المساعد الرقمي الشخصي

مشاهدة النسخة كاملة : للنقاش = الصيدليات

أم غيث
18-02-2006, 10:48 AM
السلام عليكم و رحمة الله و بركاته

++--------------------------------------++


أحببت ان أطرح موضوعا للنقاش ...

و أود رؤية تفاعلكم و ردودكم القيمة ...

-----------------------------------------------------

حديثي سيتمحور حول ظاهرة انتشرت في الآونة الاخيرة في الصيدليات ...

ظاهرة مزعجة ...


فعندما نضع اول خطوه في الصيدلية ... و قد احضرنا الوصفة الطبية .. لا نكاد نتفوه بالسلام...

تقفز اليك احداهن (لا ترتدي الرداء الابيض) و تنهال عليك بأسئلتها...

لماذا بشرتك شاحبة اللون ؟؟؟ هل تستعملين كريم او علاج لبشرتك ..؟؟.
(و في الحقيقه بشرتك لا تعرف الشحوب)

لماذا يداك جافتان و اظافرك متشققه؟؟؟
(و في الحقيقه هي رطبة و ناعمه و الاظافر تلمع)

تحيط بعينيك الهالات السود ...
(و في الحقيقه لا يعرف السواد طريق وجهك)

لدي بعض الكريمات الطبية التي ستفعل كذا و كذا و كذا و كذا و كذا .....
و تنتقي لك اغلاهن ثمناً

في المرة الاولى ...
منحتها الوقت الكافي لتقول ما تريد ... و بكل لطف اعتذرت لأنني استعمل كريمات اخرى

و في المرة الثانية ...
اسرعت الى الصيدلاني لأخذ الدواء الذي وصفه لي الطبيب .. و تجاهلت وجودها

و في المرة الثالثة ...
قلت لها ... هل اتيتك قاصدة !!! اتيت لاخذ الدواء و انا على عجله .. و لم اطلب منك تقييم بشرتي و لم اطلب منك علاج معين ...!!!
اعتذرت و تنحت جانبا...

يريدون ترويج السلع او التخلص منها بأي طريقة ... دون مراعاة لحالة المريض المستعجله ... او حتى حاجته الى ذلك المنتج ...

اصبحت الصيدلات مكانا منفرا ...

-------------------------------------------------------------
هل تعرضتم لمواقف مماثلة ؟؟؟
او هل ترون في ما يفعلونه الصواب ؟؟؟
فما هلي آرائكم ؟؟؟
بنت_الطــــواش
19-02-2006, 12:07 PM
وعليكم السلام والرحمه وبركاته
مرحبا بج ام غيث
هممم انا تعرضت لمواقف مثل هذي بس مش في الصيدليه
من فتره كنا بالقريه العالمية ..ومرينا صوب محل ويودتنا وحده تروج لمنتجاتهم الطبيعيه
استلمتنا..جربتوا هالمنتج ووو..اول شي اعتذرنا بادب
بس تمت ماسمه فينا..دخلوا وما بتخسروا ومن الكلام المزين..لين ما تضايجنا منها
ومشينا بدون ما نسوي لها سالفه
...
الموقف الثاني
في بنات يمرون على البيوت لترويج بضاعات بعض الشركات
وطبعا نضطر ندخلها داخل البيت ونضيفها..ومن بعدها تبدي تروج للبضاعه
وإذا قلنا لها ما نبي هالشي ومب محتايين له..فتزين هذي البضاعه في عينج بحيث يكون مافي احسن منها بالسوق
وتحن وتزن..لين ما يستحي الزبون منها ويضطر يشتري البضاعه مب عشان محتاج لها ..
يشتريها عشان يفتك من صدعتها
..
يمكن مثل هالاشخاص معذروين لانهم يدوروون رزقهم
بس في معظم الاحيان اصرارهم على بيع الشي يخلينا نتصرف معاهم بوقاحه

طواشوة
المنارة
19-02-2006, 01:03 PM
السلام عليكم يا أخواتي

أول شي أشكرج يا إختي على هالمشاركة وعلى محاولة إنعاش المنتدى بالآراء والأفكار المفيدة

بصراحة هذي الظاهرة وايد منتشرة والموضفات مب هم المسؤولات عن هالشي بل المسؤولين عنهم هم الي يحرضونهم على الإلحاح على الزبائن وفي النهايه فهي ستحصل على عمولة من بيع أي منتج تشترينه

