 70 او اقل وانا هذا الي سمعته وخصه انه بفلوس يعني هم مستحيل يرفضون حد ... !!

وبقولج شي غناتي الواسطه منتشره فكل مكان عفان الله مثل المرض .. والي يبا يمشي فحياته لازم بواسطه
يعني تبين تشتغلين ولا تدرسين فالمكان الفلاني لازم بواسطه ولا بتمين على هالحال .. حتى السفر وخاصة في سويسرا ولا لندن كل الي يسافرون على حساب الشيوخ وانا اعرفهم وشفتهم وسمعتهم بعد انزين يوم انتو ماترومون عالسفر ومصاريفه اشحقا اتسافرون !!! بس شو بنقول الشيخه هالشي مش بيدنا والحمدالله شيوخنا مش مقصرين كفو ووفوا والباقي على الله :) و مشكوره الغناااه

[بنت البلاد]

بنت المزروعي..

انتي فهمتي انا عن شو ارمس بخصوص جامعه الشارجه.. يا حبيبه قلبي.. الشيخ سلطان القاسمي.. يعطي منحه دراسيه للي نسبهم فوق الثمانين بس .. يعني دراسه مجانيه من غير بيزات الغاليه.. مب بس ربيعتي .. انا 84 ما قبلوني وربيعتي الثانيه 88 ما قبلوها وكلنا موافقين للشروط اننا من مواطني الشارجه.. فهمتي علي..

وعندي ناس اعرفهم هم اقل منا يعني في السبعين يعني مخالفين للشرط الي هو لازم فوق ال80 قابلينهم على برنامج المنحه شو رايج؟؟

احين عرفتي كيف الغاليه..

ربي يصلح حال دولتنا ونفتك من هالواسطات

[زعيم المرسـى]

بنت البلاد …





أنا وياج وبنفس الوقت أنا مب وياج قولي ليش ….



قلتي ليش…؟



أوكي بقولج ليش ..؟



بس انتي بعدج ما قلتي ليش … خخخخخخخخخخ متفيج



المهم … أنا وياج لأن فعلا الواسطه تلعب دور وهالشي في كل مكان وزمان … وأنا مب وياج لأنه في شي اسمه قضاء وقدر يعني هاذولا الي يسوون الواسطات ماهم إلا أسباب وكل واحد مكتوب نصيبه وين بيكون …



(( نصيب برحمتنا من نشاء )) يعني لو في واحد الله سبحانه وتعالى مب كاتب له يشتغل فالمكان الفلاني هل في حد فالدنيا يقدر يشغله في ذاك المكان…؟ لا ومستحيل ..



أتمنى إنها تكون وصلت الفكره

[بنت البلاد]

وصلت..

واشكر لك تفاعلك..

بس الموضوع مب بس موضوع شغل.. الواسطه قامت تتدخل في مواضيع اكثر من جيه واسخف.. وهالأشيا ما ظني القدر له دور فيها ..

الا قول لعانه ناس الله يسامحهم..

[اخت الجميع]

صح كلامج بنوته وانا وياج حبيبتي


فيتامين ( واو ) ....؟
نعم فيتامين ( واو ) فيتامين جديد تم إكتشافه في بعض الدول وللأسف في الدول العربية نعم فيتامين ( واو ) إختصار لكلمة ( الواسطة ) ....... مقولة تقال على ألسنة كثير من الناس ألا وهي ( الواسطه فوق القانون )

هل هذا صحيح ........؟
الجواب : نعم هذا صحيح .

الواسطه دخلت في كل حياتنا في العمل في معاملاتنا في مطالباتنا لحقوقنا لاحول ولا قوة إلا بالله .

يتخرج الواحد من الثانوية العامة ويبدأ يدور شغل المحظوظ الي عنده واسطة والي ما عنده واسطه يبقى جالس في البيت ( إنها مصيبة وكارثة كبرى ) شو هذي الحالة حالة ما تسر ........ ما هو الحل ...؟ ..... ماذا نفعل نبقى بطالين طول عمرنا ....؟

هذه مشكلة ما ندري شو نسوي ..... يعني ما فيه حل ... أبداً ..... لكن نقول لكل مصيبه ولها حل .....

[بنت البلاد]

هي والله صدقج خيتووو

اشكرج على مرورج وتفاعلج مع الموضوع..

لو عندج هالنوع من الفيتامينات عطينا شوي.. بنستفيد ..

خخخخخخخخ

[عجيد الريم]

السلام عليكم ...


في البدايه اشكرج اختي بنت البلاد على موضوعج وماتقصرين ...

وعلى رايج فيتامين واو لاعب دوره وبصوره كبيره ....

لو الواحد عنده فيتامين واو بيسوي الي يباه وبينقبل كل مكان وكل واحد بيسويله قدر وسالفه ...
لكن الي ماعنده شو يسوي ؟؟؟؟

وين يشتغل ؟؟؟
لا والمشكله يوم بيشتغل بتلاقينه يشتغل براتب اقل من صاحب الفيتامين واو مع انهم يمكن نفس الشهادات ...؟؟؟

اوكي ممكن نعرف ليش ؟؟؟

ترى هذا عنده شهاده وهذا عنده شهاده ...
هذا درس وهذا درس ...

