ضروري وهام جدا

[عبق الورد]

بسم الله الرحمن الرحيم

السلام عليكم و رحمة الله و بركاته

شحالكم و شخباركم ؟؟؟؟؟

اسفه على الازعاج .....بس بغيت اطلب من احد المشرفين او المراقبين يحذفون قصة (انتظر كلمة احبك)

من محمل القصص و الروايات ....اريد انزلها في منتدى ثاني ....لاني فهذا المنتدى مالقيت اي تشجيع من اي عضو

عشان اكمل القصه...... انا نزلت 3 اجزاء و محد رد علي الا الدمعه ....و الدمعه عضوة يديدة واشتركت فالمنتدى

بس عشان تقرى القصه .....يعني بس عشان خاطري

والله العظيم زعلت من الخاطر .....ابد محد رد ......اوكي انا ماريد اي مدحه او مجامله ...

انا بس كنت اريد حد يرد علي يعطيني رايه بالقصه حتى لو كانت بايخة و سخيفه و ممله يقولي عااادي اتقبل اي شي

بس انا مالقيت اي نوع من الردود ..الحمدالله و الشكر.....

و حتى استغربت معقوله محد قراها لين الحين و انا منزله اكثر من جزء ....الحين انتو شدراكم يمكن تكون القصه غير اخلاقيه و مخالفه لعاداتنا و قوانينا يعني تضر ؟؟؟؟؟؟؟؟؟؟؟

حتى فخاطري اقول ليش مايردون؟؟؟؟؟؟ مب من قل الاعضاء انا متاكدة ما شاء الله المنتدى فيه وااايد اعضاء قلت يمكن كل الاعضاء مسافرين يمكن؟؟؟؟؟؟؟؟ بس مش معقوله الكل يسافر ؟؟؟؟؟؟؟؟؟؟؟

يعني ما اعرف شو السبب هل هو لان القصه وااايد بايخة ولا سخيفه و مايستاهل حد يرد عليها و الا شووو؟؟؟؟؟؟انزين عادي قوولولي انكم ما تبون القصه او انها ما تساعد حد يقراها والله بوقف و بنسحب بكل طيب خاطر ....

بس ان محد يرد علي والله العظيم هاي اكبر قفطه ............الحين حسيت بندم لان اهلي و ربيعاتي قالولي ما انزلها قي منتداكم عطوني اكثر من منتدى بس انا مارضيت... قلتلهم اني شفت منتدى مرسى الامارت و عيبني ........بس الغلط مب منكم مني انا .....دايما ما احب اسمع افكار غيري و دايما اسوي الي براسي في الاخير اندم و اسوي الي قالولي اياه .........عاد بعد شووووو بعد ما يضحكون و يتمصخرون علي .........

والله العظيم حسيت اني وحده تافهه و ماعندي سالفه .........انا اقوولكم اول مره اشارك في منتدى بس هذا مب اول منتدى انزل فيه قصتي نزلتها في منتدى ثاني لكن مب انا منزلتنها اختي نزلتها بعد ما اقنعتني و صراحه شفت الاعضاء في المنتدى الي اختي مشتركه فيه واااايد عيبتهم القصه ومن اول جزء و عاد انا عيبتني السالفه و قلتلها بشترك في منتدى بختياري المهم دخلت منتداكم و حطيت القصه و حتى اني انزل الاجزاء اول عدكم و بعدين في منتدى اختي وحتى هي زعلت ليش ابديكم على منتداها مع ان الاعضاء الي في منتداها يردون على القصه اما انتو محد رد علي.

ادري ما عندي سالفه بس اتمنى من اي مشرف او مراقب يحذف القصه......... واسفه على الصدعه و المغثه...الي سويتها لكم واسفه مره ثااانيه.....

اسقه لاني نزلت هذا الكلام فالمحمل الترحبيبي كنت اريد انزله في محمل الاقتراحات و الشكاوي بس ما لقيته و اسفه.



تحياتي

عبق الورد
:marsa50:

[بقايا قلب]

سلام عليكم

شحالج الغالية؟

والله العظيم اني من زماااااااان مادخلت المنتدى واول مادخلت شفت هالموضوع
وبعدني ماقريت القصة وان شاء الله بقرى القصة وبقولج رايي بس اهم شي ماتزعلين منا

انا احب اقرى القصص واتريا ردج الغالية :marsa91:

اخوج : بقايا قلب

[the_pirate]

أختي مب انه محد شارك في قصتج تحزنين وتحطين في خاطرج ..

