قصتي الجديده ~ ضيعت روحي بتساعدني ؟ ~ [الأرشيف]

مشاهدة النسخة كاملة : قصتي الجديده ~ ضيعت روحي بتساعدني ؟ ~

بدرةالبحرين

01-02-2005, 07:12 AM

السلام عليكم ورحمة الله وبركاته

شلونكم شخباركم ان شاء الله بخير ؟

بصراحه انا اليوم رجعت ومعاي قصه يديده من بعد ماخلصت القصتين اللي راحو .. مثل ماوعدتكم

ومن كل قلب اتمنى انها تعيبكم وتحوز على اعجابكم ..

هل مره حاولت اني اغير بالاسلوب .. الحين راح اخليكم مع المقدمه

وتعريف الشخصيات راح يكون خلال القصه

-------------------------------------------------------------------------------------------------------------

لحظات كثيره تمر علينا في حياتنا وفيها يمتزج الفرح بالحزن والخطأ بالصواب .. احيانا تجتاحنا مشاعر عاصفه .. قويه لا يمكننا كبتها او ترويضها وعندما يحصل معك ستبحث عن من نصب جام هذه المشاعر علبه .. ربما عندها تكون قد اخطئت وربما لا ؟! هل نستطيع ان نمحي تلك اللحظه ؟ هل نستطيع نسيانها ؟ كلا لا تستطيع .. مثل هذه اللحظات تبقى محفوره في عقلنا و اطيافها تحاوطنا وتلازمنا ولا تبتعد مهما حصل

الحب .. الضياع .. الندم <=---=-=-- ذلك جزء من حياتها

الغفله .. التمادي .. الاستيقاظ < =-=---=-=- ذلك جزء من حياتهم

الحب .. الضياع .. الغفله .. التمادي .. الاستيقاظ .. الندم < -=-=-=-- ذلك جزء من حياتك .. وحياتي

كل هذا سنعرفه وبعد ان نعرفه هل سوف نكرره ؟؟

خلصت منيره من صلاة الصبح ويودت القرآن عشان تكمل القرايه .. لانها مقرره تختم القرآن هالشهر قعدت تقرا بخشووع وبصوت مسموع وبعد ماخصلت طوت السياده ورجعت كل شئ مكانه وقعدت على الكرسي وسرحت بالزراع شلون يعتني بحديقتهم و ينسق الورود بشكل حلو ويعطيهم الخدامه عشان تحطهم في المزهريه مثل كل يوم ويتابع شغله بدون ملل او كلل .. كانت مبتسمه وتحس براحه من زمان ماحستها

وفجاه عاد طيف الماضي اللي مو راضي يخليها لحالها ويخرب عليها لحظات الصمت ووالهدوء .. غمضت عيونها بألم وكأنها تحاول تبعد شبح الماضي عنها اللي بدا وضوحه يقل مع مرور الايام .. ولكن بدون فايده لازم يجلدها و يعذبها ويلاحقها في كل مكان

منيره : يبه ابيك في موضوع لو سمحت
بو منيره بأهتمام : قولي يا بنتي آمري
منيره بخوف : يبه مابتزفني ؟
بو منيره وهو يحاول يحافظ على ملامحه : لا حبيبتي قولي ليش انا ازفج
منيره : يبه عبدالله ولد عمي اليوم يبي ايي يكلمك
بو منيره ارتاحت ملامحه و في نفسه قال اكيد عبدالله بيي يخطب منيره .. الحمدالله .. الكل كان يدري بعلاقة منيره وعبدالله اللي ابتدت من يوم اهمه صغار والكل بارك هالشئ لانهم محيرين لبعض .. وبومنيره دايما كان يعتبر عبدالله مثل فيصل ولده اللي انحرم منه يوم كان عمره 4 سنوات وخطفه الموت لانه كان مريض

منيره تقطع افكار ابوها : يبه .. يبه
بو منيره بأبتسامه : ها حبيبتي
منيره واهي تتنفس بسرعه : يبه طلبتك حاول تفهمني لا تعصب علي
بومنيره : زين انتي ليش مكبره السالفه خلي دلع البنات
منيره واهي بتقط القنبله خلاص : يبه السالفه مو نفس ماتظن
بو منيره عدل من جلسته : عيل شنو ؟
منيره غمضت عيونها وبسرعه قالت هالكلام : يبه انا احب واحد غير عبدالله .. وعبدالله عرف بهالشئ والحين يبي ايي يقولك .. وانا خفت عشان جيه قلت لك .. يبه ادري اني غلطت وانا ندمانه .. يبه انا استاهل اللي بتسويه .. يبه ؟

منيره فتحت عيونها وجافت ابوها يطالعها بصدمه
منيره : يبه
بو منيره بهدوء : خلاص لاتقولين لي يبه .. كلمتين ماكو غيرهم .. انتي مو بنتي .. انتي مو تربيتي انا ماعرفت اربيج .. من اليوم سوي اللي بتسوينه .. انا عندي غيرج اربيه انا عندي بنت وحده واهي شيخه وماعندي بنت اسمها منيره

اهني منيره قطت روحها على ابوها وضمته وقعدت تبوس راسه ويده وتتوسله ان يسامحها وان اهي غلطت وماراح تكرر هالشئ .. بس بو منيره كل اللي سواه ان رفع يده عشان مايودها و تقوم عنه .. خلاص مايبي يكلمها مايبي يشوفها

منيره تشهق : يبه اذبحني ( تشهق ) يبه طقني سو اللي تبيه بس لاتقول انا مو بنتك .. يبه الله يخليك
بو منيره وقف عشان يطلع من الغرفه
اهني منيره نزلت على الارض ويودت ثوب ابوها بقوه وقعدت تصيح وتتوسل ابوها يسامحها وانها ماراح تكرر هالشئ
بس بومنيره صدمته فيها كانت اكبر ان يقول شئ

وقبل لا يطلع التفت عليها وقال لها

بو منيره : كنتي بعيني شئ كبير . كنت اشوفج فووق .. والحين انتي تحت للأسف .. ياخسارة تربيتي واسمي فيج .. روحي انتي مو بنتي

وطلع من الغرفه واهي كانت متكوره على الارض وتصيح .. ابوي مايبيني .. ابوي ما يبيني ..

وطبعا منيره اتصلت في جاسم ( حبيبها ) وجاسم رده كان من البركان على قلب منيره
جاسم : انا مالي شغل .. انتي الغلطانه ولوسمحتي لاتدقين على هالرقم مابي مشاكل

منيره ماقدرت تستحمل .. جاسم غدر بها .. جاسم اللي تحدت الكل عشانه واللي حبته على ولد عمها اللي كانت تحبه من يوم اهي صغيره .. جاسم اللي خسرت ابوها اكثر شخص تحبه عشانه .. آخر شئ يتخلى عنها ؟ ليش ؟؟؟

طبعا هالشئ كان صعب على مراهقه عمرها 17 سنه وصدمه قويه .. بس منيره كانت غلطانه وتستاهل كل اللي صادها منيره عاشت حياه صعبه في هالفتره .. نظرات الاتهام والتجاهل من الكل .. وانحرمت من الجامعه وابوها ماكلمها من ذاك اليوم وللأسف توفى بدون ما يسامحها على اللي صار .. وهالشئ أثر على نفسية منيره وصادتها حاله نفسيه وكوابيس واحلام يقظه طول الوقت وتعالجت عند دكتور وبدت تاخذ حبوب أعصاب

وعبدالله ولد عمها تزوج من بنت خالته ونسى منيره .. وصارت منيره وحيده ماعندها احد غير اختها شيخه اللي اكبر منها و أمها اللي كانت كبيره بالسن و ماتقدر تعتني بروحها واللي توفت وخلتهم بروحهم في هالبيت الكبير

