مشاهدة النسخة كاملة : ~*&*~"أعظم اسبابي لحبّك .. طيبتك واصلك ذهب"~*&*~
جرناسه
10-06-2005, 10:20 PM
مثل ماوعدتكم اني اكتبلكم قصه يديده .. وهذا هو وعدي.. وان شاالله تعيبكم .. بس كل اللي اباه منكم تشجيعكم حتى اكملها:marsa182:
~*&*~"أعظم اسبابي لحبّك .. طيبتك واصلك ذهب"~*&*~
نوف بنت عمرها 19 سنه وتدرس ف الجامعه ثاني سنه وايد حلوه وطيبه لدرجه فظيعه واللي ايعرفها مستحيل ينساها او ايفرط فيها .. لكنها عصبيه وايد بس دوم تتحمل كل شي حتى لو فوق طاقتها بس الله واعلم جان متنفجر في يوم !!
نوف وهي يالسه ع النت العصر الساعه 5 ونص اتزاعج من حجرتها : سلاااااااااامه سلاااااامه اففف سلوووم وصمخ
سلامه اتزاعج بعد من الغرفه الثانيه : يصمخ يالماصخه وعله اشحقه اتزعجين جي ؟؟ جنه حد ضاربنج
نوف بندت الكمبيوتر وركضت صوبها ودزت الباب بالقو ويلست ع شبرية سلامي اختها وهي امسويه عمرها امعصبه
سلامه كانت اتسحي شعرها جدام المنظره ومره وحده زاغت وقفزت : وسممممممم الهي ايسمج طيحتي قلبي .. بلاج انتي جي امصرقعه شو تبين؟
نوف تطالعها ابنص عين : سلووووم ليش اتقوليلي الصمخ يصمخني .. خلاااااص عيل كان عندي لج خبر حلو يسوى ملايين بس انتي مب ويه حتى نص
سلامه تيلس ع ركبها جدام نوف واتيود ايدها بكل براءه : فديييييييييييت روحج نوافي والله .. اقصد يصمخني انا يعلني فدى اذنج انا بس ههههههه قولي قولي شووو .. (واتسوي شرات حركة اليهال يوم يترجون)
نوف اتصد عنها الصوب الثاني : لالالا خلاااص انسي لاتحاوليين مافي امل
سلامه اتسوي عمرها بتصيح : قولي أهون عليج وحليلي اختج انا
نوف اتمد ريلها : أول تعالي بوسي ريلي بعدين بخبرج يالله جدااااااامي
سلامه اتنش عنها: اتخسييين واتهبيييين انا ابوس ريلج انتي .. انا ويهج مابسته ابوس ريلج الحين ؟؟
نوف اتسوي عمرها بتظهر من الحجره : كيفج خلاص مابخبرج
سلامه واتبين انه مايهمها : احسن انا بعد مايهمني
نوف: سلامووووووه بيطوفج ترى خبر يسوى حياتج
سلامه وهي تربط شعرها : عادي ابرايج اذا ماتبين اتقولين .. ترى باجر بعرفه ببلاش
نوف واتسير صوبها : خلاص خلاص رحمةً فيج بس بخبرج ولو اني مب متفيجه
سلامه : ........... تطالعها
نوف تلعب في قصتها : امممم بس حبيت اخبرج انه فارس احلامج البريئه خطبج وركضت عنها نوف
سلامه انصدمت منوه هذا ليكون محمد .. ياااالله لو طلع محمد مابرقد الليل ياليته هو ان شاالله هو .. وركضت صوبها سلامه
سلامه وهي مب مستوعبه : نوفوووووووه منوه هذا اللي خطبني ومنوه خبرج
نوف وهي اتطلع ثيابها من الكبت : شوبتعطيني لو خبرتج ؟
سلامه وبضيج : اففففف يا نوفوه عاده ذليتيني مايسوى عليّه
نوف تطالعها ابطرف عينها : صدق انج هبله .. وانتي كم فارس احلام عندج ؟
سلامه ماتوقعت بس سوت عمرها عاديه : اشعرفني شو هالرمسه بعد ابسرعه ورايه شغل خلصيني وقولي منوه
نوف : اللي يسمع ابشغلج ايطيح واقف .. الله ايسلمج هذا واحد (واتصد صوب اختها) ايسموووونه محمد ولد عموه حصه
سلامه ماصدقت واتمنت لو الارض تنشق وتبلعها ووااايد استانست من الخاطر وأخيرا بياخذها اللي تباه وتمت واقفه مكانها وساكته واتحاول تستوعب
نوف اتنش وهي سايره تتسبح وقفت صوب الباب : سلامه لاتتحريني ما اعرف انج اتحبينه .. ادري انج ذايبه فيه من زمان بس ماحصلتي حد تفتحيله قلبج .. وانا سمعت هالخبر من امي وهي يالسه اترمس عموه حصه ف التلفون وقالولهم عقب اسبوع بيون يخطبونج رسمي .. بس لاتسيرين اتقولين لحد لانه لين الحين ماصار شي ولو امي درت اني خبرتج بتذبحني .. ودشت الحمام
سلامه وهي مصدومه .. معقوله محمد خطبني وانا اللي من زمان اترياه .. وأخيراً انتبه لي وحرك مشاعره صوبي .. ياااالله يامحمد والله اني مب امصدقه انك بتكون ريلي ف يوم .. اشكثر اتمنيت هاللحظه والله يعلم اني اموووت ف حبك من اربع سنين .. واخيراً واخيراً .. متى بيي هاليوم بس .. يارب انك اتعدي كل شي على خير .. وراحت سلامه حجرتها وقفلت على عمرها الباب وتمت اتفكر في محمد اللي اتحبه
سلامه عمرها 24 واتحب محمد من وهي عمرها 20 وسلامه امخلصه دراستها بس ما اشتغلت وفضلت انها تيلس ف البيت .. مع انه عندها هندسة كمبيوتر
طلعت نوف عقب ماتسبحت وراحت اتدق الباب على سلامه بس ماردت عليها فعرفت انها راقده ونزلت تحت في الصاله وشافت امها واخوانها يالسين
نوف : خلاص لاداعي والله الله ينعم علييييكم بس بس سعود اسكتن اسكت قلتلك الله ينعم عليك بلاك ماتسمع عبود انته بعد خلاص ياجماعه
وضحكوا على خبالها
عبيد يضحك عليها : بسم الله عليج بلاج اتخبلتي
سعيد : اختك هاي مب صاحيه اونه تحسدون شعري عاده من زينه الكشه
نوف اتدح عبيد وسعيد ع ظهورهم واتقول حق سعيد : ودك الا انته ابهالشعر فديته
سالم : فداااج الند والبحر المسود قولي امين
ام عبيد اتحرطت ع سالم : لاتقولها جي فديتها انا يلعني افداها بنتي الغاليه قولوا ماشالله عن تضربونها ابعين
عبيد يطالع امه باستغراب : من زينها على الشو عاده
سعيد ايشوف عبيد : عبود نش نش قم خلنا نظهر بنسير بيت عموه محمد يبانا ف الميلس كلهم متيمعين