ليش هالتفرقه يعني ولا لازم يراوونكم العين الحمرا يالله يالله بتصطلبون ؟؟؟؟

لا حول ولا قوة الا بالله شو بنقول ؟؟؟

الله يستر ...

يزاج الله خير عزيزتي وماتقصرين
والسموحه على الاطاله

اختج:حوريه :)

[بنت البلاد]

مشكوره اختي حوريه
فعلا مشكله عويصه ومالها حل .. هالمشكله مرافقتنا من سنين طويله ولين احين محد قدر يوقف بوجه هذي المشكله..
وياما ناس انظلموا من ورى هالمشكله..
بس شو بنقول غير الله يكون في العون..

[هزاع x5]

أشكرج أختي ع الموضوع الوايد مهم واللي للحين العلماء والأطباء مالقو لهذا المرض علاج والواسطة تغلب القانون واللي عنده واسطة يغنم وكل شي بتسهل حقه واللي ما عنده يظهر برا وهذي حقيقه الكل يعانينها ما بتكلم أخاف أظهر اللي بصدري وأحرق الخافي أحسن شي أسويه أكتم بصدري لأني بفضح وبقول إن فلان ؟؟؟؟ يشتغل بالمكان الفلاني ؟؟ بس بس ما فيني بصراحه موضوع مثير وأتمنى أشوف مشاركات يديده والسموحه منج وأنا ويا إخواني أشاركهم الراي ماأقدر أزيد والسموحة

[بنت البلاد]

تسلم اخوي هزاع على التواجد والمشاركه..

بس ما يمنع انك تشفي غليلك.. خخخخخخخ

[هزاع x5]

أخاف يا أختي بنت البلاد يتحرون إني متعصب بس والله اللي أشوفه غلط يقهرني ما بقول زود أخاف أغلط على حد لا تجبريني وتسلمين مره ثانية

[بنت البلاد]

الله يسلمك على مرورك..

[عشق الليل]

ولله ما اردي شو اقولج لان الموضوع حساس اشوي

بس هذا الواقع ولازم تنعايش وياه

صح انا ضد الواسطه لانها فيها ظلم

بس شو انسوي العين بصيره والايد قصيره

..........................

[بنت البلاد]

صدقت اخوي عشوووق..
فعلا هاي الدنيا شو بنقول وشو بنسوي.. ما باليد حيله...
تسلم على المرور

[الظبياني]

للاسف .. ولعمق هذا الاسف في النفس ..نعم هذا هو الحال الذي نعيشه اليوم في هذا الوطن ولسنا نحن وحدنا ففي كل الوطن العربي ..تعتبر الواسطه احد المؤهلات التي لا تقاوم ولا يقف امامها اي موقف ..نعم للاسف انها نهج وطريق ..لضياع الحقوق ..للمستحقين ..انها طريق ..للظياع ..طريق ..لا نهاء كل عدل وكل طريق حق ..
ومانلاحطه اختي الغاليه ..
بسبب هذا وما نحن فيه انظري الي حال الوطن العربي ومن ضمنه حالنا نحن ..فاين نسير واين نتجه .. من تاخر الي اسوء منه الي ما اراد ربي ان يصلح ..
انظري الي العالم الذي نظر ووعي ان ما نسميه الواسطه اليوم ماهو الا تدمير لكل العطاء وتدمير لكل الابداع .. وتدمير لكل الحوافز ...التي تساهم في تنميه العطاء ..
العالم تقدم من حولنا .. وملك كل قواعد النجاح التي كانت في يوم من الايام قواعدنا ..
انها بليه . والله وانها سبيل للدمار ونحن نعتقد انها طريق للنجاح .
انها عصيان لا اوامر الخالق وانتهاك لكل القيم والاعراف ....
ولكن من ومن ومن يعي او يفهم ................................لا حول ولا قوة الا بالله .

[بنت البلاد]

تسلم اخوي على ردك المميز..
وفعلا يالظبياني ما قصرت.. كفيت ووفيت بردك الحلو..

[هادف 2005]

ولا تتلقى علاج خمس نجوم..
هههههههههههههه

يعني

فيتامين واااااو الزمن هذا ما يمشي بدوونه .. ويش نسوي بعد ..

صدقتي اختي في كل كلمة قلتيها ..

و جان زين يراعوونا ..

و يراعوون الشبااب ...

انا اذا تخرجت من الثانوي .. ما اتوقع ادخل من اول كوورس ...

مع انه عندي واسطة .. بس ساعات الواسطات ما تمشي

نياهاهاهاهاها

[بنت البلاد]

هي والله صدقت.. ساعات الواسطه ما تفيد
الله المستعان ياخوي..
تسلم على المشاركه