وطبعا شيخه تزوجت عقب فتره وراحت بيت ريلها ومنيره اللي كانت متحسفه على كل لحظه وعلى كل غلطه سوتها دموعها اللي كانت دايما تعبر عن اللي بقلبها

اجفلت منيره على صوت منبه ريلها .. الحين بيقوم عشان بيروح الشغل وبسرعه لبست الروب وراحت توعي عيالها عشان مايتأخرون على الصلاة والمدرسه .. لانها نست توعيهم حق الصلاه

منيره واهي تبطل باب غرفة بنتها : فاطمه .. فطوم يمه قومي حبيبتي .. فاطمه ( 17 سنه )
فاطمه واهي تبطل عينها بصعوبه : يمه انا مريضه ماقدر اروح المدرسه
منيره واهي تبتسم : فطيم كل يوم تسمعيني هالااسطوانه غيريها ... يالله قومي بسرعه صلي وبدلي ونزلي باروح احط الريوق

وراحت غرفة بنتها الثانيه

منيره : ساره ( ساره 19 سنه )

بس ساره كانت واعيه وكانت فارشه السياده وتقرا القرآن بهدووووووء اقتربت منها منيره وقعدت عدالها
ساره : صدق الله العظيم
منيره بأبتسامه : صدق الله العظيم ..
ساره تبوس راس امها : صباح الخير الغاليه
منيره واهي تيود يد ساره : صباح النور سارونه .. يالله يمه قومي بدلي ونزلي تأكدي انهم حطو الريوق انا بقعد خوانج وباييكم
ساره واهي تطوي السياده : ان شاء الله يمه

وردت منيره تشوف فاطمه ولقتها بعدها في السرير .. تأففت منها ويودتها بنفسها وودتها الحمام وتأكدت انها غشلت ويها وتريتها تصلي عشان تسحي شعرها

ومن بعدها راحت منيره تقعد الصبيان .. بدر (20) و سلمان ( سنوات 3) وطبعا لازم تستخدم الماي ولا مافي فايده

ومن بعدها راحت غرفتها وسمعت صوت الماي .. ريلها ( بو بدر ) كان يتسبح .. طلعت له ثياب من الكبت و بخرت الثوب والغتره ورتبت ملفه واوراقه .. وطلعت له قلم وساعه .. وبدلت ثيابها ونزلت تحت عشان تتأكد ان الكل نزل

منيره الحين عمرها 39 وصار لها 22 سنه متزوجه من بو بدر ( 45 سنه ) ولد خالتها اللي كان يمووووت فيها وكان يتمنى انها متاخذ ولد عمها

طبعا محد عرف بماضي منيره والسالفه اللي صارت غير ابوها وامها واختها وطبعا عبدالله .. وفضلت انها تخفي هالشئ على ريلها حفاظا على كرامته وعشان ماتنبش في الماضي .. مع ان ضميرها كان يأنبها انها تخبي شئ عليه

الساعه 6:30 الكل كان على الطاوله
بوبدر : صباح الخير يالحلوين
الكل : صباح النور
بو بدر يشوف ويووهم ويحاول ان مايضحك : شفيكم ضحكو على الاقل
ساره تبتسم وتطالع فاطمه : انا مافيني شئ يبه بالعكس مستانسه لان اليوم عندنا حفله في الجامعه
فاطمه بعصبيه : زين ليش تطالعيني .. تبين تقهريني يعني ؟ وش فيها اذا انا عندي امتحانات
الكل : هاهاهاهاهاهاهاها
بو بدر : قولي جذي من الاول .. زين فطووم مابيج ترسبين سمعتي ياويلج اذا رسبتي .. ترى ماكو سفر باخليج ويا سلمان

سلمان اللي مندمج بالاكل ولا سوا لهم سالفه

منيره واهي تمسح يد وحلج سلمان : لا ان شاء الله بنتي ناجحه

بدر : اشك انا
فاطمه : استاذ بدر .. انت ماتتكلم كلش وليش اذا تتكلم تكفر ؟
بدر وهو يطلع لسانه : هاهاهاها سكتي يالمفعوصه مابي ارد عليج
بو بدر : بدر يبه اسبقني الشركه انا شوي بتأخر
بدر واهو قايم : ان شاء الله يبه
ساره : لحظه لحظه بدر باروح اييب عبايتي وبايي
بدر : اوكي ناطرج لا تتأخرين
فاطمه : وانا من يوصلني ؟
بدر : وشنو فايدة سراج ؟
فاطمه بأحراج : زين بس مابيك توصلني
بدر بخبث : من قال بوصلج
فاطمه : مابرد عليك لاني مو متفرغه لك

بو بدر : بس خلاص .. يالله قومو كل واحد على مدرسته وشغله
ساره واهي تركض : يالله بدر
بدر / ساره : مع السلامه
بو بدر / منيره : مع السلامه
منيره : في حفظ الرحمن .. حاسب يا ولدي شوي شوي

وبعد فتره قليله فضى البيت .. مابقت الا منيره ويا الخدم وسلمان اللي كان يتريا باص الروضه في الحديقه ويا مولي

راحت منيره غرفتها تاخذ حمام دافئ عشان ترتاح وتجهز روحها لانه رفيجاتها بيوون الساعه 10 يتريقون عندها .. لانهم متعودين كل اسبوع عند وحده منهم

منيره الحين ساكنه ويا ريلها في بيت كبير يضمها ويا عيالها

بيتها متكون من طابقين ونص

اول شئ الحديقه اللي تحبها منيره وتحرص عليها واكثر شئ تحبه فيها ورد الروز اللي يغطي نص مساحة الحديقه والنافورة الضخمه اللي تتوسطها

الطابق الارضي .. عباره عن عدة صالات مفتوحه ببعض واللي يدش البيت يلاحظ دقة التصميم ودفئه و فخامة الديكور والاثاث واكثر شئ يلفت النظر التحف والبيانو الضخم الموجود في نص الصاله والواجهه الزجاجيه اللي اتطل على بركة السباحة وغرفة الطعام .. اهي اختارت كل قطعة اثاث خلال شهر العسل بأسبانيا واهي اشرفت على تنسيقهم

والطابق الثاني عباره عن غرف النوم وصالة واسعة في الوسط كجلسه للعائلة

والطابق الثالث اللي اهو نص طابق .. خاص ب بدر لان فيه ميلس عود و طاولة بليارد و جلسه عربيه اهني يستقبل بدر ربعه وطبعا في مصعد بابه يصير خارج البيت عشان يقدر ياخذ حريته

ببساطه منيره كانت مهتمه بكل التفاصيل .. ابتداْ من مزهرية الورد اللي محطوطه فوق البيانو اللي تحرص ان يتم تبديل الورد فيها كل يوم وصولا بعيالها وريلها وكل شئ يحيط بحياتها

منيره كانت مستانسه في حياتها وتحمد الله .. لكنها تحس بغصه و قهر واهي تتذكر اللي صار واللي يعذبها اكثر ابوها اللي توفى واهو مو راضي عنها وامها اللي توفت من القهر والحزن

القصه بعدها ما ابتدت اللي قريتوه كان مجرد تمهيد للقصه .. اكيد تقولون ان منيره اهي البطله .. بس انا اقولكم نطرو وبتعرفون .. انا وصفت لكم ماضي منيره وحياتها الحين .. بس بعد للحين ماعرفنا الاسرار والخبايا الموجوده في هالبيت .. وشنو سالفة هالعائله وشنو راح يصير !؟