سالم ايشوفهم : وانا مالي رب ؟؟
سعيد : اسمحلي فديتك قم ويانا جان بتي والله نسيتك
عبيد : سعووود واشحقه اتقولي عبود شو ياهل انا ؟
سعيد يبتسمله : ههههههه فديتك اسمحلي بس عاده مابينا شي انته الا اخويه
عبيد صدق عمره : هيييييه اتحرى بعد بس دام نيتك طيبه خلاص هههههههه
سعيد : ههههههه فقدتك
ام عبيد : ولاااااا جنه امكم يالسه على كيفهم اتشاورا وبيظهرون حشى قولوا امنا جدامنا حشموا شويه
عبيد ايحب امه ع راسها : فدييييييت ام عبيد انا .. الا هو بيت عموه حصه
ام عبيد : هيه هيه ياللوتي انته اونك عاده .. انزين يا امي ماقلنا شي بس عاده خبروني قبل لاتتشارون ارواحكم
نوف : امييييييييييييييييييييييييييييي فديتج واتبوسها انا بعد ابا اسييييير
سعيد : يالله يالله اليهال ايلسون ف البيت نحن بنسير عند الشباب وانتي شوبتسوين ؟ بتيلسين ويانا ؟
نوف اتطلعه لسانها : سخيف بسير عند اموووون فديتها بسليها من زمان ماشفتها
عبيد يقرص نوغ ف ايدها : بسليها اونه .. الا قولي بخبلها وبلوع ابجبدها وبرد البيت
نوف اتزاعج وشوي وبتصيح : آأااااااااااااااااااااااي يالسخيف ماحبك ايعور
سالم يضحك : لا الريال ايموت فيج
عبيد ايسويلها حركه بيده : دخيلج رحمي حالي احبج .. مالت على هالويه
نوف: جب جب الا انته بدوني ماتعيش والا منوه بيريحكم وايسليكم في هالبيت هااه
ام عبيد اتنش بتسير المطبخ : اسميكم الا امخبل .. بسكم من هالحشره ونوفوه جان تبين اتسيرين سيري بس لاتتحيرين بس وين سلامه ؟
نوف وهي سايره صوب الدري : راقده الدبه
ام عبيد : دبه ام ريلج هههههههههههه وحليلها رمسنا عنها قبل مانعرفها ههههه
سعيد ايقول لعبيد : انا اشهد انه الوالده اتخبلت
ام عبيد اتسير صوب سعيد واتيره من اذنه : مسود الويه شو قلت ؟؟ تتحراني ماسمعتك؟
سعيد يبا ايفج ايدها : امايه فديييييييييييييتج فجي اذنيه .. لا والله اسولف ماعاش اللي يرمس عنج بس فجيني
ام عبيد اتفج اذنه : هييييه اتحرى بعد مسود الويه ولا تحشم .. شو اسوي يا امي متخبله من خبالكم
سالم يضحك عليهم : يالله قوموا بنتاخر ع الريال
وسارت ام عبيد المطبخ ونشوا سعيد وعبيد وسالم ساروا يتلبسون عسب ايسيرون بيت عمتهم حصه
عبيد اكبر من سلامه بأربع سنين وعمره 28 ويشتغل ف شركة ابوه اللي ماقصر بحلاله من نعقب ماتوفى وعبيد شخصيته وايد حلوه وياحظ اللي بيحبها ولأنه شخصيه وايد حساسه وكتوم ف نفس الوقت وماعرس لين الحينه لانه ماحصل البنت اللي اتناسبه
سعيد اصغر منه بسنه وعمره 27 وهو بعد يشتغل ويا عبيد .. وسعيد وااايد حلو وايخبل احلى واحد ف اخوانه وله هيبه وشخصيه عجيبه ..
سالم وعمره 25 وكان يشتغل ف نفس الشركه بس قرر ايكمل دراسته وياخذ الماجستير .. وسالم من النوع الوايد هادي وحبوب
يعني ماشاالله على هالعايله كل واحد ايكمل الثاني
والحينه قولولي شو رايكم ف هالجزء البسيط حتى اقدر اكملها ...
واتريا ردودكم
بنت البلاد
11-06-2005, 04:43 AM
الله وناسه.. عمل جديد .. ولا بعد.. من تأليفج الخاص..
حلو حلو..
يلا عيل.. بخليج بسير أقراه وبرد عليج خبر..
أما سويت لج دعايه عليه في موضوع انباء المحمل.. شوفيه
الصواوه
11-06-2005, 04:43 AM
الصراااحه حلووه ...
وناااسه اعيبني اللساان الطويل ...
لااااا وفيهااا قصة حب ...
يالله متى اتكمله ...
شوفي مااا فيني صبر بالمره ...
حلو اسلوبج ...
إلى الاماام داائمااا ...
جرناسه
11-06-2005, 05:04 PM
مرحبــــــــا :marsa136:
تـــونــي نـــاشّه مـن الرقـــاد ويــايتنكـــم ابكشتــــي -------> :marsa167:
:) ... "بنـــــت الـبـــــلاد" ... :)
تسلميـــن الـغاليــــه ... ووجــــودج هــو الأحلــــى :marsa72:
وان شـــاللـــه اتـــكون عنــد حســن ظنكـــم :marsa94:
واتمنـــى وجــــودج ويـــايه دوم فديتـــــج ...
شفــت الحفـــله اللــي سويتيــها عــن القصـــه :marsa117: آخـــر عمــري مطــربه
بـــس :marsa194: ا
:) ... "الــصــــــواوه" ... :)
مشكـــور الغــاليــــه عـــلى ردج ... :marsa72:
وردج هـــو الأحـــلى ..
وان شـــاللــه اتعيبـــج القصـــه
ولاتحرميـــني مــن ردج وتـــواجـــدج حبيبتـــي :marsa197:
حتــى أنــا أحــب اللســان الطويــــل :marsa165:
جرناسه
11-06-2005, 06:10 PM
الجــــزء الثـــانـــي
~*&*~"أعظم اسبابي لحبّك .. طيبتك واصلك ذهب"~*&*~
سارت نوف فوق عسب اتبدل ثيابها مثل ماخبرتكم .. دشت حجرتها وبدلت وطلعت من حجرتها وشافت باب حجرة سلامه امبطل فدشت عليها وشافتها تتسبح ف الحمام .. راحت صوب شبريتها حصلت شرات الدفتر مفتوح قربت منه وشلته .. وطلع البوم صور فيه صور سلامه ومحمد يوم كانوا صغار ويلعبون ويا بعض .. ليييين ماكبرت سلامه وشافت صورة محمد هالايام .. استغربت نوف .. سلامه من وين يابت هالصوره ؟ هاي كانت موجوده عند سعيد شو يابها ف البوم سلامي .. وشافت دفتر صغير مكتوب فيه خواطر وقصايد كلها من سلامي لمحمد .. ضحكت عليها نوف بس في نفس الوقت تسأل من وين يابت سلامه صورة محمد وهي كانت موجوده عند سعيد
طلعت سلامه من الحمام وهي حاطه الفوده ع شعرها ..