وايد من الاعضاء مالهم ميول قصصي ..:marsa128:

[<(((><]

افا اختي ماله داعي انشالله
بس المسألة يبي لها وقت اكيد الاعضاء بيقرونها
وانشالله بيتفاعلون مع القصة

اخوك

[شـامسيــة وبــس]

والله مب حلو منج اختي تطلعين والسبب هذا يمكن نادر من الاعضاء الي يحبون يقرون ...واااااااااااااااااااايد يقرون ولا يلحقون يكملون

>> منهم انا اقرا النص واقول بعدين اكمل ولا ارد وهاي غلطه ونحن معترفين فيها اختي ...

السموحه منج الغاليه ولا تاخذين على خاطرج ... يمكن نكون قصرنا من هالناحيه بس كل واحد وياه عذره اختي

و انتي نبهتينا لنقطه مهمه وهي محمل القصص احس الاغلب مهملينا او بمعنا ثاني نادر ما يدشون هالمحمل

السموحه منج مره ثانيه ...واتنمى انج ما تكونين زعلانه ...

تحياتي لج :

اختج

شموووس

[بنت_الطــــواش]

عبق الورد

وعليكم السلام والرحمه وبركاته

اختييه حراام تقولين عن عمرج جييه
ليش تحكمين على عمرج بالفشل؟؟؟
الاعضاء لهم ضروفهم..ولاتنسين نحن في الصيف...
والاغلبيه يستعدون لسفر..يعني يدخلون المنتدى على فترات متقطعه ولفتره بسيطه
ان شااء الله الاعضااء بيقرونها وبيردون عليج
بس لا تبخسين نفسج حقها..ولازم يكون عندج إصرار وعزيمه..وكمليها
واعرضيها في اكثر من منتدى..لان الردود والتعليقات في اكثر من مكان بتساعدج في صقل موهبتج

طووشة

[الدنيا]

عبق الورد



وعليكم السلام والرحمه وبركاته

الاعضاء لهم ضروفهم..ولاتنسين نحن في الصيف...
والاغلبيه يستعدون لسفر..يعني يدخلون المنتدى على فترات متقطعه ولفتره بسيطه
ان شااء الله الاعضااء بيقرونها وبيردون عليج
بس لا تبخسين نفسج حقها..ولازم يكون عندج إصرار وعزيمه..وكمليها
واعرضيها في اكثر من منتدى..لان الردود والتعليقات في اكثر من مكان بتساعدج في صقل

انا بصرحه كنت بقول نفس كلام طووشه .. لكل شخص ظروفه والحين الصيف نص الاعضاء يا اما مسافرين او انهم يستعدون للسفر .. واذا كل انسان كتب موضوع وانحبط فيه ووقف عند هالحد جان نص الاعضاء مب موجودين ..

انا اتمنى انج ماتزعلين من هالشي .. واذ بتبنين وجودج في المنتدى على اساس ردود في موضوعج يمكن اتي النتيجه ماتسر مثل اللي استوى الحين

وانا بعد مع طووشه واقولج اعرضيها في كذا منتدى اذا كانت الردود والتعليقات بتساعدج وايد في صقل موهبتج

وعني انا الحين بسير اقراها وفالج طيب :marsa177:

اختج الدنيا

[بنت البلاد]

اختي عبق الورد..

احب اقولج شي... لا تبنين اساس نجاحج في الكتابه على اساس الردود.. انتي شوفي عدد المشاهدات ماشاء الله خلال فتره قصيره قدرتي تجذبين هالعدد.. وها دليل ان القصه حلوه.. وانا شخصيا اول ما شفت القصه اضفتها على دليل القصص الي عندي..

وفي ناس يقرون القصه لكن ما يكتبون تعليقاتهم (شراتي).. وفي ناس مب مشتركين في المنتدى ويقرون القصه..