تابعوني واتريا ردودكم وتعليقاتكم

فراشة النور

01-02-2005, 07:34 AM

ياهلا بش حبيبتي وااااااااااااااااااااااو انا اول وحدة ارد عليش
عزيزتي واختي
السلام عليكم
القصة جميلة جدا وهذا شي طبيعي مثل سابقتيها
واكثر شي عجبني اسلوبك والبداية حقتها
وانا ارى انها منذ بدايتها حزينة وماساوية كما اعتدنا عليكي
بنسبة للشخصيات
منيرة : مراه محبوبة ومسكينة يعني هيه مراهقة مفروض ابوها يسامحها لان مافي احد مايغلط ولما كبرت فهمت وادركت صعوبة غلطتها
الام: بل ماتت من الحزن والقهر مره وحدة حراااام
الاب: بصراحة ماطقته حسيته نحيس
بو بدر: شكلة طيب ومسكين
فاطمة: ام النكت والفرفشة
سارة: حبوبة وحلوة
وانتظر الجزء الجديد بفااااااارغ الصبر لا تتاخري حبيبتي

لوسفير

بنت البلاد

02-02-2005, 02:55 AM

يا حيا الله بدووووورتنا..
تولهنا على قصصج.. وماشاء الله عليج شعله من النشاط في القصص
راح اقراه ولي عوده
وبالتوفيق

عبق الورد

02-02-2005, 06:03 PM

السلام عليكم ورحمة الله وبركاته

مرحباااا والله بالغالية بدرة البحرين

تصدقين اشتقت واااااااايد اني اشوفج متواجدة في المنتدى ..

و الحمدلله الحين بشوفج دوم لأنج رديتي بقصة و متأكدة إنها بتطلع رووووووووعه شرات القصص اللي قبلها ..

أنا قريت الجزء و البداية كانت رهيبة واااااااااااايد عيبتني ..

مممممممم و انا اقرى الجزء قلت ان البطلة هي منيرة بس انتي قلتي ان مع قرايتنا للقصة بنعرف اذا هي البطلة والا لا ..
حلو انج بديتي القصة تعرفينا على ماضي منيرة ..
ممممممم هذا الماضي احس ان بيرجع مرة ثانية يعذب منيرة في حياتها .. ويمكن يإذي حد من عيالها و الا ريلها ..

شخصيات القصة :

من البداية أخبرج واااااااااااااااااااااااايد حبيت ساره و حيبت معاملتها و طريقة كلامها مع أهلها ..

فاطمة هي بعد حبيتها لانها فرفوشه و بعد احسها عيازة و غيارة واااااااااايد ..

بدر ممممممممممم ما اعرف شو اقول عنه لان وجوده في الجزء مب قوي بس حبيت بعد
وإن شاء الله مع متابعتي للقصة بعر ف شخصيته ..

ابوبدر حسيت ان طيب وااايد و حنون على عياله .. ومنيرة احسها تشترك مع ابوبدر في نفس الصفات ..
بس والله حليلها توفى ابوها و هو مب راضي عليها حرااااااااام ..

الغالية من الحين انا اقولج اني بكون من متابعين قصتج و بتشوفين ردودي وتعليقاتي على كل جزء ..

عبق الورد

بدرةالبحرين

06-02-2005, 01:48 AM

بدرةالبحرين

06-02-2005, 01:56 AM

يا حيا الله بدووووورتنا..
تولهنا على قصصج.. وماشاء الله عليج شعله من النشاط في القصص
راح اقراه ولي عوده
وبالتوفيق

هلا والله بالغاليه

بأنتظار عودتج :marsa101:

بدرةالبحرين

07-02-2005, 04:58 AM

busanad

08-02-2005, 06:38 PM

تسلمين يا بدرة البحرين الصراحة باين عليها قصة حلوة :)

<(((><

10-02-2005, 04:11 AM

هجورة

11-02-2005, 12:51 AM

روووووووووووووووووووووووووووعة

ما شاء الله اسلوبج حلووووووة وااااااااايد و احسن واااااااااااااايد

روووووووووووووووعة انتظر المزيد

ابي كل يوم جزء

اوكي حبيبتي

اختج هجورة

عبق الورد

11-02-2005, 04:22 AM

السلام عليكم ورحمة الله وبركاته

أختي الغالية بدرة البحرين ..
مب جنج اتاخرتي واااايد عيلنا ؟؟ ..
عسى المانع خير ..
أنا في انتظار الجزء الثاني بفارغ الصبر ..

عبق الورد
:marsa112:

©§¤°shory¤§©¤

11-02-2005, 01:19 PM

اختي العزيزه:بدرة البحرين
اهنيك على القصه مرررررررررره روعه بس بليزز ممكن لاتطولين علينا في تنزيل الاجزاء
يلا نستناك

بدرةالبحرين

14-02-2005, 05:42 AM

تسلمين يا بدرة البحرين الصراحة باين عليها قصة حلوة :)

شكرا على مرورك اخوي بو سند .. و يشرفني تواجدك .. ومشكور على رايك

بدرةالبحرين

14-02-2005, 05:44 AM

السلام عليكم ورحمة الله

اختي بدرة البحرين ماشالله عليج ,هذي القصة الثانية اللي اقراها لجبعد ماقريت قصتج الأولى الغاية في الروعة

نقرى هذي القصة مع البداية الحزينة واللي انتهت بسعادة الى حد الان.. والله يستر من القادم

بنتظار الجزء القادم ..

وعليكم السلاام اخوي

نورت القصه بتواجدك وهالشئ شرف لي .. شكرا على كلامك وتشجعيك الدايم .. و يا هلا بك في صفحات هالقصه البسيطه

بدرةالبحرين

14-02-2005, 05:45 AM

السلام عليكم ورحمة الله وبركاته

أختي الغالية بدرة البحرين ..
مب جنج اتاخرتي واااايد عيلنا ؟؟ ..
عسى المانع خير ..
أنا في انتظار الجزء الثاني بفارغ الصبر ..

عبق الورد
:marsa112:

حيالله اختي الغاليه .. السموحه منج ومن القراء .. شوي انشغلت بتسجيل الجامعه ومابغيت اتسرع واكتب وما لوفي القصه حقها .. بس ان شاء الله عشان خاطر عيونج وعيون اللي يتابعون القص راح ابتدي في الجزء الحين

بدرةالبحرين

14-02-2005, 06:33 AM

وفي الجهه الأخرى من الشارع .. تحديدا في البيت اللي مجابل بيت عائلة بو بدر وهالبيت يكون بيت شيخه ( ام محمد) اخت منيره اللي متزوجه من اخو بوبدر (بو محمد)

وعندهم محمد 21 سنه .. نورة 19 سنه .. هند 22 سنه .. امل سنتين

بعده بدر واقف بسيارته ويا اخته ساره يتريون بنت خالتهم نورة تنزل واللي تنقعهم وتأخرهم نص ساعه مع انهم كل يوم يقولون لها لا تتأخرين بس بدون فايده

بدر بعصبيه : سارووووه شوفي لنا حل ويا بنت خالتج تراني ماستحمل خلاص .. لايكون انا دريولكم كفايه اني اوصلكم آخر الدنيا وكل يوم الصبح نفس القصه .. شدعوه ملكة جمال شتسوي كل هالوقت !!!!!!!!!!!!!!!!!!!!!!
ساره واهي تشوف الدريشه : بدر لاتعصب الله يخليك بعدين بتحط في قلبها .. انا بعدين بكلمها
بدر : زين يا آنسه باسكت انا مرعاة لشعور البرنسس .. بس احسن لها ما تكلمني مالي مزاج كلش
ساره : زين خلاص .. كاهي يات

نورة واهي تفتح الباب : السلام عليكم
ساره /بدر : وعليكم السلام والرحمه
نورة واهي تطالع بدر من المنظره : شلونك بدر ؟
بدر بدون مايطالعها : الحمدالله عساج بخير
نورة : الحمدالله