سلامه فاجه عينها : نوفوووووووووووه .. شوتسوين انتي اهنه ؟
نوف اتفر الدفتر وبارتباك : لالا ولا شي شو كنت اترياج ابا اخبرج اني بسير بيت عموه حصه جان بتين
سلامه وقلبها ايدق : ويا منوه بتسيرين ؟ وبعدين ليش تتعبثين بأغراضي ؟
نوف اتسير صوب سلامه وتوقف جدامها : بسير ويا سعود وعبود وسلوم
سلامه اتطوف عنها : ماشالله يلعبون وياج هم اونه سعود وعبود وسلوم .. ايه ايه عيب بعد شو هالمذهب
نوف باستهزاء : ويعنييييييييييي ؟ كيفي اخواني فديتهم مايقولون شي
سلامه صوب شبريتها وشافت الدفتر والالبوم مب شرات ماخلتهم قبل ماتسير تتسبح زاغت شوي وصد
ت صوب نوف ونوف كانت يايه بتطلع بتشرد عن تاكلها سلامه : نوفوووووه .. ممكن اعرف شو شفتي وليش تلعبين ف اغراضي ؟
نوف كانت زايغه بس سوت عمرها انه عادي عندها : أولاً اسمي نوف ياسلوووم .. وبعدين انتي روحج خبله وحاطه كل شي ع الشبريه والباب امبطل .. محد قالج روحج يايبه الفضايح حق عمرج .. (سارت نوف صوب سلامه وحطت ايدها ع جتفها) بعدين انتي ليش زايغه .. مب انتي اتحبين محمد؟ ومحمد الحينه خطيبج ؟ عيل شو امخوفنج ؟
سلامه : لا بس يعــ
نــوف تقطعها ف الرمسه : لا بس ولا شياته .. انا اعرف انج زاغيه اسألج من وين يبتي صورة محمد وهي عند سعيد
سلامه مرتبكه بس ساكته
وبعدين انا مالي خص لافيج ولا ف محمد .. وكيفج جان يبتي صورته والا رقمه … لاني ادريبج اختي العوده ومب مال هالحركات ومب قصدج شي بس لنج اتحبينه تيبين صوره وماعرف شو هههههههههههههههههه اونه الحب العذري
سلامه تبا تضحك بس سوت عمرها امعصبه ودزت نوف عسب تطلع برع الحجره : جب جب يالله برع
نوف وسايره بتظهر من الحجره : يالله جااااااااو اي ول جو ناو
سعيد يزقر نوف وهو تحت : نوووووووف نوووووف ويهد يالله استعيلي ترانا بنسير عنج وبنهدج ابسرعه خلصينا
نوف سارت تركض صوب الدري : يايه يايه .. سلامييييي باااااااي
سلامه تركض وراها : نوف نوف لحظه لحظه
نوف مستعيله : هاااااه يالله شوتبين ابسرعه بيروحون عني
سلامه : صبروا صبروا بيي وياكم وتركض حجرتها
عبيد طالع من حجرته ويشوف نوف : انتي ايييييييييييييه بعدج ماخصلتي ؟ قلنا بنسير بيت عموه مب سايرين عرس
نوف اتشوف باب حجرة سلامه : شو اسوي اختك العاقله تبا تي ويانا وقالت اتريوني
عبيد نازل من الدري : ياهي بلشه وياكم انتوا .. المفروض نحن مانرمس جدامكم .. حشى كلكم بتون .
نوف اتدحه ع ظهره : تتمنووووون وجودي وياكم
سعيد واقف تحت : عبيد يابويه البسها هاي الخبله وطوف بنسير السياره
سالم واقف برع ف الحوي
عبيد : يالله بس نتريا سلامه بتي
سعيد يتأفف : اففففف ويعني شكلنا باجر بنسيرلهم
نوف اتشوف سعيد : بخبرك وانته شو عايلنك ؟ الا هو حمووود
سعيد : شو هالرمسه بعد ؟ شو حمود ؟ اصغر عيالج هو ؟؟ استحي وخيلي نحن اخوانج قلنا ماعليه بس عاده ولد عمتج .. صدق انج مب صاحيه
نوف اتعدل شيلتها : لحظه لحظه خلوني اعدل شيلتي عن حد يحسد شعري فيكم عاده انتوا عيونكم ضوووو
عبيد يمشي ويا سعيد سايرين صوب الباب : من زينه
تركض سلامه من فوق : يايه وييييييت
نوف : بسم الله عليج ابسرعه ابسرعه اتاخرنا
وطلعوا كلهم من البيت سلامه سارت ويا سالم ف سيارته
نوف سارت ف سيارة عبيد
اما سعيد سار ف سيارته ابروحه وقال انه بيلحقهم
ف سيارة عبيد
نوف تتعبث بالأشرطه : اففف عبيد ماعندك شي عدل نسمعه
عبيد : انا جان ماادعم بسبتج
نوف اتحط ايدها ع قلبها : فديييييييت اخويه انا بعيد الشر عنك
عبيد يضحك : ههههههه خبله
تمت نوف اتدور بين الأشرطه وحصلت صورة ابنيه بس ظلام ف السياره ف ماعرفتها منوه .. انصدمت معقوله عبيد جي ايسوي ؟ وهاي منوه ؟
عبيد حس انه فيه شي : نوفوه بلاج هالكثر اتشوفين اي شريط تبين ؟
نوف بارتباك : هاه .. لالا بس ظلام ويالسه اقرا اللي ع الشريط ماشوف عدل
عبيد رفع ايده بيبطل الليت : خلاص ببطلج اللي
نوف اتزخ ايده : لالالالالا لا تبطله خلاص عرفته هذا شريط عبد المجيد بس بس مايحتاي
عبيد ايشوفها وهو مستغرب هاي بلاها شو استوابها مره وحده
شلت نوف الصوره عسب اتشوفها عقب شو سالفتها بس ابدون مايحس عبيد وحطتها ف شنطتها
ورن تلفون عبيد
عبيد : الووو
محمد : السلااااام علييييك
عبيد : هلا والله وعليكم السلام .. اشحالك محمد؟
محمد : يسرك الحال .. انتوا وينكم اتاخرتوا والشباب يتريونكم
عبيد : ف الدرب واصلين ان شالله
محمد : يالله لا تتحيرون نترياكم
عبيد : ان شاالله
ويبندون عن بعض
عبيد يسأل نوف : نوف .. عليا بنت عموه حصه كم عمرها الحين ؟
نوف مستغربه من السؤال :عمرها 23 اعتقد ليش ؟
عبيد : لا بس اسأل لانه بغيت اعرف هي تدرس ف الجامعه والا
نوف تضحك : هههههههههه عبيد بلاك حبيبي اقولك عمرها 23 اكيد تدرس ف الجامعه
عبيد وايحس انه سؤاله غبي شوي : اسولف وياج اشوفج شو بتسوين قلت خبله وبنخبلبها زياده
نوف : ههههههههههه الخبال الا منكم
وف سيارة سالم سلامه تضارب وياه ويتحرشون ف بعض هذا ايحط على هذا
سالم : اييييه بسج من الحشره
سلامه : محد الحشره الا انته
سالم : لا اتحريت بعوضه هاهاها
سلامه : بااااااااااااااااايخ
سالم: مب ابيخ عنج
سلامه تلعب ف تلفونها واتشوف مسج واصلنها من اربيعتها مريم
(سلامه اشحالج فديتج ؟ بس بغيت اخبرج انه باجر العصر اذا مابتظهرين بيي عندج )
اترد سلامه اتطرشلها مسج
(حياج الغاليه وانا ماعندي شي اسويه يالسه ف البيت ما اظهر)
سالم ايشوفها تلعب ف التلفون : شو تسوين ف التلفون
سلامه وبعدها تلعب فيه : ماشي اطرش مسج حق اربيعتي
وتموا ساكتين طول الدرب
وعند سعيد
طبعاً هو ابروحه ف السياره
ويرن تلفونه والرقم غريب اول مره ايشوفه بس رد عليه
سعيد : الو
: …..