حبيبتي انا حالي حالج.. دشيت هالمنتدى لغرضي الأول الي كان هو اني بغيت انشر قصتي (حكم الأيام) واول ما نزلت القصه ما لقيت فيها وايد ردود.. وشراتج زعلت وتضايجت ولكن انا كان لي هدف هو اني انشر قصتي.. والأعضاء يبون وقت .. يحتاجون كثير من الأحداث الي تخليهم يتفاعلون مع القصه ويتشوقون لها.. لا تعقين اللوم فقط عليهم .. انتي نزلتي ماشاء الله عليج جريب ثلاث اجزاء مره وحده يعني يحتاجون وقت لغايت ما يقرونها ماراح يقدرون خلال يوم واحد.. فإنتي لازم تعطينهم مجال وتتريين شوي عليهم لغايت ما يقرون القصه على مهلهم.. وانتي يادوب يعني صار لج 3 ايام لغايت احين من نزلتي القصه.. يعني ما وحالهم.. فانتي اعطي الحق لكل جزء ان ياخذ وقته.. وانا انزل ساعات جزء واحد وما القى الرد الا بعد 3 ايام ولا يمكن ما القى رد.. بس صدقيني يوم بتزيد الأحداث وتتفاعل اكثر بتشوفين الردود كيف .. وكيف راح يطالبونج بإنج اتعجلين في الكتابه..

ادخلي في قصتي حكم الأيام ولا آه يا زمن .. ولاحظي نفس الشي.. فلا تخلين هالشي سبب للإحباط.. بالعكس.. تمي اصري على الكتابه... وماشاء الله المنتدى ممزور قصص يعني يبالهم وقت عشان يتفرغون لكل قصه..

فخلج واثقه من نفسج ولا تزعلين من الأعضاء..



(إلتمس لأخيك عذرا فإن لم تجد عذرا فسبعون عذرا)..

والسموحه طولت عليج..
اختج بنت البلاد

[عبق الورد]

بسم الله الرحمن الرحيم

السلام عليكم ورحمة الله وبركاته


شحالكم وشو أخباركم؟؟؟؟؟؟؟؟؟؟؟


أحب أقولكم إني مب زعلانة...... بس مالقيت أي طريقة للفت الأنظارللقصة إلا هذا الأسلوب........ صح إني زعلت بس الحمدلله أنا بسرعة أرضى....



مشكوووور أخوي بقايا قلب... وإن شاء الله بكمل القصة ويهمني أشوف رايك وتعليقاتك على القصة...:)





وأخوي مايد..... أنا وياك إن وايد من الأعضاء مالهم ميوول قصصي.... أعرف هذا الشي زين ومتأكدة منه وأول دليل اخوااني وخوااتي ما يحبون يقرون وايد وخاصة الأشياء الطويلة .. بعكسي أنا عندي هوس بالقراية وخاصة القصص ومن أي نوع....بس أنا إللي شفته ولا عضوعنده ميول قصصي فالمنتدى... يمكن انا اتسرعت مب يمكن أكيد أنا اتسرعت المفروض أصبر وأعطي الأعضاء وقت..... بس شسوي فيني طبع غريب أحب كل شي بسرعة........
ومشكووور أخوي على اهتمامك.:)





أخوي عريشي..... إن شاء الله بصبر على الأعضاء وبعطيهم وقت ... ومشكور على الإهتمام.:)





أختي شامسية وبس...... مشكووورة أختي شمووس على اهتماج....... وأنا مب زعلانة ومنو قال إني بطلع هاي إلا حركات.... أنا يوم أريد الشي ما حب أطلع منه بسهولة... بس هاي طريقة للفت الأنظار.;)





مشكورة أختي بنت الطواش ( طوشة )..... باخذ بنصيحتج بصبر وبتريا الأعضاء يردون عليها ....
وإن شاء الله بكمل أنزل القصة... وصح لازم أعذر الأعضاء لأن الحين وقت سفر وأنا بروحي بعد بسافر...
وصح مثل ما قلتلكم أختي منزلة القصة فمنتدى ثاني بس ما عتقد إني أريد أنزلها فأكثر من منتدى يكفيني اثنين منتداكم و المنتدى إللي أختي مشتركة فيه..:marsa181:






مرحبا أختي الدنيا..... ومشكوورة واايد على الإهتمام... وصدقيني فرحتيني من الخاطر لأنج بتقرينها .......
واتريا تعليقج على القصة..:marsa47:





مرحبا أختي بنت البلاد.. ومشكوورة وايد على اهتمامج.... صدقيني أنا ماريد كل الأعضاء يدخلون ويقروون القصة لا.. على الأقل لو عضو واحد بس يرد علي والله العظيم يكفيني... لو بس عضو واحد رد علي شي أكيد بكمل القصة عشان خاطره...
وصح مثل ما قلتي لازم ما أبني اساس نجاحي فالكتابة على أساس الردود أنا وياج ..........
بس أحب أقولج إن هذي أول قصة أكتبها .. يعني هذي أول كتاباتي فأنا محتاية واايد لدعم
والتشجيع عشان أنزل باقي كتاباتي....
بس مثل ما قلتي بثق بنفسي وقدراتي وما بزعل من حد..:marsa112:






تحياااتي لكم
عبق الورد
:marsa197:

[ابوفيصل]

عبق الورد ...

السلام عليكم ...

اختي انا ما راح اقول اني قريت القصه ... لا والله ...

بس انا والله من النوع اللي قرايته سريعه شويه ...

يعني لو بأبدا فيها ما راح اطول وانا اقرا وراح يخلص وانا بصير متعلق انتظر ...

وانا راد عليك في الترحيبي وقايلك بقرا قصتك ... وانا عند كلمتي ...

بس المشكله ...

انا من يوم دشيت المرسى فيه كذا قصه ابغى اقراها بس ما قدرت ...

تدرين ليه .؟؟؟

اولا انا كنت اقرا قصه حوريه وخربوطه ...

وكلها اسامي وشخصيات ... وقصص عن عوائل اماراتيه ... الاسامي قريبه ومتداخله ...

كذا تدخل القصص في بعض ...

وانا لما قريت اول قصتك ولقيت انها فيها نفس الفكره ... قررت اني استنى شوي ...

وهذا سببي انا اتمنى انه يقنعك ...

وانا الحين داش في قصه ام الجماجم ... ومتعلق بعد ...

عشان كذا اختي ... والله ...

ولا تتضايقين رجاءاً ...

تسلمين لنا على المجهود الحلو ...

ارجو الاستمرار ...

وانا ان شاء الله راح اقرا القصه في القريب العاجل ...

تحياتي ,,,

[زعيم المرسـى]

الأخت عبق الورد ...

أنا الصراحه محمل القصص ما أدشه أبدا يمكن دشيته مره ولا مرتين ومن مبدأ رفع معنويات الكاتب أقوله القصه حلوه وأنا أكون ما قريت ولا كلمه ...

أوكيه أنا أكتب أشعار في محمل الشعر وانتي ما رديتي علي أصلا إنتي ولا مره دشيتي محمل الشعر والصراحه الصراحه أنا أول مره أشوف اسمج ( عبق الورد ) خخخخخخ

(إلتمس لأخيك عذرا فإن لم تجد عذرا فسبعون عذرا)..




وخلاص تقبلي تحياتي ... زعيم المرسى

[هـــزاع]

مرحبا الشيخه

اسمحيلنا يمكن نحن مقصرين وياج ... بس في واايد اعضاء يقرون بدون تعليق وفي ناس ما يقرون الين القصه تخلص وانا واحد منهم


انتي شوفي عدد القراات في قصتج .. ويمكن بعد في زوار يقرون مب بس اعضاء

وتوقفج عن الكتابه او نقلها منتدى ثاني بتحرمين الكل منها


اصبري وربج كريم وسامحينا على القصور

[عبق الورد]

السلام عليكم ورحمة الله وبركاته

أخواني.... ابوفيصل .. زعيم المرسى .. هزاع...

تسلمون والله وهاي كانت بس حركة للفت الأنظار:marsa21:

زعيم المرسى....... كيف تباني أرد عليك وانا عضوه يديدة ...... وإن شاء الله بتشوفني رازه بويهي

فالمحمل الشعر والخواطر........ وإن شاء الله بتشوف تعليقاتي ومشاركتي قريبا جدا.....:marsa94:

ابوفيصل...... وإن شاء الله بعد ما أخلص القصة أعرف رايك فيها.......:marsa58:

هزاع........ أخوي هزاع أنا اصلا مب ناوية اوقف القصة و احطها فمنتدى ثاني......

لأن منتدى مرسى الإمارات وايد عايبني بس حبيت اسويلها دعاية............:marsa196:

والسموووووحة

عبق الورد

[زعيم المرسـى]

بس حبيت اسويلها دعاية


ههههههههههههههههههههههههههه حلوه هالجمله