و شغل السياره ومشى .. وطول الوقت نورة تهذرب ويا ساره وبدر راسه معوره ( اففف والله مزعجه هالبنت حشى ماتسكت دقيق ! انا لازم القى حل وياهم .. ليش اخوها مايوصلها ؟ ويوصل ساروه مره وحده ! ويفكني من صدعتهم )

** في بيت عائلة بو محمد **

شيخه : محمد يمه قوم بتتأخر على الشركه .. ابوك صار له ساعه طالع
محمد : ان شاء الله يمه الحين بروح بس مو لاقي ملف
شيخه : روح شوف المكتبه امس ريتا كانت تعدلها
محمد : لا بس خلاص لقيته .. يالله يمه مع السلامه ما تامرين على شئ ؟
شيخه : سلامتك يمه .. الله حفظك الغالي

وطلع محمد وراحت ام محمد تلبس و تبدل ثياب امل عشان بيروحون بيت اختها منيره

** في الجامعه **
نورة : سارونه مابدش المحاظره !
ساره بأستغراب : ليش !!!!!
نورة : مالي مزاج يقعد هالدكتور يهذرب على راسي وانا مو فاهمه شئ !!
ساره : زين كيفج ؟! انا بدش !
نورة : انا باروح المطاعم وباقعد ويا البنات لي الساعه 12 بعدين باروح اشوف الحفله
ساره : اوكي .. انا بدش المحاظره وبعدين باييكم المطاعم
نورة : اوكي باي

ومشت ساره عشان تدش الكلاس وكالعاده كان واقف يطالعها و يترياها تدخل الكلاس .. بس ساره مشت ولا سوت له سالفه ولا صدت صوبه

** في الشركه **

بو بدر في المكتب ويا اخوه بو محمد يسولفون

طق طق

بدر : السلام عليكم
الكل : وعليكم السلام
بومحمد : محمد ماوصل بعده ؟
بدر : لأ ماشفته ! الحين بتصل فيه اشوفه
بو محمد : اي قول لا يتأخر عشان ابيكم تروحون الموقع الجديد وتشوفون الشغل شلون ماشي
بدر : عمي انا وصيت رامي يروح يشرف عليهم
بومحمد واهو يوقع على ورقه : وانا اقول ابيكم انتو تروحون !
بو بدر : خلاص بدر اسمع كلام عمك
بدر بأستغراب : ان شاء الله احنا بنفسنا بنروح

وطلع بدر عنهم واهو معصب .. اولا من سالفة نوروه بنت خالته و حنّة بو محمد وابوه من الصبح .. بدر بطبعه مزاجي وبسرعه يعصب .. كلمته لازم تمشي اهم شئ عنده عزة نفسه ومايسمح لأي شخص ان يمس هالشئ فيه

بدر واهو يدق رقم محمد : احسن له يشيل

تررررررررررررررن ترررررررررررن

محمد : الووووووو
بدر : وعليكم ال الووو .. وينك انت ؟؟
محمد : الحين بنزل من السياره .. ليش صاير شئ ؟
بدر : حمود لا تتأخر تراني بذبحك .. كفايه حنة ابوك وابوي يبونا نروح الموقع الجديد
محمد : ايييه .. الحين باييك
بدر : اوكي مع السلامه
محمد : مع السلامه

في بيت بو بدر

منيره كانت مجهزه كل شئ وكانت تبخر الصاله وتنطر ربيعاتها يوصلون ..

وفي هالاثناء رن الجرس

منيره : moli plz go and chek who is it ..
مولي ok madam

مولي راحت وفتحت الباب
مولي :good morning madam shikha .. madam is waiting for you inside .. come in
شيخه : thanks moli

منيره واهي ميوده المبخر : السلام عليكم
شيخه واهي تعلق عبايتها : وعليكم السلام
منيره بأبتسام : من هالحلوه اللي منخشه ورا ماما !

امل طلت من ورا امها ابتسمت بخجل و ردت انخشت مره ثانيه

منيره واهي تقعد : عيل وين هند ؟
شيخه : هند ماطاعت اتيي .. كله راقده هالبنيه
منيره : شتسوي المسكينه .. متملله في البيت
شيخه : اي من تخرجت وهاي حالتها
منيره : زين ليش ماتسوي لها شئ تقضي وقتها فيه ؟
شيخه : المشكله ابوها وعمها مو راضيين انها تشتغل في الشركه
منيره : ادري .. انا اقصد انها تسوي شئ تحبه وتقضي وقتها فيه
شيخه بأستغراب : مثل شنو ؟
منيره ابتسمت : كلنا ندري انها تحب تصميم الازياء ! وماشاء الله اهي متمرسه في هالشئ !
شيخه واهي تطالع امل اللي قاعده تلعب جدامهم : اي ! بس مافهمت قصدج
منيره : انا اقول .. ليش ماتفتح لها محل وتصمم .. هالشغله حلوه وتقضي وقتها عن الملل
شيخه : اي والله .. بكلم ابوها باشوف شنو يقول

وفي هالأثناء وصلو رفيجات منيره سلمت عليهم و قضو الوقت سوالف وضحك و طبعا عقرة نسوان

في المدرسه

المعلمه : فاطمه قومي جاوبي على هالسؤال !
فاطمه وقفت وتبلعمت : أأأأأأ .. ماعرف معلمه
المعلمه بعصبيه : اي اكيد ماتعرفين .. لاني طول الوقت سوالف ويا ريمو .. وانا اوقف واشرح واتعب عمري .. انتي ماينفع وياج هالأسلوب
فاطمه : معلمه مايصير جذي ! كل كلمة والثانيه قلتي فاطمه ! انا ماقلت لها شئ كنت اسئلها عن الدرس
المعلمه بأستهزاء : ما شاء الله ! والنابغه ريم تعرف احسن مني صح ؟
فاطمه : لا بس ..
المعلمه : لا بس ولا شئ .. ناقصه درجتين .. انتي بروحج ماعندج علامات فكري شلون تحصلين علامات مو تنقصين علامات
يالله بنات انكمل الدرس

فاطمه بغت تموووت من القهر ( الحين هالمعلمه ليش كله حاطه علي .. كل البنات يسولفون .. افففففف متى تخلص الحصه تعبت .. مالت عليها درجتين ! بطلعهم من جبدها )
وحطت راسها على الطاوله عشان ترقد

اتمنى يعجبكم هالجزء

بدرةالبحرين

14-02-2005, 06:38 AM

روووووووووووووووووووووووووووعة

ما شاء الله اسلوبج حلووووووة وااااااااايد و احسن واااااااااااااايد

روووووووووووووووعة انتظر المزيد

ابي كل يوم جزء

اوكي حبيبتي

اختج هجورة

شكرا اختي هجوره .. على المتابعه نورتي القصه

ميامي

14-02-2005, 11:10 AM

يعطيج ألف عافيت والى الأمام انشاء الله دوم

©§¤°shory¤§©¤

14-02-2005, 04:19 PM

مشكوووووووووووووووور اختي بدرة البحرين على الجزء بس مررررررررررررره قصير حرام عليك
بس ممكن سؤال هو مين اللى كان واقف لرساره يناظرها عند الباب؟؟ الدكتور؟؟
المهم يعطيك الله الف عافيه ونترياك لاتبطين علينا

فراشة النور

16-02-2005, 05:04 PM

السلام
الجزء مره مره حلو
مشكورة اختي على الجزء
الجزء والشخصيات حلويييييييييييييييييييييييييييييييييييييييييين مره

اختكم لوسفير

©§¤°shory¤§©¤

17-02-2005, 09:10 PM

وين الاجزااااااااااااااااء؟؟

بدرةالبحرين

01-03-2005, 12:10 AM

السموحه على التأخير والحين بنزل لكم الجزء الثالث .. الحين نصه وباجر ان شاء الله النص الثاني

بدرةالبحرين

01-03-2005, 12:11 AM

الجزء الثالث
في الجامعه

ساره طلعت من الكلاس وكلها خوف ان يرد يلحقها .. ( حمد ) معجب بساره من ايام ما كانت في الثانوي والحين صار وياها في الجامعه .. اهو يصير اخو رفيجتها و يمووت عليها بس ساره دوم تتهرب منه مع ان حمد معروف في الجامعه والبنات يموتون عليه من حلاته ..

