::+ امهـــــ ولكن !! ـــــــات +::

[نور القمر]

..

http://www.marsauae.com/upload/uploading/D-Mo0n-Sm.gif

..

اشحالكم ؟!

..

اليوم يايتنكم بموضوع خطير .. ما ادري اذا حد تناول هالموضوع ولا لأ ؟؟

انا ما برمس وبتفلسف في شئ انا واغلب البنات في هالسن ما جربوه ..

بس هالموقفين مريتبهم امس .. واتمنى اني القى تفاعلكم حوله !!

..

أمس .. طول الليل وانا مب قادره ارقد .. والسبه هالموضوع .. :marsa107:

وطبعاً ما بلقى حد اتناقش وياه فيه الا اهل المرسى ..

..

البارحه وانا ارمس ربيعتي .. قالت لي امس .. اتضاربت ويا اختي .. وانا وربيعتي هاي وايد ويا بعض ..

فقلتلها كم مرة قايلتلج لا تتضاربين ويا خواتج .. ما يخصج فيهن ..

فقالت لي .. تبيني اشوفها تضرب ولدها .. واسكت عنها ؟؟

قلتلها ليش شو سوى ؟؟ على فكرة الولد صغير .. عمره يمكن بين الــ 2- 3 سنين !!

قالت لي وايد يعاند ويصارخ .. يوم تقول له اي شي .. يتم يصيح ويزاعج .. فضربته << امه !!

المهم .. قلتلها .. اليهال بهالسن .. وحسب رايي .. لازم ما نتعامل وياهم جي .. مب زين ..

لانهم مع الايام .. بيتعودون ع الضرب .. وبيستوي عندهم الموضوع عادي .. بيزاعج وبينضرب وبينتهي الامر ..

ويمكن يوم يكبر .. يسوي سوالف اكبر واكبر .. ويدري انه ما بيكون جزاه الا الضرب !!

فقالت والله ولدها .. وهي حرة فيه !!

المهم سكت عن هالسالفه .. وقلت برايها ..

..

في الليل .. كنا يالسين نتعشى .. وبالضبط حزة اذان العشى .. ربيع اخويه .. متصل به .. من تيلفون بيتنا ..

المهم رد عليه اخويه مستغرب .. ؟؟ وما عنده خبر انه ربيعه بييه هالحزة .. فعمره ما سواها ..

على فكره .. عمارهم 13 سنه تقريباً .. المهم رد اخويه عليه .. وقال له ربيعه .. انا في بيتكم .. في الصاله برع .. تعال لي ..

اخويه على طول نش .. وسار له .. كلنا تمينا مستغربين ؟؟ شو يايبنه هالولد هالحزه ؟؟

وليش ما كان متصل حق اخويه .. ضاري اخويه يسير اييبه من بيتهم .. وايون يلعبون ولا يذاكرون ويا بعض ..

المهم .. طلع اخويه .. ووراه اخويه الصغير .. هالثلاثي دوم ويا بعض ..

شوي .. ولا راد اخويه الصغير .. يقول حق الوالده .. اميييييه .. تعرفين ليش فلان ياي ؟؟

امه ضاربتنه ضرب .. ورايغتنه من البيت !! انا انصعقت !! قلت كيف تسوي في الولد جي .. وهو وحيدها ؟؟

طلعت الوالده .. وهو متعود عليها على فكره .. المهم .. فضيت لهم الجو .. الولد .. واخويه .. واخوي الصغير والوالده ..

ورغت اختي فوق .. وانا واختي الثانيه وعموتي كانت عندنا بعد .. يلسنا بعيد عنهم .. عشان مشاعر الولد ..

رمست الوالده ويا الولد .. وقامت الصلاة .. وساروا بيصلون .. سرنا عند الوالده .. قلنالها .. شو مستوي في الولد ؟؟ غريبه ياي هالحزه ؟؟ مب من عوايده ؟؟

على الفكرة الولد ما شاء الله عليه .. ما شاء الله عليه شاطر .. اشطر عن اخويه .. [ يدرسون مع بعض .. وربع من يوم هم في الروضه ]

ودرجاته ما شاء الله كلها فوق الــ 95% ..

قالت الوالده : قال لي كان يذاكر .. وهو متعود انه البشكاره هي اللي اتذاكر له اول !!

وبعدين حضرة المدام تتفيج له .. المهم .. البشكاره كانت تسأله .. ما عرف يجاوب كم سؤال ..