سعيد مستغرب : الووووو
: مرحبا
سعيد يسمع وايقول شو السالفه : مرحبتين منوه ويايه
: انته سعيد ؟
سعيد يعقد حياته : هيه نعم سعيد انتي منوه ؟
: انا وحده
سعيد يضحك : هههههه ادري نج وحده عيل واحد بس شو بغيتي ؟
: لا بس حبيت اسمع صوتك
سعيد : انتي منووووه ؟
: ماله داعي اتعرف .. بس انا وحده حبيتك من كل قلبي والله الشاهد على اللي اقوله ادري انك ماتعرفني بس انا اعرفك .. دوم اشوفك .. بس انته ولاكلفت عمرك اتشوفني لو بنظره .. (وبدت رمستها تتقطع كانت اتصيح) .. سعيد انا احبك والله احبك وليتك اتحس او تدري .. انا حياتي كلها امخلتنها لك انته .. ادري بتقول هاي بلاها ومنوه هي .. بس بتعرف روحك بعدين
وبندت
سعيد ايشوف تلفونه ومنصدم
منوه هاي . اتحبني . اتشوفني ؟؟؟ … شو ياها هالانسانه ؟ من وين اتعرفني ؟ متى حبتني ؟ ولا بعد اتصيح عشاني انا .. شو سالفتها
وخزن سعيد رقم البنت ف تلفونه
وبيشوف سالفتها عقب
وصلوا كلهم بيت عمتهم حصه
نزلوا من سياييرهم
نوف تزقر سلامه : سلاموووه يالله امشي ابسرعه بلاج جنج عروس
سلامه وقلبها ايدق لانها جريبه من محمد : اخاف على نعالي اتصدقين
نوف تمشي بتدش داخل مب امسوتلها سالفه : كيفج انا سايره
دشوا داخل بس نوف كانت اول وحده اتدش
وسلمت على عمتها وبنات عمتها الصغاريه وسارت فوق حجرة امنه
اما سلامه بعدها صوب الباب وتدعم حد ما انتبهت منوه رفعت راسها بتشوف
شافت محمد وويها احمرررررر
معقوله انا مااشوف يعني .. افف اسميني امطيره ولا ادري وين الله حاطني الله ياخذ عدوج يانوفوه سرتي وخليتيني بس انا براويج
محمد يبتسملها : اشحالج سلامه ؟
سلامه استحت : اب خيرررر
محمد : شوفيج ؟
سلامه زايغه وسمتحيه وترمس بالغصب : لا مافيني شي
محمد وسلامه تموا ساكتين
محمد اينزل راسه : سلامه
سلامه قلبها ايدق بالقووو فديته يوم ينطق اسمي : ..
محمد يرفع راسه وايشوف السما : ودي اخبرج برمسه في خاطري
سلامه تمت ساكته
محمد ايشوفها : يعني مابتردين؟
سلامه : قول
محمد : بخبرج ابصراحه بس ماباج تزعلين
سلامه زاغت حست انه فيه شي : …
محمد وايصد عنها : سلامه .. انا
سلامه : انته شو ؟
محمد مب عارف شو يقول بس مجبور ايقولها الصدق :
سلامه انا .. انا ماباج
وسار عنها صوب الميلس
وتمت سلامه واقفه مكانها ودمعت ابدون ماتحس ومب امصدقه اللي تسمعه
شووو ؟ محمد مايباني ؟ عيل كيف خطبني ؟ .. حرام علييييييييييك ذبحتني يامحمد .. ذبحتني .. سنين وانا اترياك واحبك .. والحينه اتقول بكل سهوله ماباج ؟؟ ليشش انا شو سوييييتلك ؟ .. وتمت واقفه مكانها واتدمع
تتوقعون شو بيستوي بين سعيد واللي متصله فيه ؟ ومنوه اتكون ؟
شو سالفة الصوره اللي في سيارة عبيد ؟
شو اللي ممكن يستوي بين سلامه ومحمد ؟
في حد بيشوف سلامه وهي بهالوضع ؟؟
شو اللي ممكن يتغير ؟
اتريوني ف الجزء الياي
الصواوه
12-06-2005, 02:21 AM
لااااااااااااااا ... كملي ... اباااا اعرف شو بيستوي ...
حراااااااااااااام غمضتني ليش جي جاسي حمووووود ... دفش ...
بنت البلاد
12-06-2005, 03:09 AM
تتوقعون شو بيستوي بين سعيد واللي متصله فيه ؟ ومنوه اتكون ؟
اممم ماعندي فكره.. ومنو تكون هالإنسانه.. هالشي الي مابنعرفه غير منج ان شاء الله.. <<عورت قلبي الصراحه :marsa93:
شو سالفة الصوره اللي في سيارة عبيد ؟
اممم يمكن صوره بنت عمته هاي الي رمس عنها مادري شو اسمها:marsa139:
شو اللي ممكن يستوي بين سلامه ومحمد ؟
بتكرهه سلامه.. وبترفضه دام انه كان مجبور يوم خطبها وهو قال لها عشان هي تفهم وتفكه من الورطه وترفضه
في حد بيشوف سلامه وهي بهالوضع ؟؟
اخوها.. أو اي واحد من اخوان محمد اذا وجد.. والله أعلم
شو اللي ممكن يتغير ??
اممم.. مافي اي فكره
الصراحه.. سمحي لي اقول لج.. مبدعه مبدعه مبدعه.. والجزء رهيييييييب الصراحه... ومبين على القصه حلوه.. بس اجزائج تنزلينها لنا بالقطاره ولا شو السالفه؟؟ :marsa86:
المهم مافيني اتريا وايد لأني مستعجله خاااااالص :marsa146: ..
نتريا الجزء.. وكملي ونحن معك
اطياف الذكريات
13-06-2005, 03:41 PM
اووهوو اختي جرناسة تقطع التشويق
خسارة
اختي الأجزاء جنهم نقطة نقطة
بصراحة اختي انتي مبدعة فنانة و احلى من جيه
ما قصرتي اختي
بس نبي جزء طووووووووووووووويل اوكي
تراني ما اعرف اصبر و اذا صبرت و اترييت قولي مخلوقة من كتلة صبر ههههههههه
اوكي اختي لا تبطين
اترياج تراني
و سلملم
اطياف العذارى
الصواوه
14-06-2005, 02:17 AM
شو رايج جرناسة اتطرشين القصه كاملة ع ايميلي ^_^ فكره حلوه وسهله .. وما بتريااا وااايد ..
صدقها أطياف العذاري نبا جزء طووووووووووويل
شكرا
لحن الحياة
14-06-2005, 12:47 PM
مشكورة جرناسة على القصة الروعة
اتمنى انش تكملين القصة بسرعة
وعندي ملاحظة بسيطة.....
ياليت يعني تستخدمين لون غير بصراحة وايد متعب في القراءة
ومسامحة على الازعاج
لحن الحياة
هجورة
16-06-2005, 02:18 AM
القصة روووووووعة مشكورة
انتظر الجزء بسرعة وقت
جرناسه
17-06-2005, 01:20 AM
مــــرحبــــا :marsa29:
اسمحـــولي ادري اتأخرت عليكم وايد ... وحبيت اقول لكل من يتابع القصه
اني باجر بنزل الجزء اكيد ان شاالله ..... واسمحولي على التأخير ...
جرناسه
17-06-2005, 01:54 AM
انا قلــت بنزله باجر ... بس مابخليكم تتريون وهذا الجزء الثالث
لكن قبل ما انزله
أحب أشــكــــر "بنـــت البـــــلاد" ... :marsa112: لانهــا ساعدتنـــي ف هالجـــزء ... وان شــالله بتكـــون مســاعدتـــي ف كــل القصـــه من الأجــــزاء اليـــايه .... ومــشكـــوره بنت البــلاد علـــى اهتمــــامـــج ....
وطبعـــاً مثــل ماطلبــت منــي هجـــورة اني اغــير اللـــون ... حتــى ايســـاعدهـــم ف القــرايـــه .. اسمحــــولي عميتــــكم :marsa140:
وهــــذا الجـــــزء الثـــالـــث
"بمســـاعدة بنــت البــــلاد"
مثل ماعرفتوا انه كلهم ساروا بيت عمتهم حصه سلامه ونوف سارت عند بنت عمتها امنه وسعيد وعبيد وسالم ساروا يتيمعون ف الميلس عند الشباب ويا محمد وربعه
في حجرة امنه
نوف تحضنها : أموووووون اتولهت عليييييج امممممممواح
امنه تضحك واتشوف نوف : ههههههههه فديت روحج وانا بعد اتولهت عليج فديتج
وعلى فكره امنه تدرس مع نوف في نفس الكليه
امنه : نوف ليش سلامه مايت وياج ؟
نوف باستغراب : سلامه!! .. سلامه يت ويايه بس بلاها الخبله مايت فوق اكيد شافت حبيب القلب تحت
امنه : قومي انسير انشوفها
نوف اتنش : يالله
ونزلن البنات تحت ماحصلوا سلامه ف الصاله واستغربوا
نوف زايغه : هاي وينها وين سارت ؟
امنه اتدورها ف الغرف اللي تحت : ماعرف وينها
امنه تزقر امها : اميييييييييي .. امييييييي وينج
ام محمد : هاه امايه انا ف المطبخ تعالي شو تبين
نوف وامنه سارن صوبها
امنه : امي ماشفتي وين سلوم ؟
ام محمد تطالعها : انتي ايه شو بعد هالرمسه شو سلوم ؟ جي اتقولين حق ولد عمج سالم ؟ استحي وخيلي يالله
نوف وامنه ماتن من الضحك
نوف : هههههههههههههههههههههههههههههه عموه هي تقصد سلامه
ام محمد : الله ايخس عدوها هاي امنه بعد طمه ماتعرف اتقول الاسم شرات الاوادم
(آمنه) اتبطل الثلاجه واتدورلها شي تاكله هي ونوف : انزين امي وينها ؟
ام محمد : مادريبها والله جيه هي مب عندكم ؟
نوف اتأشر حق امنه انها ماتبا تاكل شي
نوف : لا عموه هي يت ويايه بس ما اشوفها دشت
ام محمد اتعابل الاكل
ام محمد : جنه الا يالسه ف الحديقه برع عاده انتوا اتعرفونها سلامه من صغرها هي ومحمد ايموتون على اليلسه ف الحوي
نوف وهي بتطلع من المطبخ : امون نشي بسج عاده اربع وعشرين ساعه تصرطين خلاص عقب بناكل ههههههه قومي بنشوف سلامي
امنه : الله واكبر عن تضربيني بعين قل اعوذ برب الفلق انزين بطني بطني
نوف : ههههههههه يالله نشي عاده
امنه : اوكي يالله
وساروا ف الحوي ولقوا سلامه يالسه على المريحانه ابروحها بس هم يايين من وراها يعني سلامه عاطتنهم ظهرها
نوف اترمس امنه بصوت واطي : بلاها سلامه ؟
امنه اتسوي بيدها يعني ماعرف : علمي علمج
ويسيرون وراها بس تموا صاخين ووقفوا وراها لانهم سمعوها ترمس عمرها
سلامه وهي اترمس عمرها : ليش يامحمد ؟ ليش جي اتسوي فيني عيل انا اللي احبك وحاطتنك في قلبي اربع سنين ومستعده اتريا العمر كله عشانك واخر شي اتقولي ماباج انا شو سويتلك ؟ انته شو شايف عليه؟ هنت عليك تجرحني عقب هالسنين؟ من الله انك ماتطالعني ولا بنظره والحينه يوم اني استانست وقلت واخيراً اللي اباه بيستوي اتقوم واتقولي ماباج عيل انته ليش خطبتني شو تبابي ؟ اذا انته مجبور عليه ترى انا مااجبرك اتم العمر ويايه .. الف من تتمناك يامحمد وانا اولهم
وتمت سلامه اتصيح
وانصدموا امنه ونوف من كلامها
نوف توقف جدامها واتحط ايديها الثنتين ع جتفها وتنزل على ركبها جدام سلامه لانها امنزله راسها : سلااااامه انتي شو يالسه اتقولين ؟؟
سلامه اتصيح وتحضن نوف : مايباني يانوف مايباني
امنه توقف حذال نوف : شو بعد مايباج ؟ غصباً عنه يباج مب ابكيفه بس معقوله محمد جي قالج ؟
سلامه تمسح دموعها : والله جي قالي وقالي لاتزعلين بس انا ماباج
نوف : عيل انتي بعد شو تبيبه ؟
امنه اتشوف نوف بعصبيه : شو بعد شو تبيبه ؟ النبت اتحبه وعايشه العمر تترياه واتقوليلها شو تبيبه ؟
نوف تلف راسها لانه امنه واقفه واتشوفها : اسمعي يا امنه دام الريال يت من نفسه وقالها ماباج يعني مايباها .. وانا ماارضى اشوف اختي اتعذب عمرها عسب واحد ماقدرها ولا سوالها جيمه .. اسمحيلي امنه بس اخوج شو يتحرى عمره ؟ بنات الناس مب لعبه بيده .. وهذي بنت خاله وجي سوابها ؟ عيل الغريبه شو بيسويبها ؟
امنه : بس يانوف انتــ ..
سلامه وبصوت عالي : خلاااااااص لا بس ولا شي .. قولي لخوج الحين انا اللي ماباه لو على قص ارقبتي وهاي الرمسه امانه ف ذمتج توصلينها تسمعيييين .. وقوليله انا مب ميته عليه ولا عاقه عمري عليه .. واللي مايباني مره ماباه الف لو ان شاالله اموت فيه
شرات ماباعني ابييييعه انتي فاهمه ؟
امنه دمعت : انزين انا مالي خص ليش جي اترمسوني ؟؟ انا شو ذنبي
نوف تلوي على امنه : والله يابنت عموه ندري انه مالج ذنب بس اتعرفين الحاله اللي نحن فيها ولاتزعلين منا
امنه اتسير صوب سلامه وتوقف وراها : اسمعي سلامه .. انا مابغصبج على اخويه بس كنت اتمنى انج اتكونين انتي مرت اخويه واولى من الغريبه فيه .. انا مالي حد غيركم انتوا لا عندي خوات ولا شي بس عندي اخو واحد واتمنيت انج اتكونين عايشه ويانا عسب ما احس بالفراغ اللي انا حاسه فيه
سلامه تبتسم لها ودموعها ف عينها : نحن خواتج وكلنا وياج بس الا محمد هو اختار طريجه واختار انه ايكمل حياته ابدوني وانا مستحيل ارضى بواحد مايباني..وانتي بتمين بنت عمتي ومافي شي بيتغير..
امنه : انزين ماتعرفين هو ليش قال جي ؟
ف نفس الوقت طلع محمد من ميلس الرياييل لانه امجابل الحوي وساير الطبخ اللي برع يزقر البشكاره بس شاف سلامه ونوف واخته وسمع الرمسه وتم واقف
يبا ايعرف شو السالفه
سلامه : اخووج طول عمره مغرور ومتكبر وانا صح اني احبه بس من اليوم وساير هو ف طريج وانا ف طريج .. وهذا الشي اريح لي بدال ما اضيع عمري وشبابي عشانه .. وانا مليون اللي يبوني واذا هو مايباني ترى شيوخه يتمنوني.. ومب عاقه عمري عليه زود
محمد عصب وسار صوبها
محمد ابعصبيه : شو قلتي ياسلامه ؟
كلهم انصدموا من وجود محمد..
نوف : انته من متى اهنه ؟
محمد مارد على نوف لانه شوي وبيصفعها هي الثانيه.. كان صدق معصب ومتنرفز من الرمسه الي سمعها من سلامه
وسار صوب سلامه
محمد كان وايد معصب وبلا حاسيه مسك ايد سلامه وتم يرص عليها.. : انتي اييييه يوم ارمسج شوفيني وردي عليه
سلامه تسحب ايدها عنه بالقو: انته اللي اييييه .. اسمعني انا عندي اسم وامي يوم يابتني ماسمتني ايه .. تفهم والا لا ؟ ولا تم تستقوى عليه جدامهم يوم انته مب قد كلمتك ..لاتعرف المريله .. عمرها ماكانت المريله انك تصرخ وتمسك ايدي وتكفخني بها.. بالأول كون قد كلمتك عشان نقول عنك ريال
محمد : انا ريال غصباً عنج
نوف وقفت جدام محمد : خلاص.. رفعت صوتك وصرخت وتمد إيدك استويت ريال؟؟
وماحس ابعمره محمد الا وهو ماد ايده على نوف وصفعها طراق
نوف انصدمت وتمت اتصرخ : تضربني انااااااااااااا ؟؟ انته اتمد ايدك عليه ؟انا امي وابوي واخواني مامدوا ايدينهم عليه.. اتيي انت تمد ايدك عليه
امنه : محمد بلاك اتخبلت شوياك؟؟
محمد ايصد صوب اخته : انتي ججججججب واخر وحده ترمسين فهمتي ياهل وترمس انجبي قبل لا اييج طراق يسنيج اسمج يومين
وركضت نوف داخل وهي اتصيح
سلامه : انته شو تتحرى عمرك ؟
محمد : انا محمد
سلامه وابعصبيه وصوت عالي وماحست ابعمرها شو تقول : وخييييييييير ياطير ؟؟ محمد ويعني ؟ اسمعني وحط هالرمسه على بالك عدل انته اخر واحد اتفكر انك اتدش ف حياتي مثل مادشيتها غلط وانته ماتدري .. كنت عميه وماشوف جدامي والحين فتحت .. وحط ف بالك انا مب ميته عليك ولا على شيفتك .. واذا تتحرى عمرك بهاللي سويته انك ريال ؟ اسمحلي اقولك انا اشك ف هالشي ..ومثل ما دخلت قلبي .. طلعت منه.. ولاعاد لك أي غلا فيه.. وانا ما اتنزل احب انسان مثلك
محمد وبصوت عالي : سلااااااااااااااااااامه
وطلعوا اخوانها من الميلس لانه الشباب روحوا وسمعوا الصريخ ف الحوي
عبيد : بلاكم ؟؟ محمد سلامه شو فيكم
سلامه وبأعلى ماعندها وامعصبه : اسمعوووووني .. وجدام الكل اقول لمحمد
انا مابااااااك مليون مره دامك ماتباني وجدام اخواني اقولك … والله اني مااعرفك ليوم الدين انته فاهم هالشي ؟انت في طريج وانا ف طريج
سعيد ايزخ سلامه واييرها صوبه: سلامه بلاج شو مستوي وشوهالرمسه ؟
سلامه : اسأل الريال اللي واقف جدامك هو الي بيقول لك السالفه
محمد : ريال غصباً عنج
سلامه : غصباً على عمرك مب علينا .. انته اصلاً مب قد المسؤوليه عسب جي قلتلي ماباج .لأ نك مب مستعد اتم ويا وحده طول عمرك متعود ع البنات وكل يوم من وحده للثانيه وتلعب ف بنات الناس لعب واذا انته تتحراني لعبه عندك لالالا يامحمد انته غلطان .. والحين انا اللي اقولك ماباك بس صدقني انك بتي ليييين عندي تترجاني اوافق عليك وبتندم تذكر هالشي عدل..
وسارت عنه سلامه
عبيد : محمد شو مستوي ؟
سعيد : انتوا اتخبلتوا واتزعجون ف الحوي وسمعتوا الفريج
محمد طلع وخذ سيارته وروح وهو امعصب
وركضت سلامه داخل وسارت عند نوف وامنه
نوف بعدها اتصيح وامنه اتحاول اتهديها
امنه : بس يانوف اسكتي
نوف : والله لاراويه والله انا امي وابويه ماضربوني هو ايي ويضربني منوه يتحسب عمره
سلامه اتفج الباب : لاتصيحين نوف
آمنه صدت وراها : سلامه شو استوى ؟
سلامه تيلس ع الشبريه : اتضاربنا سعيد وعبيد ظهروا من الميلس وشافونا
نوف : اويييييييييييييييه وشو قالوا ؟
سلامه باستهزاء : ماشي بس اخوج علمته ايعرف قدره عدل وكيف يحترمني
نوف : اسميج اتخبلتي ياسلامه
سلامه توقف جدام المنظره واتشوف عمرها : الا اتخبلت يوم حبيته
وبدت اتصيح سلامه
امنه : سلامه بلاج ؟
نوف : انتي اتصيحين عسب محمد ؟
سلامه وسمعت اسم محمد وعصبت : ايخسي اصيح عشانه ماعندي سالفه انا اصيح على عمري اللي ضيعته اصيح على الأيام الي سهرت فيها وانا اتمناه.. اتحسر على نفسي ..
نوف : ســلامــ
سلامه وهي تقاطعها: بنات
امنه ونوف صدوا صوبها
سلامه : انا قررت اشتغل
نوف مب امصدقه انه سلامه اللي فضلت يلسة البيت بدال ماتشتغل اتقول جي
نوف : شوووو ؟
سلامه : اللي سمعتيه
نوف تحضنها : اللللللللللللله هذا احلى خبر سمعته
سلامه : ههههههههههه عقلت خلاص
امنه : انا اقول بنت خالي مب هينه
بعد ماتمن البنات يسولفن اتصل عبيد ف سلامه وقالها انهم بيردون الحين
سلامه : نوف يالله البسي عباتج بنروح
امنه : لالا ليش بتسيرون توه الناس عاااد مايلستوا بتخلون الوحش يستفرد فيني
سلامه تلبس عباتها واتشل شنطتها :هههه.. وحليلج.. عاد اسمحيلنا امنه عبيد توه اتصل ويتريانا ف السياره لازم انسير وبعد امي روحها ف البيت مانروم نتأخر
امنه : انزين جان يبتوها وياكم
سلامه: ههههههههه انتي ماتعرفين امي ماتروم تصبر عن مطبخها
نوف: شو تخبلتي تبين امي تشوف المسرحيه الي استوت؟؟
امنه : ههههههههههههه وحليلها سلمي عليها ولازم تي وياكم المره اليايه
سلامه اتنزل راسها وباستهزاء: هه شوقلتي؟؟ هههههه المره اليايه .. هااه هيه اوكي يصير خير
نوف تطالعهم : انتوا وايد اتهذربون يالله عن عبيد ياكلنا
وسلمن البنات على بنت عمتهم وعلى عمتهم وطلعوا وردت سلامه ويا سعيد لانه سالم طلع ويا الشباب من الميلس ونوف ويا عبيد
ف سيارة سعيد
سعيد ايرمس سلامه : سلامه
سلامه عرفت شو بيقولها : هلا
سعيد : ممكن اعرف اللي استوى اليوم بينج وبين محمد ؟
سلامه تلعب ف تلفونها : .................
سعيد : سلامه انا ارمسج
سلامه : سعيــ
ويقطع رمستها صوت تلفون سعيد ووسلامه كان التلفون جريب حذالها وشافت الرقم
وانصدمت من اللي شافته كان نفس الرقم اللي دقوا حق سعيد قبل شوي بس سلامه عرفته لانه سعيد ماكان امسيفنه باسم
سعيد : اففففففف شو هالبلشه
سلامه في خاطرها معقوووله اللي يصير جدامي
سلامه تطالعه بنص عين : سعيد شوفيك ماترد تلفونك حشرنا
سعيد بارتباك : هذا اربيعي حشره يباني اظهر وياه وانا مالي بارض اليوم
سلامه : هييييييييه اربيعك
سعيد يصد صوبها وهو عاقد حياته : شو هاللهجه الغريبه بعد ؟ شو (ويقلد سلامه ) هييييه اربيعك شو قصدج ؟
سلامه : هههههههه بسم الله كلتني ما اقصد شي
سعيد : انزين لاتغيرين السالفه شو استوى بينج وبين محمد ؟
سلامه : بتعرف بعدين
سعيد بعصبيه : سلامه وبعدين يعني قولي
سلامه : سعيد والله بتعرف بعدين الحينه انا مضايجه ومابا ارمس
سعيد : اوكي ابراحتج
ويرن تلفونه مره ثانيه
سعيد ارتبك ومب عارف شو يسوي رد على التلفون
سعيد : الوووو
...... : اشحالك ؟
سعيد : هلااااا والله ايسرك الحال الغالي
.... : اكيد حد عندك صح ؟
سعيد : والله ياخويه شو نسوي اتعرف الدنيا ومشاغلها وانا مالي بارض اظهر اليوم والاهل ويايه
.... : اهااا اوكي خلاص ابرايك مع السلامه
سعيد : اسمحلنا عاد .. مع السلامه الغالي
تمت سلامه ساكته واتعرف انها ابنيه وسلامه عرفتها منوه من الرقم
وف سيارة عبيد الهدوووء كان سيد المكان
نوف كانت عيونها محمره من الصياح
عبيد : نوف شو بلاج من اول ماطلعنا من بيت عموه وانتي ماترمسين مستوي شي ؟
نوف وبدت اتدمع : لا ولاشي
عبيد ايوقف سيارته ع طرف الشارع: نوووف شو بلاج ؟
نوف وابصوت متقطع : اقولك ولا شي
عبيد : حطي عينج ف عيني
نوف : ....
عبيد : اقولج حطي عينج ف عيني
نوف ترفع عيونها : ...
عبيد : ليش اتصيحين ؟
نوف : .........
عبيد : ياربييييييي يانوف انا اكلمج ردي عليه
نوف : محمد
عبيد استغرب وشافها : محمد شو بلاه ؟
نوف اتصيح : صفعني
عبيد : شوووووووو ؟؟ محمد يصفعج ؟ من متى هالرمسه ؟
نوف : اليوم اتضاربت سلامه وياه لانه هو قايلها انا ماباج وسلامه اتعرف انها اتحبه وكلنا انعرف انقهرت وتمت يالسه ف الحوي ابروحها وسمعها محمد اتقول عنه انه متكبر واتضارب وياها .. ويوم انا وقفت ف طريجه وبغيت اوقفه عند حده جان يصفعني
عبيد من سمع هالرمسه عصب.. مهما يكون مايرضى علىخواته.. كيف محمد يتجرأ يمد إيده عليهن ويسويبهن جي.. خذ تلفونه وإتصل بمحمد
نوف : عبيد دخيلك مافينا ع المشاكل
عبيد وبعصبيه : جب اقولج .. ابويه ف حياته ماضرب حد ولا مد ايده ولا انا ولا حد من اخوانج مد ايده عليج اخر عمره حمود ايي ويضربج .. ليش ابصفته شووو ؟ ومنوه ايكون ؟ شو انتي ماوراج ولي ؟
تم يرن التليفون.. ومحد رد على عبيد.. تنرفز عبيد أكثر.. وتأكد وقتها ان محمد أكيد مسوي شي يخليه مايرد..
عبيد : انا اراويك يامحمد
ووصلوا كلهم البيت وسلموا على امهم وكل حد سار حجرته بيرقد
سارت سلامه ع شبريتها وتمت منسدحه وماحست الا ابدمعه تنزل ع خدها
انا اصييييح عشانك انته اللي ماتستاهل ؟ ... انته كيف دشيت حياتي وليش؟؟ شو الي شفته فيك خلاني احبك واعلق حياتي بك ... ليتني مت قبل مايي هاليوم .. بس انا لازم انساه خلاص واطلعه من حياتي وادوس قلبي وماهينه حق واحد شراته .. مايستاهلني
بس اللي سويته اانا صح ؟ .. هيه هيه اكيد صح عيل اذل عمري حقه واتم عايشه عمري ف رجاه وانتظر لحظه قدومه.. ليش وهو ولا يفتكر فيني ولا يحس.. تمت على هالحال طول الليل وهي تفكر.. وكان على الكومدينه الي حذالها الألبوم الي لامه فيه صورها وصور محمد وهم صغار من طاحت عينها عليهم شلته وفرته على اليدار بكل قوتها .. طاح الألبوم.. وتمت اتصيح بحرقة كبيره.. حطت ويهها على المخده وتمت حاضنتها وتصيح بألم..
وماحست سلامه ابعمرها ورقدت
اما نوف ف حاله
تمت ف الحجره واتذكرت اتشوف الصوره .. سارت نوف صوب شنطتها وطلعت الصوره وانصدمت من اللي شافته وتمت اترمس الصوره
شوووو ياب صورتج اهنه ؟؟ شو يابها عند اخويه ؟
ليكوووون ؟؟
وخشت نوف الصوره ف كبتها وسارت بترقد ... وباجر بتتصرف
وعبيد على طول سار ورقد ويتريا باجر عسب ايشوف محمد وسالفته ويا خواته ويتفاهم معاه
ف حجرة سعيد طالع من الحمام متسبح وشاف مسجين ف تلفونه
وشافه من نفس البنيه قراهم ومن بعدها بند التليفون من غيرلا مسحهم
اسمحووولي على التأخير
وتتوقعون
صورة منوه طلعت ؟؟
وشو بيستوي ف علاقة سلامه ومحمد ؟؟
ومحمد ليش سوا جي ؟؟
ومنوه هالبنيه اللي عرفتها سلامه ؟؟
وامنه شو موقعها من الاعراب ؟؟
اتريوووووني
اطياف الذكريات
17-06-2005, 03:55 PM
حلو الجزء اختي بس البروفيسور محمد يمبى ليه العب وياه بوكس انغ
ما تستاهل اوعليا نوف مسيجينة
و بإنتظار الجزء الياي اختي و مشكوورة و عساج على القوة دوووووووووم
أطياف العذارى
هجورة
17-06-2005, 11:44 PM
انتظر يمكن اسبوع
واخر شئ هالقصة القصير
الله يسامحج
انتظر جزء
بصراحة القصة حلوووووووووة و اسلوبج احلى
©§¤°shory¤§©¤
19-06-2005, 03:30 PM
مشكوووووووووره اختي جرنااااسه على القصصه الروعه بس ممكن اسألك سؤال
الحين انتي مو ناويه تكملين قصه ياربي ارجوك اجمعني مع اللى يغليني ؟؟؟ بليززز جاوبي على
وتسلم يدينك على القصه الروعه
نتريااااااك
بنت البلاد
19-06-2005, 07:23 PM
يبالها ضرب جرناسوووو..
يلا عااد مصختيها.. نبا نعرف التكمله..
©§¤°shory¤§©¤
20-06-2005, 12:35 AM
خخخخخخخخخخخخخ ياويلك ياخرناااسه من بنت البلاد خخخخخخخخخخخ
لا تنسين تردين على سؤالي بليزززززز
نترياك
جرناسه
20-06-2005, 02:00 AM
الســـــلام عليـــــكم
تسلمــــون علـــى ردودكم اللــي الصراحه ترفع مــن معنوياتـــي
وان شــاالله بنــزل الجـــزء ورا باجــر أو اللــي عقبــــه أكيييييييد
وعن سؤالج اختي
قصة (يارب ارجوك اجمعني ،، مع اللي كان يغليني )
انــا قلـــت انـــي مابكملهــــا بس اشــوف الاقبـــال عليـــها اكثــر من هذي القصه :marsa5:
وان شـــاالله اذا الوقــت ساعدنـــي بخلــص من هــذي القصـــه وبحــاول أكلمهـــا بس عسب خـــاطركم
هجورة
20-06-2005, 03:21 AM
انتظرج اختي الغالية
هجورة
20-06-2005, 04:05 PM
اوف متي االتكلمة
©§¤°shory¤§©¤
20-06-2005, 05:26 PM
يلا خيتووو نترياااااك
الصواوه
20-06-2005, 08:03 PM
جرنااااااااااااسه بس عاااد
كملي
والله قهر
ما روم اصبر اكثر
افضل اني اقرا القصص كامله .. الحين ما بقراهااا لين ما تخلصين منها
شووو راايج ...؟
هجورة
21-06-2005, 04:34 PM
يلاا اختي شسالفة
هجورة
22-06-2005, 08:19 AM
الظاهر ماكو قصة
انا اسفه اختي بس الظاهر انت ما وراج شئ
مع السلامة اذا حصرتهم قصة
هجورة
©§¤°shory¤§©¤
22-06-2005, 04:13 PM
متى تنزلين الجزء الجديد :marsa42:
ابطيتي علينا :marsa180: :marsa180: :marsa180:
يلا نترياك
جرناسه
22-06-2005, 05:49 PM
السلام عليكم
انا اسفه اتأخرت عليكم كم يووم
بس مابطول عليكم وان شاالله اليوم ف الليل الجزء بيكون عندكم
بس حبيت اقول للي اهتم تسلمون على ردودكم
وهجورة اختي اذا شايفه ما ورايه شي مثل ماتقولين ... فيه قصص وايد احلى عني وتستاهل انج تقرينها ابدال قصتي اللي ماوراها شي
واسمحووولي
جرناسه
22-06-2005, 06:07 PM
جرنااااااااااااسه بس عاااد
كملي
والله قهر
ما روم اصبر اكثر
افضل اني اقرا القصص كامله .. الحين ما بقراهااا لين ما تخلصين منها
شووو راايج ...؟
تسلمين اختي الصواوه على ردج
واسمحيلي عاد اعرف اني طولت شوي ... بس مب انا الوحيده اتأخر واعذرووني
والقصه موجوده ف اي وقت تقدرين تقرينها ... بس لين نهايتها بتترين وايد ... واللي يحب يقرا القصه تراها موجوده
واسمحولي ازعجتكم يمكن ابردودي .... بس المهم الجزء بيكون موجود اليوووم
بنت البلاد
22-06-2005, 08:02 PM
يا جماعه .. بقول لكم كلمه.. لا تعتبروني ادافع او شي من هالقبيل..
الكاتبه بدت معانا القصه بإسلوب راااااااائع في الكتابه وجميل.. وكتبت الجزء الثاني والثالث بنفس المستوى والجمال..
مانباها في الجزء الرابع تكتبه اقل مستوى من الثانين.. فعشان جي.. تحتاج لفتره تكتب على راحتها وبطوله باااال.. وانتوا اذا تميتوا اتزنون على راسها .. يمكن عشان ترضيكم تكتب جزء بسيط ومب شرات مستوى الي قبله .. وبهالحاله بيقل مستوى القصه وبيخرب على ميزانها.. وهالشي مب لصالحها دام انها بدت في الكتابه..
انا اقولكم هالرمسه عن تجربه.. وتقريبا معظمكم الي هني اتابعون قصصي وشفتوا كيف.. ان يوم اكتب الجزء وانا مب فايجه.. اتيي الأحداث سريعه ومب حلوه.. وجزء قصير.. وهذا كله انتوا كقراء تتضايقون منه..
دامكم قريتوا قصه وبديتوا فيها.. وعيبتكم.. اتريوا عليها.. توها المسكينه في بدايتها.. في الجزء الثالث عانت من مشكله بسيطه وطلبت مني اساعدها.. وهالشي الي مخليها تتأخر..
يمكن طولت انا بكلامي عليكم.. بس انا ابا اهدي الوضع من بينكم.. لأنكم خوات .. وكل وحده لازم تقدر ظروف الثانيه..
هدوا اعصابكم.. عشان الكاتبه تهدأ اعصابها وتكتب الجزء على رواق وتحطه لكم..
السموحه منكم جميعا..
بنت البلاد(الإداره)
©§¤°shory¤§©¤
24-06-2005, 05:26 PM
مشكوووووره اختي بنت البلاد على تنبيهنا
سوري جرناااسه على الازعاج خلاص احنا عاذرينك خذي كل وقتك اهم شي راحتك
عشق الليل
26-06-2005, 10:03 AM
تسلمين يا بنت البلااااااااد
عجييييييبه ماشاء الله علييييييييج
تف تف تف
يلله نتريا البارت الياي ..
عاشق الدمعه
14-07-2005, 03:04 AM
اختي القصه الاولى قلتي بتكملينها بعد هذا الجزء
بس الظاهر انج مابتكملين لا هالقصه ولا الاولى
هيا جرنااااسة كملي كمان قصتك الاولى ما كملتيها بسرررعة
بنت البلاد
15-06-2006, 08:53 PM
نغلق القصه لحين عودة الكاتبة
.vBulletin® version 3.8.0 Beta 2, Copyright ©2000-2008, Jelsoft Enterprises Ltd