ساره واهي تسرع في خطواتها " يا ربي متى بافتك منه .. شنو هالبلوه بيسوي لي سالفه أخرتها ! "

طبعا حمد كان يمشي وراها بهدوء ( يزعم مايدري ) و يراقب كل تحركاتها ..

وصلت ساره المطاعم وشافت ربعها قاعدين .. قطت كتبها على الطاوله بملل و قعدت

نورة : بل ! شفيج هلون ؟
ساره واهي تتعبث بتلفونها : تمللت نوووره شوفيه لي اهني لاحقني !
دانه ( رفيجتهم ) : انتي غبيه .. شوفيه شحلاته .. شنو تبين احسن من جذيه ؟
ساره بنظره حاده : ومن قال انا ابي اتعرف على احد ؟
دانه : مافي وحده ماتعرفت او ما كلمت احد
ساره بجديه : وانا بغير هالنظريه !
نوره : زين بس خلاص .. عورتو راسي
ساره : دنووي بتروحين عرس فاطمه ؟
دانه : مادري والله .. ماشريت شئ للحين !
نوره : حتى احنا شرايكم انروح اليوم ؟
ساره و دانه : اوكي

في الشركه :
بدر : يوعااااااان
محمد : حدددددي يوعاان .. يا ترى شنو طابخين اليوم ؟
بدر واهو يحط يده على بطنه : مادري .. اذا امي طابخه الصراحه عيد
محمد : ههههههههههه ننطر وبنشوف
بدر : حمود روح ييب البنات من الجامعه .. انا مافيني شده تعبان
محمد واهو عاقد حياته : شفيهم ذيلين ! كل وحده صافه سيارته جدام البيت ومايمشون ! ليش بعد ماخذين الليسن ؟
بدر بملل : ماتدري الآنسات يخافون يمشون للجامعه
محمد : وليش ان شاء الله ؟
بدر : ههههههههههههه سارونه تقول " شباب متهورين "
محمد : ههههههههههههههه اصلا الشباب اذا جافو ويوهم يشردون
بدر : اي اتحداك تقول هالحجي جدامهم
محمد : اسكت يا معود لا تسوي لنا سالفه .. قم قم نروح نييبهم ويا بعض
بدر : وسيارتي شاسوي فيها ؟
محمد : عطها واحد من الموظفين يوديها البيت
بدر : اوكي يالله

وقامو الشباب عشان اييبون البنات من الجامعه

في بيت بو بدر ..

الساعه 1
منيره و شيخه في المطبخ يشرفون على الاكل .. بيت بو بدر و بو محمد متعودين كل يوم يتغدون ويا بعض في بيت بو بدر لانهم وايد يحبون اللمه و العلاقات العائليه ..

منيره : حشى وينهي هند ؟ وايد تأخرت ؟
شيخه واهي تقطع السلطه : مادري والله شتسوي ..المفروض توصل .. قالت انها بالدرب
منيره : وين رايحه ؟
شيخه : تزور رفيجتها في المستشفى
سلمان واهو توه راد : ماااااا ماااااااااااا
منيره : ها ماما رديت ؟
سلمان : يوعااااااااااااااااان ما ماااااااا
منيرة : ههههههههه زين روح عشان يبدلونك .. تبي تاكل ويانا ولا تبي يحطون لك بروحك ؟
سلمان واهو مبطل عيونه : ماما يوعان .. ابي اثنين
شيخه : هههههههههه مو مرتين .. اثنين
منيره : هههههههههههههه زين ماما اكل مرتين !

راح سلمان بس رد لأنه تذكر شئ
سلمان : خالوه
شيخه : ها حبيبي ؟
سلمان بخبث : وين امووله ؟
شيخه تأففت ( تدري سلمان يبي يغربلها ) : تشوف الفيديو فوق
سلمان من سمع ان امل فووق راح ركيييض

في هالوقت وصلت فاطمه : قطت شنطتها وبسرعه راحت المطبخ

فاطمه : السلام عليكم
شيخه /ومنيره : عليكم السلام
منيره : ها حبيبتي .. شفيج مطنقره
فاطمه واهي تقعد : المعلمه السخيفه
منيره : عيب فطوم .. مهما يكون هاذي انسانه تتعب واكبر منج لازم تحترمينها
فاطمه : ليش اهي ماتحترمني
منيره بأهتمام : ليش شصاير ؟
فاطمه قالت حق امها كل اللي صار ..
منيره : فطوم انتي غلطانه وباجر ابيج تروحين تعتذرين من المدرسه فهمتي ؟
فاطمه : بس يمه ..
منيره تقاطعها : لا بس ولا شئ .. سمعتيني .. المفروض ماتتحجين في حصتها
فاطمه واهي منزله راسها : ان شاء الله يمه باجر بروح اعتذر منها
منيره بأبتسام : عفيه على بنتي .. يالله قومي بدلي وصلي .. وارتاحي شوي لي ما يوصلون
فاطمه : ان شاء الله

وطلعت فاطمه وفي طريجها شافت هند
فاطمه بأبتسامه كبيره : هندوووووه حبيبتي شلووونج
هند بتوتر : هلا حبيبتي .. الحمدالله وانتي ؟
فاطمه : بطرف عينها : الحمدالله ! ( سكتت شوي ) شفيج هند ؟
هند واهي تدش المطبخ : مافيني شئ !
فاطمه مشت عنها بس كانت حاسه ان هند فيها شئ

دشت هند وسلمت عليهم

شيخه : شلونها رفيجتج ؟
هند بتوتر واضح : هاا ؟ ايه رفيجتي . زينه زينه
شيخه : زين شفيج تبلعمتي
هند واهي تقوم : مافيني شئ .. انا باروح فوق برتاح شوي
منيره : روحي خالو ارتاحي

والساعه 2 الكل وصلوو

ساره ونورة كانو فوق في غرفة ساره

ساره : يالله دشي الحمام ابي اتيدد
نوره : وين ثيابي !
ساره : غيرت الخدامه مكانهم حطتهم في الرف الرابع
نورة : وانا اقوول
نورة واهي تدز ساره عشان تدش الحمام
ساره : أييي
نورة : هههههههههههه لا تتدلعين
ساره : زين يالله ولي يعافيج سرعي
نورة تتحجى واهي في الحمام
نورة : ساعه جم بتروحون حق نشوف ثياب ؟
ساره واهي تطلع لها ثياب : مادري 5 اوكي ؟
نورة : اي اوكي

والساعه 2:20 الكل كان قاعد على الطاول

بدر ومحمد ... نورة وساره وفاطمه وهند .. شيخه ومنيره .. بو محمد وبوبدر .. وطبعا امل وسلمان ..

الطاوله كانت فوضى .. الشباب يسولفون والبنات يسولفون ونفس الشئ الرياييل و طبعا سلمان وامل غلبو الكل في الفوضى

بس هند كانت ساكته .. ومايودت الاكل بس كانت تلعب بالشوكه بدون ماتاكل .. واول وحده استأذنت ومشت البيت !

من بعد الاكل ..