فسألت امه البشكاره .. عرف يجاوب ؟؟ .. هذيج النذله <<< عرفت انها تضربه احياناً ..

المهم قالت لها .. لا .. في كمن سؤال .. ما عرف يجاوب عليهن !!

عاد المدام ما ياز لها الموضوع .. اللي يسمع عاد هي كانت تطلع الاولى على مستوى الدوله ..

عن اضربها بعين بس !!

نشت .. واضربت الولد ضرب .. بنعال عزكم الله .. وعقب فتحت الباب وراغته .. تم الولد برع البيت .. شوي وتفتح الباب .. وتفر نعاله في ويهه .. <<<<<<< قمة الحقارة !!

تم الولد يالس شوي .. يفكر وين بيسير في هالليل ؟؟ وهو ولد صغير ؟؟

آخر شي قرر انه ايي عند اخويه ..

فـــ عقب ما رد اخويه من الصلاة .. قال .. تعرفون ليش هو يا بيتنا ؟؟

لانه هو فكر .. وين بيسير ؟؟ اذا سار عند خالاته .. بيضربنه .. يمكن تي الام وياهن وتضربه ..

واذا سار عند يدوته .. نفس المشكله !! فما لقى الا اخويه ..

..

بوقت الصلاة .. طبعاً الوالده اتصلت بيتهم .. وردت عليها البشكاره .. قالت لها الوالده .. وين ام فلان .. قالتلها .. طالعه .. فقالت الوالده اكيد طلعت تدوره !!

ردت الوالده تتصل بامه على الموبايل .. ما عطت اميه فرصه انها ترمس ..

وعلى طول قالت لها .. وينه ؟؟ عطيني برمسه ؟؟ قالت لها اميه .. الولد سار يصلي ..

قالت .. انزين .. الحين انا بمر اخذه .. المهم .. يته صوب المسيد .. وخذته وعلى طول سارت !!

..

أنا بصراحه تميت خايفه عالولد .. اقول حق الوالده .. اذا هي جي تسوي فيه .. بس عشان هو ما حفظ .. كمن سؤال .. وعلى فكره اليوم عندهم اجازه .. يعني يقدر يحفظ كل شي مثله اسمه بعد حق باجر !!

شو ممكن تسوي فيه اول ما ترده البيت ؟؟

ترى بيتهم مب قريب من بيتنا .. بعيييييييد .. والولد .. ياي يمشي .. من هناكـ !! لين بيتنا !!

بتقولون لي .. وين ابو الولد ؟؟

ما اعرف شو اسمي هالنوع من الاباء .. بس باختصار ومثل ما يقولون !!

سكانه مرته !!

..

شو رايكم باللي سوته امه فيه ؟؟

وهل هالشي يصب في مصلحه الولد ؟؟ <<<< طبعاً لأ !!

وكيف ممكن نتعامل مع هالأبرياء ؟؟

وهل هالتعامل الوحشي .. طريقه نافعه ومجديه ؟؟

وحلها صايب ؟؟

بانتظار مناقشاتكم .. وارائكم الطيبه .. حول هالموضوع .. :(

..

http://www.marsauae.com/upload/uploading/D-Mo0nb-DBM.gif

..

[أم غيث]

واعليه عنه .... غمضني حليله ....


طبعا اللي سوته الام .... مب طبيعي ... و لا صح ...
لو هيه اللي يالسه تذاكر له ... بنقول ... ارتفع ضغطها و تعبت ....

مبين عليها معتمده اعتماد كلي على البشكاره ...

الضرب عمره ما يصلح .... مثل ما قلتي ... بيتعود على الضرب ... و هذا اذا ما اثر فيه نفسيا ... و خلاه يكره اهله ...

زين يوم انه لجأ لكم .... هذا يعني انه يحبكم و يحترمكم

الله يكون في عونه مسكين .....

هاي لازم حد ينصحها ... و حد لازم يكون قريب منها ... ربيعتها ... اختها ... او اي حد مقرب

لانها ما بتسمع النصيحه الا من حد مقرب .... و ياريت يعطونها امثله عن اولاد ضاعوا بسبب الضرب و سوء المعامله .....
و قولي حق اخوج ... يهون عليه الموضوع ... و لا يركز على سوء معاملة امه له ...