وأنا مثلج يا إختي ما أحب حد يلح :marsa150: علي ويعطيني:marsa150: تعليقات جدام الناس:marsa150: ويخلونج إتحسين إنج عبره :marsa74: من كثر مايقولونلج العيوب اللي فيج:marsa98:

ومشكوورة على المشاركة:marsa190:
أم غيث
19-02-2006, 01:08 PM
يمكن مثل هالاشخاص معذروين لانهم يدوروون رزقهم
بس في معظم الاحيان اصرارهم على بيع الشي يخلينا نتصرف معاهم بوقاحه

طواشوة



صدقتي و الله ... هالظاهره المنفره منتشره في كل مكان .. اول ما ابتدت كانت في باريس غاليري ..
الله يهيديهم لزقه الين ما يخلونج تشترين المحل بكبره ...
و عقب شوي شوي زادت هالنوعيه من مروجي السلع و استوت في كل مكان


بس في الصيدليه ... ما اعتقد انها المكان المناسب ... يعني الواحد مريض او محموم او مستعيل
ما اعتقد انه بيدش الصيليه يتبضع عادي ... اكيد بيكون قاصدنها عشان دوا معين


تسلمين بنت الطواش على مرورج الكريم و مشاركتج القيمه
أم غيث
19-02-2006, 01:11 PM
السلام عليكم يا أخواتي

أول شي أشكرج يا إختي على هالمشاركة وعلى محاولة إنعاش المنتدى بالآراء والأفكار المفيدة

بصراحة هذي الظاهرة وايد منتشرة والموضفات مب هم المسؤولات عن هالشي بل المسؤولين عنهم هم الي يحرضونهم على الإلحاح على الزبائن وفي النهايه فهي ستحصل على عمولة من بيع أي منتج تشترينه

وأنا مثلج يا إختي ما أحب حد يلح :marsa150: علي ويعطيني:marsa150: تعليقات جدام الناس:marsa150: ويخلونج إتحسين إنج عبره :marsa74: من كثر مايقولونلج العيوب اللي فيج:marsa98:

ومشكوورة على المشاركة:marsa190:

و عليكم السلام هلا المناره ...

و الله مشكله -- ان تصرفنا وياهم بوقاحه استوينا مب ذربين .. و ان عطيناهم ويه مصخوها ...

بس هم المفروض من اولها اذا قلنا لا .. خلاص لا ... لا يلسون يلحون و يلحون و يلحون ...

تسلمين على مرورج و مشاركتج ..
الصواوه
20-02-2006, 05:19 AM
مشكوره أختي على المواضيع القيمة
كل يوم شي يديد وأحلى
الله يعطيج العافية

..........

والله أول مره اسمع ان البايع في الصيدليه استوا حنااان
اللي اعرفه ان المريض يالله بدينه .. ياي ياخذ وصفة الدواء ويطلع
ابروحه تعبان وين ايروم لسوالف البايع وحنته
المحلات الثانيه وقلنا اوكي هذي مهنتهم ايروجون عن بضايعهم بس الصيدليه شلها
....؟!
بس تدرين شو اللي اعرفه
البايع قبل ما يبدأ الشغل ياخذ دوره فن التعامل وياا الزباين
وكيف يكسبهم ويخليهم يشترون السلعه
في منهم شطار ويعرفون كيف يسحبون البايع صوبهم
وفي منهم ايعورن الراس

..........

عني انا اذا زقروني اقول الهم كلمة شكراً واسير عنهم
واذا لحقني البايع اقوله خلني على راحتي بشوف واذا بغيت شي بزقرك
فجي افتك منهم

..........

ShoOOokranhttp://smileys.smileycentral.com/cus/e_1_43.gif (http://www.smileycentral.com/?partner=ZSzeb001_ZNxdm119YYAE)
أم غيث
20-02-2006, 08:36 AM
الصواوه

العفو... و يعافيج اختي


شفتي عاد !!

ما اختاروا الا الصيدلية -- عشان يزيدون ويع الراس ...

هي صاح ياخذون دورات ... بس اعتقد انها دورة في الحنه و الزنه .. مب في عرض السلع ...

تسلمين على المرور
الظبياني
21-02-2006, 10:33 PM
يريدون ترويج السلع او التخلص منها بأي طريقة ... دون مراعاة لحالة المريض المستعجله ... او حتى حاجته الى ذلك المنتج ...

اصبحت الصيدلات مكانا منفرا ...




أم غيث
اعي ان ما قلتيه ..حق في مكانه ..وان الصدليات ..ومخازن الدواء ..ليست المكان اللائق ..لعرض واستعراض ....المستحضرات المختلفه ....ولكن دعيني ..اخبرك بشئ ..
انها ...الحياه ..التي نعيشها اختي ..فهل اصبح ..هذا الشئ هو الا منطقي ..لا والله ..فهناك الكثير والكثير ..من هذا
وتعلمين ..ان الرخصه اليوم ..اصبحت ..نحتوي علي ...اكثر من نشاط ..وانا والله لا الوم هولاء ولكن الوم من اعطي ووافق علي اعطاء ترخيص ..بيع ..المستحضرات التجمليه في الصيدلايات اما انه لا يعي ما يفعل وهذا مستحيل ...واما انه ..ممن يريد ان يستفيد من يريد في هذه الدوله الغافله ..عن ابسط الامور ...لماذا ؟؟ لا نهم ..واكثرهم ..من يقررون ويسنون ..القواعد .والاسس ..
واريد منك تسالي نفسك ..هل هناك من تفكر قبل ان يوافق علي الترخيص ......!!!!السموحه
الظبياني
أم غيث
21-02-2006, 10:40 PM
:: الظبياني ::

و ان كان صاحب الرخصه ... متغافل عن ما يحصل او لا يعير الامر اهتماما ... في النهايه حتى الدواء هو سلعه ... و بامكاننا الحصول عليها من اي صيدلية اخرى لا تتعامل بالاسلوب ذاته ...

لكن .. المؤلم اننا اصبحنا نغير من اسلوبنا مع مروجي السلع فنصبح بذلك وقحين لا نعرف اللباقه و طريقها ... كل ذلك فقط لتخلص منهم ...

شاكره لك مرورك الكريم اخي الظبياني
شـامسيــة وبــس
22-02-2006, 10:10 AM
.................................................. .................................................. .........
وعليكم السلام ورحمة الله وبركاته

ام غيث ... شحالج

:marsa110: هو يا ام غيث مب موقف واحد ...على كل دشه فالصيدليه موقف
............ طبعا الغرض الاول والاخير حق حشرة صاحب الصيدليه هو التخص من بضاعته مثل ما قلتي
وذا بنقول فخاطرنا حليله هذا وايد مهتم .. ترى هو لا مهتم ولا غيره ...ولو صار شي بعد ما حضرته وصف وصفته .. بقول هو مب مسؤول ...
وبصراحه .. الصيدليات المفروض الكل يعرف انه مب كل مستحضراتهم او اغراضهم ما عليها رقابه
وهالشي هو الي كنت مستغربه منه في كورس خذيته من سنه ...ولا كنت مستعوبه انه صيدليه تبيع ادويه على خلق الله .. ما يكو ن عليها اي رقابه من الدوله .. وبصراحه للحين مب مقتنعه

وهالصيدلي .. بسوي نفسه فاهم في كل شي البشره والشعر والامراض والعلل كلهن .. وهو يخرطه
ونحن نصدق ونشتري ...

والحل بإيد المستهلك طبعا .. يطنشه .. او يكون ويه لوح ويوقله ما طلبت منك اشتشاره
وهالاشكال المفروض ننسى وياهم اسلوب الادب ... ولا بنستوي نحن مصخره ينقص علينا


ام غيث ثانكس الووت ... كالعاده وايد اخرط والا اعرف شو خرط ولا يخلصني اجيك شو قلت

وتسلمين والله
.................................................. .................................................. .........
أم غيث
22-02-2006, 10:17 AM
يا حيا الله الشامسية ...

اول شي اشكرج على تواصلج ...

ثاني شي ... صح الحل في ايدنا نحن المستهلكين ... بس اللي ينرفز اسلوبهم يوم يلحون عليج .. جنه غصبا عنج لاااازم تشترين شي انتي ما تبينه ...

عشان جييه الواحد يطلع من طوره و يرد عليهم بردود بايخه

و بالنسبة للأدويه و الله توني ادري ان شي من الادويه ما عليها رقابه ...
بس الحل في ايد المسؤولين و لازم يطرشون مفتشين للتحقق من هالامور ....

تسلمين على مرورج و ردج ...
سجينه الحب
20-04-2006, 01:31 AM
مشكورة أختي أم غيث على الموضوع الحلو والله يعطيج العافية:marsa112: ..
أم غيث
21-04-2006, 11:20 PM
العفو اختي سجينة الحب ..

تسلمين على المرور
عيوز الفريج
22-09-2006, 02:15 PM
مرحبا ملاين ام غيث...
ادري موضوع جديم بس توني اشوفه^_^...
عيبني وقلت خلني اكتب تعليقي على الموضوع...

انا صيدلانيه وبخبرج شو السالفه .. في يوم من الايام رحت صيدله احذال بيتنا عشان ادرب عندهم واتعلم كيف اصرف الدوا..
انزين وكان اللي يدربني واحد مب بلاد الشام وشوي شوي تعلمت كيف اتعامل مع الناس وكيف اصرف ادويه وكيف اشرح طريقه الاستعمال ....
انزين المهم دخل علينا واحد عمر شي واربعين يايب الوصفه وانا استلمتها وكانت عباره عن كريم مال الحساسيه مده استعماله 4-6 ايام وكانت منطقه الحساسيه في ويهه منطقه صغيره يعني لازم وعندي حجمين من هالكريم ((المرهم)) كبير وصغير .. انزين وكان الريال اللي يعلمني هذا من بلاد الشام يرمس فالتلفون وكان يتابع شغلي وانا كنت سايره ويبت علبه المرهم الصغيره لانه مابيحتاج وايد وفجأه هجم عليه وهو يرمس فالتلفون((الصيدلاني مال بلاد الشام)) وسحبني على طرف وقالي اصرفي المرهم الكبير لانه اغلى والريال يبغي يربح وانا استغربت وين الامانه فالشغل ومايقدر حال الريال وبسرعه سحب المرهم الكبير وعطاه حق الريال ومن هذاك اليوم وانا ما اسير ادرب عنده ...



وبس....
أم غيث
25-09-2006, 10:13 AM
مرحبا ملاين ام غيث...
ادري موضوع جديم بس توني اشوفه^_^...
عيبني وقلت خلني اكتب تعليقي على الموضوع...

انا صيدلانيه وبخبرج شو السالفه .. في يوم من الايام رحت صيدله احذال بيتنا عشان ادرب عندهم واتعلم كيف اصرف الدوا..
انزين وكان اللي يدربني واحد مب بلاد الشام وشوي شوي تعلمت كيف اتعامل مع الناس وكيف اصرف ادويه وكيف اشرح طريقه الاستعمال ....
انزين المهم دخل علينا واحد عمر شي واربعين يايب الوصفه وانا استلمتها وكانت عباره عن كريم مال الحساسيه مده استعماله 4-6 ايام وكانت منطقه الحساسيه في ويهه منطقه صغيره يعني لازم وعندي حجمين من هالكريم ((المرهم)) كبير وصغير .. انزين وكان الريال اللي يعلمني هذا من بلاد الشام يرمس فالتلفون وكان يتابع شغلي وانا كنت سايره ويبت علبه المرهم الصغيره لانه مابيحتاج وايد وفجأه هجم عليه وهو يرمس فالتلفون((الصيدلاني مال بلاد الشام)) وسحبني على طرف وقالي اصرفي المرهم الكبير لانه اغلى والريال يبغي يربح وانا استغربت وين الامانه فالشغل ومايقدر حال الريال وبسرعه سحب المرهم الكبير وعطاه حق الريال ومن هذاك اليوم وانا ما اسير ادرب عنده ...



وبس....


حتى لو الموضوع جديم ... تجدد بمرورج المميز اختي

و خاصة انتي من نفس المجال ....

شفتي عاد يبا يربح على حساب الريال... !!

احم احم .. سوري يعني ... قمت من ادش الصيدليات اتعامل وياهم بخشونه شوي .. و دفاشه اذا استدعى الامر ...

مصخوها و الله ...

انتي من نفس المجال ...و ما عيبج الوضع ... كيف نحن :) !!

تسلمين على انعاش الموضوع من اول و يديد :)

و دمتِ بألف خير
ريحة المشموم
25-09-2006, 04:49 PM
موضوع واايد مهم بس الحمدلله ولا مره صادفني هالشي في الصيدليه
أم غيث
26-09-2006, 10:27 AM
موضوع واايد مهم بس الحمدلله ولا مره صادفني هالشي في الصيدليه

زين يا اختي يوم ما صادفتي هالمواقف ...
و الا جان بيرتفع ضغطج ... خاصه اذا كنتي مستعيله و عندج حد مريض ...

تسلمين اختي على المرور و المداخله