شيخه وريلها وعيالها ردو البيت .. بس نورة قعدت ويا ساره وراحو فوق يرقدون شوي قبل مايروحون المجمع

محمد كان في غرفته قاعد على الكومبيوتر .. فتح المسنجر .. ودشت عليه وحده كانت وياه في الجامعه

girlsih devil : هاي
MrX_5 : هلا
girlsih devil : محمد شلونك ؟
MrX_5: الحمدالله بخير

وقعد يكلمها شوي بس تملل منها .. شخسفه ماعندها سالفه و طلع عنها

وراح يرقد شوي .. لأن اليوم الاربعاء وفي الليل اكيد بيطلعون واهو حده تعبان

هند كانت في غرفتها منسدحه وتفكر .. هند بطبعها انسانه شفافه ماتقدر تخبي شئ .. اليوم الكل لاحظ انها مو على بعضها .. كان مبين ان في شئ مكدرها .. بش شنو اهو هالشئ ؟ محد يعرف

هند اليوم ماراحت تزور رفيجتها ! هند كانت رايحه المستشفى لأنها كانت تحس بتعب وماكنت تدري شنو السبب ففضلت انها تروح المستشفى بدون ماتخبر احد .. بس الروحه خلتها تتوتر اكثر

ان شاء الله بكمل لكم الجزء باجر

بدرةالبحرين

01-03-2005, 11:42 PM

الجزء الرابع ..

هند كانت في غرفتها منسدحه وتفكر .. هند بطبعها انسانه شفافه ماتقدر تخبي شئ .. اليوم الكل لاحظ انها مو على بعضها .. كان مبين ان في شئ مكدرها .. بش شنو اهو هالشئ ؟ محد يعرف

هند اليوم ماراحت تزور رفيجتها ! هند كانت رايحه المستشفى لأنها كانت تحس بتعب وماكنت تدري شنو السبب ففضلت انها تروح المستشفى بدون ماتخبر احد .. بس الروحه خلتها تتوتر اكثر

اول ماوصلت عند الدكتور وشكت له من الاعراض .. سوى لها فحص سريري .. ومن بعدها طلب منها تروح تسوي تحاليل وطلب منها تزوره بعد يومين

هند من مده تحس بضعف و تعب لما تسوي اي شئ و تحس بصعوبه في التنفس احيانا بس كانت تتجاهل هالشئ بس في الفتره الاخيره زاد عليها و بعد الحاح من رفيجتها راحت عند دكتور .. كل هالاشياء خلاها تتوتر وتحس ان السالفه جايده .. بس لازم تنطر لي بعد يومين وان شاء الله مافيها شئ ..

الساعه 4:30 نورة وساره يبدلون عشان بيروحون المجمع يشوفون ثياب .. لين يروحون shoping دايما يفضلون يلبسون دفه .. اريح لهم لما يبون يجربون ثياب ..

الساعه 5 ركبو سيارة ساره وراحو

في السياره

نورة : وين cd راشد ؟
ساره : بدر خذاه
نورة بأهتمام : بدر يحب يسمع راشد ؟
ساره : اي
نورة واهي تقلب في السيديات : تراج حزره مافي شئ حلو
ساره واهي تطلع لسانها : الناس اذواق
نورة : الله والذوق بس .. زين دنووي بتكون هناك ؟
ساره : اي المفروض

وصلوو المجمع وتلاقو ويا دانه .. وابتدو يدورون في المحلات ..

في بيت بو بدر .. ام بدر ( منيره ) ويا فاطمه في المطبخ يسوون كوكيز .. ربع فاطمه بيوون الليله على العشا .. عشان جذي فاطمه طردت الكل من البيت عشان يفضى البيت ..

منيره : فطووم حبيبتي .. مابي شطانه فهمتي ؟
فاطمه واهي تعجن : يمه حبيبتي يا بعد عمري قلت لج لا تخافين مابيصير شئ ! حشى لايكون انا عمري 7 سنوات ؟
منيره : ادريبج عوده ماشاء الله بس بعد ماتبيني انصحج ؟
فاطمه واهي تبتسم : من حقج .. زين يمه بدر وين بيروح ؟
منيره : مادريبه بس اظن بيطلع ويا ولد خالتج وربعه .. (سكتت شوي) وساره مابترد من وقت .. وانا وسلمان بنروح بيت خالتج
فاطمه واهي تبتتسم ابتسامه بانت كل ضروسها : اي هلون فله

في هالوقت دش بدر

بدر واهي يمد يده عشان ياخذ التشوكلت تشيبز من على الطاوله : السلام عليكم
فاطمه طقته على يده : وعليكم .. يالله يالله شيل يدك
بدر واهو يهوس على يدها : شيلي يدج لا اكسرها
فاطمه صارت حمره : ههههههه ايييي ههههههههههه زين زين بس هههههه

بدر بفخر : عبالي بعد .. اخر عمرنا يهال يتآمرون علينا

فاطمه سكتت عنه تدري ان يمكن يعاندها ويخرب عليها كل شئ

منيره : يمه وين بتروح ؟
بدر : باروح بيت واحد من الربع
منيره : ويا محمد ؟
بدر : لا مادري عنه محمد
منيره : زين تحمل بروحك يمه وعدال شوي شوي
بدر واهو يعدل غترته : لاتوصين يمه .. يالله مع السلامه
منيره /فاطمه : مع السلامه

طلع محمد وركب سيارته ال بي ام وراح حق ربعه ..

في المجمع

ساره واهي تطالع روحها في المنظره : لا نوره كلش مو حلو علي يسويني متينه
نوره واهي تتأفف : ساروو مللتيني انتي وينج وين المتن ؟
ساره : زين مو عاجبني مايصير اللبس شئ مو عاجبني ؟
دانه اوهي طالعه : زين انا بروح ادفع ماقدر اتأخر اكثر من جذي انتو شكلكم بتمون لي باجر
نورة : ههههههههههه شكله جذي ويا البرنسس ساره

طلعت دانه عنهم و راحو البنات يشوفون محلات ثانيه

وبعد دوراة 3 ساعات اخيرا حصلو اللي يبونه

ساره حصلت فستان اسود بدون اكمام بس فيه ورده صغيره من الاورجانزا اللامع على الطرف .. ونفس الورده كأكسسوار لليد .. كان وايد cute وبسييييط ومطلعها حدها بيبي .. ساره تتميز بصفاء وبياض بشرتها .. جمالها ملفت و يتسم بالهدوء .. ملامحها وايد وايد حلوه واحلى مافيها عيونها الناعسه .. والفستان كان مبرز جمالها و معطيه طابع طفولي ..

نورة خذت توب فيروزي بدون اكمام من ريفر ايلاند وفيه فولك فضي على الاطراف بس .. وخذت وياه بنطلون اسود وسير فيروزي .. وحصلت شنطه فيروزيه لماعه في مون سون .. وكان مناسبها وايد هالستايل .. و مسويها وايد جريئه و ملفته لأنه نوره ماشاء الله تتميز بجسمها الممشوق والطويل جنها عارضه عشان جذي كل شئ يكون حلو عليها ويناسبها

ساره واهي تيود الاجياس : ما شاء الله حلو اللي خذتيه
نورة واهي تدفع : مابغينه .. حتى فستانج حلو
ساره : زين شنو تبين عشا يعت انا ؟
نورة : انروح تشيليز ؟
ساره : اوكي .. بس ماتظنين زحمه شوي ؟
نورة : لا ماظن الحين الساعه 7:30 الناس عقب ال 8 اييون
ساره واهي تضحك : شورج وهداية الله

محمد كان في غرفته متملل وقرر يتصل في بدر يشوف وينه

محمد : الوو
بدر بصوت عالي : الوو
محمد : هاا وينك ؟
بدر : انا عند الربع
محمد : مامنك فايده
بدر : ههههههههههههههه زين ليش ماتيي ؟ بنروح تشيليز
محمد : لا لا باشوف ربعي وينهم
بدر : اوكي عيل
محمد : باي

واتصل محمد في ربعه وقالو له انهم بيروحون سينما واتفق وياهم يشوفهم هناك

فاطمه في البيت قاعده ويا رفيجاتها عايشه وندى يسولوفون ويتعشون
الاجواء كانت هاديه عندها وكل شوي امها تتصل تتطمن عليها وتسئلها اذا محتاجه شئ .. فاطمه وايد تعتمد على امها في كل شئ مع ان عمرها 17 بس للحين امها تقعدها وتسوي شعرها و تقول لها شنو تلبس .. بعكس ساره اللي معتمده على روحها في كل شئ ..