الله يعينه و الله

------------------------------

نور القمر

تسلمين على طرح هالمشكله اللي تعاني منها بيوت وايده ,,, و ضحاياها الاطفال

[~ القلب ~]

حليله الولد..
غمضني،،، اتروغه من البيت لانه ما عرف يجاوب.. عيل لو رسب شو بتسوي،،، بتجتله..!!

انا وااايد سمعت عن امهات واباء كانوا هم السبب في انحراف اعيالهم.. بسبب عدم الاهتمام والضرب
اصلا دايما السبب الرئيسي في الانحراف هم الاهل..
انا ما اعرف ليش الامهات جذه يسوون بعيالهم.. يمكن لانهم هم ما كانوا امحصلين الحنان في طفولتهم<< فاقد الشي لا يعطيه،،، بس هالشي ما يخليهم يسوون جذه بعيالهم..

الضرب عمره ما كان حل و لا بيكون.. بالعكس الضرب يخلي الطفل يعاند كثر و يخليه عدواني ويا الغير ...

عن سؤالج كيف نتعامل مع هالابرياء؟؟؟ والله ما ادري ،،،
لان نحن ما نقدر نتحكم في الناس ونعلمهم شقايل يربون عيالهم..
بس علينا ننصحهم ونخبرهم باثار هالشي على مستقبل الطفل... يمكن الله يهديهم

تسلمين الغاليه على هالموضوع ...

اختج // القلب

[نور القمر]

..

http://www.marsauae.com/upload/uploading/D-Mo0n-Sm.gif

.:][ ام غيث ][:.


واعليه عنه .... غمضني حليله ....

هي والله انا بعد غمضني .. عاد لو تشوفونه .. ضعيييييف وصغير .. يغمض .. ما يستاهل .. :marsa180:


طبعا اللي سوته الام .... مب طبيعي ... و لا صح ...

أكيد اصلا .. بس ما باليد حيله .. شو نقدر نسوي بها .. ؟؟

لو هيه اللي يالسه تذاكر له ... بنقول ... ارتفع ضغطها و تعبت ....

مبين عليها معتمده اعتماد كلي على البشكاره ...

صح كله ع البشكاره .. وين تعرف تذاكر وتتعب عشان ولدها هاي .. :marsa103:


الضرب عمره ما يصلح .... مثل ما قلتي ... بيتعود على الضرب ... و هذا اذا ما اثر فيه نفسيا ... و خلاه يكره اهله ...


أكيد اصلا .. ومثل ما ذكرت هو يانا .. لانه يعرف لو لجأ ليدته او خالاته .. بييه من الزين اللي تعطيه اياه امه !!

زين يوم انه لجأ لكم .... هذا يعني انه يحبكم و يحترمكم


هي ترى هو متعود على الوالده واخويه وايد ..

الله يكون في عونه مسكين .....

هاي لازم حد ينصحها ... و حد لازم يكون قريب منها ... ربيعتها ... اختها ... او اي حد مقرب

وين .. وهم كلهم يعاملونه نفس معاملتها له .. يعني سامحتلهم انهم يضربونه ..

والقهر .. انه وحيدها .. وجي تسوي فيه .. !!


لانها ما بتسمع النصيحه الا من حد مقرب .... و ياريت يعطونها امثله عن اولاد ضاعوا بسبب الضرب و سوء المعامله .....
و قولي حق اخوج ... يهون عليه الموضوع ... و لا يركز على سوء معاملة امه له ...

وضحناله هالشي ..


الله يعينه و الله


آمييييييييييييييين ويهون عليه ..
------------------------------

نور القمر

تسلمين على طرح هالمشكله اللي تعاني منها بيوت وايده ,,, و ضحاياها الاطفال

العفو الغاليه .. ومشكورة ع المرور والرد الطيب ..

لا هنتي ..


http://www.marsauae.com/upload/uploading/D-Mo0nb-DBM.gif

..

[شـامسيــة وبــس]

حشاااااااااا في امهات جي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
:
اصلا الضرب مب من مصلحة الياهل ومستحيل ويكون فامصلحته لو شو ما كان
خاصه فالسن الي ذكرتيهم ( يعني من 2-3 ) شو تبا تضربه
خذيت مساق فالجامعه ثقافه علم نفس وكله عن اليهال وطباعهم لين ما يكبرون
وفالهسن الياهل طبيعي يكون عده حب امتلاك وعناد .. لانه بعده مب مستوعب انه الاشخاص الي وياه حقهم حق انهم ياثرون على رايه
يعني مرحله طبيعيه يمرون فيها
والضرب يزيده ... شو هالحلول هاي .. جي الامهات الي مب متعلمات ربن عيالهن احسن تربيه وبدون هالاساليب هذي .. هاي وياها عقده ومشكله وطلعها فولدها اذا كان ولدها لاني بصراحه شاكه
:
بالنسبه للحاله الثانيه ... هاي من النوع الي يحب يثب نفسه غصب وهي اصلا مالها اي دور فحياتها
وياها نقص .. والله يعين ولدها
:
مونتي ... تسلمين الغاليه

[نور القمر]

..

http://www.marsauae.com/upload/uploading/D-Mo0n-Sm.gif

.:][ القلـــــــــب ][:.



حليله الولد..
غمضني،،، اتروغه من البيت لانه ما عرف يجاوب.. عيل لو رسب شو بتسوي،،، بتجتله..!!


الله يعينه .. الغاليه .. هذا وهو شاطر ما شاء الله عليه ..

بس ما عرف يجاوبها .. كان متلخبط .. :marsa66:

انا وااايد سمعت عن امهات واباء كانوا هم السبب في انحراف اعيالهم.. بسبب عدم الاهتمام والضرب
اصلا دايما السبب الرئيسي في الانحراف هم الاهل..
انا ما اعرف ليش الامهات جذه يسوون بعيالهم.. يمكن لانهم هم ما كانوا امحصلين الحنان في طفولتهم<< فاقد الشي لا يعطيه،،، بس هالشي ما يخليهم يسوون جذه بعيالهم..


أكيـــــــــــــد .. بس ما باليد حيله ..

الضرب عمره ما كان حل و لا بيكون.. بالعكس الضرب يخلي الطفل يعاند كثر و يخليه عدواني ويا الغير ...


كلامج صحيح .. وبعناده ممكن يسوي اشياء هو ما يبا يسويها ..

بس عناداً فيهم بيسويها !!

عن سؤالج كيف نتعامل مع هالابرياء؟؟؟ والله ما ادري ،،،
لان نحن ما نقدر نتحكم في الناس ونعلمهم شقايل يربون عيالهم..
بس علينا ننصحهم ونخبرهم باثار هالشي على مستقبل الطفل... يمكن الله يهديهم

تسلمين الغاليه على هالموضوع ...

اختج // القلب



..

الله يسلمج من الشر يالغلا ..

وتسلمين ع المرور والتواصل الطيب .. :)

..

http://www.marsauae.com/upload/uploading/D-Mo0nb-DBM.gif

..

[نور القمر]

..

http://www.marsauae.com/upload/uploading/D-Mo0n-Sm.gif

.:][ شمـــــوستي ][:.

حشاااااااااا في امهات جي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
:

يس للأسف ..

اصلا الضرب مب من مصلحة الياهل ومستحيل ويكون فامصلحته لو شو ما كان
خاصه فالسن الي ذكرتيهم ( يعني من 2-3 ) شو تبا تضربه

طريقه من طرق التاديب الـــغير مجديه !!

خذيت مساق فالجامعه ثقافه علم نفس وكله عن اليهال وطباعهم لين ما يكبرون
وفالهسن الياهل طبيعي يكون عده حب امتلاك وعناد .. لانه بعده مب مستوعب انه الاشخاص الي وياه حقهم حق انهم ياثرون على رايه
يعني مرحله طبيعيه يمرون فيها

لو رمستي من احين لين باجر .. لا حياة لمن تنادي !!

والضرب يزيده ... شو هالحلول هاي .. جي الامهات الي مب متعلمات ربن عيالهن احسن تربيه وبدون هالاساليب هذي .. هاي وياها عقده ومشكله وطلعها فولدها اذا كان ولدها لاني بصراحه شاكه
:

الله يعينه ..
بالنسبه للحاله الثانيه ... هاي من النوع الي يحب يثب نفسه غصب وهي اصلا مالها اي دور فحياتها
وياها نقص .. والله يعين ولدها

هي والله .. غامضني للحين افكر فيه .. :(

:
مونتي ... تسلمين الغاليه [/QUOTE]

الله يسلمج من الشر يالغلا ..

تسلمين ع المرور والرد الطيب ..

http://www.marsauae.com/upload/uploading/D-Mo0nb-DBM.gif

..

[الزنبقة السوداء]

:marsa180: مسكين الولد
يكسر الخاطر
اشهالامهات:marsa155: لا احساس لا مشاعر
من وين جايبينهم
الاحساس معدوم
حرام عليها تضرب الولد
هذيل الامهات اكيد فيهم عقده
او فيهم شي نفسي يطلعونه بعيالهم
يعني الحين يوم يقولون لهالولد
اكتب انشاء عن الام
اشلون يكتب؟
قولولي اشلون يكتب
يكتب شي مايشوفه
كلام بس
امي ينبوع الحنان
وامي وامي....................
وهو مايشوف شي........................
في ناس يتمنون الامومه
وناس عندهم بس مايحسون
مسكين الولد
انا متأكده انه بيطلع عيون امه وابوه
خل يكبر اشوي
بس لانه صغير مسكين
مأكول حقه
بس مااقول اله الله يعين اليهال
اللي امهاتهم او ابهاتهم جي
وتسلمين يانور القمر على الموضوع
لازم نلقي الضوء على هالنوع من الامهات
لان دوم الناس اتقول انهم مصدر الحنان
بس في امهات مايستوي ينقال عنهم انهم امهات
ومشكوره مره ثانيه

[نور القمر]

..

http://www.marsauae.com/upload/uploading/D-Mo0n-Sm.gif

..

.:][ الزنبقة السوداء ][:.

لا حول ولا قوة الا بالله ..

هذا حال بعض الامهات ويمكن اردى !!

تسلمين اختي ع المرور والرد الطيب .. :)

..

http://www.marsauae.com/upload/uploading/D-Mo0nb-DBM.gif

..

[بحار]

:: نور القمر ::

موضوع شيق وحلو للنقاش...

ان شاء الله ابحلله بس بعدين...

لاني مستعيل ... مشكوره عليه...

ولي عوده ان شاء الله

[هزاع x5]

للأسف بعض أمهات اليوم جيه ...

وما أستغرب من تصرفات هذي الأم أو إنصارف الأب خلف المصالح الشخصيه لأن هم السبب الأول في الإجرام والسلوك الخاطيء الذي يقوم به الطفل أو الشاب أثناء مرحله المراهقه وتتحول إلى إنحراف ...

وإذا صاب الولد باس كل واحد يرمي اللوم على الثاني ...

متى ينتبه بعض الآباء والأمهات لمسؤولياتهم ...

الله بيحاسبهم على تربيت أبنائهم يوم القيامه ...

الدليل قول الرسول صلى الله عليه وسلم كلكم راع وكلكم مسؤول عن رعيته ...

وأكتفي بهذا القدر من الإجابة والسؤال هو متى الصحوه ...

[الأنامل الفضية]

وعليكم السلام والرحمه ..



او ماشاء الله ليت القمر في محملنا :marsa117:
سمكان ييب دله القهوة :marsa168:






موضوعج يتناول مسالتين المسأله الاولى اليهال وعنادهم والثانيه اهمال الامهات ..


اليهال الله يسلمج من طبعهم يلعبون ويجلبون الدنيا فوق تحت :marsa58:

وشي وسائل غير الضرب تروم تلجأله الام .. بقولج موقف استوابي من جمن يوم ..

عيال خالتي يهالو اللي يناقز هني واللي هناك واللي يدقدق عالكيبورد اقولهم ايلسو ما ييلسون
جان يي واحد اونه ليش حاطه حديد على ضروسج :marsa117:
جان استغل هالسؤال واقول عشان اللي يشيطن اعضه ومن يوم ماقلت هالجمله صارو
يسمعون الكلام :marsa117:
فالام تروم تتبع هالاسلوب كبديل للضرب :marsa22:






وعن الولد حرااام.. :(
شي ناس امهاتهم ذابحين عمارهم عسب ينجحون عيالهم ولا ينجحون
المفروض تحمد ربها انه من الشطار :marsa110:

والام هي الغلطانه و عمر البشكاره ما تاخذ دور الام ..
و ام غيث وشموس و القلب ما قصرو
فماله داعي اعيد الرمسه ..







نور القمر

تسلمين خيتوو على مواضيعج الحلوه :marsa197:

وجزاج الله الف خير .. :)

[the_pirate]

السلام عليكم ورحمة الله وبركاته ,,

شو ها الأسلوب الهجمي ,, اللي تتعامل به الأم,,

ذكرتيني بناس :marsa22:

الولد بيكبر وبيستحمل ,,

بس في نهياة المطاف بيضيع

لنه يوم بيكبر ويخدي ريال محد بيقدر يوقف تصرفاته ..

واكثر شبابنا ضايعين بها السبب ,,
<< شو عليه من كلام ها العيوز طاااااف ..
لاااه سنت شو سوت فيني خلني أسوي لها بو لابس ,,
وسهر وضياع ,,
وآخر المطاف عادي يعق الام في دار العجزه ,,

< ها فئه ,,

فئه ثانيه أتيهم حالات نفسيه ,,
والله تحسينهم مش طبيعين

هذا عشان شو عشان امتحانات,,
احينه الدرجات اهم من الولد ,,

كل ما كان الولد مرتاح نفسياً ومنزلياً كل ما كان عطائه جيد..

ما احيد بيقيسون الطالب من المراحل الأولى أللي مهم الثانويه العامه وخلاص ,,
بعدها بيدخل الجامعه ,,
<< أللي فيها حتى اللي نسبتهم 90% ما قدروا يفلحون فيها ..
واللي نسبهم في 60 و 70 % تخرجوا وهم بعدهم

وما نقول غير الله يهدي كل نفس

ومشكوره على الموضوع

[<(((><]

وعليكم السلام ورحمة الله

اختي نور القمر ماشالله على الموضوع

بالنسبة للموضوع والسالفة الصراحة انا استغرب من ام تعمل كذا

بس دايما احسنو الظن فما اعرف يمكن الام معها حق في اللي تعمله

والكلام اللي قاله الولد غير صحيح في ان امه تعمل بيه كذا

اما اذا كان الشي صحيح وفي امهات بهذي الطريقة تعامل اولادها مو غريبة

لان في اعتقادهم هذي الطريقة الصحيحة اللي تربي بيها ولدها

وتظن ان يحق لها ان تسوي بيه هذا العمل ..صحيح الام مسئولة عن ولدها

لاكن الامور لاتأخذ بهذي الطريقة ولكل شي له شي مضاد

وبارك الله فيكم اللي عملتوا والله يهدي الام ان شالله

[نور القمر]

..

http://www.marsauae.com/upload/uploading/D-mo0on-Slm.gif

..

.:][ هـــــزاعx5 .. الانامل الفضيه .. مايــــد ..سمكان ][:.

تسلمون اعزائي ع المرور والمداخله الطيبه ..

والله يكــــــــون في عون كل من يتعرض لهالنوع من المعاناة من جانب الوالدين ..

لكم .. أصدق التحايا .. :)

..

http://www.marsauae.com/upload/uploading/D-Mo0on-dbm.gif

..

[sarah]

أختي موضوعج وايد حلو ما عليه كلام
هذه وحدة من المشاكل اللي نحن نعاني منها حاليا .
في أمهات نظرتهم غير من ناحية التعليم و خصوصا إذا كانوا محرومين من التعليم و هم الصغار فبإعتقادهم إنهم راح يفيدون عيالهم بطرق غير حضارية .....كالضرب مثلا !
كل أم تخاف على ولدها و هذا شيء إيجابي و لكن طريقة المعالجة للمشكلة نفسه غلط
في إعتقادي أن هناك وسائل غير الضرب لأن الضرب يؤدي إلى عدم الثفة و الكراهية
فالأم مفروض تلجأ لوسيلة التوبيخ مب الضرب لأن الضرب ماراح يفيدها بشيء

[نور القمر]

..

http://www.marsauae.com/upload/uploading/D-mo0on-Slm.gif

..

.:][ SaRaH ][:.

كلامج صحيح اختي ..

وتسلمين ع المرور وابداء رايج الطيب ..

لا هنتي ..

..

http://www.marsauae.com/upload/uploading/D-Mo0on-dbm.gif

..

[عذراء القلب]

أو لا الي سوتة الأم أكيد غلط .. و الضرب مو وسيلة ..

يعني من وجهة نظري ان الانسان الي يتربى على الضرب أكيد ليمن يكبر راح يستخدم نفس الاسلوب

و على قولة المثل مثل تعامل تُعامل

و الإنسان بطبيعتة يحب اعاند يعيني هالولد الي ضربتة امة يمكن اعاندها جزاء اسلوبها هذا

و ما انقول في الاخير الا الله يهدي الجميع