في تشيليز

نورة : شنو بتاكلين ؟
ساره : مادري ؟
نوره : كالعاده ؟
ساره : ههههههههههههه شكله جذي
نوره : زين باروح الحمام .. طلبي لي
ساره : اوكي ..

قامت نورة تروح الحمام وفي طريجها وقفها ريال ..
الريال : لو سمحتي اختي
نورة تفشلت انها تطنشه عشان جذي التفت عليه : نعم ؟

الريال كان مو بحريني كان يبي يسئلها عن شئ ... ونورة بكل شعة صدر قعدت تشرح له وتوضح له

في هالوقت شافها بدر .. وبدون اي مقدمات .. تقدم صوبها ويودها من يدها بالقوه وطلعها بره

نورة : شفيك انت ينيت
بدر بعصبيه : انا ماينيت انتي اللي ماتستحين واقفه ويا ريال
نورة : الريال كان يسئلني
بدر يقاطعها : انا مالي شغل يسئلج ولا لأ .. انتي وحده ماتستحين
نورة ودموعها على خدها : لا تقول عني هلون

شنو بيصير ؟؟ نطروني في الجزء الياي

فراشة النور

09-03-2005, 04:38 PM

السلام بدرة البحرين
الجزء حلو بس هاذا بدر قهرني واش فيها لو بدلي واحد هيه مو قاعدة تتغزل فيه
وفطومة هاذي مصخرة حتى في البس تسال ويش بلبس (اعيب كني ماسويها)
المهم الجء حلو مره مره حبيبتي
لاتتاخري

©§¤°shory¤§©¤

10-03-2005, 12:34 AM

كلللولولوولولولولووليييييييييييييش مابغيتي تنزلين الجزء
بس يعطيك الله الف الف الف الف الف عافيه خيتو تسلم يدك بس لاتبطين علينا بليز
اترياك على احر من الجمر

هجورة

15-03-2005, 07:40 PM

الجزء وايد حلووووو

تسلمين

انتظر المزيد منج

هجورة

18-03-2005, 04:57 PM

وينج القصة روعة

ليش ما اشوف الجزء الي الان

انتظرج

©§¤°shory¤§©¤

20-03-2005, 02:35 PM

:marsa118: مو كانك ابطيتي علينا

يلا نتريا الاجزاااء على احر من الجمر

بنت_الطــــواش

22-03-2005, 08:47 PM

بدره البحرين
الله يعطيج العافيه اختييه :marsa70:
ماشااء الله اسلوبج وايد حلوو في كتابه القصه
الصراحه عشت اجوائها..واحس عمري اتابع تحركات الاشخاص بس من زاويه بعيده
حليلها ساره..حرام ما سوت شي..لا يكون بدر بيحرمها من كل شي حراااك
كل شي ولا سارونه :(:(

ونترياا اليديد :marsa63:
..
يا اعضاء ياحلووين
لا تضغطون على البنيه..شكلها عندها جامعه
فلازم توفق بين دراستها واهلها..وان شااء الله جريب تنزل البارت اليديد
good luck sis :marsa112:

طواشوة

©§¤°shory¤§©¤

25-03-2005, 04:52 PM

خيتوووووو وين الاجزاااء ابطيتيى علينا

بدرةالبحرين

31-03-2005, 02:23 AM

السموحه على التأخير بس الجهاز كان خربان .. الحين بانزل لكم جزئين وان شاء الله يعجبونكم

بدرةالبحرين

31-03-2005, 02:25 AM

بدره البحرين

الله يعطيج العافيه اختييه :marsa70:
ماشااء الله اسلوبج وايد حلوو في كتابه القصه
الصراحه عشت اجوائها..واحس عمري اتابع تحركات الاشخاص بس من زاويه بعيده
حليلها ساره..حرام ما سوت شي..لا يكون بدر بيحرمها من كل شي حراااك
كل شي ولا سارونه :(:(

ونترياا اليديد :marsa63:
..
يا اعضاء ياحلووين
لا تضغطون على البنيه..شكلها عندها جامعه
فلازم توفق بين دراستها واهلها..وان شااء الله جريب تنزل البارت اليديد
good luck sis :marsa112:

طواشوة

مشكووووره اختي على ردج الحلووو وتشجيعج ...

والسموحه على التأخير وكاني بنزل لكم جزء الحين :marsa177:

بدرةالبحرين

31-03-2005, 02:37 AM

الجزء الخامس

نورة ودموعها على خدها : لاتقول عني هلون

بدر مارد عليها بس عطاها نظره احتقار ومشى عنها

اهني نورة احترقت ازيد .. ليش بدر يعاملها جذي ؟ ليش دايما يتعمد يعور قلبها .. اهي ماسوت شئ غلط .. ليش مايصدقها ؟ وراحت نورة الحمام عشان تغسل ويها

بدر كان يحترق ازيد منها .. مايدري ليش هالبنت بالذات تخليه يحس بالغيره تحرقه .. مايدري ليش .. يعني لو كانت ساره او فاطمه كان ممكن يسئلهم اول شئ .. الا نورة يموووووت لين يشوف احد يطالعها .. ممكن اتكون غيره طبيعيه ؟ لانها بنت خالته وبنت عمه .. ويمكن لا ؟ بس اهو يفضل التفسير الاولي

بدر من كثر ماتنرفز ماراح حق ربعه .. رد سيارته لانه وايد تضايق .. مسكينه نورة شنو ذنبها جذي صارخ عليها وقط عليها كلام قوي .. بدر كان متوهق .. اهو مو من النوع اللي يقدر يعبر عن مشاعره .. مايقدر يعتذر يحس ان هالشئ انتقاص من كرامته .. بس الله يهديها نوره وايد دلوعه ! اذا حصل فرصه بيحاول ان يعتذر منها

نورة ردت قعدت عند ساره بس كانت ساكته وعيونها منفخه .. ساره كانت تتفحصها بأستغراب

ساره بنظرة شك : نورة شفيج ؟
نورة تفر راسها عشان تغير السالفه : لا ولا شئ .. طلبتي ؟
ساره تحط يدها على يد نورة : نورة حبيبتي .. شفيج ؟
نورة والدموع برقت في عينها : بدر شافيني واقفه ويا ريال و هزئني !
ساره بأستغراب : اي ريال ؟ وبدر شيسوي هني ؟
نورة : ريال كان يسئلني عن محل .. وشدراني فيه بدر
ساره واهي تعطي نورة الكلينكس : زين هاج .. بس خلاص لاتعورين قلبج .. لو ماكنتي عزيزه عليه جان ما زفج وماخاف عليج .. انتي تدرين حالج من حالنا
نورة : بس
ساره تقاطعها : لا بس ولا شئ .. خلاص يالله ترى تلوعين الجبد وانتي زعلانه
نورة واهي تحاول تبتسم : جذي زين ؟
ساره : اي زييييين انتي جذي اوكي

وقعدو يتعشون بس نورة بعدها حاطه في خالطرها على بدر ..

في بيت بو بدر .. منيره وصلت واهي شايله سلمان اللي كان راقد .. وفاطمه كانت في الصاله تشوف التلفزيون ..

منيره : السلام عليكم
فاطمه : وعليكم السلام .. ها يمه شنو يبتي لي ؟
منيره : الله اكبر عليج .. شتبيني اييب لج ؟
فاطمه يزعم تتدلع : وشلون ماتيبين لي شئ وانا بنتج حبيبتج ؟
منيره واهي تضحك : يالله بلا كلام زايد .. قومي جدامي فوق روحي رقدي باجر عندج نادي من الصبح
فاطمه واهي تصك التلفزيون : ان شاء الله يمه ..
منيره : ساره وينهي ؟ اتصل تلفونها لا يمكن ؟
فاطمه : ساره من مساعه راقده .. يالله تصبحين على خير
منيره : وانتي من اهل الخير حبيبتي ..

وراحت منيره فوق تودي سلمان غرفته .. وفي طريجها دشت غرفة ساره لحفتها عدل وباستها على خدها وطلعت تشوف بدر .. لقته في غرفته يقرا قرآن .. صكت الباب وراحت غرفتها تشوف تلفزيون لي ما يوصل بو بدر

في بيت بو محمد الاجواء كانت وايد هاديه ..

محمد في غرفته قاعد على النت كالعاده .. و نورة في الصاله تقرا قصه .. وهند في غرفتها تحاول انها ترقد بس بدون فايده

وانتهى هاليوم المتعب بالنسبه للكل .. وارتاحو من صخب النهار فيه ..

يوم الخميس الساعه 11 الصبح .. الكل قاعد في بيت بو بدر .. متيمعين على الطاوله يتريقون

بو بدر : فطوم جنج تأخرتي على النادي ؟
فاطمه بملل : يبه والله ذبحتوني .. مايسوى علي هالجم كيلو الي زدتهم
بدر واهو ياكل الكرواسون : محد قالج تربين كرشه
فاطمه بعصبيه : وانت محد قال لك تربي راس
بدر : ها ها ها سخيفه
منيره : حسبي الله عليكم .. وانتو من تقعدون تتذابحون .. سكتو شوي من الصبح
ساره : فطوم قومي بوصلج في طريجي
بو بدر : ليش انتي وين رايحه ؟
ساره : باروح الصالون يبه اليوم عرس رفيجتي .. مخبره امي انا
منيره : بس وايد من وقت ساعه 11 ؟
ساره : لا يمه انا بوصل فطوم النادي وبعدين باروح اخذ لي جم شغله في الطريج ..
منيره : والغدى ؟
ساره : بتغدى يمه اي شئ
منيره بتأفف : والله ذبحتكم هالمطاعم .. والله مو زين
بو بدر : بعدين بتصيرين نفس ام كرش فطوم
فاطمة بزعل : يبه والله حرام عليك
الكل :هاهاهاهاها

الساعه 11:30 وصلت ساره اختها النادي .. وراحت ويا نورة عشان تشتري شوية اغراض من المجمع وتغدو ومن بعدها راحو الصالون

بدر ومحمد كانو قاعدين في صالة بيت بو محمد يلعبون بلاي ستيشن
بدر : افااااااا
محمد : قلت لك ماتقدر علي
بدر : بس بس مابي العب
محمد : اي اكيد ماتبي ههههههههه
بدر يغير السالفه : وين بيتكم ؟ ( كان يقصد نورة )
محمد : شدراني .. جايفني ناني ؟
بدر : ذبحتنا ويا هالناني .. مايسوى علينا كبرتك
محمد : والله الوالد والوالده رايحين السوق .. هندو فوق ونورو ويا ساره
بدر: اهاا .. زين قوم ناد هند تقعد ويانا .. من زمان ماشفتها
محمد : خلها بروحها ممله
بدر : قلت لك قم لا اهفك بكف
محمد : ترا وايد تحن انت .. مره ثانيه اقعد في بيتكم

وعقب دقايق نزلت هند .. وسلمت على بدر وقعدو يسولفون
هند ومحمد وايد كلوز ويا بعض .. هند تعتبر بدر اخوها وصديقها اللي ترتاح له علاقتهم وايد قويه .. وبدر وايد يحب هند لانها مثال للبنت الرزينه والعاقل .. وطبعا محمد لاحظ ان هند مو طبيعيه بس فضل ان مايسئلها الحين جدام اخوها .. يمكن ماتبي تقول

المغرب البنات كانو في بيت بو محمد جاهزين بس باقي احد يوصلهم العرس لانهم بيتأخرون ومايقدرون يروحون بروحهم

ساره حطت ميك اب اسود ووردي لامع .. و حطو لها بلاش وردي ناعم وكانت وايد وايد حلوووووه .. وشعرها الطويل كان مفلول ويتحرك مع كل حركه

نورة كانت بعد حلوه .. حطو لها ميك اب فيروزي بسيط وكان وايد حلو عليها .. وشعرها سوته مموج وكان محليها ازيد

ساره : عطشانه وايد
نورة : زين روحي شربي ماي
ساره : لا اخاف في احد مالي بارض البس دفه.. روحي انتي
نورة : مافي احد روحي
ساره بخوف : اكيد ؟
نورة : اي اكيدين روحي

ساره طلعت من الغرفه ونزلت الصاله وبسرعه خذت قلاص ماي وشربته وبسرعه ركضت عشان ترد الغرفه .. بس في الطريج صار شئ ما كانت تتوقعه .. حست انها اصطدمت بشئ وطاحت على الارض !

بطلت عيونها شافت محمد جدامها وكان مبهت و متفاجئ .. ساره التوت ريلها ماكانت قادره تقوم .. محمد ماكان يدري شنو يسوي .. حاول ان يطلع من المطبخ بس المشكله ساره متعوره !

تابعوني في الجزء الياي .. ان شاء الله باجر

فراشة النور

06-04-2005, 03:08 PM

السلام عليكم
واااااااااااااااااااااااااااااااااااااااو واخيرا جزء جديد مسكورة مشكورة عليه
نورة:مسكينة تعور لفاد كسرت خاطري
بدر:شكله يحب نورة
محمد: الي انا احسه ناحيتها انه بحيب سارونه
سارة:احلىىىىىىىىىىىىىىىىىىى شخصية حبوبة مره مره وظريفة بس شكلها هيه بعد بتحب محمد المهم دولين لثنين بصير فيهم شي

وشكرا

شوق العيون

24-04-2005, 08:32 PM

يلا حبيبتي كملي الجزء القصة مره حلوه

©§¤°shory¤§©¤

31-05-2005, 06:03 PM

اهيء اهيء وين الجزء ابطيتي علينا

لحن الحياة

23-06-2005, 12:46 AM

قوة بدرةالبحرين

وينش؟؟

ليش كل هذا التأخير؟؟

عسى المانع خير ان شاء الله؟؟

ننتظرش على أحر من الجمر

اختك\ لحن الحياة

ريناد الربيع

10-07-2005, 04:30 AM

السلام عليكم
الغلا
نترياج الغلا لاتطولين علينا في الجزء

هجورة

18-07-2005, 08:28 AM

وين الجزء

انتظرج

لوتي

08-05-2006, 08:43 PM

بدرة البحرين قصتك رووووعة كمليها بسررررررررررررعة

.................................................. ...........

لوتي

31-05-2006, 03:58 PM

كملييييييييييييييييييييييييي

بلييييييييييييييييييييييييييييييييييز

نيكول كيدمان

08-06-2006, 03:09 PM

بليز كملي القصة اندمجنا فيها :marsa128:

بنت البلاد

15-06-2006, 08:28 PM

عذراً
سيتم إغلاق القصة لحين ظهور صاحبتها لإكمالها
لأنه مر اكثر من سنة على القصه دون تكملة

وهذا يخالف قوانين القسم

الإدارة
بنت البلاد

بنوته

25-07-2006, 11:33 PM

القصة وايد حلوه
وندمجة فيها أتري التكملة

:marsa194: